جی ہاں۔ پاک کلام چ ایس گل دے پکے ثبوت پائے جاندے نیں کہ خدا موجود اے۔ پاک کلام چ ساڈا حوصلہ ودھا گیا اے کہ اَسی اَکھاں بند کر کے خدا تے ایمان نہ رکھئے سگوں اپنی سوچن سمجھن دی صلاحیت نُوں چنگی طرحاں استمال کر کے خدا تے ایمان لیایئے۔ (‏رومیوں 12:‏1؛‏ 1-‏یوحنا 5:‏20‏)‏ پاک کلام وچوں کجھ دلیلاں تے غور کرو جنہاں توں ثابت ہوندا اے کہ خدا واقعی موجود اے۔‏

•   کائنات دا نظام جیس منظم طریقے نال چل رہیا اے تے زمین تے زندگی جیس طریقے نال چل رہی اے اوہدے توں پتہ چلدا اے کہ کوئی خالق ضرور ہے وے۔ پاک کلام چ دَسیا گیا اے کہ ظاہری گل اے کہ ہر گھر نُوں کسے نے بنایا اے پر ساریاں شیواں خدا نے بنائیاں نیں۔ (‏عبرانیوں 3:‏4‏)‏ ایہہ دلیل بھانویں کہ بڑی سادہ اے پر بوہت سارے پڑھے لکھے لوک وی ایہنوں بڑی پکی دلیل سمجھدے نیں۔‏ a

•   عام طور تے سارے انساناں چ ایہہ جانن دی خواہش ہوندی اے کہ اوہناں دی زندگی دا مقصد کیہہ اے۔ شاید ساڈیاں جسمانی لوڑاں تے پوریاں ہو رہیاں نیں پر جدوں تک سانوں اپنی زندگی دا مقصد پتہ نئیں چل جاندا، اَسی بے چین رہنے آں۔ اصل چ ساڈی ایس خواہش دا تعلق پاک کلام چ لکھی ایس گل نال اے کہ سانوں خدا دی رہنمائی دی لوڑ اے۔ (‏متی 5:‏3‏)‏ ساڈے اندر قدرتی طور تے ایہہ خواہش اے کہ اَسی خدا نُوں جانیے تے اوہدی عبادت کریئے۔ (‏مکاشفہ 4:‏11‏)‏ ایہدے توں نہ صرف ایس گل دا ثبوت مِلدا اے کہ خدا دا وجود ہے وے سگوں ایہہ وی ظاہر ہوندا اے کہ اوہ محبت کرن والا اے تے اوہ چاہندا اے کہ اَسی اوہنوں جانیے تے اوہدی عبادت کریئے۔—‏متی 4:‏4‏۔‏

•   بوہت سارے واقعے ہون توں کئی صدیاں پہلاں ای بائبل چ ایہناں بارے پیشین‌گوئیاں کر دِتیاں گیاں سن۔ ایہناں پیشین‌گوئیاں دی ہر گل اونویں ای پوری ہوئی جیویں ایہناں چ دَسیا گیا سی۔ ایہہ ایس گل دا صاف ثبوت اے کہ ایہہ پیشین‌گوئیاں کسے ایہو جیہی ہستی نے کیتیاں سن جیہڑی انساناں توں بوہت زیادہ طاقت‌ور اے۔—‏2-‏پطرس 1:‏21‏۔‏

•   بائبل لکھن والیاں نے ایہو جہیاں سائنسی گلاں لکھیاں جیہڑیاں اوہناں دے زمانے دے لوکاں دی سمجھ توں باہر سن۔ مثال دے طور تے پرانے زمانے دے بوہت سارے لوک ایہہ من دے سن کہ زمین کسے جانور جیویں کہ ہاتھی، سؤر یاں کسے طاقت‌ور ٹگھے اُتے ٹکی ہوئی اے۔ پر ایہدی بجائے بائبل چ دَسیا گیا اے کہ خدا زمین نُوں خلا چ لمکاندا اے۔ (‏ایوب 26:‏7‏)‏ ایہدے علاوہ بائبل چ زمین دی صحی شکل بارے دَسیا گیا اے۔ ایہنوں ”‏کُرۂ‌ارض“‏ کہیا گیا اے جدا مطلب اے کہ ایہدی شکل گیند وانگوں اے۔ (‏یسعیاہ 40:‏22‏، کیتھولک ترجمہ‏)‏ بوہت سارے لوکاں دا خیال اے کہ بائبل لکھن والیاں کول اینی جدید معلومات ہونا ایس گل دا ثبوت اے کہ ایہہ معلومات اوہناں نُوں خدا وَلّوں ملیاں سن۔‏

•   بائبل چ بوہت سارے اوکھے سوالاں دے جواب دِتے گئے نیں۔ ایہہ ایہو جہے سوال نیں جنہاں دے تسلی‌بخش جواب نہ مِلن دی وجہ توں اِک بندہ خدا دے وجود تے ایمان رکھنا چھڈ دیندا اے۔ ایہناں وچوں کجھ ایہو جہے سوال ہو سکدے نیں:‏ جے خدا ساڈے نال پیار کردا اے تے بے اِنتہا طاقت دا مالک اے تے فیر دُنیا چ اینی بُرائی تے مصیبتاں کیوں نیں؟ مذہب دے ناں تے اینے بھیڑے کم کیوں کیتے جاندے نیں؟—‏طِطُس 1:‏16‏۔‏