یسوع نے اپنی جان ایس لئی قربان کیتی تاکہ انساناں نُوں اوہناں دے گُناہواں توں معافی تے ہمیشاں دی زندگی حاصل کرن دا موقع مِل سکے۔ (‏رومیوں 6:‏23؛‏ اِفسیوں 1:‏7‏)‏ یسوع دی قربانی توں ایہہ ثابت ہویا کہ انسان مشکل توں مشکل ویلے چ وی یہوواہ دے وفادار رہ سکدے نیں۔—‏عبرانیوں 4:‏15‏۔‏

 غور کرو کہ اِک انسان دی قربانی دی وجہ توں ایہہ سب کجھ کیویں ممکن ہو سکدا اے۔‏

1.   یسوع مسیح نے اپنی جان ایس لئی قربان کیتی تاکہ سانوں گُناہواں توں معافی ملے۔‏‏—‏کُلسّیوں 1:‏14‏۔‏

    جدوں پہلے انسان آدم نُوں بنایا گیا تے اوہ بے‌عیب سی، یعنی گُناہ توں پاک سی۔ پر فیر اوہنے خدا دی نافرمانی کیتی تے اوہدے ایس گُناہ دا اثر اوہدی ساری اولاد تے ہویا۔ پاک کلام چ دَسیا گیا اے:‏ اِک آدمی دی نافرمانی دی وجہ توں بوہت سارے لوکاں نُوں گُناہ‌گار ٹھہرایا گیا۔—‏رومیوں 5:‏19‏۔‏

    آدم وانگوں یسوع وی بے‌عیب سی، پر اوہنے کدی کوئی گُناہ نئیں کیتا۔ ایس لئی ’‏اوہ ساڈے گُناہواں دی خاطر اپنی قربانی دے سکدا سی۔‘‏ (‏1-‏یوحنا 2:‏2‏)‏ آدم دی نافرمانی دی وجہ توں سارے انسان گُناہ‌گار بن گئے، پر یسوع دی قربانی دی وجہ توں اوہناں سارے انساناں دے گُناہ مٹ گئے جیہڑے اوہدے تے ایمان لیاندے نیں۔‏

    اِک لحاظ نال آدم نے سارے انساناں نُوں گُناہ دا غلام بنن لئی ویچ دِتا۔ پر یسوع مسیح نے خوشی خوشی ساڈے لئی اپنی جان قربان کر کے سانوں خرید لیا۔ ایس لئی ”‏جے کسے کولوں کوئی گُناہ ہو وی جائے تے باپ کول ساڈا اِک مددگار اے یعنی یسوع مسیح جیہڑا نیک اے۔“‏—‏1-‏یوحنا 2:‏1‏۔‏

2.   یسوع مسیح نے اپنی جان ایس لئی قربان کیتی”‏ تاکہ جیہڑا وی اوہدے تے ایمان ظاہر کرے، اوہ ہلاک نہ ہوئے سگوں ہمیشاں دی زندگی پائے۔“‏‏—‏یوحنا 3:‏16‏۔‏

    بھانویں کہ آدم نُوں ہمیشاں تک زندہ رہن لئی بنایا گیا سی، پر گُناہ کرن دی وجہ توں اوہنوں موت دی سزا ملی۔ پر ایہہ سزا صرف اوہنوں ای نئیں ملی سگوں پاک کلام چ لکھیا اے کہ اوہدے ذریعے گُناہ دُنیا چ آیا تے گُناہ دے ذریعے موت آئی تے موت سارے انساناں چ پھیل گئی کیونکہ ساریاں نے گُناہ کیتا۔—‏رومیوں 5:‏12‏۔

    پر یسوع مسیح دی قربانی دی وجہ توں نہ صرف انساناں دے گُناہ مٹ گئے سگوں ایہدے ذریعے اوہناں سارے لوکاں نُوں موت دی سزا توں وی چھٹکارا مِلیا جیہڑے اوہدے تے ایمان لیاندے نیں۔ پاک کلام چ ایس گل نُوں اِنج بیان کیتا گیا اے:‏ جیویں گُناہ نے موت نال حکمرانی کیتی، اونویں رحمت وی حکمرانی کرے گی تاکہ ساڈے مالک یسوع مسیح دے ذریعے سانوں نیک قرار دِتا جائے تے ہمیشاں دی زندگی دِتی جائے۔—‏رومیوں 5:‏21‏۔‏

    ایہہ سچ اے کہ اَج انساناں دی عمر لمی نئیں ہوندی۔ پر خدا نے وعدہ کیتا اے کہ اوہ وفادار انساناں نُوں ہمیشاں دی زندگی دَوے گا تے مُردیاں نُوں زندہ کر دَوے گا تاکہ اوہ وی یسوع مسیح دی قربانی توں فائدہ حاصل کر سکن۔—‏زبور 37:‏29؛‏ 1-‏کُرنتھیوں 15:‏22‏۔‏

3.   یسوع مسیح موت دا سامنا کردے ویلے وی فرمانبردار رہیا تے اِنج اوہنے ثابت کیتا کہ انسان مشکل توں مشکل ویلے چ وی خدا دا وفادار رہ سکدا اے‏۔—‏فِلپّیوں 2:‏8‏۔‏

    بھانویں کہ آدم دا جسم تے سوچ ہر طرحاں دے نُقص تے عیب توں پاک سی، پر فیر وی اوہنے خدا دی نافرمانی کیتی۔ اوہنے اِک ایہو جہی چیز دا لالچ کیتا جدے تے اوہدا کوئی حق نئیں سی۔ (‏پیدایش 2:‏16، 17؛‏ 3:‏6‏)‏ بعد چوں خدا دے سب توں وڈے دُشمن شیطان نے دعویٰ کیتا کہ کوئی وی انسان بغیر کسے لالچ توں خدا دا فرمانبردار نئیں رہوے گا، خاص کر اوہدوں جدوں اوہدی جان خطرے چ ہوئے گی۔ (‏ایوب 2:‏4‏)‏ پر یسوع مسیح اوس ویلے وی خدا دا فرمانبردار تے وفادار رہیا جدوں اوہنوں شرم‌ناک تے تکلیف دہ موت سہنی پئی۔ (‏عبرانیوں 7:‏26‏)‏ اوہدی موت دے ذریعے شیطان دے ایس دعوے دا جواب مِل گیا، یعنی ایہہ کہ اِک انسان تے بھانویں جِنّی وی وڈی مشکل آ جائے اوہ خدا دا وفادار رہ سکدا اے۔‏

یسوع مسیح دی موت بارے کجھ سوال

•   انساناں نُوں موت دی سزا توں نجات دوان لئی یسوع نُوں تکلیف کیوں سہنی پئی تے مرنا کیوں پیا؟ خدا نے ایس سزا نُوں ختم کیوں نئیں کر دِتا؟‏

   خدا دی شریعت چ دَسیا گیا اے کہ گُناہ دی مزدوری موت اے۔ (‏رومیوں 6:‏23‏)‏ تے ایہی گل اوہنے آدم نُوں صاف صاف دَس دِتی سی کہ جے اوہ نافرمانی کرے گا تے اوہنوں موت دی سزا ملے گی۔ (‏پیدایش 3:‏3‏)‏ ایس لئی جدوں آدم نے گُناہ کیتا تے خدا اپنی گل تے قائم رہیا کیونکہ اوہ ”‏جھوٹھ نئیں بول سکدا۔“‏ (‏طِطُس 1:‏2‏)‏ آدم نے اپنی اولاد نُوں ورثے چ نہ صرف گُناہ دِتا سگوں گُناہ دی مزدوری موت وی دِتی۔‏

   بھانویں کہ گُناہ‌گار ہون دی وجہ توں انسان موت دی سزا دے لائق نیں، پر فیر وی خدا نے اوہناں لئی بڑی ”‏عظیم رحمت“‏ ظاہر کیتی اے۔ (‏اِفسیوں 1:‏7‏)‏ اوہنے اپنے پُتر نُوں گھلیا تاکہ اوہ انساناں نُوں گُناہ تے موت توں نجات دوان لئی اپنی بے‌عیب جان قربان کرے۔ ایس بندوبست توں صاف نظر آندا اے کہ خدا کِنّاں انصاف پسند تے رحم کرن والا اے۔‏

•   یسوع کدوں فوت ہویا؟‏

   یسوع یہودیاں دی عیدِفسح والے دن دوپہر دے تقریباً تِن وجے فوت ہویا۔ (‏مرقس 15:‏33-‏37‏)‏ اَج دے کیلنڈر دے مطابق ایہہ تاریخ جمعہ 1 اپریل 33 عیسوی اے۔‏

•   یسوع کتھے فوت ہویا؟‏

   یسوع نُوں اوس جگہ سُولی دِتی گئی جنہوں ”‏کھوپڑی“‏ کہیا جاندا اے تے عبرانی چ اوہدا ناں ”‏گلگتا“‏ اے۔ (‏یوحنا 19:‏17، 18‏)‏ یسوع دے زمانے چ ایہہ جگہ شہر یروشلم توں باہر سی۔ (‏عبرانیوں 13:‏12‏)‏ ہوسکدا اے کہ ایہہ جگہ اِک پہاڑ تے سی کیونکہ پاک کلام چ لکھیا اے کہ جدوں یسوع نُوں سُولی دِتی جا رہی سی تے کجھ لوک اوہنوں دُوروں ویکھ رہے سن۔ (‏مرقس 15:‏40‏)‏ پر ایہہ گل یقین نال نئیں کہی جا سکدی کہ اَج گلگتا کیہڑی جگہ تے وے۔‏

•   یسوع نُوں کیویں ماریا گیا؟‏

   بوہت سارے لوک من دے نیں کہ یسوع نُوں صلیب تے چڑھا کے ماریا گیا پر پاک کلام چ دَسیا گیا اے:‏ اوہ ساڈے گُناہواں نُوں اپنے جسم چ درخت تے لے گیا۔ (‏1-‏پطرس 2:‏24‏،‏کنک جیمز ورشن‏)‏ جیہڑی چیز تے یسوع نُوں ماریا گیا سی اوہدے لئی یونانی چ دو لفظ استمال ہوئے نیں:‏ ستاؤرس تے کسیلون۔ بوہت سارے عالم ایس نتیجے تے پونچے نیں کہ ایہہ دونویں یونانی لفظ اِک سِدھی بَلّی یاں کھمبے وَل اشارہ کردے نیں جیہڑا لکڑ دے صرف اِک ٹکڑے دا بنیا ہوئے۔‏

•   سانوں یسوع دی موت نُوں کیویں یاد کرنا چاہی دا اے؟‏

   اپنی موت توں پہلاں جدوں یسوع مسیح نے اپنے شاگرداں دے نال فسح دی عید منائی تے ایس رات اوہنے اِک ہور سادی جہی تقریب وی منائی تے اپنے شاگرداں نُوں ایہہ حکم وی دِتا:‏ میری یاد چ ایسے طرحاں کریا کرو۔ (‏1-‏کُرنتھیوں 11:‏24‏)‏ ایہدے کجھ گھنٹیاں بعد یسوع مسیح نُوں مار دِتا گیا۔‏

   پاک کلام نُوں لکھن والیاں نے دَسیا کہ یسوع مسیح اِک ایہو جہے میمنے وانگوں اے جنہوں فسح دی عید تے قربان کیتا جاندا سی۔ (‏1-‏کُرنتھیوں 5:‏7‏)‏ فسح دی عید یہودیاں نُوں ایہہ یاد دَواندی سی کہ اوہ غلامی توں آزاد ہو گئے نیں۔ ایسے طرحاں جدوں مسیحی یسوع مسیح دی موت دی یاد گیری مناندے نیں تے ایہہ دن اوہناں نُوں ایہہ یاد دَواندا اے کہ اوہناں نُوں گُناہ تے موت توں آزادی مل گئی اے۔‏

   ہر سال اَج دے کیلنڈر دی جیہڑی تاریخ 14 نیسان نُوں آندی اے، اوس تاریخ تے پوری دُنیا چ لکھاں لوک یسوع مسیح دی موت دی یاد گیری مناندے نیں۔‏