امریکہ چ بیماریاں توں بچن تے اوہناں تے قابو پان لئی کم کرن والے اِک اِدارے نے 15 توں 19 سالاں دے کجھ نوجواناں دا اِنٹرویو لیا۔ ایہدے توں ایہہ پتہ چلیا کہ اوہناں وچوں اَدھے نوجوان موُنہہ دے ذریعے جنسی عمل a کرن چ شامل سن۔ ایس موضوع بارے کتاب لکھن والی اِک عورت شارلین اعظم نے کہیا:‏ ”‏جے تُسی نوجواناں نُوں ایس بارے پچھو تے اوہ کہندے نیں کہ موُنہہ دے ذریعے جنسی عمل کرنا کوئی وڈی گل نئیں۔ اوہناں دے خیال چ ایہہ جنسی عمل ہے ای نئیں۔“‏

•  تُسی ایہدے بارے کیہہ سوچدے او؟‏

•  ایہدے بارے سچائی کیہہ اے؟‏

•  ایہہ معاملہ ایناں اہم کیوں اے؟‏

 ایہناں سوالاں دا ہاں یاں ناں چ جواب دَوو۔‏

1.   کیہہ موُنہہ دے ذریعے جنسی عمل کرن نال کوئی کُڑی حاملہ ہو سکدی اے؟‏

   1.  الف.‏ ہاں

   2.  ب.‏ نئیں

2.   کیہہ موُنہہ دے ذریعے جنسی عمل کرن نال کوئی بیماری لگ سکدی اے؟‏

   1.  الف.‏ ہاں

   2.  ب.‏ نئیں

3.   کیہہ موُنہہ دے ذریعے جنسی عمل واقعی سیکس کرنا ہوندا اے؟‏

   1.  الف.‏ ہاں

   2.  ب.‏ نئیں

 غور کرو کہ ایہناں سوالاں دے صحی جواب کیہہ نیں۔‏

1.   کیہہ موُنہہ دے ذریعے جنسی عمل کرن نال کوئی کُڑی حاملہ ہو سکدی اے؟‏

    جواب:‏ نئیں۔ ایہہ اِک وجہ اے جدے توں لوکاں نُوں لگدا اے کہ موُنہہ نال جنسی عمل کرن دا کوئی نقصان نئیں۔‏

2.   کیہہ موُنہہ دے ذریعے جنسی عمل کرن نال کوئی بیماری لگ سکدی اے؟‏

    جواب:‏ ہاں۔ موُنہہ دے ذریعے جنسی عمل کرن والے لوکاں نُوں کئی بیماریاں لگ سکدیاں نیں جیویں کہ ہیپاٹائٹس (‏اے، بی)‏، سوزاک، ایڈز، آتشک، جنسی اعضا تے دانے وغیرہ۔‏

3.   کیہہ موُنہہ دے ذریعے جنسی عمل واقعی سیکس کرنا ہوندا اے؟‏

    جواب:‏ ہاں۔ کوئی وی ایہو جیہا عمل جدے چ کسے دُوجے انسان دے جنسی اعضا شامل ہون اوہ سیکس کرنا ای ہوندا اے جیویں کہ موُنہہ دے ذریعے جنسی عمل کرنا، مقعد یعنی پاخانہ کرن دی جگہ دے ذریعے جنسی عمل کرنا تے کسے دُوجے انسان دے جنسی اعضا نال چھیڑچھاڑ کرنا۔‏

 بائبل دِیاں کجھ ایتاں تے غور کرو جیہڑیاں ایس معاملے تے لاگو ہوندیاں نیں۔‏

 بائبل چ لکھیا اے:‏ خدا دی مرضی ایہہ وے کہ تُسی حرام‌کاری توں دُور رہوو۔—‏1-‏تھسلُنیکیوں 4:‏3‏۔‏

 بائبل چ جیس لفظ دا ترجمہ حرام‌کاری کیتا گیا اے اوہدے چ بغیر شادی دے ہون والا ہر قسم دا جنسی عمل شامل اے جیویں کہ موُنہہ دے ذریعے جنسی عمل، مقعد یعنی پاخانہ کرن دی جگہ دے ذریعے جنسی عمل تے دُوجے بندے دے جنسی اعضا نال چھیڑچھاڑ کرنا وغیرہ۔ جیہڑا بندہ حرام‌کاری کردا اے اوہنوں بڑے بھیڑے نتیجے بُھگتنے پیندے نیں۔ سب توں وڈا نقصان ایہہ ہوندا اے کہ خدا نال اوہدا رشتہ ختم ہو جاندا اے۔—‏1-‏پطرس 3:‏12‏۔‏

 بائبل چ لکھیا اے:‏ جیہڑا بندہ حرام‌کاری کردا اے اوہ اپنے ای جسم دے خلاف گُناہ کردا اے۔—‏1-‏کُرنتھیوں 6:‏18‏۔‏

 موُنہہ دے ذریعے جنسی عمل کرن نال نہ صرف بیماریاں لگ جاندیاں نیں سگوں خدا نال دوستی وی خراب ہو جاندی اے۔ ایہدے نال نال بڑی شرمندگی وی چکنی پے سکدی اے۔ بچیاں نال جنسی معاملیاں تے گل بات کرن بارے اِک کتاب چ لکھیا اے:‏ ”‏ایہو جہے گندے کم کرن والیاں نُوں بعد چ پچھتاوا ہوندا اے۔ اوہ محسوس کردے نیں کہ اوہناں نُوں استمال کیتا گیا اے تے کوئی وی اوہناں نال کجھ وی کر سکدا اے۔ جیہڑی شرمندگی ناجائز جنسی تعلق قائم کرن توں بعد محسوس ہوندی اے اوہ ہر قسم دے غلط جنسی عمل کرن توں بعد وی محسوس ہو سکدی اے۔“‏

 بائبل چ لکھیا اے:‏ میں ای یہوواہ تیرا خدا واں جیہڑا تینوں تیرے فائدے لئی تلیم دینا واں۔—‏یسعیاہ 48:‏17‏۔‏

 کیہہ توانوں لگدا اے کہ جنسی تعلق رکھن بارے خدا دے قانون توں توانوں فائدہ ہووے گا؟ یاں توانوں محسوس ہوندا اے کہ ایہناں دے ذریعے تواڈے اُتے کسے قسم دی پابندی لا دِتی گئی اے؟ ایس سوال دا جواب حاصل کرن لئی ذرا اِک مثال تے غور کرو۔ اِک سڑک بارے سوچو جدے توں بوہت ساریاں گڈیاں لنگھ دِیاں نیں۔ اوہدے تے ٹریفک سگنل تے گڈی دی رفتار بارے سائن‌بورڈ وی لگے نیں۔ تواڈے خیال چ اوہ سگنل تے سائن‌بورڈ پابندی لئی لائے گئے نیں یاں حفاظت لئی؟ جے تُسی تے دُوجے گڈی چلان والے اوہناں اُتے دھیان نئیں دَوو گے تے کیہہ ہوئے گا؟‏

 ایہی گل خدا دے معیاراں بارے وی سچ اے۔ جے تُسی اوہناں اُتے دھیان نئیں دَوو گے تے توانوں بڑا نقصان چُکنا پووے گا۔ (‏گلتیوں 6:‏7‏)‏ جنسی معاملیاں بارے اِک کتاب چ دَسیا گیا اے:‏”‏ جِنّاں زیادہ تُسی ایہو جہے کم کرو گے جیہڑے تواڈے عقیدیاں تے معیاراں دے خلاف نیں اوناں ای زیادہ تُسی اپنیاں نظراں چ ڈِگ جاؤ گے۔“‏ پر جے تُسی خدا دے معیاراں دے مطابق زندگی گزارو گے تے تُسی ظاہر کرو گے کہ تواڈا چال‌چلن پاک اے۔ ایہدے علاوہ تواڈا ضمیر وی صاف رہوے گا۔—‏1-‏پطرس 3:‏16‏۔‏