کیہہ توانوں اپنی زندگی یہوواہ دے ناں کرن تے بپتسمہ لین توں ڈر لگدا اے؟ جے ایہہ گل اے تے ایہہ مضمون تواڈی مدد کرے گا تاکہ تُسی اپنے ڈر تے قابو پا سکو۔‏

ایس مضمون چ:‏

•  بپتسمہ لین توں بعد کِتے میرے کولوں کوئی وڈا گُناہ نہ ہو جائے

•  بپتسمہ لین توں بعد میرے سِر تے ذمے‌داریاں پے جان گیاں

•  مینوں ایہہ ڈر اے کہ مَیں تے یہوواہ دی خدمت کرن دے لائق ای نئیں آں

•  دُوجے نوجواناں دی رائے

 ایس ڈر دی وجہ:‏ شاید تُسی کسے ایہو جہے بندے نُوں جان دے او جنہوں کوئی وڈا گُناہ کرن دی وجہ توں کلیسیا چوں کڈھ دِتا گیا۔ (‏1-‏کُرنتھیوں 5:‏11-‏13‏)‏ ایس لئی ہو سکدا اے کہ تُسی پریشان ہووو کہ کِتے تواڈے نال وی اِنج نہ ہو جائے۔‏

 ‏”‏شروع شروع چ مینوں بپتسمہ لین توں ڈر لگدا سی کیونکہ مَیں سوچنی ساں کہ جے میرے کولوں کوئی وڈا گُناہ ہو گیا تے فیر کیہہ ہوئے گا۔ میرے امی‌ابو نُوں کِنّی شرمندگی ہوئے گی۔“‏—‏ربیقہ۔‏

 بائبل دا اصول:‏ بھیڑا بندہ اپنی راہ نُوں چھڈے۔ اوہ یہوواہ وَل مُڑے جیہڑا اوہدے تے رحم کرے گا، ہاں ساڈے خدا وَل کیونکہ اوہ کُھلے دل نال معاف کرے گا۔—‏یسعیاہ 55:‏7‏۔‏

 ذرا سوچو:‏ جیہڑے لوک اپنے گُناہ توں توبہ نئیں کردے، اوہناں نُوں کلیسیا چوں کڈھ دِتا جاندا اے۔ پر جیہڑے لوک خاکساری نال اپنے گُناہ توں توبہ کردے نیں تے اپنی غلطی نُوں ٹھیک کردے نیں، یہوواہ اوہناں تے رحم کردا اے۔—‏زبور 103:‏13، 14؛‏ 2-‏کُرنتھیوں 7:‏11‏۔‏

 ایہدے علاوہ ایس گل تے وی غور کرو:‏ خدا دی مدد نال تُسی غلط کم کرن دی اَزمیش دا مقابلہ کر سکدے او۔ (‏1-‏کُرنتھیوں 10:‏13‏)‏ ایہہ فیصلہ کسے ہور دے نئیں سگوں تواڈے ہتھ وچ اے کہ اَزمیش دے ویلے تُسی غلط کم کرو گے یاں نئیں۔‏

 ‏”‏مَیں بپتسمہ لین توں ایس لئی ڈرنی ساں کیونکہ مینوں لگدا سی کہ بپتسمہ لین توں بعد کِتے میرے کولوں کوئی وڈی غلطی نہ ہو جائے۔ پر فیر مَیں سوچیا کہ جے مَیں بپتسمہ نہ لیا تے اوہدوں وی تے میرے کولوں غلطیاں ہون گیاں۔ مَیں سمجھ گئی کہ مینوں کل بارے سوچ کے اَج بپتسمہ لین توں نئیں رُکنا چاہی دا۔“‏—‏کیرن۔‏

 اِک اہم گل:‏ یہوواہ دے بوہت سارے بندیاں وانگوں تُسی ایہو جہی صورتحال توں ای دُور رہن دا فیصلہ کر سکدے او جدے چ کوئی گُناہ ہون دا خطرہ ہوئے۔—‏فِلپّیوں 2:‏12‏۔‏

 ہور مدد لئی:‏ اُردو زبان چ ایس مضمون نُوں ویکھو:‏ ”‏آپ غلط خواہشات پر قابو پا سکتے ہیں!‏“‏

 ایس ڈر دی وجہ:‏ شاید تُسی ایہو جہے نوجواناں نُوں جان دے او جیہڑے یہوواہ دی ہور زیادہ خدمت کرن لئی اپنے گھر والیاں تے دوستاں توں دُور کسے ہور جگہ چلے گئے نیں۔ ایس لئی شاید تُسی پریشان ہووو کہ بپتسمہ لین توں بعد لوک تواڈے کولوں وی ایہی توقع کرن گے۔‏

 ‏”‏بپتسمہ یافتہ مسیحی یہوواہ دی خدمت چ بوہت کجھ کر سکدے نیں۔ پر شاید کجھ لوک اِنج کرن لئی تیار نہ ہون یاں شاید اوہناں دے حالات وی اوہناں نُوں ہور زیادہ خدمت کرن دی اجازت نہ دین۔“‏—‏میری۔‏

 بائبل دا اصول:‏ ہر بندہ اپنے کماں نُوں پرکھے۔ اِنج اوہنوں اپنے کماں دی وجہ توں خوشی ملے گی نہ کہ دُوجیاں نال اپنا مقابلہ کرن دی وجہ توں۔—‏گلتیوں 6:‏4‏۔‏

 ذرا سوچو:‏ اپنا مقابلہ دُوجیاں نال کرن دی بجائے مرقس 12:‏30 تے غور کرو جتھے لکھیا اے:‏”‏تُوں یہوواہ اپنے خدا نال اپنے سارے دل نال پیار کر۔“‏

 غور کرو کہ ایہناں ایتاں چ لکھیا اے کہ توانوں یہوواہ نُوں اپنے سارے دل نال پیار کرنا اے۔ ایتھے کسے ہور دے دل دا ذکر نئیں ہویا۔ جے تُسی یہوواہ نُوں دِلوں پیار کردے او تے تُسی اپنے حالاتاں مطابق بہترین طریقے نال اوہدی خدمت کرن دے طریقے لبھ لوو گے۔‏

 ‏”‏بپتسمہ اِک وڈی ذمے‌داری اے پر ایہہ کوئی بوجھ نئیں اے۔ جے تُسی چنگے دوست بناؤ گے تے اوہ ایس ذمے‌داری نُوں پورا کرن چ تواڈی مدد کرن گے۔ اِنج جیویں جیویں تُسی ذمے‌داریاں چکو گے، تواڈی خوشی ودھدی جائے گی۔ پر بپتسمہ نہ لے کے توانوں کوئی فائدہ نئیں ہوئے گا۔“‏—‏جولیا۔‏

 اِک اہم گل:‏ یہوواہ دے پیار لئی اپنے دل چ شکرگزاری پیدا کرو۔ اِنج تواڈے دل چ خواہش پیدا ہوئے گی کہ تُسی وی اوہدے پیار دے بدلے اوہدے لئی پیار وکھاؤ۔—‏1-‏یوحنا 4:‏19‏۔‏

  ایس ڈر دی وجہ:‏ یہوواہ ایس پوری کائنات دا حکمران اے۔ اوہدے مقابلے چ انسان کجھ وی نئیں۔ ایس لئی شاید تُسی سوچو:‏ ”‏کیہہ یہوواہ نُوں پتہ وی اے کہ مَیں ہے واں۔“‏

 ‏”‏میرے ماں پیو یہوواہ دے گواہ نیں۔ ایس لئی مَیں ایس گل دی وجہ تو ں پریشان ساں کہ یہوواہ نال میری دوستی اوہناں دی وجہ توں ہوئی اے نہ کہ ایس لئی کیونکہ یہوواہ نے آپ مینوں اپنے وَل کھچیا اے۔“‏—‏نیٹلی۔‏

 بائبل دا اصول:‏ ”‏کوئی وی انسان میرے کول نئیں آ سکدا جدوں تک باپ جنہے مینوں گھلیا اے اوہنوں میرے کول نہ لیائے۔“‏—‏یوحنا 6:‏44‏۔‏

 ذرا سوچو:‏ جے تُسی بپتسمے بارے سوچ رہے او تے فیر ایہدا مطلب اے کہ یہوواہ توانوں اپنے وَل کِھچ رہیا اے تاکہ اوہ تواڈے نال ہور گُوڑھی دوستی کر سکے۔ کیہہ تُسی وی اوہدے ہور نیڑے نئیں جانا چاہوو گے؟‏

 یاد رکھو کہ نہ تے تُسی تے نہ ای کوئی ہور سگوں صرف یہوواہ ایس گل دا فیصلہ کردا اے کہ اوہ اپنے وَل کنہوں کھچے گا۔تے اوہدے کلام چ سانوں ایس گل دا یقین دَوایا گیا اے کہ جے اَسی اوہدے نیڑے جانواں گے تے اوہ وی ساڈے نیڑے آئے گا۔—‏یعقوب 4:‏8‏۔‏

 ‏”‏تُسی یہوواہ نُوں جان دے او تے اوہنے توانوں اپنے وَل کھچیا اے۔ ایہہ ایس گل دا ثبوت اے کہ اوہ توانوں پیار کردا اے۔ ایس لئی جے تواڈے دل چ ایہہ گل آئے کہ تُسی اوہدی خدمت کرن دے لائق نئیں او تے فوراً سوچو کہ یہوواہ تواڈے بارے اِنج نئیں سوچدا تے اوہ کدی وی غلط نئیں ہوسکدا۔“‏—‏سیلینا۔‏

 اِک اہم گل:‏ جے تُسی اوہناں شرطاں تے پورا اُتردے او جیہڑیاں بپتسمہ لین لئی بائبل چ دِتیاں گئیاں نیں تے تُسی یہوواہ دی خدمت کرن دے وی لائق او۔ یاد رکھو کہ اوہ تواڈی عبادت دا حق‌دار اے۔—‏مُکاشفہ 4:‏11‏۔‏

 ہور مدد لئی:‏ ایس مضمون نُوں ویکھو:‏ ”‏مینوں دُعا کیوں کرنی چاہی دی اے؟‏‏“‏