بوہت سارے نوجوان کہندے نیں کہ اوہ دُعا کردے نیں۔ پر ایہناں چوں بس کجھ ای نوجوان روزانہ دُعا کردے نیں۔ بے‌شک کجھ نوجوان ایہہ سوچدے ہون گے :‏ ”‏کیہہ دُعا کرن نال صرف دلی سکون مِلدا اے ؟ یاں ایہدا کوئی ہور وی فائدہ ہوندا اے؟“‏

•  دُعا کیہہ اے؟‏

•  کیہہ خدا دُعاواں سُن دا اے؟‏

•  میں کیہڑیاں گلاں بارے دُعا کر سکنا واں؟‏

•  دُعا بارے دُوجے نوجواناں دا کیہہ خیال اے؟‏

 دُعا کرن دا مطلب خالق نال گل کرنا اے۔ ذرا سوچو کہ ایہہ کنہاں وڈا شرف اے!‏ یہوواہ خدا ہر لحاظ نال سارے انساناں توں اُچا اے پر فیر وی اوہ ساڈے چوں کسے توں دُور نئیں۔ (‏اعمال 17:‏27‏)‏ بائبل چ سانوں ایہہ خاص دعوت دِتی گئی اے کہ خدا دے نیڑے جاؤ تے اوہ تواڈے نیڑے آئے گا۔–‏ یعقوب 4:‏8‏۔‏

 تُسی خدا دے نیڑے کیویں جا سکدے اوہ؟‏

•   ایہدا اِک طریقہ دُعا کرنا اے۔ اِنج اَسی خدا نال گل کرنے آں۔‏

•   دُوجا طریقہ بائبل پڑھنا اے۔ اِنج خدا ساڈے نال گل کردا اے۔‏

 سو دُعا کرن تے بائبل پڑھن نال اَسی خدا نال مضبوط دوستی قائم کر سکنے آں۔‏

 ‏”‏اسمانی باپ یہوواہ نال گل کرنا انساناں لئی بڑا وڈا شرف اے۔“‏—‏جیرمی۔‏

 ‏”‏دُعا دے ذریعے یہوواہ نال اپنے دل دِیاں گلاں کر کے میں اپنے آپ نُوں اوہدے ہور نیڑے محسوس کرنی آں۔“‏–‏مرینڈا۔‏

 تُسی خدا تے ایمان رکھدے اوہ تے اوہدے کولوں دُعا وی کردے اوہ فیر وی ہو سکدا اے توانوں ایہہ گل مننا مشکل لگے کہ اوہ واقعی دُعاواں نُوں سن دا اے۔ بائبل چ یہوواہ نُوں دُعا دا سُنن والا کہیا گیا اے۔ (‏زبور 65:‏2‏)‏ خدا بائبل چ ایہہ وی کہندا اے کہ تُسی اپنیاں ساریاں پریشانیاں اوہدے تے سُٹ دَوو۔ اوہ اِنج کیوں کہندا اے؟ کیونکہ اوہنوں تواڈی فکر اے۔—‏1-‏پطرس 5:‏7‏۔‏

 ذرا سوچو:‏ کیہہ تُسی اپنے قریبی دوستاں نال ہر روز گل کرن لئی وقت کڈھدے او؟ تُسی خدا نال وی ہر روز گل کرن لئی وقت کڈھ سکدے او۔ جدوں تُسی دُعا کرو تے خدا دا ناں لے کے دُعا کرو۔ اوہدا ناں یہوواہ اے۔ (‏زبور 86:‏5-‏7؛‏ 88:‏9‏)‏ بائبل چ سانوں کہیا گیا اے کہ تُسی ہر وقت دُعا کرو۔—‏1-‏تھسلُنیکیوں 5:‏17‏۔‏

 ‏”‏دُعا میرے تے میرے اسمانی باپ چ ہون والی گل بات اے جدے چ میں اوہدے سامنے اپنا دل کھول کے رکھ دینا واں۔“‏—‏موئزز۔‏

 ‏”‏میں یہوواہ نال اپنے دل دی ہر گل کرنی آں،‏ بالکل اُنج ای جیویں میں اپنی امی یاں اپنے کسے قریبی دوست نال کرنی آں۔“‏–‏کیرن۔‏

 پاک کلام چ لکھیا اے :‏ کسے گلوں پریشان نہ ہووو سگوں ہر معاملے وچ شکرگزاری نال دُعا تے فریاد کرو تے اپنیاں ساریاں درخاستاں خدا دے حضور پیش کرو۔—‏فِلپّیوں 4:‏6‏۔‏

 کیہہ ایہدا ایہہ مطلب اے کہ اَسی خدا نُوں اپنیاں پریشانیاں بارے دَس سکنے آں؟ جی۔ اصل چ بائبل دَسدی اے:‏ اپنا سارا بھار یہوواہ اُتے سُٹ دَوو تے اوہ توانوں سنبھالے گا۔ اوہ راستباز نُوں کدی وی ڈولن نئیں دَوے گا۔—‏زبور 55:‏22‏۔‏

 پر خدا توں دُعا کردے ویلے سانوں بس اپنیاں مشکلاں بارے ای گل نئیں کرنی چاہی دی۔ اِک نوجوان کُڑی شینٹیل کہندی اے:‏ ”‏جے میں یہوواہ نُوں صرف مشکل ویلے چ یاد کراں تے ایہہ ودھیا دوستی نئیں ہووے گی۔ میں سوچنی آں کہ دُعا چ مینوں سب توں پہلاں خدا دا شکریہ ادا کرنا چاہی دا اے تے صرف اِک دو چیزاں لئی نئیں سگوں اوہدیاں ساریاں برکتاں تے نعمتاں لئی اوہدی شکرگزاری کرنی چاہی دی اے۔“‏

 ذرا سوچو:‏ تُسی اپنی زندگی چ کیہڑیاں گلاں لئی شکرگزار او؟ کیہہ تُسی تِن ایہو جہیاں گلاں بارے سوچ سکدے او جنہاں لئی تُسی اَج دُعا چ یہوواہ خدا دا شکر ادا کرو گے؟‏

 ‏”‏کسے چھوٹی جہی گل لئی جیویں کہ کسے سوہنے پُھل نُوں ویکھ کے ‏،اَسی دُعا چ خدا نُوں شکریہ کیہہ سکنے آں۔“‏–‏انیتا۔‏

 ‏”‏خدا دی بنائی ہوئی کوئی چیز جیہڑی توانوں بڑی سوہنی لگدی اے یاں بائبل دی کوئی ایت جنہے تواڈے دل نُوں چُھو لیا اے،‏ تُسی اوہدے تے سوچ وچار کرو تے اوہدے لئی یہوواہ دا شکریہ ادا کرو۔“‏–‏برائن۔‏