رسولاں دے اعمال 24:1-27
24 فیر پنج دِناں بعد اعلیٰ کاہن حننیاہ کجھ بزرگاں تے ترطِلُس ناں دے اِک وکیل نُوں لے کے اوتھے آیا تے اوہناں نے حاکم فیلکس دے سامنے پولُس دے خلاف اپنا مقدمہ پیش کیتا۔
2 جدوں ترطِلُس نُوں گل کرن دا موقع دِتا گیا تے اوہنے پولُس تے اِلزام لاندے ہوئے کہیا:
”جناب فیلکس، تواڈی وجہ توں اَسی بڑے سکون نال رہ رہے آں تے تواڈے ودھیا منصوبیاں دی وجہ توں ساڈی قوم بڑی ترقی کر رہی اے۔
3 ایس لئی اَسی ہر وقت تے ہر جگہ تواڈی بوہت تعریف کرنے آں تے تواڈے بڑے احسانمند آں۔
4 پر مَیں لمیچوڑی گل کر کے تواڈا وقت ضائع نئیں کراں گا۔ بس مہربانی نال میری چھوٹی جہی اِلتجا سُن لوو۔
5 اَسی ویکھیا اے کہ ایہہ بندہ سارے فساد دی جڑ اے۔ ایہہ ساری دُنیا چ رہن والے یہودیاں نُوں حکومت دے خلاف بھڑکا رہیا اے۔ ایہہ ناصریاں دے فرقے دا اِک سردار اے۔
6 ایناں ای نئیں سگوں ایہنے ہیکل نُوں ناپاک کرن دی کوشش وی کیتی سی۔ ایسے لئی اَسی ایہنوں پھڑیا سی۔
7 ——*
8 جدوں تُسی آپ ایہدے توں پچھگچھ کرو گے تے توانوں پتہ لگ جائے گا کہ اَسی ایہدے بارے جو کجھ کہہ رہے آں، اوہ بالکل سچ اے۔“
9 فیر سارے یہودی وی پولُس دے خلاف بولن لگ پئے تے ترطِلُس دی ہاں چ ہاں ملان لگ پئے۔
10 جدوں حاکم نے سِر ہلا کے پولُس نُوں بولن دا اشارہ کیتا تے اوہنے کہیا:
”مَیں جاننا واں کہ کئی سالاں توں ایس قوم دے لوک تواڈے سامنے اپنے مُقدمے پیش کر رہے نیں۔ ایس لئی مَیں خوش آں کہ مینوں تواڈے سامنے اپنی صفائی دین دا موقع ملیا اے۔
11 تُسی آپ ایس گل دا پتہ لا سکدے او کہ تقریباً 12 دن پہلاں مَیں عبادت کرن لئی یروشلم گیا ساں۔
12 ایس دوران نہ تے مَیں ہیکل چ کسے نال بحث کیتی تے نہ ای یہودیاں دِیاں عبادت گاہواں چ یاں شہر چ کسے نُوں بھڑکایا۔ ایہہ گل ایہناں نُوں وی پتہ اے۔
13 نالے ایہہ بندے میرے تے جیہڑے اِلزام لا رہے نیں، ایہہ اوہناں نُوں وی ثابت نئیں کر سکدے۔
14 پر مَیں ایہہ گل قبول کرنا واں کہ مَیں اوس مذہب دے مطابق جنہوں ایہہ لوک فرقہ کہندے نیں، اپنے پیو دادیاں دے خدا دی عبادت کرنا واں کیونکہ مَیں اوہناں ساریاں گلاں تے ایمان رکھنا واں جیہڑیاں شریعت تے نبیاں دِیاں کتاباں چ لکھیاں نیں۔
15 ایہناں بندیاں وانگوں میرا وی ایمان* اے کہ خدا نیک لوکاں دے نال نال بُرے لوکاں نُوں وی زندہ کرے گا۔
16 ایس لئی مَیں خدا تے انساناں سامنے اپنے ضمیر نُوں ہمیشاں صاف رکھن دی کوشش کرنا واں۔
17 مَیں کئی سالاں بعد یروشلم ایس لئی واپس آیا ساں تاکہ اپنی قوم دے ضرورتمند لوکاں نُوں عطیات* پونچاواں تے خدا دے حضور قربانیاں چڑھاواں۔
18 جدوں مَیں ایہہ کم کر رہیا ساں تے ایہناں لوکاں نے مینوں ہیکل چ ویکھیا۔ اوس ویلے وی مَیں اپنے آپ نُوں شریعت دے مطابق پاک کیتا ہویا سی۔ اوہدوں نہ تے میرے نال کوئی بِھیڑ سی تے نہ ای مَیں کوئی فساد کھڑا کر رہیا ساں۔ اوتھے آسیہ دے صوبے توں آئے کجھ یہودی وی سن۔
19 جے اوہ میرے تے کوئی اِلزام لانا چاہندے نیں تے اوہناں نُوں ایتھے آ کے تواڈے سامنے گل کرنی چاہی دی اے۔
20 یاں فیر ایہہ بندے آپ دَسن کہ جدوں مینوں یہودیاں دی وڈی عدالت دے سامنے پیش کیتا گیا سی تے میرے خلاف کیہڑا جُرم ثابت ہویا سی؟
21 سوائے ایس گل دے کہ مَیں ایہناں ساریاں دے سامنے کہیا سی کہ ”میرے تے مقدمہ ایس لئی چلایا جا رہیا اے کیونکہ مَیں ایمان رکھنا واں کہ مُردے زندہ ہون گے۔““
22 پر فیلکس نُوں مالک دی راہ بارے بوہت کجھ پتہ سی۔ ایس لئی اوہنے اوہناں نُوں ٹالن لئی کہیا: ”جدوں وی فوجی کمانڈر لُوسیاس آئے گا، اوہدوں ای مَیں تیرے مُقدمے بارے فیصلہ کراں گا۔“
23 فیر اوہنے فوجی افسر نُوں حکم دِتا کہ پولُس نُوں پہرے چ رکھیا جائے۔ پر اوہنوں تھوڑی بوہت آزادی وی دِتی جائے تے اوہدے دوستاں نُوں اوہدیاں ضرورتاں پوریاں کرن توں نہ روکیا جائے۔
24 کجھ دِناں بعد فیلکس اپنی بیوی درُوسِلہ نال آیا جیہڑی اِک یہودی سی۔ فیلکس نے پولُس نُوں بلوایا تے مسیح یسوع اُتے ایمان لیان بارے اوہدی تلیم نُوں سُنیا۔
25 پر جدوں پولُس نے اوہنوں نیکی کرن، اپنے اُتے قابو رکھن تے آن والی عدالت بارے دَسیا تے اوہ بڑا ڈر گیا تے اوہنے کہیا: ”ہُن تُوں جا سکنا ایں۔ بعد چ جدوں موقع ملے گا تے مَیں تینوں فیر بلاواں گا۔“
26 اصل چ اوہنوں ایہہ امید سی کہ پولُس اوہنوں رشوت دَوے گا۔ ایس لئی اوہ اوہنوں وار وار بلا کے اوہدے نال گل کردا سی۔
27 پر فیر اوہنے پولُس نُوں قید چ ای چھڈ دِتا کیونکہ اوہ یہودیاں نُوں خوش کرنا چاہندا سی۔ دو سالاں بعد فیلکس دی جگہ پُرکیُس فیستُس حاکم بن گیا۔
فٹ نوٹ
^ ایہہ ایت کئی پرانے نسخیاں وچ نئیں اے جدا مطلب اے کہ ایہہ اِلہامی کلام دا حصہ نئیں اے۔
^ یونانی چ: ”امید۔“
^ یاں، ”امداد۔“
