رسولاں دے اعمال 7:1-60
7 پر اعلیٰ کاہن نے ستفنُس نُوں پچھیا: ”کیہہ ایہہ گلاں سچ نیں؟“
2 ستفنُس نے جواب دِتا: ”بھراوو تے بزرگو، میری گل سُنو۔ ساڈا عظیم خدا ساڈے پیو دادے ابراہام اُتے اوس ویلے ظاہر ہویا جدوں اوہ حالے حاران نئیں گیا سی سگوں مسوپتامیہ چ رہندا سی۔
3 خدا نے اوہنوں کہیا سی: ”اپنے ملک تے رشتےداراں نُوں چھڈ کے اوس ملک چلا جا جیہڑا مَیں تینوں وکھاواں گا۔“
4 ایس لئی اوہ کسدیاں دے ملک نُوں چھڈ کے حاران چ رہن لگ پیا۔ فیر جدوں اوہدا پیو مر گیا تے خدا نے اوہنوں اوس ملک چ رہن لئی کہیا جدے چ اَج تُسی رہندے او۔
5 پر اوس ویلے خدا نے اوہنوں ایتھے وراثت دے طور تے کوئی زمین نئیں دِتی سی ایتھوں تک کہ پیر رکھن دی وی تھاں نئیں دِتی سی۔ پر خدا نے اوہدے نال وعدہ کیتا سی کہ اوہ اوہنوں تے بعد چوں اوہدی اولاد نُوں ایس ملک دا مالک بنائے گا جد کہ اوس ویلے اوہ بےاولاد سی۔
6 خدا نے اوہنوں ایہہ وی دَسیا سی کہ اوہدی اولاد اِک غیر ملک چ پردیسیاں وانگوں رہوے گی تے اوتھوں دے لوک اوہناں نُوں غلام بنا کے 400 سالاں تک اوہناں تے ظلم کرن گے۔
7 نالے خدا نے ایہہ وی کہیا سی: ”مَیں اوس قوم نُوں سزا دَواں گا جیہڑی میرے بندیاں نُوں غلام بنائے گی تے اوہدے بعد اوہ اوس ملک چوں نکل آن گے تے ایس جگہ تے میری عبادت کرن گے۔“
8 خدا نے ابراہام نال ختنے دا عہد وی کیتا۔ ابراہام توں اِضحاق پیدا ہویا تے اوہنے اَٹھویں دن اوہدا ختنہ کیتا۔ فیر اِضحاق توں یعقوب پیدا ہویا تے یعقوب توں ساڈی قوم دے 12 سربراہ پیدا ہوئے۔*
9 اوہ سربراہ یوسف توں حسد کرن لگ پئے تے اوہناں نے اوہنوں مصریاں دے ہتھ ویچ دِتا۔ پر خدا اوہدے نال سی۔
10 اوہنے یوسف نُوں اوہدیاں ساریاں مصیبتاں چوں کڈھیا تے اوہنوں حکمت بخشی جدی وجہ توں مصر دا بادشاہ فرعون اوہدے توں خوش ہویا۔ اوہنے یوسف نُوں مصر تے اپنے سارے گھرانے دا نگران بنا دِتا۔
11 پر فیر پورے مصر تے کنعان وچ کال پے گیا جدی وجہ توں لوکاں اُتے مصیبت دا پہاڑ ٹُٹ پیا تے ساڈے پیو دادیاں کول کھان لئی کجھ وی نہ رہیا۔
12 جدوں یعقوب نے سُنیا کہ مصر چ اناج ہے وے تے اوہنے اپنے پُتراں* نُوں اوتھے گھلیا۔
13 فیر جدوں اوہ دُوجی وار اوتھے گئے تے یوسف نے اپنے بھراواں نُوں دَس دِتا کہ اوہ کون اے۔ نالے فرعون نُوں وی یوسف دے گھرانے بارے پتہ لگ گیا۔
14 ایس لئی یوسف نے پیغام گھل کے اپنے پیو یعقوب تے اپنے سارے رشتےداراں نُوں کنعان توں مصر بلا لیا جیہڑے کُل 75 جنے سن۔
15 فیر یعقوب مصر چ رہن لگ پیا تے اوتھے ای فوت ہویا۔ نالے اوہدے پُتر* وی اوتھے ای فوت ہوئے۔
16 اوہناں نُوں دفنان لئی سِکم لجایا گیا تے اوس قبر وچ رکھیا گیا جیہڑی ابراہام نے سِکم چ حمور دے پُتراں کولوں چاندی دے سِکّیاں نال خریدی سی۔
17 جیویں جیویں اوہ وعدہ پورا ہون دا ویلا نیڑے آ رہیا سی جیہڑا خدا نے ابراہام نال کیتا سی، مصر چ ساڈی قوم اِسرائیل دی تعداد ودھدی جا رہی سی۔
18 فیر مصر دا اِک نواں بادشاہ بنیا جیہڑا یوسف نُوں نئیں جان دا سی۔
19 اوہنے ساڈی قوم نال بڑی چالاکی کیتی تے بےرحمی نال ساڈے پیو دادیاں نُوں مجبور کیتا کہ اوہ اپنے ننھے بچیاں نُوں بےسہارا چھڈ دین تاکہ اوہ مر جان۔
20 اوہناں دِناں چ ای موسیٰ پیدا ہویا۔ اوہ بوہت ای سوہنا* سی۔ اوہدے ماں پیو نے تِن مہینیاں تک اوہنوں اپنے گھر چ پالیا۔
21 فیر جدوں اوہ موسیٰ نُوں چھڈن تے مجبور ہو گئے تے فرعون دی دِھی نے اوہنوں اپنا لیا تے اپنے پُتر وانگوں پالیا۔
22 ایس لئی موسیٰ نُوں مصریاں دے ہر طرحاں دے علم دی تلیم دِتی گئی تے اوہدیاں گلاں تے کم زبردست سن۔
23 جدوں اوہ 40 سالاں دا ہویا تے اوہنے فیصلہ کیتا کہ اوہ جا کے اپنے اِسرائیلی بھراواں دی حالت ویکھے گا۔
24 اِک وار اوہنے ویکھیا کہ اِک مصری اِک اِسرائیلی تے ظلم کر رہیا اے۔ اوہنے اپنے اِسرائیلی بھرا نُوں بچان تے اوہدا بدلہ لین لئی مصری نُوں جانوں مار دِتا۔
25 اوہنے سوچیا کہ اوہدے بھرا سمجھ جان گے کہ خدا اوہدے ذریعے اِسرائیل نُوں نجات دَوائے گا۔ پر اوہ ایہہ گل نئیں سمجھے۔
26 اگلے دن اوہنے دو اِسرائیلیاں نُوں لڑدے ویکھیا۔ اوہنے اوہناں چ صلح کران دی کوشش کیتی تے کہیا: ”تُسی دونویں تے بھرا او، تُسی اِک دُوجے نال کیوں لڑ رہے او؟“
27 پر جیہڑا بندہ اپنے اِسرائیلی بھرا نُوں مار رہیا سی، اوہنے موسیٰ نُوں دھکا دے کے کہیا: ”تینوں کنہے ساڈا حاکم بنایا اے کہ تُوں ساڈے فیصلے کریں؟
28 کیہہ تُوں مینوں وی اوسے طرحاں جانوں مارنا چاہنا ایں جیویں تُوں کل اوس مصری نُوں ماریا سی؟“
29 ایہہ سُن کے موسیٰ مصر توں بھج گیا تے ملک مِدیان چ اِک پردیسی وانگوں رہن لگ پیا۔ اوتھے اوہنے ویاہ کر لیا تے اوہدے دو مُنڈے پیدا ہوئے۔
30 فیر 40 سالاں بعد اِک دن جدوں اوہ سینا دے پہاڑ دے نیڑے ویرانے چ سی تے اوہنوں بلدی ہوئی اِک جھاڑی چ اِک فرشتہ نظر آیا۔
31 موسیٰ ایہہ ویکھ کے حیران ہو گیا۔ فیر جدوں اوہنے نیڑے جاکے ویکھیا تے اوہنوں یہوواہ دی آواز سُنائی دِتی جنہے کہیا:
32 ”مَیں تیرے پیو دادیاں دا خدا واں یعنی ابراہام، اِضحاق تے یعقوب دا خدا۔“ ایہہ سُن کے موسیٰ ڈر دے مارے کمبن لگ پیا تے اوہنے ہور اَگے جان دی ہمت نہ کیتی۔
33 فیر یہوواہ نے اوہنوں کہیا: ”اپنی جُتی لاہ دے کیونکہ تُوں پاک جگہ تے کھلوتا ہویا ایں۔
34 مَیں ویکھیا اے کہ مصر چ میرے بندیاں تے کِنّاں ظلم ہو رہیا اے۔ مَیں اوہناں دے ہوکے سُنے نیں تے مَیں اوہناں نُوں بچان آیا واں۔ ایس لئی مَیں تینوں مصر گھلاں گا۔“
35 ایہہ اوہی موسیٰ سی جنہوں اِسرائیلیاں نے ایہہ کہہ کے ٹھکرا دِتا کہ ”تینوں کنہے ساڈا حاکم بنایا اے کہ تُوں ساڈے فیصلے کریں؟“ پر خدا نے اوہنوں ای اوس فرشتے دے ذریعے حاکم تے نجات دہندہ بنا کے گھلیا جیہڑا اوہنوں بلدی جھاڑی چ نظر آیا سی۔
36 اوہی موسیٰ اِسرائیلیاں نُوں غلامی چوں کڈھ لیایا تے اوہنے مصر چ تے بحرِقلزم* تے حیران کرن والے کم کیتے تے نشانیاں وکھائیاں۔ نالے اوہ ویرانے چ وی 40 سالاں تک اِنج کردا رہیا۔
37 اوسے موسیٰ نے اِسرائیلیاں نُوں کہیا: ”خدا تواڈے بھراواں وچوں تواڈے لئی میرے ورگا اِک نبی گھلے گا۔“
38 موسیٰ ای ویرانے چ اِسرائیلیاں نال سی تے اِک فرشتے نے اوہدے نال ای سینا دے پہاڑ اُتے گل کیتی سی۔ موسیٰ نے ای ساڈے پیو دادیاں نال گلاں کیتیاں سن تے اوہنوں ای ساڈے لئی خدا دا زندہ کلام دِتا گیا سی۔
39 پر ساڈے پیو دادیاں نے اوہدی گل منن توں اِنکار کر دِتا تے اوہنوں ٹھکرا کے مصر واپس جان دے خواب ویکھن لگ پئے۔
40 اوہناں نے ہارون نُوں کہیا: ”ساڈے لئی ایہو جہے بُت بنا جیہڑے ساڈے خدا ہون تے ساڈے اَگے اَگے جان کیونکہ سانوں نئیں پتہ کہ موسیٰ نال کیہہ ہویا اے جیہڑا سانوں مصر چوں کڈھ کے لیایا سی۔“
41 ایس لئی اوہناں نے اِک وچھے دا بُت بنایا تے اوہدے اَگے قربانی چڑھائی تے اوہ اپنے ہتھاں دے بنائے اوس بُت اَگے جشن منان لگ پئے۔
42 ایس لئی خدا نے اوہناں توں مُونہہ موڑ لیا تے اوہناں نُوں اسمان دی فوج* دی پوجا کرن دِتی جیویں کہ نبیاں دی کتاب چ لکھیا اے: ”اَے اِسرائیل دے گھرانے، کیہہ تُسی 40 سالاں تک ویرانے چ میرے لئی قربانیاں تے نذرانے چڑھائے؟ بالکل نئیں
43 سگوں تُسی مولک دیوتا دے خیمے نُوں تے رِفان دیوتا دے تارے دے بُتاں نُوں پوجن لگ پئے جنہاں نُوں تُسی بنایا سی۔ ایس لئی مَیں توانوں تواڈے ملک چوں کڈھ کے بابل توں وی دُور گھل دَواں گا۔“
44 ساڈے پیو دادیاں کول ویرانے چ گواہی دا خیمہ سی جیہڑا ایس گل دی نشانی سی کہ خدا اوہناں دے نال اے۔ خدا نے موسیٰ نُوں حکم دِتا سی کہ اوہ ایس خیمے نُوں اوس نقشے مطابق بنائے جیہڑا خدا نے اوہنوں وکھایا سی۔
45 فیر اوہ خیمہ ساڈے پیو دادیاں نُوں ورثے چ ملیا۔ جدوں اوہ تے یشوع اوس خیمے نُوں ایس ملک چ لیائے تے ایتھے دُوجیاں قوماں دے لوک وَسے ہوئے سن۔ پر خدا نے اوہناں نُوں ساڈے پیو دادیاں دے سامنیوں کڈھ دِتا۔ اوہ خیمہ داؤد دے زمانے تک ایتھے رہیا۔
46 داؤد تے خدا دی برکت دا ہتھ سی۔ ایس لئی اوہنے اِلتجا کیتی کہ اوہنوں یعقوب دے خدا لئی اِک گھر* بنان دا مان بخشیا جائے۔
47 پر خدا لئی گھر سلیمان نے بنایا۔
48 اصل چ خدا تعالیٰ ہتھاں دے بنے گھراں چ نئیں وَسدا جیویں اِک نبی نے لکھیا:
49 ”یہوواہ کہندا اے: ”اسمان میرا تخت اے تے زمین میرے پیراں دی چونکی اے۔ تُسی میرے لئی کیہو جیہا گھر بناؤ گے؟ یاں میرے آرام کرن دی تھاں کتھے ہوئے گی؟
50 کیہہ سب کجھ مَیں ای نئیں بنایا؟““
51 ڈھیٹھ، پتھر دل تے نافرمان لوکو،* تُسی ہمیشاں پاک روح دے خلاف جاندے او۔ تُسی وی اوہی کردے او جو تواڈے پیو دادیاں نے کیتا۔
52 کیہہ اِک وی نبی ہے وے جدے تے تواڈے پیو دادیاں نے ظلم نہ کیتا ہوئے؟ سگوں اوہناں نے تے اوہناں سارے نبیاں نُوں مار دِتا جنہاں نے اِک نیک بندے دے آن بارے پیشینگوئی کیتی سی۔ اوسے نیک بندے نُوں تُسی دھوکھے نال پھڑوایا تے مار دِتا۔
53 توانوں فرشتیاں دے ذریعے شریعت ملی سی، پر تُسی اوہدے تے عمل نئیں کردے۔“
54 ستفنُس دِیاں ایہہ گلاں سُن کے اوہناں لوکاں دِیاں اَکھاں چ خون اُتر آیا تے اوہ غصے نال کچیچیاں وَٹن لگ پئے۔
55 پر ستفنُس پاک روح نال بھریا ہویا سی تے اوہنے اسمان وَل ویکھیا تے اوہنوں خدا دی شان نظر آئی تے خدا دے سجے ہتھ یسوع کھلوتا ہویا نظر آیا۔
56 فیر ستفنُس نے کہیا: ”ویکھو! مینوں اسمان کُھلا ہویا نظر آ رہیا اے تے انسان دا بیٹا خدا دے سجے ہتھ کھلوتا ہویا اے۔“
57 ایہہ سُن دے سار ای اوہ رولا پان لگ پئے۔ اوہناں نے اپنے کناں تے ہتھ رکھ لئے تے اوہ سارے کٹھے ای ستفنُس تے ٹُٹ پئے۔
58 اوہ ستفنُس نُوں گھسیٹ کے شہروں باہر لے گئے تے اوہنوں پتھر مارن لگ پئے۔ اوہدے خلاف جھوٹھی گواہی دین والیاں نے اپنیاں چادراں لاہ کے ساؤل ناں دے اِک جوان بندے دے پیراں کول رکھ دِتیاں۔
59 جدوں اوہ ستفنُس نُوں پتھر مار رہے سن تے اوہنے ایہہ اِلتجا کیتی: ”مالک یسوع، مَیں اپنی جان تیرے حوالے کرنا واں۔“
60 فیر اوہنے گوڈے ٹیک کے اُچی آواز چ کہیا: ”اَے یہوواہ، ایہناں لوکاں نُوں ایس گُناہ دی سزا نہ دوِیں۔“ ایہدے بعد اوہ موت دی نیندر سوں گیا۔
فٹ نوٹ
^ یاں شاید، ”اضحاق نے یعقوب دا ختنہ کیتا تے یعقوب نے وی 12 سربراہواں نال اِنج ای کیتا۔“
^ یونانی چ: ”ساڈے پیو دادیاں نُوں پہلی وار اوتھے گھلیا۔“
^ یونانی چ: ”ساڈے پیو دادے۔“
^ یاں، ”خدا دِیاں نظراں چ سوہنا۔“
^ یاں، ”بحیرۂاحمر۔“
^ یعنی سورج، چن تے تارے۔
^ یعنی ہیکل۔
^ یونانی چ: ”تواڈے دِلاں تے کناں دا ختنہ نئیں ہویا۔“
