رسولاں دے اعمال 9:1-43
9 پر ساؤل اُتے حالے وی مالک دے شاگرداں نُوں دھمکان تے اوہناں نُوں ختم کرن دا جنون سوار سی۔ ایس لئی اوہ اعلیٰ کاہن کول گیا
2 تے کہیا کہ اوہ دمشق وچ یہودیاں دِیاں عبادتگاہواں دے ناں اوہنوں اِک حکمنامہ دَوے تاکہ اوہنوں اِختیار مِل جائے تے اوہ اوتھے جاکے وی اوہناں سارے آدمیاں تے عورتاں نُوں گِرفتار کر کے یروشلم لیائے جیہڑے مالک دی راہ تے چلدے نیں۔
3 جدوں اوہ سفر کردے کردے دمشق دے نیڑے پونچیا تے اچانک اسمانوں اوہدے چارے پاسے تیز روشنی چمکی۔
4 اوہ زمین تے ڈِگ پیا تے اوہنوں ایہہ آواز سُنائی دِتی: ”ساؤل، ساؤل، تُوں میرے تے ظلم کیوں کر رہیا ایں؟“
5 ساؤل نے پچھیا: ”مالک، تُوں کون ایں؟“ اوہنے کہیا: ”مَیں یسوع آں جدے تے تُوں ظلم کر رہیا ایں۔
6 ہُن اُٹھ تے شہر چ چلا جا۔ اوتھے تینوں دَسیا جائے گا کہ تُوں کیہہ کرنا اے۔“
7 جیہڑے بندے اوہدے نال سفر کر رہے سن، اوہ اینے حیران سن کہ چپچاپ کھلوتے رہے۔ اوہناں نے آواز تے سُنی، پر اوہناں نُوں کوئی نظر نئیں آیا۔
8 فیر ساؤل زمین توں اُٹھیا۔ اوہدیاں اَکھاں تے کُھلیاں سن، پر اوہنوں کجھ نظر نئیں آ رہیا سی۔ ایس لئی اوہ بندے اوہدا ہتھ پھڑ کے اوہنوں دمشق لے گئے۔
9 اوہنوں تِن دِناں تک کجھ وی نظر نئیں آیا تے نہ ای اوہنے کجھ کھادا پیتا۔
10 دمشق چ اِک شاگرد سی جدا ناں حننیاہ سی۔ مالک نے اِک رُویا چ اوہنوں کہیا: ”حننیاہ!“ اوہنے کہیا: ”جی مالک۔“
11 مالک نے اوہنوں کہیا: ”اُٹھ تے اوس سڑک تے جا جنہوں سِدھی کہندے نیں۔ اوتھے یہوداہ دے گھر جا کے ساؤل بارے پچھ جیہڑا شہر ترسُس توں اے۔ اوہ ایس ویلے دُعا کر رہیا اے تے
12 اوہنے رُویا چ ویکھیا اے کہ حننیاہ ناں دا اِک بندہ آ کے اوہدے اُتے اپنے ہتھ رکھدا اے تاکہ اوہدیاں اَکھاں دی روشنی واپس آ جائے۔“
13 پر حننیاہ نے کہیا: ”مالک، مَیں بوہت سارے لوکاں کولوں اوس بندے بارے سُنیا اے کہ اوہنے یروشلم چ تیرے پاک خادماں تے بڑا ظلم کیتا اے۔
14 نالے ہُن تے وڈے کاہناں نے اوہنوں اِختیار دِتا اے کہ اوہ اوہناں سارے لوکاں نُوں گِرفتار کرے جیہڑے تیرا ناں لیندے نیں۔“
15 پر مالک نے اوہنوں کہیا: ”تُوں فیر وی جا کیونکہ مَیں اوہنوں چُنیا اے تاکہ اوہ میرے ناں بارے غیریہودیاں، بادشاہواں تے اِسرائیلیاں نُوں گواہی دَوے۔
16 مَیں اوہنوں صاف صاف دَساں گا کہ اوہنوں میرے ناں دی خاطر کِنّیاں مصیبتاں سہنیاں پین گیاں۔“
17 ایس لئی حننیاہ چلا گیا تے اوس گھر دے اندر جا کے اوہنے ساؤل تے ہتھ رکھے تے کہیا: ”ساؤل، میرے بھرا، مالک یسوع نے مینوں گھلیا اے جنہے راہ چ تیرے نال گل کیتی سی۔ اوہنے مینوں ایس لئی گھلیا تاکہ تیریاں اَکھاں دی روشنی واپس آ جائے تے تُوں پاک روح نال بھر جائیں۔“
18 اوسے ویلے ساؤل دِیاں اَکھاں توں چھلکے جہے ڈِگے تے اوہنوں نظر آن لگ پیا تے اوہنے جا کے بپتسمہ لیا۔
19 فیر اوہنے کھادا پیتا تے اوہدے چ جان آئی۔
ساؤل دمشق چ شاگرداں نال کجھ دن رہیا
20 تے فوراً ای یہودیاں دِیاں عبادتگاہواں چ ایہہ مُنادی کرن لگ پیا کہ یسوع ای خدا دا پُتر اے۔
21 پر اوہدیاں گلاں سُنن والے سارے لوک بڑے حیران ہوندے سن تے کہندے سن: ”کیہہ ایہہ اوہی بندہ نئیں جیہڑا یروشلم چ یسوع دا ناں لین والیاں تے بڑا ظلم کردا سی؟ کیہہ اوہ ایتھے ایسے لئی نئیں آیا کہ اوہناں نُوں گِرفتار کر کے وڈے کاہناں کول لے جائے؟“
22 پر ساؤل طاقت حاصل کردا گیا تے بڑے زبردست طریقے نال مُنادی کردا رہیا۔ اوہ دلیلاں دے کے ثابت کردا سی کہ یسوع ای مسیح اے۔ اوہدیاں گلاں سُن کے دمشق دے یہودی اینے حیران ہوندے سن کہ اوہنوں کوئی جواب نئیں دے سکدے سن۔
23 کجھ وقت بعد یہودیاں نے ساؤل نُوں جانوں مارن دی سازش کیتی۔
24 پر ساؤل نُوں اوہناں دی سازش بارے پتہ چل گیا۔ یہودی دن رات شہر دے دروازیاں تے نظر رکھدے سن تاکہ موقع مِلدیاں ای ساؤل نُوں مار دین۔
25 ایس لئی اوہدے شاگرداں نے رات نُوں اوہنوں اِک ٹوکرے چ بیٹھا کے شہر دی دیوار دی اِک باری توں تھلے لاہ دِتا۔
26 جدوں ساؤل یروشلم پونچیا تے اوہنے شاگرداں نال مِلن دی کوشش کیتی۔ پر اوہ سارے اوہدے توں ڈردے سن کیونکہ اوہناں نُوں یقین نئیں آ رہیا سی کہ اوہ یسوع دا شاگرد بن گیا اے۔
27 ایس لئی برنباس نے ساؤل دی مدد کیتی تے اوہنوں رسولاں کول لے گیا۔ برنباس نے اوہناں نُوں کُھل کے دَسیا کہ کیویں راہ چ ساؤل نے مالک یسوع نُوں ویکھیا تے مالک نے اوہدے نال گل کیتی۔ نالے ایہہ وی دَسیا کہ اوہنے دمشق چ بڑی دلیری نال یسوع دے ناں بارے مُنادی کیتی۔
28 ایس لئی ساؤل اوہناں دے نال رہیا۔ اوہ یروشلم چ آزادی نال گھمدا پھردا سی تے بڑی دلیری نال مالک دے ناں بارے مُنادی کردا سی۔
29 اوہ یونانی بولن والے یہودیاں نال گل بات تے بحث کردا سی۔ ایس لئی اوہناں نے اوہنوں جانوں مارن دی کوشش کیتی۔
30 جدوں بھراواں نُوں ایس بارے پتہ چلیا تے اوہ ساؤل نُوں قیصریہ لے گئے تے فیر اوہنوں ترسُس گھل دِتا۔
31 فیر سارے یہودیہ، گلیل تے سامریہ دِیاں کلیسیاواں نُوں کجھ عرصے لئی دُشمناں توں سکون ملیا تے شاگرداں دا ایمان مضبوط ہوندا گیا۔ نالے اوہناں دی تعداد وی ودھدی گئی کیونکہ اوہ یہوواہ دا خوف رکھدے ہوئے اوہدی مرضی تے چلدے سن تے اوہناں نُوں پاک روح دے ذریعے حوصلہ مِل رہیا سی۔
32 اوہناں دِناں چ پطرس سارے علاقیاں دا سفر کر رہیا سی تے اوہ شہر لِدہ چ رہن والے مُقدس لوکاں کول وی گیا۔
33 اوتھے اینیاس ناں دا اِک بندہ سی جیہڑا فالج دی وجہ توں 8 سالاں توں منجی تے پیا ہویا سی۔
34 پطرس نے اوہنوں کہیا: ”اینیاس، یسوع مسیح تینوں شفا دے رہیا اے۔ اُٹھ تے اپنا بسترا سمیٹ۔“ اوہ اوسے ویلے اُٹھ پیا۔
35 جدوں لِدہ تے شارون چ رہن والیاں نے اوس آدمی نُوں ویکھیا تے اوہ مالک تے ایمان لے آئے۔
36 شہر یافا وچ مالک نُوں منن والی اِک عورت رہندی سی جدا ناں تبیتا سی۔ یونانی چ تبیتا دا ترجمہ ”ڈورکس“* اے۔ اوہ دُوجیاں نال بھلائی کردی سی تے ضرورتمنداں دی بڑی مدد کردی سی۔
37 پر اوہناں دِناں چ اوہ بیمار ہو گئی تے مر گئی۔ اوہناں نے اوہدی لاش نُوں نہوا کے گھر دے اُتے والے کمرے چ رکھ دِتا۔
38 لِدہ شہر یافا دے نیڑے ای سی۔ ایس لئی جدوں شاگرداں نے سُنیا کہ پطرس اوتھے وے تے اوہناں نے دو بندے گھل کے اوہدے اَگے مِنت کیتی: ”مہربانی کر کے چھیتی ساڈے کول آ۔“
39 پطرس اُٹھ کے اوہناں نال چلا گیا۔ جدوں اوہ اوتھے پونچیا تے اوہ اوہنوں گھر دے اُتے والے کمرے چ لے گئے۔ اوتھے ساریاں بیوہ عورتاں اوہنوں مِلن آئیاں۔ اوہ بوہت رو رہیاں سن تے اوہنوں اوہ کپڑے وکھا رہیاں سن جیہڑے ڈورکس نے اوہناں لئی بنائے سن۔
40 فیر پطرس نے ساریاں نُوں باہر جان لئی کہیا تے گوڈے ٹیک کے دُعا کیتی۔ فیر اوہ لاش وَل مُڑیا تے کہیا: ”تبیتا، اُٹھ جا!“ اوہنے اپنیاں اَکھاں کھولیاں تے پطرس نُوں ویکھدیاں سار ای اُٹھ بیٹھی۔
41 فیر پطرس نے اوہدا ہتھ پھڑ کے اوہنوں کھڑا کیتا تے اوہنے مُقدس لوکاں تے بیوہ عورتاں نُوں بلایا تے اوہناں نُوں وکھایا کہ تبیتا زندہ ہو گئی اے۔
42 ایہہ گل پورے یافا چ پھیل گئی تے بوہت سارے لوک مالک تے ایمان لے آئے۔
43 پطرس کافی دِناں تک یافا چ شمعون دے گھر رہیا جیہڑا چمڑا تیار کرن دا کم کردا سی۔
فٹ نوٹ
^ یونانی ناں ڈورکس تے ارامی ناں تبیتا دا مطلب اے ہرنی۔
