اِفسیوں دے ناں خط 1:1-23
1 مَیں پولُس خدا دی مرضی نال مسیح یسوع دا رسول آں تے اوہناں وفادار مُقدس لوکاں نُوں ایہہ خط لکھ رہیا واں جیہڑے اِفسس چ رہندے نیں تے مسیح یسوع نال اِک مُٹھ نیں۔
2 میری دُعا اے کہ ساڈا باپ خدا تے ساڈا مالک یسوع مسیح توانوں عظیم رحمت تے سلامتی بخشن۔
3 ساڈے مالک مسیح یسوع دے خدا تے باپ دی وڈیائی ہووے جنہے سانوں پاک روح دے ذریعے اسمان تے ہر طرحاں دی برکت دِتی اے کیونکہ اَسی مسیح نال اِک مُٹھ آں۔
4 اوہنے دُنیا دی نِیہہ رکھن توں پہلاں سانوں مسیح نال اِک مُٹھ ہون لئی چُنیا تاکہ اَسی خدا نال پیار کرن دی وجہ توں اوہدے حضور پاک تے بےداغ ہوئیے۔
5 اوہنے اپنی خوشی تے مرضی دے مطابق پہلاں توں ای ایہہ فیصلہ کیتا سی کہ اوہ سانوں یسوع مسیح دے ذریعے گود لے کے اپنے پُتر بنائے گا
6 تاکہ خدا دی وڈیائی ہوئے جنہے مہربان ہو کے اپنے پیارے پُتر دے ذریعے بڑے ای شاندار طریقے نال ساڈے تے عظیم رحمت کیتی۔
7 اوہنے اپنے پُتر دا فدیہ دِتا تاکہ اوہدے خون دے ذریعے سانوں چھٹکارا ملے تے ساڈے گُناہ معاف ہون۔ واقعی خدا دی رحمت بڑی عظیم تے قیمتی اے۔
8 اوہنے دل کھول کے ساڈے تے عظیم رحمت کیتی تے سانوں بڑی حکمت تے سمجھ دین لئی
9 اپنی مرضی دے مُقدس راز بارے دَسیا۔ ایس راز دے مطابق اوہدی خواہش تے مقصد ایہہ سی
10 کہ طے کیتا ہویا ویلا پورا ہون تے اوہ اِک ایہو جیہا اِنتظام کرے جدے ذریعے اسمان دِیاں ساریاں چیزاں تے زمین دِیاں ساریاں چیزاں نُوں مسیح دے تابع کیتا جائے۔ ہاں، مسیح دے تابع
11 جدے نال اَسی اِک مُٹھ آں تے وارث بن گئے آں۔ایہہ فیصلہ خدا نے پہلاں توں ای اپنے مقصد دے مطابق کر لیا سی تے اوہ اپنی مرضی دے مطابق جو فیصلہ کردا اے، اوہنوں پورا وی کردا اے۔
12 سانوں ایس لئی چُنیا گیا اے تاکہ ساڈے ذریعے خدا دی وڈیائی تے حمد ہووے کیونکہ اَسی سب توں پہلے مسیح تے امید رکھی۔
13 پر تُسی وی سچائی دا پیغام یعنی اپنی نجات دی خوشخبری سُن کے مسیح تے امید رکھی۔ایہہ ایمان رکھن دے بعد خدا نے مسیح دے ذریعے تواڈے تے اوس پاک روح نال مُہر لائی جدا وعدہ کیتا گیا سی۔
14 ایہہ ایس گل دی ضمانت* اے کہ سانوں وراثت ملے گی۔ ایہہ مُہر ایس لئی لائی جاندی اے تاکہ خدا فدیے دے ذریعے اپنے لوکاں* نُوں چھٹکارا دَوائے تے اوہدی وڈیائی تے حمد ہووے۔
15 ایس لئی جدوں توں مَیں سُنیا اے کہ تُسی مالک یسوع تے ایمان رکھدے او تے سارے مُقدس لوکاں نال پیار کردے او،
16 مَیں لگاتار تواڈے لئی خدا دا شکر کردا رہنا واں۔ مَیں ہمیشاں تواڈے لئی دُعاواں کرنا واں
17 کہ ساڈے مالک یسوع مسیح دا خدا تے عظیم باپ پاک روح دے ذریعے توانوں حکمت تے اپنے بارے صحی علم دی سمجھ بخشے۔
18 اوہنے تواڈے دل دِیاں اَکھاں کھول دِتیاں نیں تاکہ تُسی سمجھ جاؤ کہ توانوں کیس امید لئی بلایا گیا اے تے اوہ مُقدس لوکاں نُوں کِنّی قیمتی تے شاندار وراثت دَوے گا۔
19 نالے اوہدی طاقت کِنّی عظیم تے بےمثال اے جیہڑی اوہنے ساڈے لئی ظاہر کیتی اے کیونکہ اَسی ایمان لیائے آں۔ اوہدی شاندار طاقت ایس گل توں نظر آندی اے
20 کہ اوہنے مسیح نُوں مُردیاں چوں زندہ کیتا تے اوہنوں اسمان چ اپنے سجے ہتھ بیٹھایا
21 تے اوہنوں ہر حکومت، اِختیار، طاقت، مرتبے تے ہر ناں توں اُچا کیتا تاکہ اوہدے کول نہ صرف ایس زمانے چ سگوں آن والے زمانے چ وی ایہناں ساریاں توں بوہتا اِختیار ہووے۔
22 خدا نے ساریاں چیزاں وی اوہدے پیراں ہیٹھاں کر دِتیاں نیں تے اوہنوں کلیسیا دِیاں ساریاں چیزاں دا سربراہ بنا دِتا اے۔
23 کلیسیا مسیح دا جسم اے جیہڑی اوہدیاں خوبیاں نال بھری ہوئی اے تے اوہی ساریاں گلاں نُوں ہر طرحاں نال پورا کردا اے۔
