فِلپّیوں دے ناں خط 2:1-30
2 تُسی سارے مسیح نال اِک مُٹھ او۔ ایس لئی محبت دی وجہ توں اِک دُوجے نُوں حوصلہ تے تسلی دَوو تے اِک دُوجے لئی دِلوں فکر، پیار تے ہمدردی ظاہر کرو۔
2 جے تُسی اِنج کرو گے تے مینوں بوہت زیادہ خوشی ہوئے گی۔ آپس چ ایکا رکھو، اِک دُوجے نال پیار کرو، اِکو جہی سوچ رکھو تے مِل کے کم کرو۔
3 غرور چ آ کے کوئی کم نہ کرو، جھگڑالو نہ بنو سگوں خاکساری نال دُوجیاں نُوں اپنے توں وڈا سمجھو۔
4 صرف اپنے بھلے بارے ای نئیں سگوں دُوجیاں دے بھلے بارے وی سوچو۔
5 مسیح یسوع ورگی سوچ رکھو۔
6 بھانویں کہ اوہ خدا ورگا سی فیر وی اوہنے خدا دے اِختیار اُتے قبضہ کرن تے اوہدے برابر بنن بارے سوچیا وی نئیں۔
7 ایہدی بجائے اوہنے اپنا سب کجھ چھڈ دِتا تے غلام بن گیا تے اِک انسان دے روپ چ زمین تے آ گیا۔
8 ایناں ای نئیں، جدوں اوہ انسان بن کے آیا تے اوہ بڑی خاکساری نال مردے دم تک فرمانبردار رہیا، ایتھوں تک کہ اوہنے سُولی* تے جان دے دِتی۔
9 ایسے لئی خدا نے اوہنوں پہلاں توں زیادہ اُچا رُتبہ دِتا تے مہربان ہو کے اوہنوں اوہ ناں دِتا جیہڑا ہر اِک ناں توں اُچا اے
10 تاکہ اسمان چ، زمین اُتے تے زمین دے تھلے* ہر کوئی یسوع دے ناں تے گوڈے ٹیکے۔
11 نالے ہر زبان ساریاں دے سامنے قبول کرے کہ یسوع مسیح مالک اے تاکہ ساڈے خدا باپ دی وڈیائی ہووے۔
12 میرے پیارے بھراوو، تُسی میرے ہوندیاں ہمیشاں فرمانبردار رہے او تے جدوں مَیں تواڈے نال نئیں ہوندا تُسی ہور وی زیادہ فرمانبردار رہندے او۔ ایس لئی مَیں توانوں تاکید کرنا واں کہ تُسی خدا لئی ڈر تے احترام وکھاندے ہوئیاں نجات پان دی کوشش کردے رہوو۔
13 خدا خوشی نال توانوں ہمت بخشدا اے تاکہ تواڈے چ ایہو جہے کم کرن دی خواہش تے طاقت پیدا ہوئے جیہڑے اوہنوں پسند نیں۔
14 کوئی وی کم کردے ویلے بُڑبُڑ یاں بحث نہ کرو
15 تاکہ تُسی خدا دے بےاِلزام تے پاک بچے بن سکو۔ اِنج تُسی ایس دھوکھےباز تے وِگڑی پُشت چ بےداغ ثابت ہووو گے تے دُنیا وچ روشنی وانگوں چمکدے رہوو گے۔
16 تُسی زندگی دے کلام نُوں گُھٹ کے پھڑی رکھو تاکہ مسیح دے دن چ مَیں ایس گلوں خوش ہو سکاں کہ میری دوڑ تے محنت ضائع نئیں گئی۔
17 بھانویں کہ مینوں مے دے نذرانے وانگوں پوری طرحاں ڈولھیا جا رہیا اے، پر فیر وی مَیں خوش آں سگوں تواڈی خوشی چ شامل آں کیونکہ اِنج مَیں تواڈی قربانی چ تے اوس پاک خدمت چ حصےدار بن رہیا واں جیہڑی تُسی اپنے ایمان دی وجہ توں خدا لئی کردے او۔
18 ایسے طرحاں توانوں وی میرے نال خوش ہونا چاہی دا اے۔
19 جے مالک یسوع دی مرضی ہوئی تے مَیں چھیتی تیمُتھیُس نُوں تواڈے کول گھلاں گا تاکہ تواڈا حال چال جان کے مینوں تسلی ملے۔
20 میرے کول اوہدے ورگا ہور کوئی نئیں جیہڑا سچے دل نال تواڈی فکر کردا ہووے
21 کیونکہ باقی سارے اپنے بھلے بارے ای سوچدے نیں، یسوع مسیح دے کم بارے نئیں۔
22 پر تُسی اوہدی چنگی مثال بارے جان دے او کہ جیویں اِک بچہ اپنے پیو دی مدد کردا اے اوسے طرحاں اوہنے خوشخبری نُوں پھیلان چ میرے نال مِل کے بڑی محنت کیتی اے۔
23 ایس لئی جیویں ای مینوں پتہ چل جائے گا کہ میرے نال کیہہ ہوئے گا، مَیں تیمُتھیُس نُوں تواڈے کول گھلن دی کوشش کراں گا۔
24 اصل چ مینوں مالک تے بھروسا اے کہ مَیں وی توانوں چھیتی مِلن آواں گا۔
25 پر فیالحال ضروری اے کہ مَیں اِپَفردِتُس نُوں تواڈے کول بھیجاں جیہڑا میرا بھرا تے ہمخدمت اے۔ اوہ میرے وانگوں مسیح دا فوجی اے تے تواڈے وَلّوں میری خدمت تے مدد کرن لئی آیا اے۔
26 اوہ توانوں ساریاں نُوں مِلن لئی ترس رہیا اے تے ایس گلوں بڑا دُکھی اے کہ توانوں اوہدی بیماری دی خبر ملی سی۔
27 اوہ ایناں بیمار ہو گیا سی کہ مرن والا سی۔ پر خدا نے اوہدے تے رحم کیتا سگوں صرف اوہدے تے ای نئیں، میرے تے وی رحم کیتا تاکہ میرے دُکھ ودھ نہ جان۔
28 ایس لئی مَیں چھیتی توں چھیتی اوہنوں تواڈے کول گھل رہیا واں تاکہ اوہنوں مِل کے تُسی دُبارہ خوش ہو جاؤ تے میری پریشانی وی گھٹ ہو جائے۔
29 ایس لئی اوہنوں خوشی نال ملو جیویں تُسی مالک دے باقی خادماں نُوں مِلدے او تے اوہدے ورگے بھراواں دی قدر کردے رہوو
30 کیونکہ مسیح* دے کم دی خاطر اوہ مرن والا سی تے میری خاطر اوہنے اپنی جان خطرے چ پا دِتی تاکہ اوہ ایتھے تواڈی کمی نُوں پورا کرے تے تواڈے بدلے میری خدمت کرے۔
