لُوقا دی اِنجیل 14:1-35
14 اِک وار یسوع سبت دے دن فریسیاں دے اِک رہنما دے گھر کھانے لئی گیا۔ اوتھے لوک اوہنوں بڑے دھیان نال ویکھ رہے سن۔
2 یسوع دے سامنے اِک بندہ آیا جدا جسم اِک بیماری دی وجہ توں سُجیا ہویا سی۔
3 ایس لئی یسوع نے شریعت دے ماہراں تے فریسیاں نُوں پچھیا: ”کیہہ سبت دے دن کسے نُوں شفا دینا جائز اے یاں نئیں؟“
4 پر اوہناں نے کوئی جواب نہ دِتا۔ فیر یسوع نے اوہدے تے ہتھ رکھیا تے اوہنوں شفا دے کے گھل دِتا۔
5 فیر یسوع نے اوہناں نُوں کہیا: ”جے تواڈا پُتر یاں بیل سبت دے دن کُھوہ چ ڈِگ پووے تے کیہہ تُسی اوہنوں فوراً باہر نئیں کڈھو گے؟“
6 پر اوہ اوہنوں کوئی جواب نہ دے سکے۔
7 یسوع نے ویکھیا کہ کھانے تے آن والے لوک اَگے اَگے جا کے خاص تھانواں تے بہہ رہے نیں۔ ایس لئی اوہنے اوہناں نُوں ایہہ مثال دِتی:
8 ”جدوں تینوں ویاہ دی دعوت تے بلایا جائے تے سب توں اَگے خاص تھاں تے نہ بہہ۔ ہو سکدا اے کہ اوتھے تیرے نالوں وی کسے وڈے بندے نُوں بلایا گیا ہوئے۔
9 فیر دعوت رکھن والا آ کے تینوں کہوے گا: ”ایس بندے نُوں ایتھے بیہن دے۔“ فیر تینوں شرمندہ ہو کے سب توں پچھے بیہنا پووے گا۔
10 ایس لئی جدوں تینوں دعوت تے بلایا جائے تے سب توں پچھے جا کے بہہ۔ فیر جدوں دعوت رکھن والا آ کے تینوں کہوے گا: ”میرے دوست، اَگے جا کے بہہ،“ تے اِنج سارے مہماناں دے سامنے تیری عزت ودھے گی۔
11 جیہڑا وڈا بن دا اے، اوہنوں چھوٹا کیتا جائے گا تے جیہڑا چھوٹا بن دا اے، اوہنوں وڈا کیتا جائے گا۔“
12 فیر یسوع نے دعوت رکھن والے بندے نُوں کہیا: ”جدوں تُوں دوپہر نُوں یاں شام نُوں کوئی دعوت رکھیں تے اپنے دوستاں، بھراواں، رشتےداراں یاں اپنے امیر گوانڈھیاں نُوں نہ بلا، نئیں تے بدلے چ اوہ وی تینوں اپنے گھر کھانے تے بلان گے تے اِنج حساب برابر ہو جائے گا۔
13 ایہدی بجائے جدوں تُوں دعوت رکھیں تے ایہو جہے لوکاں نُوں بلا جیہڑے غریب، معذور، لنگڑے تے اَنھے نیں۔
14 فیر تینوں خوشی ملے گی کیونکہ اوہناں کول بدلے چ تینوں دین لئی کجھ نئیں اے۔ تیری ایس نیکی دا اَجر تینوں اوہدوں ملے گا جدوں نیک لوکاں نُوں زندہ کیتا جائے گا۔“
15 ایہہ سُن کے اِک مہمان نے یسوع نُوں کہیا: ”خوش اے اوہ جیہڑا خدا دی بادشاہی چ روٹی کھائے گا۔“
16 یسوع نے اوہنوں کہیا: ”اِک بندے نے شام نُوں بڑی شاندار دعوت رکھی تے بوہت سارے لوکاں نُوں بلایا۔
17 جدوں کھانے دا ویلا آیا تے اوہنے اپنے غلام نُوں مہماناں نُوں ایہہ دَسن لئی گھلیا: ”آ جاؤ، سب کجھ تیار اے۔“
18 پر اوہ سارے بہانے بنان لگ پئے۔ اِک نے کہیا: ”مَیں اِک کھیت خریدیا اے تے اوہنوں ویکھن جا رہیا واں۔ معاف کرِیں، مَیں نئیں آ سکدا۔“
19 اِک ہور نے کہیا: ”مَیں بیلاں دِیاں پنج جوڑیاں خریدیاں نیں تے اوہناں نُوں کھیتاں چ اَزمان جا رہیا واں۔ معاف کرِیں، مَیں نئیں آ سکدا۔“
20 اِک ہور نے کہیا: ”میرا نواں نواں ویاہ ہویا اے۔ ایس لئی مَیں نئیں آ سکدا۔“
21 فیر غلام نے واپس آ کے ایہہ ساریاں گلاں مالک نُوں دَسیاں۔ گھر دے مالک نُوں بڑا غصہ آیا تے اوہنے غلام نُوں کہیا: ”چھیتی چھیتی جا تے شہر دے چونکاں تے گلیاں وچوں غریب، معذور، اَنھے تے لنگڑے لوکاں نُوں لے کے آ۔“
22 تھوڑی دیر بعد غلام نے واپس آ کے کہیا: ”مالک، جیہڑا کم تُوں کہیا سی، اوہ ہو گیا اے۔ پر حالے وی ہور لوکاں لئی جگہ ہے وے۔“
23 فیر مالک نے غلام نُوں کہیا: ”شہر دے باہر سڑکاں تے کھیتاں وَل جا تے لوکاں نُوں دعوت چ آن لئی منا* تاکہ میرا گھر بھر جائے۔
24 مَیں توانوں کہنا واں کہ جیہڑے مہماناں نُوں بلایا گیا سی، اوہناں وچوں اِک وی ایس دعوت دا کھانا نئیں چکھے گا۔““
25 بوہت سارے لوک یسوع نال سفر کر رہے سن۔ اوہنے اوہناں وَل مُڑ کے کہیا:
26 ”جے کوئی میرا شاگرد بننا* چاہندا اے، پر اپنے ماں پیو، بیوی بچیاں، بھین بھراواں ایتھوں تک کہ اپنے آپ* توں نفرت* نئیں کردا، اوہ میرا شاگرد نئیں بن سکدا۔
27 جیہڑا وی اپنی سُولی چُک کے میرے پچھے پچھے نئیں آندا، اوہ میرا شاگرد نئیں بن سکدا۔
28 فرض کرو کہ تُسی اِک عمارت* بنانا چاہندے او۔ کیہہ تُسی پہلاں بہہ کے ایہہ حساب نئیں لاؤ گے کہ تواڈے کول ایس کم نُوں پورا کرن لئی پیسے ہے نیں یاں نئیں؟
29 نئیں تے ہو سکدا اے کہ تُسی نِیہہ تے رکھو، پر عمارت نُوں مکمل نہ کر سکو۔ فیر سارے لوک تواڈا مذاق اُڈان گے
30 تے کہن گے: ”ایس بندے نے عمارت نُوں بنانا شروع تے کیتا، پر اوہنوں مکمل نئیں کر سکیا۔“
31 یاں فرض کرو کہ اِک بادشاہ جنگ لئی نکلدا اے۔ کیہہ اوہ پہلاں بہہ کے ایہہ مشورہ نئیں کرے گا کہ اوہ اپنے 10 ہزار فوجیاں نال اوس دُشمن بادشاہ دا مقابلہ کیویں کرے گا جیہڑا 20 ہزار فوجی لے کے آ رہیا اے؟
32 جے اوہنوں لگدا اے کہ اوہ مقابلہ نئیں کر سکے گا تے جدوں دُوجا بادشاہ حالے دُور ای ہوئے گا تے اوہ اوہدے کول اپنے نمائندے گھل کے اوہدے نال صلح کرن دی کوشش کرے گا۔
33 ایسے طرحاں یاد رکھو جیہڑا اپنیاں ساریاں چیزاں نُوں قربان نئیں کردا،* اوہ میرا شاگرد نئیں بن سکدا۔
34 بےشک لُون چنگی شے وے۔ پر جے لُون دا سواد ای ختم ہو جائے تے فیر اوہنوں دُبارہ سوادی کیویں بنایا جا سکدا اے؟
35 ایہہ نہ تے مٹی تے نہ ای کھاد دے طور تے استمال ہو سکدا اے سگوں لوک ایہنوں سُٹ دیندے نیں۔ میریاں گلاں نُوں دھیان نال سُنو۔“
فٹ نوٹ
^ یونانی چ: ”مجبور کر۔“
^ یونانی چ: ”میرے کول آنا۔“
^ یونانی چ: ”اپنی جان۔“
^ یاں، ”گھٹ محبت۔“
^ یونانی چ: ”بُرج، مینار۔“
^ یونانی چ: ”خدا حافظ نئیں کہندا۔“
