لُوقا دی اِنجیل 17:1-37
17 فیر یسوع نے اپنے شاگرداں نُوں کہیا: ”لوکاں نُوں گمراہ تے کیتا ای جائے گا، پر لعنت اوس بندے تے جیہڑا گمراہ کردا اے۔
2 اوہدے لئی چنگا ہوئے گا کہ اوہدے گلے چ چکی دا پُڑ پا کے اوہنوں سمندر چ سُٹ دِتا جائے بجائے ایہدے کہ اوہ ایہناں نُمانیاں* وچوں کسے اِک نُوں وی گمراہ کرے۔
3 خبردار رہوو۔* جے تیرا بھرا تیرے خلاف گُناہ کردا اے تے اوہنوں سمجھا تے جے اوہ معافی منگدا* اے تے اوہنوں معاف کر دے۔
4 جے اوہ دن چ سَت واری وی تیرے خلاف گُناہ کردا اے تے سَت واری تیرے کول آ کے کہندا اے: ”مینوں معاف کر دے،“* تے تُوں اوہنوں ضرور معاف کر دوِیں۔“
5 فیر رسولاں نے مالک یسوع نُوں کہیا: ”سانوں ہور ایمان دے۔“
6 مالک نے کہیا: ”جے تواڈے اندر رائی دے دانے جِنّاں وی ایمان ہے وے تے تُسی شہتوت دے ایس درخت نُوں کہوو گے کہ ”ایتھوں اُکھڑ کے سمندر چ چلا جا!“ تے ایہہ تواڈا کہنا منے گا۔
7 فرض کرو کہ تواڈا اِک غلام کھیت چ ہل چلا کے یاں بھیڈ بکریاں چرا کے گھر واپس آندا اے۔ کیہہ تُسی اوہنوں ایہہ کہوو گے: ”چھیتی چھیتی ایدھر آ تے بہہ کے میز تے کھانا کھا لے“؟
8 ایہدی بجائے کیہہ تُسی اوہنوں ایہہ نئیں کہوو گے: ”میرے لئی شام دا کھانا بنا تے لک بنھ کے اوہدوں تک میری خدمت کر جدوں تک مَیں کھا پی نئیں لیندا۔ اوہدے بعد تُوں وی کھا پی لوِیں“؟
9 تُسی اپنے غلام دے شکرگزار نئیں ہووو گے کیونکہ اوہنے تے بس اپنا فرض پورا کیتا اے۔
10 ایس لئی جدوں تُسی وی اوہ سارے کم کر لوو جیہڑے توانوں دِتے گئے نیں تے کہوو: ”اَسی نکمّے غلام آں۔ اَسی تے بس اوہی کیتا اے جو سانوں کرنا چاہی دا سی۔““
11 یروشلم نُوں جاندے ویلے یسوع سامریہ تے گلیل دے علاقے چوں لنگھیا۔
12 جدوں اوہ اِک پِنڈ چ گیا تے دس کوڑھی اوہنوں مِلن آئے۔ پر اوہ اوہدے توں دُور کھلوتے رہے۔
13 اوہناں نے اُچی اُچی کہیا: ”اَے اُستاد، یسوع، ساڈے تے رحم کر!“
14 اوہناں نُوں ویکھ کے یسوع نے کہیا: ”جاؤ، اپنے آپ نُوں کاہناں نُوں وکھاؤ۔“ فیر جدوں اوہ جا رہے سن تے راہ چ اوہ ٹھیک* ہو گئے۔
15 جدوں اوہناں وچوں اِک نے ویکھیا کہ اوہ ٹھیک ہو گیا اے تے اوہ اُچی اُچی خدا دی وڈیائی کردے ہوئیاں واپس آیا۔
16 اوہنے یسوع دے پیراں چ مُونہہ پرنے ڈِگ کے شکریہ کہیا۔ اوہ بندہ سامری سی۔
17 یسوع نے کہیا: ”کیہہ دس دے دس کوڑھی ٹھیک نئیں ہوئے؟ تے فیر باقی نو کتھے نیں؟
18 کیہہ ایس سامری دے علاوہ ہور کوئی خدا دی وڈیائی کرن واپس نئیں آیا؟“
19 فیر یسوع نے اوس بندے نُوں کہیا: ”اُٹھ تے اپنی راہ چلا جا۔ تُوں اپنے ایمان دی وجہ توں ٹھیک ہویا ایں۔“
20 فیر اِک دن فریسیاں نے یسوع نُوں پچھیا: ”خدا دی بادشاہی کدوں آئے گی؟“ یسوع نے جواب دِتا: ”خدا دی بادشاہی ایس طرحاں نئیں آئے گی کہ ساریاں نُوں پتہ چلے
21 تے نہ ای اوس ویلے لوک ایہہ کہن گے: ”ایتھے ویکھو!“ یاں ”اوتھے ویکھو!“ کیونکہ خدا دی بادشاہی تواڈے وچکار اے۔“
22 فیر اوہنے اپنے شاگرداں نُوں کہیا: ”اوہ ویلا وی آئے گا جدوں تُسی انسان دے بیٹے دے زمانے دا صرف اِک دن ویکھنا چاہوو گے، پر ویکھ نئیں سکو گے۔
23 لوک توانوں کہن گے: ”ویکھو، اوہ اوتھے وے!“ یاں ”ویکھو، اوہ ایتھے وے!“ پر تُسی باہر نہ جانا یاں اوہناں دے مغر نہ لگ جانا
24 کیونکہ جیس طرحاں بجلی اسمان دے اِک سِرے توں لے کے دُوجے سِرے تک چمکدی اے، اوسے طرحاں انسان دے بیٹے دے زمانے چ ہوئے گا۔
25 پر پہلاں اوہدے تے بڑا ظلم کیتا جائے گا تے ایس پُشت دے لوک اوہنوں ردّ کر دین گے۔
26 ایہدے علاوہ انسان دے بیٹے دے زمانے چ وی اونویں ای ہوئے گا جیویں نوح دے زمانے چ ہویا سی۔
27 اوہدوں لوک کھا پی رہے سن تے ویاہ شادی کر رہے سن۔* ایہہ سارے کم اوہدوں تک ہوندے رہے جدوں تک نوح کشتی چ نئیں چلا گیا۔ فیر طوفان آیا تے اوہ سارے مارے گئے۔
28 لُوط دے دِناں چ وی اِنج ای ہو رہیا سی۔ لوک کھا پی رہے سن، چیزاں ویچ تے خرید رہے سن، فصلاں بو رہے سن تے گھر بنا رہے سن۔
29 پر جیس دن لُوط سدوم شہر چوں نکلیا، اسمان توں اَگ تے گندھک نازل ہوئی جنہے ساریاں نُوں ساڑ کے سواہ کر دِتا۔
30 جیس دن انسان دا بیٹا ظاہر ہوئے گا اوس دن وی اِنج ای ہوئے گا۔
31 اوس دن جیہڑا بندہ کوٹھے تے ہوئے پر اوہدیاں چیزاں گھر چ ہون، تے اوہ تھلے آ کے اوہناں نُوں لین لئی نہ جائے۔ ایسے طرحاں جیہڑا بندہ باہر کھیت چ ہوئے، اوہ اپنیاں چیزاں لین لئی واپس اپنے گھر نہ جائے۔
32 یاد رکھو کہ لُوط دی بیوی نال کیہہ ہویا سی۔
33 جیہڑا وی اپنی جان بچانا چاہندا اے، اوہ ایہنوں گنوا بیٹھے گا۔ پر جیہڑا ایہنوں گنواندا اے، اوہ ایہنوں بچا لوے گا۔
34 مَیں توانوں کہنا واں کہ اوس رات دو جنے منجی تے سوں رہے ہون گے، اِک نُوں نال کھڑیا جائے گا تے دُوجے نُوں چھڈ دِتا جائے گا۔
35 دو عورتاں اِکو چکی پیہہ رہیاں ہون گیاں، اِک نُوں نال کھڑیا جائے گا تے دُوجی نُوں چھڈ دِتا جائے گا۔“
36 —*
37 ایہہ گل سُن کے شاگرداں نے اوہنوں پچھیا: ”مالک، ایہہ کتھے ہوئے گا؟“ اوہنے جواب دِتا: ”چیلاں اوتھے ای کٹھیاں ہوندیاں نیں جِتھے لاش پئی ہوندی اے۔“
فٹ نوٹ
^ یعنی یسوع تے ایمان رکھن والے۔
^ یاں، ”اپنی سوچ تے چال چلن تے نظر رکھو۔“
^ یونانی چ: ”توبہ کردا۔“
^ یونانی چ: ”مَیں توبہ کرنا واں۔“
^ یونانی چ: ”پاک، صاف۔“
^ یونانی چ: ”آدمی ویاہ کررہے سن تے عورتاں ویائیاں جا رہیاں سن۔“
^ ایہہ ایت کئی پرانے نسخیاں وچ نئیں اے جدا مطلب اے کہ ایہہ اِلہامی کلام دا حصہ نئیں اے۔
