لُوقا دی اِنجیل 22:1-71
-
مذہبی رہنما یسوع نُوں قتل کرن دا منصوبہ بناندے نیں (1-6)
-
آخری فسح دی عید دی تیاری (7-13)
-
یسوع دی موت دی یاد منان دی شروعات (14-20)
-
میرے نال دھوکھا کرن والا میرے نال بیٹھا اے (21-23)
-
وڈا بنن بارے بحث (24-27)
-
یسوع بادشاہی بارے عہد کردا اے (28-30)
-
پطرس دے اِنکار کرن بارے پیشینگوئی (31-34)
-
تیار رہن دی لوڑ، دو تلواراں (35-38)
-
زیتون دے پہاڑ تے یسوع دی دُعا (39-46)
-
یسوع نُوں گِرفتار کیتا جاندا اے (47-53)
-
پطرس یسوع دا اِنکار کردا اے (54-62)
-
یسوع دا مذاق اُڈایا جاندا اے (63-65)
-
وڈی عدالت چ مقدمہ (66-71)
22 ہُن بےخمیری روٹی دی عید جنہوں فسح دی عید وی کہیا جاندا اے، نیڑے سی۔
2 وڈے کاہن تے شریعت دے عالم یسوع نُوں مارنا چاہندے سن، پر لوکاں توں ڈردے سن۔ ایس لئی اوہ اوہنوں مارن دا کوئی ودھیا طریقہ لبھ رہے سن۔
3 فیر شیطان نے یہوداہ اِسکریوتی نُوں اپنے وَس چ کر لیا جیہڑا 12 رسولاں وچوں سی۔
4 یہوداہ نے جا کے وڈے کاہناں تے ہیکل دے نگراناں نُوں دَسیا کہ اوہ کیویں یسوع نُوں اوہناں دے حوالے کرے گا۔
5 اوہدی گل سُن کے اوہ بڑے خوش ہوئے تے اوہنوں چاندی دے سِکّے دین دا وعدہ کیتا۔
6 ایس لئی یہوداہ من گیا تے اوہدوں توں ای یسوع نُوں پھڑوان دا ایہو جیہا موقع لبھن لگ پیا جدوں اوہدے آلے دَوالے بِھیڑ نہ ہووے۔
7 بےخمیری روٹی دی عید دے پہلے دن جدوں فسح دے جانور نُوں قربان کیتا جاندا اے،
8 یسوع نے پطرس تے یوحنا نُوں کہیا: ”جاؤ تے ساڈے لئی فسح دا کھانا تیار کرو۔“
9 اوہناں نے کہیا: ”اَسی ایہنوں کتھے تیار کریئے؟“
10 اوہنے اوہناں نُوں کہیا: ”جدوں تُسی شہر دے اندر جاؤ گے تے توانوں اِک بندہ ملے گا جنہے مٹی دا گھڑا چُکیا ہوئے گا۔ اوہدے پچھے پچھے اوس گھر چ چلے جانا جدے چ اوہ جائے گا
11 تے اوس گھر دے مالک نُوں کہنا: ”اُستاد پچھ رہیا اے کہ ”اوہ کمرہ کتھے وے جِتھے مَیں اپنے شاگرداں نال فسح دا کھانا کھا سکنا واں؟““
12 اوہ بندہ توانوں اُتے اِک وڈا کمرہ وکھائے گا جیہڑا ساڈے لئی تیار کیتا گیا اے۔ اوتھے کھانا تیار کرنا۔“
13 ایس لئی شاگرد چلے گئے تے سب کجھ اُنج ای ہویا جیویں یسوع نے اوہناں نُوں دَسیا سی تے اوہناں نے فسح دی تیاری کیتی۔
14 جدوں کھانا کھان دا وقت ہو گیا تے یسوع اپنے رسولاں نال میز تے بہہ گیا۔
15 اوہنے اوہناں نُوں کہیا: ”میری بڑی خواہش سی کہ مَیں تکلیف سہن توں پہلاں تواڈے نال فسح دا کھانا کھاواں
16 کیونکہ مَیں توانوں کہنا واں کہ مَیں ایہنوں دُبارہ اوہدوں تک نئیں کھاواں گا جدوں تک خدا دی بادشاہی چ ایہدے بارے ساریاں گلاں پوریاں نہ ہون جان۔“
17 فیر اوہنے اِک پیالہ لے کے دُعا کیتی تے کہیا: ”ایہہ لوو تے سارے واری واری ایہدے چوں پیو
18 کیونکہ مَیں توانوں کہنا واں کہ ہُن مَیں انگوراں دی مے اوہدوں تک نئیں پیاں گا جدوں تک خدا دی بادشاہی نہ آ جائے۔“
19 فیر اوہنے روٹی لئی تے دُعا کر کے توڑی تے شاگرداں نُوں دِتی تے کہیا: ”ایہہ میرے جسم وَل اشارہ کردی اے جیہڑا تواڈی خاطر قربان کیتا جائے گا۔ میری یاد چ ایسے طرحاں کردے رہوو۔“
20 جدوں اوہناں نے کھانا کھا لیا تے یسوع نے مے دے پیالے نال وی ایسے طرحاں کیتا تے کہیا: ”ایہہ پیالہ نویں عہد وَل اشارہ کردا اے جنہوں اوس خون دے ذریعے قائم کیتا جائے گا جیہڑا تواڈے لئی وگایا جائے گا۔
21 پر ویکھو، مینوں دھوکھے نال پھڑوان والا میز تے میرے نال بیٹھا اے۔
22 انسان دے بیٹے نال اوہ سب تے ہونا ای اے جو اوہدے بارے طے کیتا گیا اے۔ پر افسوس اوس بندے تے جیہڑا اوہنوں دھوکھا دَوے گا۔“
23 ایس لئی رسول آپس چ گل کرن لگ پئے کہ اوہناں وچوں کون ایہو جہی حرکت کر سکدا اے۔
24 پر فیر اوہناں چ ایہہ گرما گرم بحث چھڑ گئی کہ اوہناں وچوں سب توں وڈا کون اے۔
25 پر یسوع نے اوہناں نُوں کہیا: ”دُنیا دے بادشاہ لوکاں تے رُعب پاندے نیں تے اِختیار رکھن والیاں نُوں وڈا* سمجھیا جاندا اے۔
26 پر تُسی ایہو جہے نہ بنو سگوں جیہڑا تواڈے چ سب توں وڈا اے، اوہ ساریاں توں چھوٹا بنے تے جیہڑا پیشوائی کردا اے، اوہ خادم بنے۔
27 ذرا سوچو کہ اصل چ وڈا کون اے، جیہڑا میز تے بہہ کے کھانا کھاندا اے یاں جیہڑا خدمت کردا اے۔ کیہہ اوہ نئیں جیہڑا بہہ کے کھانا کھاندا اے؟ پر ویکھو، مَیں تواڈے ساریاں دی خدمت کر رہیا واں۔
28 پر تُسی میریاں اَزمیشاں چ میرا ساتھ دِتا اے۔
29 ایس لئی جیویں میرے باپ نے مینوں بادشاہی دین دا عہد کیتا اے، اوسے طرحاں مَیں وی تواڈے نال عہد کرنا واں
30 کہ تُسی میری بادشاہی چ میری میز تے کھاؤ پیو گے تے تختاں تے بہہ کے اِسرائیل دے 12 قبیلیاں دا اِنصاف کرو گے۔
31 شمعون،* شمعون، شیطان چاہندا اے کہ اوہ توانوں ساریاں نُوں کنک وانگوں چھٹے۔
32 پر مَیں خدا کولوں تیرے لئی اِلتجا کیتی اے کہ تُوں ایمان توں پھر نہ جائیں۔ جدوں تُوں توبہ کر کے واپس آئیں گا تے اپنے بھراواں دا حوصلہ ودھائیں۔“
33 فیر پطرس نے اوہنوں کہیا: ”مالک، مَیں تے تیرے نال قید ہون تے مرن لئی وی تیار آں۔“
34 پر یسوع نے اوہنوں کہیا: ”پطرس، مَیں تینوں کہنا واں کہ اَج کُکڑ دے بانگ دین توں پہلاں تُوں تِن واری مینوں جانن توں اِنکار کریں گا۔“
35 یسوع نے رسولاں نُوں ایہہ وی کہیا: ”جدوں مَیں توانوں مُنادی لئی گھلن توں پہلاں کہیا سی کہ اپنے نال پیسے، کھانے دی تھیلی تے جُتیاں دا وادھو جوڑا نہ لے کے جانا تے کیہہ توانوں کسے شے دی کمی ہوئی سی؟“ اوہناں نے کہیا: ”نئیں۔“
36 فیر اوہنے اوہناں نُوں کہیا: ”پر ہُن مَیں توانوں کہنا واں کہ جے کسے کول پیسے یاں کھانے دی تھیلی ہے وے تے اوہ اوہنوں نال کھڑے تے جدے کول تلوار نئیں اے، اوہ اپنی چادر ویچ کے اِک تلوار خرید لوے
37 کیونکہ مَیں توانوں کہنا واں کہ پاک کلام چ میرے بارے جو کجھ وی لکھیا اے، اوہ ضرور پورا ہوئے گا یعنی ایہہ کہ ”اوہ مُجرماں چ گنیا گیا۔“ ایہہ گل میرے تے پوری ہو وی رہی اے۔“
38 فیر رسولاں نے کہیا: ”مالک، ویکھ ساڈے کول دو تلواراں نیں۔“ اوہنے کہیا: ”کافی نیں۔“
39 فیر یسوع اوتھوں نکل کے ہمیشاں وانگوں زیتون دے پہاڑ تے گیا تے شاگرد وی اوہدے پچھے گئے۔
40 اوتھے پونچ کے یسوع نے اوہناں نُوں کہیا: ”دُعا کردے رہوو تاکہ تُسی کسے اَزمیش چ نہ پووو۔“
41 فیر اوہ اوہناں توں تھوڑی دُور گیا تے زمین تے گوڈے ٹیک کے دُعا کرن لگ پیا۔
42 اوہنے کہیا: ”باپ، جے تُوں چاہویں تے ایہہ پیالہ میرے توں ہٹا دے۔ پر فیر وی میری نئیں سگوں تیری مرضی پوری ہوئے۔“
43 فیر اسمان توں اِک فرشتہ اوہدے کول آیا تے اوہنے اوہدا حوصلہ ودھایا۔
44 پر یسوع ایناں پریشان سی کہ اوہ ہور وی زیادہ فریاد کرن لگ پیا تے اوہدا پسینہ خون دے قطریاں وانگوں بن کے زمین تے ڈِگن لگ پیا۔
45 دُعا کرن دے بعد جدوں اوہ اپنے شاگرداں کول گیا تے اوہنے ویکھیا کہ اوہ سوں رہے نیں کیونکہ دُکھ دے مارے اوہناں دی ہمت جواب دے گئی سی۔
46 اوہنے اوہناں نُوں کہیا: ”تُسی سوں کیوں رہے او؟ اُٹھو تے دُعا کردے رہوو تاکہ تُسی کسے اَزمیش چ نہ پووو۔“
47 یسوع حالے ایہہ گل کہہ ای رہیا سی کہ ویکھو! لوکاں دی اِک بِھیڑ آئی جدے اَگے اَگے یہوداہ سی جیہڑا 12 رسولاں وچوں سی۔ اوہنے کول آ کے یسوع نُوں چُمیا۔
48 یسوع نے اوہنوں کہیا: ”یہوداہ، کیہہ تُوں انسان دے بیٹے نُوں ایس لئی چُم رہیا ایں کہ اوہنوں دھوکھے نال پھڑوا سکیں؟“
49 جدوں یسوع دے شاگرداں نے ویکھیا کہ کیہہ ہون والا اے تے اوہناں نے کہیا: ”مالک، کیہہ اَسی اپنیاں تلواراں نال حملہ کریئے؟“
50 اوہناں وچوں اِک نے اپنی تلوار کڈھی تے اعلیٰ کاہن دے غلام دا کن لاہ دِتا۔
51 پر یسوع نے کہیا: ”بس بوہت ہو گیا۔“ فیر اوہنے غلام دے کن نُوں چُھو کے ٹھیک کر دِتا۔
52 ایہدے بعد یسوع نے وڈے کاہناں، ہیکل دے نگراناں تے بزرگاں نُوں جیہڑے اوہنوں پھڑن آئے سن کہیا: ”کیہہ مَیں کوئی ڈاکو آں جیہڑا تُسی مینوں تلواراں تے ڈانگاں نال پھڑن آئے ا و؟
53 مَیں ہر روز ہیکل چ تواڈے سامنے تلیم دینا ہُنا ساں، اوہدوں تے تُسی مینوں نئیں پھڑیا۔ پر ہُن تواڈا ویلا اے تے نھیرے دا راج اے۔“
54 فیر اوہ یسوع نُوں گِرفتار کر کے اعلیٰ کاہن دے گھر لے گئے۔ پطرس وی اوہناں دے پچھے پچھے گیا۔ پر اوہ تھوڑی دُور ای رہیا۔
55 لوک ویہڑے دے وچکار اَگ بال کے اوہدے آلے دَوالے بیٹھے ہوئے سن تے پطرس وی اوہناں نال بیٹھا ہویا سی۔
56 پر اِک نوکرانی نے اوہنوں اَگ دے نیڑے بیٹھے ویکھ لیا۔ فیر اوہنے بڑے غور نال اوہنوں ویکھ کے کہیا: ”ایہہ بندہ وی اوہدے نال سی۔“
57 پر پطرس نے اِنکار کردے ہوئیاں کہیا: ”بیبی، مَیں اوہنوں نئیں جان دا۔“
58 تھوڑی دیر بعد اِک ہور بندے نے پطرس نُوں ویکھ کے کہیا: ”تُوں وی اوہناں دا ساتھی ایں۔“ پر اوہنے کہیا: ”نئیں بھراوا، مَیں نئیں آں۔“
59 تقریباً اِک گھنٹے بعد اِک ہور بندہ بڑے یقین نال کہن لگ پیا: ”ایہہ پکا اوہدے نال سی کیونکہ ایہہ وی گلیل توں اے۔“
60 پر پطرس نے کہیا: ”بھراوا، مینوں نئیں پتہ کہ تُوں کیہہ کہہ رہیا ایں۔“ جدوں اوہ ایہہ گل کہہ ای رہیا سی تے اوسے ویلے کُکڑ نے بانگ دِتی۔
61 اوہدوں مالک یسوع نے مُڑ کے پطرس وَل ویکھیا تے پطرس نُوں مالک دی اوہ گل یاد آئی جدوں اوہنے کہیا سی کہ ”اَج کُکڑ دے بانگ دین توں پہلاں تُوں تِن واری مینوں جانن توں اِنکار کریں گا۔“
62 فیر اوہ باہر جا کے پُھٹ پُھٹ کے رون لگ پیا۔
63 یسوع دی نگرانی کرن والے سپاہی اوہدا مذاق اُڈان لگ پئے تے اوہنوں مارن کُٹن لگ پئے۔
64 اوہناں نے کپڑے نال اوہدا مُونہہ ڈھک کے اوہنوں وار وار پچھیا: ”جے تُوں واقعی نبی ایں تے دَس تینوں کنہے ماریا اے؟“
65 اوہناں نے اوہدے خلاف بڑیاں گلاں کیتیاں تے ہور وی کفر بکے۔
66 فیر جدوں دن چڑھیا تے بزرگاں دی جماعت یعنی وڈے کاہن تے شریعت دے عالم جمع ہوئے تے یسوع نُوں وڈی عدالت چ لے گئے تے کہیا:
67 ”جے تُوں مسیح ایں تے سانوں صاف صاف دَس۔“ پر یسوع نے کہیا: ”جے مَیں توانوں دَس وی دَواں تے تُسی میرا یقین نئیں کرو گے۔
68 نالے جے مَیں توانوں کوئی سوال پچھاں تے تُسی جواب نئیں دَوو گے۔
69 پر اَج توں بعد انسان دا بیٹا طاقتور خدا دے سجے ہتھ بیٹھے گا۔“
70 ایہہ سُن کے اوہناں ساریاں نے کہیا: ”کیہہ تُوں ایہہ کہہ رہیا ایں کہ تُوں خدا دا پُتر ایں؟“ اوہنے اوہناں نُوں کہیا: ”تُسی آپ ای کہہ دِتا اے کہ مَیں خدا دا پُتر آں۔“
71 اوہناں نے کہیا: ”بھلا ہُن سانوں کسے ہور گواہی دی کیہہ لوڑ اے؟ اَسی آپ ایہدے مُونہوں سُن لیا اے۔“
