لُوقا دی اِنجیل 7:1-50
7 لوکاں نُوں ایہہ ساریاں گلاں دَسن دے بعد یسوع کفرنحوم گیا۔
2 اوتھے اِک فوجی افسر* دا غلام ایناں بیمار سی کہ مرن والا سی۔ افسر اوہنوں بوہت پیار کردا سی۔
3 جدوں افسر نے یسوع بارے سُنیا تے اوہنے یہودیاں دے کجھ بزرگاں نُوں اوہدے کول گھلیا تاکہ یسوع آ کے اوہدے غلام نُوں ٹھیک کر دَوے۔
4 بزرگ یسوع کول آئے تے اوہدے اَگے ایہہ مِنت کرن لگ پئے: ”ساڈی درخاست اے کہ تُوں اوہدی مدد کر۔ اوہ اِک چنگا بندہ اے
5 کیونکہ اوہ ساڈی قوم نال محبت کردا اے تے اوہنے ساڈی عبادتگاہ وی بنوائی اے۔“
6 ایس لئی یسوع اوہناں دے نال چلا گیا۔ اوہ گھر دے نیڑے ای سی کہ فوجی افسر نے اپنے دوست اوہدے کول گھلے تے اوہناں نے اوہدے وَلّوں یسوع نُوں کہیا: ”جناب، تُسی تکلیف نہ کرو۔ مَیں ایس لائق نئیں آں کہ تُسی میرے گھر آؤ۔
7 مَیں آپ توانوں مِلن ایس لئی نئیں آیا کیونکہ مَیں اپنے آپ نُوں ایس قابل نئیں سمجھدا۔ تُسی بس اپنے مُونہوں کہہ ای دَوو تے میرا نوکر ٹھیک ہو جائے گا۔
8 مَیں وی کسے دے تھلے کم کرنا واں تے میرے تھلے وی کئی فوجی کم کردے نیں۔ جدوں مَیں اِک نُوں کہنا واں کہ ”اودھر جا!“ تے اوہ جاندا اے تے جدوں دُوجے نُوں کہنا واں کہ ”ایدھر آ!“ تے اوہ آندا اے تے جدوں مَیں اپنے غلام نُوں حکم دینا واں کہ ”ایہہ کم کر!“ تے اوہ کردا اے۔“
9 ایہہ گلاں سُن کے یسوع حیران رہ گیا تے اوہنے مُڑ کے اپنے پچھے آ رہے لوکاں نُوں کہیا: ”مَیں توانوں کہنا واں کہ مَیں اِسرائیل چ وی اینے مضبوط ایمان والا بندہ نئیں ویکھیا۔“
10 جیہڑے بندیاں نُوں فوجی افسر نے بھیجیا سی، اوہناں نے گھر آ کے ویکھیا کہ غلام بالکل ٹھیک ہو گیا اے۔
11 ایہدے بعد یسوع شہر نائین گیا تے اوہدے نال اوہدے شاگرد تے ہور بوہت سارے لوک وی سن۔
12 جدوں اوہ شہر دے پھاٹک دے نیڑے پونچیا تے ویکھو! لوک اِک بندے دا جنازہ لے کے جا رہے سن۔ اوہ اپنی بیوہ ماں دا اِکو اِک پُتر سی۔ اوس عورت نال شہر دے بوہت سارے لوک وی جا رہے سن۔
13 جدوں مالک یسوع نے اوس بیوہ نُوں ویکھیا تے اوہنوں اوہدے تے بڑا ترس آیا تے یسوع نے اوہنوں کہیا: ”نہ رو۔“
14 فیر اوہنے جا کے اوس منجی تے ہتھ رکھیا جدے تے اوس مُنڈے دی لاش پئی ہوئی سی تے منجی چُکن والے رُک گئے۔ فیر یسوع نے کہیا: ”پُتر، مَیں تینوں کہنا واں اُٹھ جا!“
15 اوہ مُنڈا اُٹھ پیا تے گلاں کرن لگ پیا تے یسوع نے اوہنوں اوہدی ماں دے حوالے کر دِتا۔
16 ایہہ ویکھ کے سارے ڈر گئے تے خدا دی وڈیائی کردے ہوئیاں کہن لگ پئے: ”ساڈے اپنے لوکاں وچوں اِک وڈا نبی آیا اے،“ تے ”خدا نے اپنی قوم نُوں یاد کیتا اے۔“
17 یسوع دے ایس معجزے دی خبر پورے یہودیہ تے آلے دَوالے دے علاقیاں چ پھیل گئی۔
18 یوحنا دے شاگرداں نے ایہہ ساریاں گلاں یوحنا نُوں دَسیاں۔
19 ایس لئی یوحنا نے اپنے دو شاگرداں نُوں بلایا تے اوہناں نُوں مالک یسوع کول ایہہ پچھن لئی گھلیا: ”کیہہ تُوں اوہی ایں جنہے آنا سی یاں اَسی کسے ہور دا اِنتظار کریئے؟“
20 اوہناں نے یسوع کول آ کے کہیا: ”یوحنا بپتسمہ دین والے نے سانوں تیرے کول ایہہ پچھن لئی گھلیا اے کہ ”کیہہ تُوں اوہی ایں جنہے آنا سی یاں اَسی کسے ہور دا اِنتظار کریئے؟““
21 اوس ویلے یسوع نے بوہت سارے لوکاں نُوں بیماریاں توں شفا دِتی، ایتھوں تک کہ وڈیاں وڈیاں بیماریاں توں وی۔ نالے اوہنے لوکاں چوں باغی فرشتیاں نُوں کڈھیا تے بوہت سارے اَنھے لوکاں دِیاں اَکھاں نُوں روشن کیتا۔
22 فیر اوہنے یوحنا دے شاگرداں نُوں کہیا: ”جا کے یوحنا نُوں اوہ ساریاں گلاں دَسو جیہڑیاں تُسی ویکھیاں تے سُنیاں نیں کہ اَنھے ویکھ رہے نیں، لنگڑے ٹُر پھر رہے نیں، کوڑھی شفا پا رہے نیں، بولھے سُن رہے نیں، مُردیاں نُوں زندہ کیتا جا رہیا اے تے غریباں نُوں خوشخبری سُنائی جا رہی اے۔
23 خوش اے اوہ جیہڑا میرے بارے شک نئیں کردا۔“*
24 جدوں یوحنا دے شاگرد چلے گئے تے یسوع لوکاں نُوں یوحنا بارے کہن لگ پیا: ”تُسی ویرانے چ کیہہ ویکھن گئے سو؟ کیہہ ہوا نال ہِلدے ہوئے کانے نُوں؟
25 فیر تُسی کیہہ ویکھن گئے سو؟ کیہہ ریشمی کپڑے پائے ہوئے آدمی نُوں؟ ایہو جہے شاندار کپڑے پان والے تے عیش دی زندگی جین والے لوک محلاں چ رہندے نیں۔
26 فیر تُسی کیہہ ویکھن گئے سو؟ کیہہ اِک نبی نُوں؟ ہاں، مَیں توانوں کہنا واں کہ اوہ تے نبیاں توں وی ودھ کے وے۔
27 اوہ اوہی اے جدے بارے لکھیا اے: ”ویکھ، مَیں اپنا پیغمبر تیرے اَگے اَگے بھیج رہیا واں جیہڑا تیرے لئی راہ تیار کرے گا۔“
28 مَیں توانوں کہنا واں کہ اَج تک جِنّے وی انسان پیدا ہوئے نیں، اوہناں وچوں یوحنا توں وڈا کوئی نئیں۔ پر جیہڑا خدا دی بادشاہی چ سب توں چھوٹا اے، اوہ یوحنا نالوں وڈا اے۔“
29 جدوں سارے لوکاں تے ٹیکس لین والیاں نے ایہہ سُنیا تے اوہ خدا دی تعریف کرن لگ پئے کہ اوہ سچا تے نیک اے کیونکہ اوہناں نے یوحنا کولوں بپتسمہ لیا سی۔
30 پر فریسی تے شریعت دے ماہر خدا دی مرضی تے نئیں چلنا چاہندے سن، ایس لئی اوہناں نے یوحنا کولوں بپتسمہ نہ لیا۔
31 فیر یسوع نے کہیا: ”ایس زمانے دے لوکاں بارے سمجھان لئی مَیں کیہڑی مثال دَواں؟ ایہہ کِدے ورگے نیں؟
32 ایہہ بازار چ بیٹھے ہوئے چھوٹے بچیاں ورگے نیں جیہڑے اِک دُوجے نُوں آواز مار کے کہندے نیں: ”اَسی تواڈے لئی بانسری وجائی، پر تُسی نہ نچے۔ اَسی تواڈے لئی وین پائے، پر تُسی نہ روئے۔“
33 ایسے طرحاں یوحنا بپتسمہ دین والا نہ تے روٹی کھاندا اے تے نہ ای مے پیندا اے، پر تُسی کہندے او: ”اوہنوں اِک باغی فرشتہ چِمبڑیا ہویا اے۔“
34 انسان دا بیٹا کھاندا پیندا اے، پر اوہدے بارے تُسی کہندے او: ”ویکھو، پیٹو تے شرابی، ٹیکس لین والیاں تے گُناہگاراں دا یار۔“
35 پر حکمت اپنے کماں* توں صحی ثابت ہوندی اے۔“*
36 اِک فریسی نے وار وار یسوع نُوں کہیا کہ اوہ اوہدے نال کھانا کھائے۔ ایس لئی یسوع اوہدے گھر گیا تے کھانا کھان لئی بہہ گیا۔
37 اوس شہر دی اِک بدنام عورت نُوں پتہ چلیا کہ یسوع اوس فریسی دے گھر کھانا کھا رہیا اے۔ اوہ اوتھے پتھر دی بوتل چ خوشبودار تیل لے کے آئی۔
38 اوہ عورت پچھوں دی آ کے یسوع دے پیراں چ بہہ گئی تے رون لگ پئی۔ اوہ اپنے اَتھروواں نال اوہدے پیر گلے کرن لگ پئی۔ فیر اوہنے اپنے والاں نال اوہدے پیر پُونجے۔ نالے اوہنے بڑے پیار نال اوہدے پیراں نُوں چُمیا تے اوہناں تے خوشبودار تیل پایا۔
39 ایہہ ویکھ کے اوہ فریسی جنہے یسوع نُوں اپنے گھر بلایا سی سوچن لگ پیا: ”جے ایہہ بندہ واقعی اِک نبی ہوندا تے ایہنوں پتہ ہوندا کہ جیہڑی عورت ایہنوں چُھو رہی اے، اوہ بڑی بدکار اے۔“
40 پر یسوع نے اوس فریسی نُوں کہیا: ”شمعون، مَیں تینوں کجھ کہنا چاہنا واں۔“ اوہنے کہیا: ”جی اُستاد کہوو۔“
41 یسوع نے کہیا: ”اِک بندے دے دو قرضدار سن۔ اِک تے 500 دینار دا قرضہ سی تے دُوجے تے 50 دینار دا۔
42 جدوں اوہ دونویں قرضہ واپس نہ کر سکے تے اوس بندے نے مہربانی کر کے اوہناں دونواں دا قرضہ معاف کر دِتا۔ تیرے خیال چ اوہناں دونواں وچوں کون اوس بندے نال بوہتی محبت کرے گا؟“
43 شمعون نے جواب دِتا: ”میرے خیال چ جدا بوہتا قرضہ معاف ہویا اے۔“ یسوع نے اوہنوں کہیا: ”تُوں صحی کہیا اے۔“
44 فیر یسوع نے اوس عورت وَل ویکھیا تے شمعون نُوں کہیا: ”ایس عورت نُوں ویکھ، جدوں مَیں تیرے گھر آیا تے تُوں مینوں پیر دھون لئی پانی نئیں دِتا۔ پر ایہنے اپنے اَتھروواں نال میرے پیر گلے کیتے تے اپنے والاں نال پُونجے۔
45 نالے تُوں مینوں نئیں چُمیا، پر ایہہ عورت اوہدوں توں بڑے پیار نال میرے پیراں نُوں چُم رہی اے جدوں توں مَیں آیا واں۔
46 تُوں میرے سِر تے تیل نئیں پایا۔ پر ایس عورت نے میرے پیراں تے خوشبودار تیل پایا۔
47 ایس لئی مَیں تینوں کہنا واں کہ بھانویں ایس عورت نے بوہت* گُناہ کیتے نیں، پر اوہ معاف ہو گئے نیں کیونکہ ایہہ بوہتی محبت کردی اے۔ پر جدے تھوڑے گُناہ معاف ہوندے نیں، اوہ تھوڑی محبت کردا اے۔“
48 فیر یسوع نے اوس عورت نُوں کہیا: ”تیرے گُناہ معاف ہو گئے نیں۔“
49 ایہہ سُن کے اوہدے نال بیٹھے لوک اِک دُوجے نُوں کہن لگ پئے: ”ایہہ بندہ ہے کون جیہڑا گُناہ وی معاف کردا اے؟“
50 پر یسوع نے اوس عورت نُوں کہیا: ”تُوں اپنے ایمان دی وجہ توں نجات پائی اے۔سلامت رہ۔“
فٹ نوٹ
^ اوہ 100 فوجیاں دا نگران سی۔
^ یونانی چ: ”میری وجہ توں ٹھوکر نئیں کھاندا۔“
^ یاں، ”کماں دے نتیجیاں۔“
^ یونانی چ: ”اپنے سارے بچیاں توں نیک ثابت ہوندی اے۔“
^ یاں، ”وڈے وڈے۔“
