متی دی اِنجیل 18:1-35
18 اوس ویلے شاگرد یسوع کول آئے تے اوہنوں پچھیا: ”اسمان دی بادشاہی چ سب توں وڈا کون ہوئے گا؟“
2 اوہنے اِک چھوٹے بچے نُوں بلا کے اوہناں دے وچکار کھڑا کیتا
3 تے کہیا: ”مَیں توانوں سچ کہنا واں کہ جے تُسی اپنی سوچ نُوں بدل کے اپنے آپ نُوں چھوٹے بچیاں وانگوں نئیں بناؤ گے تے تُسی اسمان دی بادشاہی چ بالکل نئیں جاؤ گے۔
4 ایس لئی جیہڑا وی خاکسار بنے گا تے اپنے آپ نُوں ایس چھوٹے بچے وانگوں سمجھے گا، اوہی اسمان دی بادشاہی چ سب توں وڈا ہوئے گا
5 تے جیہڑا وی ایہو جہے چھوٹے بچے نُوں میری خاطر قبول کردا اے، اوہ مینوں وی قبول کردا اے۔
6 پر جے کوئی میرے تے ایمان رکھن والے ایہناں نُمانیاں وچوں کسے نُوں گمراہ کردا اے تے بہتر ہوئے گا کہ اوہدے گلے چ چکی دا پُڑ* پا کے اوہنوں سمندر چ سُٹ دِتا جائے۔
7 لوکاں نُوں گمراہ کرن والی ایس دُنیا دا حال بھیڑا ای ہوئے گا۔ گمراہ کرن والیاں نے تے آنا ای آنا اے۔ پر لعنت اوس بندے تے جیہڑا دُوجیاں نُوں گمراہ کردا اے۔
8 جے تیرا ہتھ یاں پیر تینوں گمراہ کردا اے تے اوہنوں وڈھ کے دُور سُٹ دے کیونکہ تیرے لئی لُولا تے لنگڑا ہو کے زندگی پانا ایس توں بہتر اے کہ تینوں دونواں ہتھاں تے پیراں سمیت ابدی اَگ چ سُٹ دِتا جائے۔
9 تے جے تیری اَکھ تینوں گمراہ کردی اے تے اوہنوں کڈھ کے دُور سُٹ دے کیونکہ تیرے لئی کانا ہو کے زندگی پانا ایس توں بہتر اے کہ تینوں دونواں اَکھاں سمیت ہنوم دی وادی وچ سُٹ دِتا جائے۔
10 خبردار رہوو کہ تُسی ایہناں نُمانیاں وچوں کسے نُوں وی گھٹیا نہ سمجھو کیونکہ مَیں توانوں کہنا واں کہ اسمان چ ایہناں دے فرشتے ہمیشاں میرے اسمانی باپ دی حضوری چ کھلوتے* رہندے نیں۔
11 *—
12 تواڈا کیہہ خیال اے، جے اِک بندے کول 100 بھیڈاں ہون تے اوہناں وچوں اِک راہ بھٹک جائے تے کیہہ اوہ باقی 99 نُوں پہاڑ تے چھڈ کے اوس بھٹکی ہوئی بھیڈ نُوں لبھن نئیں جائے گا؟
13 مَیں توانوں سچ کہنا واں کہ جے اوہ بھیڈ اوہنوں لبھ جائے گی تے اوہ اوہناں 99 بھیڈاں دی وجہ توں ایناں خوش نئیں ہوئے گا جیہڑیاں اوہدے کول نیں جِنّاں کہ اوس اِک بھیڈ دے لبھن تے خوش ہوئے گا۔
14 ایسے طرحاں میرا* اسمانی باپ وی ایہہ نئیں چاہندا کہ ایہناں نُمانیاں وچوں اِک وی ہلاک ہووے۔
15 جے تیرا بھرا تیرے خلاف کوئی گُناہ کردا اے تے علیٰحدگی چ جاکے اوہنوں اوہدی غلطی بارے دَس۔* جے اوہ تیری گل سُن لیندا اے تے تُوں اوہنوں سِدھی راہ تے واپس لے آیا ایں۔
16 پر جے اوہ تیری نئیں سُن دا تے اِک یاں دو جنیاں نُوں نال لے جا تاکہ دو یاں تِن گواہواں دے بیان دے مطابق ہر معاملہ ثابت ہو جائے۔
17 جے اوہ اوہناں دی نئیں سُن دا تے کلیسیا نال گل کر تے جے اوہ کلیسیا دی وی نئیں سُن دا تے اوہنوں دُنیا دے لوکاں* تے ٹیکس لین والیاں ورگا سمجھ۔
18 مَیں توانوں سچ کہنا واں کہ جو کجھ تُسی زمین تے بنھو گے، اوہ پہلاں ای اسمان تے بنھ دِتا گیا ہوئے گا۔ تے جو کجھ تُسی زمین تے کھولو گے، اوہ پہلاں ای اسمان تے کھول دِتا گیا ہوئے گا۔
19 مَیں توانوں فیر سچ کہنا واں کہ جے تواڈے وچوں دو جنے کسے خاص معاملے بارے دُعا کرن لئی آپس چ متفق ہو جاندے نیں تے میرا اسمانی باپ اوہناں دی درخاست پوری کرے گا
20 کیونکہ جِتھے دو یاں تِن جنے میرے ناں تے جمع ہوندے نیں مَیں وی اوہناں نال اوتھے ہُنا واں۔“
21 فیر پطرس نے آ کے یسوع نُوں پچھیا: ”مالک، جے میرا بھرا میرے خلاف گُناہ کردا رہوے تے مَیں اوہنوں کِنّی وار معاف کراں؟ سَت وار؟“
22 یسوع نے اوہنوں کہیا: ”مَیں تینوں کہنا واں کہ سَت وار نئیں سگوں ستتر (77) وار۔
23 ایس لئی اسمان دی بادشاہی اِک ایہو جہے بادشاہ وانگوں اے جیہڑا اپنے غلاماں کولوں قرضے دا حساب لینا چاہندا سی۔
24 جدوں اوہ حسابکتاب کر رہیا سی تے اوہدے سامنے اِک غلام نُوں پیش کیتا گیا جنہے اوہدے 6 کروڑ دینار* دینے سن۔
25 پر اوہدے کول قرضہ واپس کرن لئی کجھ وی نئیں سی۔ ایس لئی بادشاہ نے حکم دِتا کہ قرضے دی رقم لین لئی اوہنوں، اوہدی بیوی نُوں، اوہدے بچیاں نُوں تے اوہدیاں ساریاں چیزاں نُوں ویچ دِتا جائے۔
26 ایہہ سُن کے غلام اوہدے اَگے گوڈے ٹیک کے مِنت کرن لگ پیا: ”مالک، مینوں تھوڑا جیہا وقت دے دے۔ مَیں تیرا اِک اِک پیسہ موڑ دَواں گا۔“
27 ایہہ ویکھ کے بادشاہ نُوں اوہدے تے ترس آگیا تے اوہنے اوہنوں چھڈ دِتا تے اوہدا سارا قرضہ معاف کر دِتا۔
28 پر جدوں اوہ غلام باہر گیا تے اوہنے اپنے نال کم کرن والے اِک ہور غلام نُوں لبھیا جنہے اوہدے صرف 100 دینار دینے سن۔ اوہنے اوس غلام نُوں پھڑیا تے اوہدا گلا نپ کے کہن لگ پیا: ”میرے پیسے واپس کر۔“
29 پر اوہ غلام اوہدے اَگے گوڈے ٹیک کے ترلے کرن لگ پیا: ”مینوں تھوڑا جیہا وقت دے دے۔ مَیں تیرا قرضہ واپس کر دَواں گا۔“
30 پر اوہنے اوہدی اِک نہ سُنی سگوں جاکے اوہنوں اوہدوں تک جیل چ بند کرا دِتا جدوں تک اوہ اوہدے پیسے واپس نئیں کر دیندا۔
31 باقی غلام ایہہ سب کجھ ویکھ کے بڑے دُکھی ہوئے تے اوہناں نے جاکے بادشاہ نُوں ساری گل دَس دِتی۔
32 بادشاہ نے اوس غلام نُوں بلوایا تے اوہنوں کہیا: ”اوئے گھٹیا انسان، جدوں تُوں میرے اَگے مِنت کیتی سی تے مَیں تیرا سارا قرضہ معاف کر دِتا سی۔
33 تے فیر کیہہ تینوں وی اپنے ساتھی اُتے رحم نئیں سی کرنا چاہی دا جیویں مَیں تیرے اُتے رحم کیتا سی؟“
34 ایس لئی بادشاہ نے غصے چ آ کے اوہنوں اوہدوں تک جیل چ پوا دِتا جدوں تک اوہ سارا قرضہ واپس نئیں کر دیندا۔
35 میرا اسمانی باپ وی تواڈے نال اِنج ای کرے گا جے تُسی اِک دُوجے* نُوں دلوں معاف نئیں کرو گے۔“
فٹ نوٹ
^ یاں، ”ایہو جیہا پُڑ جنہوں اِک کھوتا کھچ دا اے۔“
^ یاں، ”ہمیشاں میرے اسمانی باپ دا چہرہ ویکھدے رہندے نیں۔“
^ متی 17:21 دے فٹنوٹ نُوں ویکھو۔
^ یاں شاید، ”تواڈا۔“
^ یونانی چ: ”اوہدی درستی کر۔“
^ یاں، ”غیر یہودیاں۔“
^ یونانی چ: ”10 ہزار تلنتون۔“ جیہڑا کہ 6 کروڑ دینار دے برابر سی۔ دینار، چاندی دا اِک رومی سِکّہ سی جدا وزن 85.3 گرام سی ۔ اِک دینار اِک دِن دی مزدوری ہوندی سی۔
^ یاں، ”اپنے بھرا۔“
