متی دی اِنجیل 19:1-30
19 ایہہ ساریاں گلاں کہن دے بعد یسوع گلیل چوں چلا گیا تے دریائےیردن دے پار یہودیہ دے سرحدی علاقے چ آ گیا۔
2 لوکاں دی اِک وڈی بِھیڑ وی اوہدے پچھے اوتھے آ گئی تے یسوع نے اوہناں وچوں بیماراں نُوں ٹھیک کر دِتا۔
3 فیر فریسی اوہدے کول آئے تے اوہنوں اَزمان لئی پچھیا: ”کیہہ کوئی آدمی کسے وی وجہ توں اپنی بیوی نُوں طلاق دے سکدا اے؟“
4 یسوع نے جواب دِتا: ”کیہہ تُسی نئیں پڑھیا کہ جنہے انساناں نُوں بنایا اوہنے شروع توں ای اوہناں نُوں مرد تے عورت بنایا
5 تے کہیا: ”ایس لئی مرد اپنے ماں پیو نُوں چھڈ کے اپنی بیوی نال رہوے گا تے اوہ دونویں اِک جسم ہون گے“؟
6 ایس وجہ توں اوہ دو نئیں رہندے سگوں اِک جسم بن جاندے نیں۔ ایس لئی جنہوں خدا نے ایس بندھن* چ بنھیا اے، اوہنوں کوئی وی انسان وَکھ نہ کرے۔“
7 پر فریسیاں نے اوہنوں پچھیا: ”تے فیر موسیٰ نے ایہہ کیوں کہیا کہ اِک آدمی اپنی بیوی نُوں طلاقنامہ دے کے چھڈ سکدا اے؟“
8 یسوع نے اوہناں نُوں کہیا: ”موسیٰ نے تواڈی سخت دلی دی وجہ توں توانوں اپنیاں بیویاں نُوں طلاق دین دی اجازت دِتی سی۔ پر شروع چ اِنج نئیں سی۔
9 پر مَیں توانوں کہنا واں کہ جیہڑا آدمی اپنی بیوی نُوں حرامکاری* دے علاوہ کسے ہور وجہ توں طلاق دیندا اے تے کسے ہور نال ویاہ کردا اے، اوہ زِنا کردا اے۔“
10 ایہہ سُن کے شاگرداں نے یسوع نُوں کہیا: ”جے ایہہ گل اے تے فیر بہتر اے کہ بندہ ویاہ ای نہ کرے۔“
11 یسوع نے اوہناں نُوں کہیا: ”ہر کوئی ویاہ کیتے بغیر نئیں رہ سکدا سگوں صرف اوہی رہ سکدا اے جنہوں ایہہ توفیق ملی اے۔
12 کجھ لوک کسے پیدائشی نُقص دی وجہ توں ویاہ نئیں کردے تے کجھ نُوں دُوجے لوک ویاہ لئی ناقابل* بنا دیندے نیں تے کجھ اسمان دی بادشاہی دی خاطر ویاہ نئیں کردے۔ جیہڑا ویاہ دے بغیر رہ سکدا اے اوہ ضرور رہوے۔“
13 فیر لوک چھوٹے بچیاں نُوں یسوع کول لیائے تاکہ اوہ اوہناں تے ہتھ رکھ کے اوہناں نُوں برکت دَوے تے اوہناں لئی دُعا کرے۔ پر شاگرد لوکاں نُوں جھڑکن لگ پئے۔
14 پر یسوع نے کہیا: ”بچیاں نُوں نہ روکو۔ اوہناں نُوں میرے کول آن دَوو کیونکہ اسمان دی بادشاہی دے وارث ایہناں ورگے ای لوک ہون گے۔“
15 فیر اوہنے بچیاں دے سِراں تے ہتھ رکھ کے اوہناں نُوں برکت دِتی تے اوتھوں چلا گیا۔
16 فیر ویکھو! اِک بندے نے آ کے یسوع نُوں پچھیا: ”اُستاد، مینوں ہمیشاں دی زندگی پان لئی کیہڑے چنگے کم کرنے چاہی دے نیں؟“
17 یسوع نے اوہنوں کہیا: ”تُوں چنگے کماں بارے مینوں کیوں پچھ رہیا ایں؟ چنگا تے بس خدا ای اے۔* جے تُوں زندگی پانا چاہنا ایں تے بس حکماں تے چلدا رہ۔“
18 اوہنے کہیا: ”کیہڑے حکماں تے؟“ یسوع نے کہیا: ”ایہہ کہ تُوں خون نہ کرِیں، تُوں زِنا نہ کرِیں، تُوں چوری نہ کرِیں، تُوں جھوٹھی گواہی نہ دَویں،
19 تُوں اپنے ماں پیو دی عزت کرِیں تے اپنے گوانڈھی نال اُنج ای پیار کرِیں جیویں تُوں اپنے آپ نُوں کرنا ایں۔“
20 اوس جوان آدمی نے یسوع نُوں کہیا: ”ایہناں ساریاں حکماں اُتے تے مَیں چلنا واں فیر میرے چ کیس چیز دی کمی اے؟“
21 یسوع نے اوہنوں کہیا: ”جے تُوں چاہنا ایں کہ تیرے چ کسے چیز دی کمی نہ رہوے تے جا اپنا مال ویچ کے غریباں چ وَنڈ دے تاکہ تیرے لئی اسمان چ خزانہ جمع ہو جائے تے آ کے میرا شاگرد بن جا۔“
22 ایہہ سُن کے اوہ جوان آدمی بڑا دُکھی ہو گیا تے اوتھوں چلا گیا کیونکہ اوہ بڑا امیر سی۔
23 فیر یسوع نے اپنے شاگرداں نُوں کہیا: ”مَیں توانوں سچ کہنا واں کہ کسے امیر آدمی لئی اسمان دی بادشاہی چ جانا بوہت اوکھا ہوئے گا۔
24 مَیں توانوں فیر کہنا واں کہ اِک اُونٹھ دا سوئی دے نکے چوں لنگھنا تے اسان اے پر اِک امیر آدمی لئی اسمان دی بادشاہی چ جانا اوکھا اے۔“
25 ایہہ سُن کے شاگرد بوہت حیران ہوئے تے کہن لگ پئے: ”تے فیر بچے گا کون؟“
26 یسوع نے اوہناں نُوں بڑے دھیان نال ویکھیا تے کہیا: ”انساناں لئی تے ایہہ ناممکن اے۔ پر خدا لئی سب کجھ ممکن اے۔“
27 فیر پطرس نے اوہنوں کہیا: ”ویکھ، اَسی تے سارا کجھ چھڈ چھڈا کے تیرے پچھے ٹُر پئے آں فیر سانوں کیہہ ملے گا؟“
28 یسوع نے اوہناں نُوں کہیا: ”مَیں توانوں سچ کہنا واں کہ جدوں سب کجھ نواں بنایا جائے گا تے انسان دا بیٹا* اپنے عالیشان تخت تے بہووے گا تے تُسی جیہڑے میرے پچھے پچھے چل رہے او 12 تختاں تے بہوو گے تے اِسرائیل دے 12 قبیلیاں دا اِنصاف کرو گے۔
29 جنہے وی میرے ناں دی خاطر گھر یاں بھراواں یاں بھیناں یاں پیو یاں ماں یاں بچیاں یاں زمیناں نُوں چھڈیا اے، اوہنوں سو گُنا زیادہ ملے گا تے ہمیشاں دی زندگی وی ملے گی۔
30 پر کئی لوک جیہڑے آخر نیں، اوہ پہلے ہو جان گے تے جیہڑے پہلے نیں، اوہ آخر ہو جان گے۔“
فٹ نوٹ
^ یونانی چ: ”اِکو جُوئے چ۔“ متی 11:29 دے فٹ نوٹ نُوں وی ویکھو۔
^ یونانی چ: ”پورنیا۔ “ ”لفظاں دی وضاحت“ نُوں ویکھو۔
^ یعنی اولاد پیدا کرن لئی ناقابل۔
^ یاں، ”بس خدا ای دَس سکدا اے کہ چنگے کم کیہڑے نیں۔“
^ ”لفظاں دی وضاحت“ نُوں ویکھو۔
