متی دی اِنجیل 3:1-17
3 اوہناں دِناں چ یوحنا بپتسمہ دین والے نے یہودیہ دے ویرانے چ ایہہ مُنادی کرنا شروع کیتی:
2 ”توبہ کرو کیونکہ اسمان دی بادشاہی نیڑے آ گئی اے۔“
3 اصل چ یوحنا اوہی بندہ سی جدے بارے یسعیاہ نبی نے ایہہ کہیا سی: ”ویرانے چ کوئی اُچی آواز چ کہہ رہیا اے کہ ”یہوواہ* دا رستہ تیار کرو۔ اوہدیاں راہواں نُوں پدھرا کرو۔““
4 یوحنا اُونٹھ دے والاں دے بنے ہوئے کپڑے پاندا سی تے کمر تے چمڑے دی پیٹی بنھ دا سی۔ اوہ ٹڈیاں تے جنگلی شہد کھاندا سی۔
5 اوہدوں یروشلیم تے سارے یہودیہ تے دریائےیردن دے آلے دوالے دے سارے علاقیاں توں لوک یوحنا کول آن لگ پئے۔
6 اوہناں نے ساریاں دے سامنے اپنے گُناہواں دا اِقرار کیتا تے یوحنا کولوں دریائےیردن چ بپتسمہ* لیا۔
7 جدوں اوہنے کئی فریسیاں تے صدوقیاں نُوں وی اوتھے آندیاں ویکھیا تے اوہنے اوہناں نُوں کہیا: ”اَے سَپ دے بچیو، توانوں کنہے کہیا اے کہ تُسی خدا دے آن والے قہر تُوں بچن دی کوشش کرو؟
8 اپنے کماں توں ثابت کرو* کہ تُسی توبہ کر لئی اے۔
9 ایہہ نہ سوچو کہ ”ساڈا پیو تے ابراہام اے“ کیونکہ مَیں توانوں کہنا واں کہ خدا تے ایہناں پتھراں توں وی ابراہام لئی اولاد پیدا کر سکدا اے۔
10 ویکھو! کلہاڑا درختاں دِیاں جڑاں اُتے رکھیا ہویا اے۔ جیہڑا وی درخت چنگا پھل نئیں دیندا اوہنوں وڈھ کے اَگ چ سُٹ دِتا جائے گا۔
11 مَیں تے توانوں پانی نال بپتسمہ دے رہیا واں کیونکہ تُسی توبہ کیتی اے۔ پر جیہڑا میرے بعد آئے گا اوہدے کول میرے نالوں بوہتا اِختیار اے۔ مَیں تے اوہدی جُتی لان دے قابل وی نئیں۔ اوہ توانوں پاکروح تے اَگ نال بپتسمہ دَوے گا۔
12 اوہدا چھج* اوہدے ہتھ وچ اے تے اوہ اپنے کھلیان نُوں بالکل صاف کردے گا۔ اوہ اپنی کنک نُوں گودام چ جمع کرے گا پر تُوڑی نُوں ایہو جہی اَگ چ ساڑے گا جیہڑی بجھائی نئیں جا سکدی۔“
13 فیر یسوع گلیل توں یوحنا کول دریائےیردن چ بپتسمہ لین لئی آیا۔
14 پر یوحنا نے اوہنوں روکن دی کوشش کیتی تے کہیا: ”بپتسمہ تے مینوں تیرے کولوں لینا چاہی دا اے تے تُوں میرے کولوں بپتسمہ لین آیا ایں۔“
15 پر یسوع نے اوہنوں کہیا : ”مینوں بپتسمہ لین توں نہ روک کیونکہ خدا دی مرضی پوری کرن لئی اِنج کرنا ضروری اے۔“ ایہہ سُن کے یوحنا نے اوہدی گل من لئی۔
16 بپتسمہ لین توں فوراً بعد یسوع پانی توں باہر آیا تے ویکھو! اسمان کُھل گیا تے یوحنا نے خدا دی روح نُوں کبوتر دی شکل چ یسوع تے آندے ویکھیا۔
17 تے اسمان توں ایہہ آواز وی آئی: ”ایہہ میرا پیارا پُتر اے جدے توں مَیں خوش آں۔“
فٹ نوٹ
^ ”لفظاں دی وضاحت“ نُوں ویکھو۔
^ یاں، ”ڈُبکی لئی۔“
^ یونانی چ: ”ایہو جہے پھل پیدا کرو۔“
^ اِک قسم دا اوزار جدے نال کنک نُوں تُوڑی توں وَکھ کیتا جاندا اے۔
