متی دی اِنجیل 4:1-25
4 فیر پاک روح یسوع نُوں اِک ویران جگہ تے لے گئی جِتھے اِبلیس نے اوہنوں اَزمایا۔
2 یسوع نُوں 40 دن تے 40 راتاں روزہ رکھن دے بعد بُھکھ لگی۔
3 اوہدوں اِبلیس اوہنوں اَزمان لئی آیا تے کہیا: ”جے تُوں خدا دا پُتر ایں تے ایہناں پتھراں نُوں کہہ کہ ایہہ روٹیاں بن جان۔“
4 یسوع نے جواب دِتا: ”پاک کلام چ لکھیا اے کہ ”انسان نُوں زندہ رہن لئی صرف روٹی دی لوڑ نئیں سگوں ہر اوس گل دی لوڑ اے جیہڑی یہوواہ* دے مُونہہ چوں نکل دی اے۔““
5 ایہدے بعد اِبلیس یسوع نُوں مُقدس شہر* چ لے گیا تے ہیکل* دی سب توں اُچی تھاں تے کھڑا کر کے
6 اوہنوں کہیا: ”جے تُوں خدا دا پُتر ایں تے ایتھوں چھال مار دے کیونکہ پاک کلام چ لکھیا اے کہ ”اوہ اپنے فرشتیاں نُوں تیرے بارے حکم دَوے گا“ تے ”اوہ تینوں اپنے ہتھاں تے چُک لین گے تاکہ پتھراں چ وَج کے تیرے پیراں چ سٹ نہ لگے۔““
7 یسوع نے اوہنوں کہیا: ”ایہہ وی لکھیا اے: ”تُوں یہوواہ* اپنے خدا دا اِمتحان نہ لے۔““
8 فیر اِبلیس یسوع نُوں اِک بوہت ای اُچے پہاڑ تے لے گیا تے اوہنوں دُنیا دِیاں ساریاں بادشاہیاں تے اوہناں دی شانوشوکت وکھائی
9 تے اوہنوں کہیا: ”جے تُوں گوڈے ٹیک کے صرف اِک وار مینوں سجدہ کریں تے مَیں ایہہ سب کجھ تینوں دے دَواں گا۔“
10 پر یسوع نے کہیا: ”چلا جا ایتھوں شیطان! کیونکہ پاک کلام چ لکھیا اے کہ ”تُوں صرف یہوواہ* اپنے خدا دی عبادت کر تے صرف اوہدی خدمت کر۔““
11 فیر اِبلیس اوتھوں چلا گیا تے ویکھو! فرشتے آ کے یسوع دی خدمت کرن لگ پئے۔
12 جدوں یسوع نُوں پتہ لگیا کہ یوحنا نُوں گرفتار کر لیا گیا اے تے اوہ گلیل چلا گیا۔
13 فیر اوہ ناصرت نُوں چھڈ کے کفرنحوم چ رہن لگ پیا جیہڑا زبولون تے نفتالی دے علاقے چ جھیل دے کنارے وے
14 تاکہ یسعیاہ نبی دی کہی ایہہ گل پوری ہوئے:
15 ”اَے غیریہودیاں دے گلیل، ہاں، اَے زبولون تے نفتالی دے علاقے، تُوں جیہڑا سمندر وَل جان والے رستے تے دریائےیردن دے اوس پار ایں!
16 نھیرے وچ بیٹھے لوکاں نے وڈا چانن ویکھیا تے موت دے سائے والے علاقے چ بیٹھے لوکاں تے روشنی چمکی۔“
17 اوس ویلے توں یسوع نے ایہہ مُنادی کرنی شروع کیتی: ”توبہ کرو کیونکہ اسمان دی بادشاہی نیڑے آ گئی اے۔“
18 گلیل دی جھیل دے کنارے ٹُردے ہوئیاں اوہنے دو بھراواں نُوں ویکھیا جیہڑے مچھیرے سن تے جھیل چ جال سُٹ رہے سن۔ اِک دا ناں شمعون سی جنہوں پطرس وی کہیا جاندا اے تے دُوجے دا ناں اندریاس سی۔
19 یسوع نے اوہناں نُوں کہیا: ”میرے پچھے آؤ، مَیں توانوں مچھیاں دی بجائے انساناں نُوں جمع کرنا سکھانواں گا۔“
20 اوہ فوراً اپنے جال چھڈ کے اوہدے پچھے پچھے* ٹُر پئے۔
21 اَگے جاکے یسوع نے دو ہور بھراواں نُوں ویکھیا۔ اِک دا ناں یعقوب سی تے دُوجے دا ناں یوحنا۔ اوہ دونویں اپنے پیو زبدی نال کشتی چ بیٹھے جالاں د ی مرمت کر رہے سن۔ جدوں یسوع نے اوہناں نُوں بلایا
22 تے اوہ کشتی تے اپنے پیو نُوں چھڈ کے اوہدے پچھے پچھے ٹُر پئے۔
23 فیر یسوع نے سارے گلیل دا دَورہ کیتا تے اوتھوں دِیاں عبادتگاہواں چ تلیم دِتی، بادشاہی دی خوشخبری دی مُنادی کیتی تے لوکاں دی ہر طرحاں دی بیماری تے معذوری نُوں ٹھیک کیتا۔
24 نالے سُوریہ دے کونے کونے تک یسوع بارے خبر پھیل گئی تے لوک اوہناں ساریاں نُوں اوہدے کول لیائے جیہڑے طرحاں طرحاں دِیاں بیماریاں تے تکلیفاں دے مارے ہوئے سن، جنہاں نُوں باغی فرشتے چِمبڑے ہوئے سن تے جیہڑے مرگی تے فالج دے روگی سن۔ یسوع نے اوہناں ساریاں نُوں ٹھیک کر دِتا۔
25 ایس کر کے گلیل، دِکاپُلِس،* یروشلیم، یہودیہ تے دریائےیردن دے دُوجے پاسیوں بوہت سارے لوک اوہدے پچھے ٹُر پئے۔
فٹ نوٹ
^ ”لفظاں دی وضاحت“ نُوں ویکھو۔
^ یعنی یروشلیم۔
^ یعنی خدا دا گھر۔
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ ”یسوع دے پچھے پچھے ٹُرن“ دا مطلب اے اوہدا شاگرد بننا۔
^ یاں، ”دس شہراں دا علاقہ۔“
