مرقس دی اِنجیل 6:1-56
6 ایہدے بعد یسوع اپنے علاقے* چ آیا تے اوہدے شاگرد وی اوہدے نال سن۔
2 اوتھے اوہ سبت دے دن اِک عبادتگاہ چ تلیم دین لگ پیا۔ اوہدی تلیم سُن کے بوہت سارے لوک حیران ہوئے تے کہن لگ پئے: ”ایس بندے نے ایہہ سب کجھ کتھوں سکھیا اے؟ ایہنوں اینی حکمت تے معجزے کرن دی طاقت کتھوں ملی اے؟
3 کیہہ ایہہ اوہی ترکھان نئیں جدی ماں دا ناں مریم اے تے جدے بھراواں دا ناں یعقوب، یوسف، یہوداہ تے شمعون اے؟ تے ایہدیاں بھیناں وی تے ایتھے ای نئیں رہندیاں؟“ ایس لئی اوہ یسوع تے ایمان نہ لیائے۔
4 پر یسوع نے اوہناں نُوں کہیا: ”اِک نبی دے اپنے علاقے دے لوکاں، رشتےداراں تے گھر والیاں دے علاوہ باقی سارے اوہدی عزت کردے نیں۔“
5 ایس لئی اوہنے کجھ بیماراں تے ہتھ رکھ کے اوہناں نُوں ٹھیک کرن دے علاوہ اوتھے ہور کوئی معجزہ نہ کیتا۔
6 اصل چ یسوع ایہہ ویکھ کے حیران سی کہ اوہ ایمان نئیں لیائے۔ ایہدے بعد اوہنے پورے علاقے دا دَورہ کیتا تے پِنڈاں چ تلیم دِتی۔
7 فیر یسوع نے 12 رسولاں نُوں اپنے کول سّدیا تے اوہناں نُوں دو دو کر کے گھلنا شروع کیتا تے اوہناں نُوں باغی فرشتیاں اُتے اِختیار دِتا۔
8 یسوع نے اوہناں نُوں ایہہ ہدیت وی دِتی کہ اوہ سفر چ اپنے نال اپنی ڈانگ دے علاوہ ہور کجھ نہ کھڑن۔ نہ روٹی، نہ کھانے دا تھیلا، نہ پیسیاں دی تھیلی،
9 نہ دو کُرتے* سگوں بس جُتی پان تے چلے جان۔
10 اوہنے اوہناں نُوں ایہہ وی کہیا: ”تُسی جیہڑے گھر وچ جاؤ اوتھے اوہدوں تک رہوو جدوں تک تُسی اوس علاقے چوں چلے نئیں جاندے۔
11 جیہڑے علاقے دے لوک توانوں یاں تواڈے پیغام نُوں قبول نہ کرن اوتھوں جاندے ویلے اپنے پیراں توں مٹی جھاڑ دیو۔ ایہہ اوہناں دے خلاف گواہی ہوئے گی۔“
12 ایہدے بعد اوہ لوکاں چ ایہہ مُنادی کرن چلے گئے کہ اوہ توبہ کرن۔
13 نالے اوہناں نے کئی لوکاں وچوں باغی فرشتیاں نُوں کڈھیا تے بوہت سارے بیماراں نُوں تیل ملیا تے اوہناں نُوں ٹھیک کیتا۔
14 بادشاہ ہیرودیس نُوں ایہناں ساریاں گلاں دی خبر ملی کیونکہ ہر پاسے یسوع بارے چرچا ہو رہیا سی تے لوک کہہ رہے سن: ”یوحنا بپتسمہ دین والا مُردیاں چوں زندہ ہو گیا اے۔ ایس لئی اوہ ایہہ معجزے کر رہیا اے۔“
15 پر کئی کہہ رہے سن: ”ایہہ تے ایلیاہ اے “ جد کہ کجھ کہہ رہے سن: ”ایہہ پرانے زمانے دے نبیاں ورگا ای کوئی نبی ہونا اے۔“
16 پر جدوں ہیرودیس نے ایہہ سب سُنیا تے اوہنے کہیا: ”ایہہ ضرور یوحنا ای ہونا اے جدا مَیں سِر لوایا سی۔ اوہ زندہ ہو گیا اے۔“
17 اصل چ ہیرودیس نے یوحنا نُوں گِرفتار کرن لئی سپاہی گھلے سن تے اوہنوں بیڑیاں پوا کے قید کر دِتا سی۔ ایہہ سب کجھ اوہنے اپنے بھرا فِلپّس دی بیوی ہیرودیاس دی وجہ توں کیتا سی کیونکہ اوہنے اوہدے نال ویاہ کر لیا سی۔
18 ایس لئی یوحنا وار وار ہیرودیس نُوں کہہ رہیا سی: ”تیرے لئی اپنے بھرا دی بیوی نُوں رکھنا جائز نئیں۔“
19 ایس وجہ توں یوحنا ہیرودیاس دِیاں اَکھاں چ رڑک دا سی تے اوہ اوہنوں جانوں مارنا چاہندی سی۔ پر اوہنوں موقع نئیں مِل رہیا سی
20 کیونکہ ہیرودیس یوحنا نُوں بچان دی کوشش کر رہیا سی۔ اوہ یوحنا نُوں نقصان پونچان توں ڈردا سی کیونکہ اوہنوں پتہ سی کہ اوہ اِک نیک تے پاک انسان اے۔ بھانویں کہ یوحنا دِیاں گلاں سُن کے اوہ ایس اُلجھن چ پے جاندا سی کہ اوہدے نال کیہہ کرے پر فیر وی اوہ خوشی خوشی اوہدیاں گلاں سُندا سی۔
21 پر ہیرودیس دی سالگرہ تے ہیرودیاس نُوں موقع مِل ای گیا۔ اوس دن ہیرودیس نے شام نُوں وڈے وڈے افسراں، فوجی افسراں تے گلیل دے مشہور لوکاں نُوں دعوت تے بلایا۔
22 اوس دعوت چ ہیرودیاس دی دھی آ کے نچی جدے توں ہیرودیس تے اوہدے مہمان بڑے خوش ہوئے۔ بادشاہ نے کُڑی نُوں کہیا: ”منگ، کیہہ منگنی ایں؟ تیری فرمائش پوری کیتی جائے گی۔“
23 بادشاہ نے تے اوہنوں قسم کھا کے کہیا: ”تُوں جو وی منگیں گی، تینوں دِتا جائے گا، ایتھوں تک کہ مَیں تینوں اَدھی بادشاہی وی دے دَواں گا۔“
24 کُڑی نے باہر جا کے اپنی ماں نُوں پچھیا: ”مَیں کیہہ منگاں؟“ اوہنے کہیا: ”یوحنا بپتسمہ دین والے دا سِر۔“
25 اوہ فٹافٹ بادشاہ کول گئی تے کہیا: ”مینوں ہُنے ای یوحنا بپتسمہ دین والے دا سِر تھال وچ رکھ کے دِتا جائے۔“
26 بھانویں کہ اوہدی ایس گل دی وجہ توں بادشاہ بڑا دُکھی ہویا پر فیر وی اوہنے اپنی قسم تے مہماناں دی وجہ توں کُڑی دی گل نہ موڑی۔
27 بادشاہ نے فوراً اِک سپاہی نُوں ایہہ حکم دے کے گھلیا کہ اوہ یوحنا دا سِر لا کے لیائے۔ ایس لئی سپاہی نے جیل چ جا کے یوحنا دا سِر وڈھ دِتا
28 تے اوہنوں تھال وچ رکھ کے لے آیا۔ فیر اوہ تھال اوہنے کُڑی نُوں دِتا تے کُڑی نے اپنی ماں نُوں دے دِتا۔
29 جدوں یوحنا دے شاگرداں نُوں ایہہ پتہ چلیا تے اوہ آئے تے اوہدی لاش نُوں اِک قبر وچ رکھ دِتا۔
30 جدوں رسول یسوع کول واپس آئے تے اوہناں نے یسوع نُوں دَسیا کہ اوہناں نے کیہہ کیہہ کیتا تے لوکاں نُوں کیہہ کیہہ سکھایا۔
31 یسوع نے اوہناں نُوں کہیا: ”آؤ، کسے ویران جگہ چلئے تے تھوڑا آرام کر لئیے۔“ اصل چ بوہت سارے لوک اوہناں کول آ جا رہے سن تے اوہناں نُوں کھانا کھان دا وی وقت نئیں مِل رہیا سی۔
32 ایس لئی اوہ کشتی چ بہہ کے اِک ویران جگہ وَل نکل پئے تاکہ کلّے وقت گزار سکن۔
33 پر لوکاں نے اوہناں نُوں جاندیاں ویکھ لیا تے کئیاں نُوں ایہدی خبر مِل گئی۔ ایس لئی سارے شہراں توں لوک بھجے بھجے گئے تے اوہناں توں پہلاں اوتھے پونچ گئے۔
34 جدوں یسوع کشتی توں اُتریا تے اوہنے ویکھیا کہ اوتھے بوہت سارے لوک جمع نیں۔ اوہنوں اوہناں تے بڑا ترس آیا کیونکہ اوہ ایہو جہیاں بھیڈاں وانگوں سن جنہاں دا کوئی چرواہا نہ ہووے۔ تے اوہ اوہناں نُوں بوہت ساریاں گلاں سکھان لگ پیا۔
35 جدوں کافی دیر ہو گئی تے اوہدے شاگرداں نے اوہدے کول آ کے کہیا: ”بڑی دیر ہو گئی اے تے ایہہ جگہ وی ویران اے۔
36 ایس لئی لوکاں نُوں بھیج دے تاکہ اوہ آلے دَوالے دے پِنڈاں چ جاکے اپنے لئی کھانا خرید سکن۔“
37 اوہنے اوہناں نُوں کہیا: ”تُسی اوہناں نُوں کجھ کھان لئی دَوو۔“ شاگرداں نے کہیا: ”کیہہ ہُن اَسی جا کے اوہناں لئی 200 دینار* دِیاں روٹیاں خرید کے لیائیے؟“
38 یسوع نے اوہناں نُوں کہیا: ”جا کے ویکھو کہ تواڈے کول کِنّیاں روٹیاں نیں۔“ اوہناں نے ویکھیا تے آ کے یسوع نُوں کہیا: ”ساڈے کول تے صرف پنج روٹیاں تے دو مچھیاں نیں۔“
39 فیر یسوع نے سارے لوکاں نُوں کہیا کہ اوہ ٹولیاں بنا کے ہری ہری گھاہ تے بہہ جان۔
40 ایس لئی اوہ سو، سو تے پنجاہ، پنجاہ دِیاں ٹولیاں بنا کے بہہ گئے۔
41 یسوع نے پنج روٹیاں تے دو مچھیاں نُوں لیا تے اسمان وَل ویکھ کے دُعا کیتی تے فیر روٹیاں توڑ کے شاگرداں نُوں دین لگا تاکہ اوہ لوکاں چ وَنڈن۔ ایسے طرحاں اوہنے مچھیاں وی لوکاں چ وَنڈیاں۔
42 اوہناں ساریاں نے رَج کے کھادا۔
43 ایہدے بعد شاگرداں نے روٹیاں دے بچے ہوئے ٹکڑیاں نال 12 ٹوکریاں بھر لئیاں۔ نالے کجھ مچھیاں وی بچ گئیاں۔
44 اوہدوں 5000 آدمیاں نے روٹی کھادی۔
45 لوکاں نُوں کھانا کھوان دے فوراً بعد یسوع نے اپنے شاگرداں نُوں کہیا کہ اوہ کشتی چ بہہ کے اوہدے توں پہلاں جھیل دے دُوجے پاسے بیت صیدا چلے جان جد کہ اوہ آپ لوکاں نُوں رُخصت کرن لگ پیا۔
46 لوکاں نُوں خدا حافظ کہن دے بعد اوہ دُعا کرن لئی پہاڑ تے چلا گیا۔
47 جدوں رات ہوئی تے کشتی جھیل دے وچکار پونچ چُکی سی۔ پر یسوع پہاڑ تے کلّا سی۔
48 جدوں اوہنے ویکھیا کہ تیز نھیری دی وجہ توں شاگرداں لئی کشتی چلانا مشکل ہو رہیا اے تے اوہ رات دے کوئی تِن وجے* پانی تے ٹُردا ہویا اوہناں وَل آیا۔ پر اِنج لگ رہیا سی جیویں اوہ اوہناں توں اَگے نکل جائے گا۔
49 جدوں شاگرداں نے اوہنوں پانی تے ٹُردیاں ویکھیا تے اوہ چیکاں مار کے کہن لگ پئے: ”ایہہ کیہہ اے؟“
50 اوہ سارے اوہنوں ویکھ کے بوہت گھبرا گئے سن۔ پر یسوع نے فوراً اوہناں نُوں کہیا: ”حوصلہ رکھو! مَیں آں، ڈرو نہ۔“
51 فیر اوہ اوہناں دے نال کشتی چ بہہ گیا تے نھیری رُک گئی۔ شاگرد ایہہ ویکھ کے بڑے حیران ہوئے
52 کیونکہ اوہ روٹیاں والے معجزے دا مطلب نئیں سمجھے سن سگوں اوہناں دی سمجھ اُتے حالے وی پردہ پیا ہویا سی۔
53 فیر اوہ جھیل پار کر کے گنیسرت دے علاقے چ پونچے تے کشتی نُوں اوتھے کھلار دِتا۔
54 پر جیویں ای اوہ کشتی توں اُترے لوکاں نے اوہنوں پچھان لیا۔
55 تے لوک بھجے بھجے گئے تے سارے علاقے چ خبر پھیلا دِتی تے اوہ بیماراں نُوں منجیاں تے پا کے اوس جگہ لیان لگ پئے جِتھے یسوع سی۔
56 اوہ جیہڑے جیہڑے پِنڈاں یاں شہراں چ جاندا سی اوتھوں دے لوک بیماراں نُوں لیا کے بازاراں چ لٹا دیندے سن۔ اوہ بیمار یسوع اَگے مِنت کردے سن کہ اوہ اوہناں نُوں اپنے کپڑیاں دی بس جھالر ای چُھو لین دَوے۔ تے جیہڑے جیہڑے اوہدے کپڑیاں نُوں چُھوندے سن اوہ ٹھیک ہو جاندے سن۔
فٹ نوٹ
^ یاں، ”جیس علاقے چ اوہ پلیا سی۔“
^ یونانی چ: ”نہ اِک وادھو کُرتا۔“
^ ”لفظاں دی وضاحت“ نُوں ویکھو۔
^ یونانی چ: ”چوتھے پہر۔“ (سویر دے 3 وجے توں لے کے سویر دے 6 وجے تک جدوں سورج چڑھدا اے۔)
