گلتیوں دے ناں خط 3:1-29
-
شریعت دا نتیجہ لعنت تے ایمان دا نتیجہ برکت (1-14)
-
نیک بندہ اپنے ایمان دی وجہ توں زندہ رہوے گا (11)
-
-
ابراہام نُوں وراثت وعدے دی بِنا تے ملی سی، شریعت دی بِنا تے نئیں (15-18)
-
ابراہام دی نسل مسیح اے (16)
-
-
شریعت کیوں دِتی گئی؟ (19-25)
-
ایمان دی وجہ توں خدا دے پُتر (26-29)
-
مسیح تے ایمان دی وجہ توں ابراہام دی نسل (29)
-
3 اَے ناسمجھ گلتیو! توانوں کنہے گمراہ کر دِتا اے؟ توانوں تے یسوع مسیح نُوں سُولی* چڑھان بارے اینی چنگی طرحاں سمجھایا گیا سی جیویں کہ ایہہ واقعہ تواڈیاں اَکھاں سامنے ہویا ہووے۔
2 مَیں توانوں ایہہ پچھنا چاہنا واں کہ توانوں پاک روح کیس وجہ توں ملی سی؟ شریعت تے عمل کرن دی وجہ توں یاں خوشخبری تے ایمان لیان دی وجہ توں؟
3 کیہہ تُسی اینے ناسمجھ او؟ تُسی تے پاک روح دے مطابق چلنا شروع کیتا سی۔ پر ہُن کیہہ تُسی انسانی سوچ مطابق اپنی منزل تے پونچنا چاہندے او؟
4 کیہہ تُسی اینیاں تکلیفاں بِلاوجہ سہیاں سن؟ مینوں نئیں لگدا۔
5 ایس لئی جیہڑا توانوں پاک روح دیندا اے تے تواڈے چ معجزے کردا اے، کیہہ اوہ ایس لئی کردا اے کیونکہ تُسی شریعت تے عمل کردے او؟ یاں فیر ایس لئی کیونکہ تُسی خوشخبری تے ایمان لیائے او؟
6 یاد کرو کہ ابراہام نے ”یہوواہ تے ایمان رکھیا جدی وجہ توں اوہنوں نیک ٹھہرایا گیا۔“
7 توانوں ایہہ گل تے پتہ ای اے کہ جیہڑے ایمان دے مطابق چلدے نیں، اوہ ابراہام دے پُتر نیں۔
8 پاک کلام چ پہلاں ای دَس دِتا گیا سی کہ خدا غیریہودیاں وچوں اوہناں نُوں نیک ٹھہرائے گا جیہڑے اوہدے تے ایمان لیاندے نیں۔ ایسے لئی اوہنے ابراہام نُوں پہلاں ای ایہہ خوشخبری دے دِتی سی: ”تیرے ذریعے ساریاں قوماں نُوں برکت ملے گی۔“
9 جیس طرحاں ابراہام نُوں اپنے ایمان دی وجہ توں برکتاں ملیاں، اوسے طرحاں اوہناں لوکاں نُوں وی برکتاں مِل رہیاں نیں جیہڑے اپنے ایمان دے مطابق چلدے نیں۔
10 جیہڑے لوک سمجھدے نیں کہ اوہ شریعت تے عمل کر کے نیک ٹھہر سکدے نیں، اوہ لعنتی نیں کیونکہ پاک کلام چ لکھیا اے: ”جیہڑا بندہ شریعت دی ہر گل تے عمل نئیں کردا، اوہ لعنتی اے۔“
11 نالے سانوں ایہہ گل وی چنگی طرحاں پتہ اے کہ کوئی وی بندہ شریعت دے ذریعے خدا دِیاں نظراں چ نیک نئیں ٹھہر سکدا کیونکہ پاک کلام چ لکھیا اے کہ ”اِک نیک بندہ اپنے ایمان دی وجہ توں زندہ رہوے گا۔“
12 اصل چ شریعت تے چلن لئی ایمان دی لوڑ نئیں ہوندی کیونکہ ایہدے چ لکھیا اے کہ ”جیہڑا بندہ شریعت چ لکھیاں گلاں تے عمل کرے گا، اوہ زندہ رہوے گا۔“
13 مسیح نے سانوں خرید کے اوس لعنت توں بچا لیا جیہڑی شریعت دے ذریعے ساڈے تے آئی۔ اوہنے ساڈی لعنت اپنے اُتے لے لئی کیونکہ لکھیا اے: ”ہر اوہ بندہ لعنتی اے جنہوں سُولی تے چڑھایا جاندا اے۔“
14 اوہنے ایہہ ایس لئی کیتا تاکہ ابراہام نال جیہڑیاں برکتاں دا وعدہ کیتا گیا سی، اوہ مسیح یسوع دے ذریعے غیریہودی قوماں نُوں مِلن تے سانوں ساریاں نُوں اپنے ایمان دی وجہ توں پاک روح ملے جدا وعدہ کیتا گیا سی۔
15 بھراوو، مَیں توانوں اِک مثال دینا واں۔ جدوں کوئی عہد پکا کیتا جاندا اے تے اوہنوں نہ تے کوئی توڑ سکدا اے تے نہ ای اوہدے چ کجھ ودھا سکدا اے، فیر بھانویں اوہ عہد کسے انسان نے ای کیوں نہ کیتا ہووے۔
16 جتھوں تک اوہناں وعدیاں دی گل اے جیہڑے ابراہام تے اوہدی نسل نال کیتے گئے سن، اوہناں وعدیاں چ ایہہ نئیں کہیا گیا سی کہ ”تیری ساری نسل نال،“ یعنی بوہت سارے پُتراں وَل اشارہ نئیں کیتا گیا سی سگوں ایہہ کہیا گیا سی کہ ”تیری نسل نال،“ یعنی اِک پُتر وَل اشارہ کیتا گیا سی جیہڑا مسیح اے۔
17 میرے کہن دا مطلب اے کہ خدا نے پہلاں ابراہام نال عہد بنھیا تے ایہدے 430 سالاں بعد اوہنے اپنے لوکاں نُوں شریعت دِتی۔ ایس لئی شریعت نہ تے اوس عہد نُوں تے نہ ای اوس وعدے نُوں ختم کردی جیہڑا خدا نے ابراہام نال کیتا سی۔
18 جے خدا نے شریعت دی بنیاد تے وراثت دینی ہوندی تے فیر وعدے دا کوئی فائدہ نہ ہوندا۔ پر خدا نے ابراہام تے مہربانی کیتی تے اوہنوں وعدے دی بنیاد تے وراثت دِتی۔
19 فیر خدا نے شریعت کیوں دِتی؟ایس لئی دِتی تاکہ ایہدے ذریعے پتہ چلے کہ گُناہ کیہہ اے۔ ایہہ شریعت اوس نسل دے آن تک رہنی سی جدے نال وعدہ کیتا گیا سی۔ خدا نے ایہہ شریعت فرشتیاں دے ذریعے اِک وِچولے* نُوں دِتی تے فیر اوہدے ہتھیں ایہہ لوکاں تک پونچی۔
20 اِک وِچولے دی لوڑ اوہدوں پیندی اے جدوں دو جنے آپس چ کوئی عہد کردے نیں کیونکہ دونواں نُوں شرطاں پوریاں کرنیاں پیندیاں نیں۔ پر جدوں ابراہام نال وعدہ کیتا گیا تے صرف اِک جنے نے وعدہ کیتا یعنی خدا نے۔
21 تے فیر کیہہ شریعت خدا دے وعدیاں دے خلاف اے؟ بالکل نئیں، کیونکہ جے شریعت دے ذریعے انساناں نُوں زندگی مِل سکدی تے فیر شریعت دے ذریعے انساناں نُوں نیک وی ٹھہرایا جاندا۔
22 پر پاک کلام نے ظاہر کیتا کہ ہر انسان گُناہ دا غلام اے تاکہ جیہڑیاں برکتاں دا وعدہ خدا نے کیتا اے، اوہ اوہناں لوکاں نُوں مِلن جیہڑے یسوع مسیح تے ایمان ظاہر کردے نیں۔
23 پر مسیح تے ایمان لیان* توں پہلاں اَسی شریعت دی نگرانی چ ساں تے ایہدے غلام ساں۔ نالے اِنتظار کر رہے ساں کہ خدا ایس ایمان بارے کیہہ ظاہر کردا اے۔
24 اِنج شریعت ساڈی نگران* بن کے سانوں مسیح تک لے کے آئی تاکہ اَسی ایمان رکھن دی وجہ توں نیک ٹھہریئے۔
25 پر ہُن اَسی مسیح تے ایمان لے آئے آں۔ ایس لئی ہُن سانوں نگران* دی کوئی لوڑ نئیں رہی۔
26 اصل چ مسیح یسوع تے ایمان رکھن دی وجہ توں تُسی سارے خدا دے پُتر او۔
27 تُسی سارے بپتسمہ لے کے مسیح نال اِک مُٹھ ہو گئے او تے مسیح ورگے بن گئے او۔*
28 ایس لئی ایس گل توں کوئی فرق نئیں پیندا کہ تُسی یہودی او یاں یونانی، غلام او یاں آزاد، آدمی او یاں عورت کیونکہ تُسی سارے مسیح یسوع نال اِک مُٹھ او۔
29 ایہدے علاوہ جے تُسی مسیح دے او تے فیر تُسی سچمچ ابراہام دی نسل او تے اوس وعدے دے وارث او جیہڑا ابراہام نال کیتا گیا سی۔
فٹ نوٹ
^ ”لفظاں دی وضاحت“ نُوں ویکھو۔
^ یعنی موسیٰ۔ وِچولا اوہ بندہ ہوندا اے جیہڑا دو فریقاں دے وچ کوئی معاملہ طے کرواندا اے۔
^ یاں، ”مسیحی مذہب دے آن۔“
^ یاں، ”اُستاد۔“
^ یاں، ”اُستاد۔“
^ یاں، ”مسیح نُوں اِنج پا لیا اے جیویں کپڑے پائی دے نیں۔“
