گلتیوں دے ناں خط 5:1-26
5 مسیح نے سانوں ایہی آزادی دین لئی چھڈایا اے۔* ایس لئی ایس آزادی دی بڑی حفاظت کرو* تے غلامی دا جُوا اپنے موڈھیاں تے دُبارہ نہ رکھو۔
2 دھیان نال میری گل سُنو۔ مَیں پولُس توانوں دَس رہیا واں کہ جے تُسی ختنہ کراؤ گے تے فیر مسیح نے جو کجھ کیتا اے، اوہدا توانوں کوئی فائدہ نئیں ہوئے گا۔
3 مَیں توانوں فیر کہہ رہیا واں کہ جیہڑا بندہ ختنہ کراندا اے، اوہدے لئی لازمی اے کہ اوہ شریعت دی ہر گل تے عمل کرے۔
4 تُسی جیہڑے شریعت تے عمل کر کے نیک ٹھہرن دی کوشش کر رہے او، اصل چ تُسی مسیح توں دُور ہو گئے او تے اوہدی عظیم رحمت گنوا بیٹھے او۔
5 پر جتھوں تک ساڈی گل اے، سانوں پاک روح دے ذریعے ایمان دی وجہ توں پوری طرحاں نیک ٹھہرایا جائے گا۔ اَسی اوس ویلے دا بڑی بےصبری نال اِنتظار کر رہے آں جدوں ساڈی ایہہ امید پوری ہوئے گی۔
6 اصل چ جیہڑے لوک مسیح یسوع نال اِک مُٹھ نیں، اوہناں لئی ختنہ کرانا یاں نہ کرانا اہم نئیں اے سگوں اہم ایہہ وے کہ اوہ ایمان دے مطابق چلن جدی بنیاد محبت اے۔
7 تُسی تے چنگے بھلے سچائی دی راہ تے دوڑ رہے سو تے فیر اَگے ودھن توں توانوں کنہے روک دِتا؟
8 خدا جنہے توانوں بلایا اے، اوہنے تے توانوں اِنج کرن دی ہلاشیری نئیں دِتی۔
9 یاد رکھو کہ تھوڑا جیہا خمیر سارے آٹے نُوں خمیرا بنا دیندا اے۔
10 مینوں بھروسا اے کہ تُسی سارے جیہڑے مالک نال اِک مُٹھ او، میری گل نال اِتفاق کرو گے۔ توانوں پریشان کرن والا بندہ بھانویں جیہڑا وی ہووے، اوہنوں اوہ سزا ضرور ملے گی جدے اوہ لائق اے۔
11 پر بھراوو، جتھوں تک میری گل اے، جے مَیں حالے وی ختنہ کران دی تلیم دے رہیا واں تے فیر مینوں ستایا کیوں جا رہیا اے؟ تے لوکاں نُوں میرا اوہ پیغام بُرا کیوں لگدا اے جیہڑا مَیں یسوع دی سُولی* بارے دینا واں؟
12 مَیں چاہنا واں کہ جیہڑے آدمی توانوں گمراہ کرن دی کوشش کر رہے نیں، اوہ اپنا جنسی حصہ* ای کٹوا لین۔
13 بھراوو، توانوں ایس لئی بلایا گیا سی تاکہ تُسی آزاد ہو جاؤ۔ پر ایس آزادی نُوں اپنے جسم دِیاں غلط خواہشاں نُوں پورا کرن لئی استمال نہ کرو سگوں محبت دی بِنا تے اِک دُوجے دی خدمت کرو۔
14 ساری شریعت دا نچوڑ ایہہ حکم اے: ”تُوں اپنے گوانڈھی نال اُنج ای پیار کر جیویں تُوں اپنے آپ نال کرنا ایں۔“
15 پر جے تُسی اِک دُوجے نُوں وڈھ کھان چ لگے رہوو گے تے خبردار رہوو کہ تُسی کِتے اِک دُوجے نُوں تباہ نہ کر دَوو۔
16 پر مَیں توانوں کہنا واں کہ تُسی پاک روح دے مطابق چلدے رہوو۔ اِنج تُسی جسم دی کوئی وی غلط خواہش پوری نئیں کرو گے
17 کیونکہ جسم تے ایہدیاں خواہشاں پاک روح دے خلاف نیں تے پاک روح جسم دے خلاف اے۔ ایہہ دونویں اِک دُوجے دے خلاف نیں۔ ایس لئی تُسی جو کرنا چاہندے او، اوہ نئیں کر پاندے۔
18 ایہدے علاوہ جے تُسی پاک روح دی رہنمائی چ چلدے او تے فیر تُسی شریعت دے تابع نئیں او۔
19 ہُن جسم دے کم تے صاف نظر آندے نیں یعنی کہ جنسی بدکاری،* ناپاکی، بےحیائی نال غلط کم کرنا،*
20 بُتپرستی، جادو ٹونا، دُشمنی، لڑائی جھگڑا، دُوجیاں توں سڑنا، غصے چ بھڑکنا، بحث کرنا، پُھٹ پانا، فرقے بنانا،
21 حسد کرنا، حدوں ودھ شراب پینا، محفلاں چ رنگرلیاں منانا تے ایہو جہے ہور کم۔ مَیں توانوں ایہناں کماں توں خبردار کر رہیا واں، بالکل اُنج ای جیویں مَیں پہلاں وی کیتا سی کیونکہ جیہڑے لوک ایہناں کماں چ لگے رہندے نیں اوہ خدا دی بادشاہی دے وارث نئیں ہون گے۔
22 پر پاک روح دا پھل ایہہ وے: پیار، خوشی، اِطمینان، صبر، مہربانی، بھلائی، ایمان،
23 نرممزاجی تے اپنے آپ اُتے قابو رکھنا۔ کوئی وی شریعت ایہناں خوبیاں دے خلاف نئیں اے۔
24 ایہدے علاوہ جیہڑے مسیح یسوع دے لوک نیں اوہناں نے اپنے گُناہگار جسم نُوں ایہدے ہر بھیڑے شوق تے خواہشاں سمیت سُولی تے ٹنگ دِتا* اے۔
25 جے اَسی پاک روح دے مطابق زندگی گزار رہے آں تے فیر آؤ ایہدی رہنمائی چ چلدے رہیے۔
26 نالے اَسی غرور نہ کریئے، اِک دُوجے نُوں مقابلہ کرن تے نہ اُکسائیے تے نہ ای اِک دُوجے توں حسد کریئے۔
فٹ نوٹ
^ یعنی شریعت دی غلامی توں آزاد کرایا اے۔
^ یونانی چ: ”ڈٹے رہوو۔“
^ لفظاں دی وضاحت“ نُوں ویکھو۔
^ یعنی اُولاد پیدا کرن والا حصہ۔ اِنج اوہ موسیٰ دی شریعت تے عمل کرن دے قابل ای نئیں رہن گے۔
^ یونانی چ: ”پورنیا۔“ ”لفظاں دی وضاحت“ نُوں ویکھو۔
^ یاں، ”بےشرم چال چلن۔“ یونانی چ: ”اسیلگیا۔“ ”لفظاں دی وضاحت“ نُوں ویکھو۔
^ یاں، ”مار دِتا۔“
