یعقوب دا خط 1:1-27
1 مَیں یعقوب خدا تے مالک یسوع مسیح دا غلام، ایہہ خط اوہناں 12 قبیلیاں نُوں لکھ رہیا واں جیہڑے فرق فرق علاقیاں چ رہ رہے نیں۔
سلام!
2 میرے بھراوو، جدوں تُسی فرق فرق اَزمیشاں چوں لنگھدے او تے خوش ہووو
3 کیونکہ توانوں پتہ اے کہ جدوں تواڈا ایمان پَرکھیا جاندا اے تے تواڈے چ صبر* پیدا ہوندا اے۔
4 پر صبر نُوں اپنا کم پورا کرن دَوو تاکہ تواڈے چ کوئی کمی نہ رہوے تے تُسی ہر لحاظ نال مکمل تے بےداغ ہو جاؤ۔
5 ایس لئی جے تواڈے وچوں کسے چ حکمت دی کمی اے تے اوہ خدا کولوں منگدا رہوے تے اوہنوں حکمت دِتی جائے گی کیونکہ خدا ناراض ہوئے بغیر* ساریاں نُوں دل کھول کے دیندا اے۔
6 پر اوہنوں پورے ایمان نال منگنا چاہی دا اے تے ذرا وی شک نئیں کرنا چاہی دا کیونکہ شک کرن والا انسان سمندر دِیاں چھلاں وانگوں ہوندا اے جیہڑیاں ہوا دے زور نال ایدھر اودھر اُچھلدیاں رہندیاں نیں۔
7 اصل چ ایہو جہے انسان نُوں ایہہ امید نئیں رکھنی چاہی دی کہ اوہنوں یہوواہ وَلّوں کجھ ملے گا۔
8 ایہو جیہا انسان کوئی وی فیصلہ نئیں کر پاندا تے اپنی ہر گل چ ڈانوانڈول رہندا اے۔
9 پر جیہڑا بھرا غریب اے، اوہ خوش* ہووے کہ اوہنوں اُچا کیتا گیا اے
10 تے جیہڑا بھرا امیر اے، اوہ وی خوش ہووے کہ اوہنوں نیواں کیتا گیا اے کیونکہ امیر بندہ پُھل وانگوں سُک جائے گا۔
11 جدوں سورج چڑھدا اے تے اوہدی تیز دُھپ نال پودا سُک جاندا اے، اوہدے پُھل جھڑ جاندے نیں تے اوہدی خوبصورتی ختم ہو جاندی اے۔ ایسے طرحاں امیر آدمی وی اپنے کم دھندے دی بھج دوڑ چ ختم ہو جائے گا۔
12 خوش اے اوہ انسان جیہڑا اَزمیشاں نُوں صبر نال برداشت کردا رہندا اے کیونکہ اَزمیشاں چ کامیاب ہون توں بعد اوہنوں زندگی دا تاج ملے گا۔ یہوواہ نے ایہہ تاج اوہناں لوکاں نُوں دین دا وعدہ کیتا اے جیہڑے اوہنوں پیار کردے نیں۔
13 جدوں کوئی بندہ اَزمیش دا سامنا کر رہیا ہووے تے اوہ ایہہ نہ کہوے کہ ”خدا مینوں اَزما رہیا اے“ کیونکہ نہ تے خدا نُوں اَزمایا جا سکدا اے تے نہ ای اوہ کسے نُوں مصیبت چ پا کے اَزماندا اے
14 سگوں ہر انسان اپنیاں خواہشاں دے جال چ پھس کے اَزمایا جاندا اے۔
15 فیر ایہہ خواہشاں اندر ای اندر پلدیاں* رہندیاں نیں تے ایہناں توں گُناہ پیدا ہوندا اے تے گُناہ کرن دا انجام موت ہوندا اے۔
16 میرے پیارے بھراوو، دھوکھا نہ کھاؤ۔
17 ہر شاندار نعمت تے ہر ودھیا* تحفہ اُتوں یعنی اسمانی روشنیاں دے باپ وَلّوں مِلدا اے۔ اوہ پرچھانویں وانگوں نئیں اے جیہڑا بدلدا رہندا اے۔
18 اوہدی مرضی سی کہ اوہ سانوں سچائی دے کلام دے ذریعے پیدا کرے تاکہ اَسی انساناں وچوں اِک لحاظ نال پہلے پھل بنئے۔
19 میرے پیارے بھراوو، ایہہ گل جان لوو: ہر کوئی سُنن لئی تیار رہوے، بولن چ کالھی نہ کرے تے چھیتی غصے چ نہ آئے
20 کیونکہ جیہڑا بندہ غصے نُوں قابو چ نئیں رکھدا، اوہ خدا دِیاں نظراں چ نیک نئیں ٹھہردا۔
21 ایس لئی ہر طرحاں دی گندگی توں دُور رہوو تے چھوٹی توں چھوٹی بُرائی* توں وی پاک رہوو۔ نالے اوس کلام نُوں نرممزاجی نال قبول کرو جیہڑا تواڈے دِلاں چ بویا گیا اے تے توانوں نجات دَوا سکدا اے۔
22 ایہدے علاوہ کلام تے عمل کرن والے بنو نہ کہ صرف سُنن والے جیہڑے اپنے آپ نُوں جھوٹھیاں تسلیاں دے کے دھوکھا دیندے نیں۔
23 جے اِک بندہ کلام نُوں صرف سُن دا اے پر اوہدے تے عمل نئیں کردا، اوہ اوس انسان ورگا اے جیہڑا شیشے چ اپنا مُونہہ ویکھدا اے۔
24 اوہ بس اپنے آپ نُوں ویکھ کے چلا جاندا اے تے فوراً بُھل جاندا اے کہ اوہ کیہو جیہا نظر آ رہیا اے۔
25 پر جیہڑا بندہ اوس کامل شریعت* تے دھیان دیندا اے جیہڑی آزادی وَل لجاندی اے تے اوہدے تے چلدا رہندا اے، اوہ ایہنوں سُن کے بُھلدا نئیں سگوں ایہدے تے عمل کردا اے تے اوہنوں اپنے کماں توں خوشی ملے گی۔
26 جیہڑا انسان سوچدا اے کہ اوہ خدا دی عبادت کردا اے،* پر اپنی زبان نُوں لگام نئیں دیندا، اوہ اپنے آپ نُوں دھوکھا دیندا اے تے اوہدی عبادت فضول اے۔
27 ساڈے خدا تے باپ دی نظر چ پاک صاف عبادت* ایہہ وے کہ اَسی مصیبت چ یتیماں تے بیوہ عورتاں دا خیال رکھیے تے اپنے آپ نُوں دُنیا دی گندگی توں پاک رکھیے۔
فٹ نوٹ
^ ایس ایت چ لفظ صبر دا مطلب اے مشکلاں نُوں برداشت کرنا۔
^ یاں، ”جِھڑکے بغیر۔“
^ یونانی چ: ”فخر کرے۔“
^ یونانی چ: ”حاملہ ہوندیاں نیں۔“
^ یونانی چ: ”مکمل۔“
^ یاں شاید، ”ہر پاسے پھیلی بُرائی۔“
^ یعنی خدا دا کلام۔
^ یاں، ”اوہ مذہبی اے۔“
^ یاں، ”مذہب۔“
