یوحنا دی اِنجیل 5:1-47
5 فیر جدوں یہودیاں دی اِک عید آئی تے یسوع یروشلیم گیا۔
2 یروشلیم چ بھیڈ پھاٹک دے لاگے اِک تلا سی جدا عبرانی چ ناں بیتزاتا* سی تے جدے آلے دَوالے پنج برانڈے سن۔
3 ایہناں برانڈیاں چ بوہت سارے بیمار، اَنھے، لنگڑے تے معذور* لوک پئے ہوئے سن۔
4 *—
5 پر اوتھے اِک آدمی سی جیہڑا 38 سالاں توں بیمار سی۔
6 یسوع نُوں پتہ سی کہ اوہ آدمی بڑے چِر توں بیمار اے۔ اوہنوں اوتھے لمے پیا ویکھ کے یسوع نے اوہنوں پچھیا: ”کیہہ تُوں ٹھیک ہونا چاہنا ایں؟“
7 اوس بیمار آدمی نے کہیا: ”جناب، میرے نال کوئی ایہو جیہا بندہ نئیں جیہڑا مینوں اوس ویلے تلا چ لے جائے جدوں پانی ہِلدا اے۔ ایس لئی میرے تلا چ جان توں پہلاں ای کوئی ہور اوہدے چ چلا جاندا اے۔“
8 یسوع نے اوہنوں کہیا: ”اُٹھ! اپنی چٹائی چُک تے ٹُر پھر۔“
9 اوہ آدمی اوسے ویلے ٹھیک ہو گیا تے اپنی چٹائی چُک کے ٹُرن پھرن لگ پیا۔
ایہہ سب کجھ سبت والے دن ہویا۔
10 ایس لئی کجھ یہودیاں نے اوس آدمی نُوں جنہوں ٹھیک کیتا گیا سی کہیا: ”اَج سبت دا دن اے۔ تیرے لئی چٹائی چُکنا جائز نئیں اے۔“
11 پر اوہنے اوہناں نُوں کہیا: ”جیس بندے نے مینوں ٹھیک کیتا سی، اوہنے ای مینوں کہیا سی کہ ”اپنی چٹائی چُک تے ٹُر پھر۔““
12 اوہناں نے اوہنوں پچھیا: ”کون اے اوہ بندہ جنہے تینوں کہیا سی کہ ”ایہہ چُک تے ٹُر پھر“؟ “
13 پر اوس آدمی نُوں پتہ نئیں سی کہ اوہنوں کنہے ٹھیک کیتا اے کیونکہ یسوع بِھیڑ چ ایدھر اودھر ہو گیا سی۔
14 بعد چ یسوع نُوں اوہ آدمی ہیکل چ ملیا تے اوہنے اوہنوں کہیا: ”ویکھ، تُوں ٹھیک ہو گیا ایں۔ اَگے توں گُناہ نہ کرِیں تاکہ تیرے نال ایس توں وی بُرا نہ ہووے۔“
15 اوس آدمی نے جا کے یہودیاں نُوں دَسیا کہ یسوع نے اوہنوں ٹھیک کیتا سی۔
16 ایس لئی یہودی یسوع نُوں بُرا بھلا کہن لگ پئے کیونکہ اوہ ایہہ سارے کم سبت والے دن کر رہیا سی۔
17 پر یسوع نے اوہناں نُوں کہیا: ”میرا باپ اَج تک کم کر رہیا اے۔ ایس لئی مَیں وی کم کردا رہنا واں۔“
18 ایہہ سُن کے یہودی اوہنوں مارن تے تُل گئے کیونکہ اوہناں دے خیال چ اوہنے نہ صرف سبت دے قانون نُوں توڑیا سی سگوں خدا نُوں اپنا باپ کہہ کے اپنے آپ نُوں اوہدے برابر وی بنایا سی۔
19 ایس لئی یسوع نے اوہناں نُوں جواب دِتا: ”مَیں توانوں سچ کہنا واں، پُتر اپنی مرضی نال کجھ نئیں کر سکدا سگوں اوہی کم کردا اے جیہڑے اوہ باپ نُوں کردیاں ویکھدا اے کیونکہ جیہڑے کم باپ کردا اے، پُتر وی اوہ کم اوسے طرحاں کردا اے جیویں باپ کردا اے۔
20 باپ پُتر نال پیار کردا اے۔ ایس لئی اوہ اوہنوں اوہ سارے کم وکھاندا اے جیہڑے اوہ آپ کردا اے سگوں اوہ اوہنوں ایہناں نالوں وی وڈے وڈے کم وکھائے گا تاکہ تُسی حیران ہووو
21 کیونکہ جیویں باپ مُردیاں نُوں زندہ کردا اے تے اوہناں نُوں زندگی بخشدا اے، اوسے طرحاں پُتر وی جنہوں چاہوے زندگی بخشدا اے۔
22 باپ کسے دی عدالت نئیں کردا سگوں اوہنے عدالت کرن دی ساری ذمےداری پُتر دے حوالے کیتی اے
23 تاکہ سارے اوسے طرحاں پُتر دی عزت کرن جیویں اوہ باپ دی عزت کردے نیں۔ جیہڑا پُتر دی عزت نئیں کردا، اوہ باپ دی عزت وی نئیں کردا جنہے اوہنوں گھلیا اے۔
24 مَیں توانوں سچ کہنا واں، جیہڑا میری گل سُن دا اے تے مینوں گھلن والے دِیاں گلاں تے یقین کردا اے، اوہنوں ہمیشاں دی زندگی ملے گی۔ اوہنوں سزا نئیں ملے گی سگوں اوہنے موت دے قبضے چوں آزاد ہو کے زندگی پا لئی اے۔
25 مَیں توانوں سچ کہنا واں، اوہ ویلا آ رہیا اے سگوں آ گیا اے جدوں مُردے خدا دے پُتر دی آواز سُنن گے تے جیہڑے اوہدی گل تے دھیان دین گے، اوہ زندگی پان گے۔
26 جیویں باپ کول زندگی دین دی طاقت اے، اونویں ای اوہنے پُتر نُوں وی زندگی دین دی طاقت بخشی اے۔
27 نالے باپ نے اوہنوں عدالت کرن دا اِختیار وی دِتا اے کیونکہ اوہ انسان دا بیٹا* اے۔
28 ایس گلوں حیران نہ ہووو کیونکہ اوہ ویلا آ رہیا اے جدوں اوہ سارے لوک جیہڑے قبراں وچ نیں، اوہدی آواز سُنن گے
29 تے نکل آن گے۔ جنہاں نے چنگے کم کیتے سن، اوہناں نُوں زندگی ملے گی تے جنہاں نے بھیڑے کم کیتے سن، اوہناں دی عدالت ہوئے گی۔
30 مَیں اپنی مرضی نال کجھ نئیں کر سکدا۔ جیویں باپ مینوں دَسدا اے، مَیں اونویں ای عدالت کرنا واں تے میرا فیصلہ صحی ہوندا اے کیونکہ مَیں اپنی مرضی نئیں سگوں اوہدی مرضی پوری کرنا چاہنا واں جنہے مینوں گھلیا اے۔
31 جے مَیں کلّا ای اپنے بارے گواہی دیندا تے میری گواہی سچی نہ ہوندی۔
32 پر اِک ہور وی اے جیہڑا میرے بارے گواہی دیندا اے تے مینوں پتہ اے کہ میرے بارے اوہدی گواہی سچی اے۔
33 تُسی یوحنا کول آدمی گھلے تے اوہنے سچائی بارے گواہی دِتی۔
34 پر مینوں کسے آدمی دی گواہی دی لوڑ نئیں سگوں مَیں ایہہ گلاں توانوں ایس لئی کہہ رہیا واں تاکہ تُسی نجات پاؤ۔
35 یوحنا اِک بلدے تے چمکدے ہوئے دِیوے وانگوں سی جدے چانن چ تُسی تھوڑے چِر لئی خوشیاں منان لئی تیار سو۔
36 پر میرے کول یوحنا توں وی وڈی گواہی اے کیونکہ اوہ کم جیہڑے میرے باپ نے مینوں دِتے نیں یعنی جیہڑے کم مَیں کر رہیا واں، اوہ گواہی دیندے نیں کہ باپ نے مینوں گھلیا اے۔
37 نالے باپ نے وی میرے بارے گواہی دِتی اے جنہے مینوں گھلیا اے۔ تُسی نہ تے اوہدی آواز سُنی اے تے نہ ای اوہنوں ویکھیا اے۔
38 تواڈے دل چ اوہدا کلام نئیں اے کیونکہ تُسی اوس بندے تے یقین نئیں کردے جنہوں اوہنے گھلیا اے۔
39 تُسی پاک کلام نُوں بڑی باریکی نال پڑھدے او کیونکہ تُسی سوچدے او کہ ایہدے ذریعے توانوں ہمیشاں دی زندگی ملے گی۔ ایہی تے میرے بارے گواہی دیندا اے۔
40 پر فیر وی تُسی زندگی پان لئی میرے کول نئیں آنا چاہندے۔
41 مَیں انساناں کولوں اپنی تعریف نئیں کرانا چاہندا۔
42 پر مینوں چنگی طرحاں پتہ اے کہ تواڈے دِلاں چ خدا لئی پیار نئیں اے۔
43 مَیں اپنے باپ دے ناں تے آیا واں۔ پر تُسی مینوں قبول نئیں کردے۔ جے کوئی ہور اپنے ناں تے آیا ہوندا تے تُسی اوہنوں ضرور قبول کر لینا سی۔
44 تُسی میرا یقین کر وی کیویں سکدے او؟ کیونکہ تُسی تے اِک دُوجے کولوں اپنی عزت کرانا چاہندے او۔ پر اوہ عزت نئیں لینا چاہندے جیہڑی واحد خدا دیندا اے۔
45 ایہہ نہ سوچو کہ مَیں باپ دے سامنے تواڈے اُتے اِلزام لاواں گا۔ پر اِک ہے وے جیہڑا تواڈے تے اِلزام لاندا اے یعنی موسیٰ جدے تے تُسی اُمید لائی ہوئی اے۔
46 اصل چ جے تُسی موسیٰ تے یقین کردے تے تُسی میرے تے وی یقین کردے کیونکہ اوہنے میرے بارے لکھیا سی۔
47 پر جے تُسی اوہدیاں لکھیاں ہوئیاں گلاں تے یقین نئیں کردے تے فیر تُسی میریاں گلاں تے یقین کیویں کرو گے؟“
فٹ نوٹ
^ بائبل دے کجھ پرانے نسخیاں چ ایس تلا نُوں بیتحسدا کہیا گیا اے۔
^ یاں، ”جنہاں دِیاں بانہواں یاں لتاں تے فالج ہویا سی۔“
^ متی 17:21 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
