یوحنا دی اِنجیل 6:1-71
6 اوہدے بعد یسوع گلیل دی جھیل یعنی طبریاس دی جھیل دے پار گیا۔
2 لوکاں دی اِک وڈی بِھیڑ وی اوہدے پچھے پچھے گئی کیونکہ اوہناں نے ویکھیا سی کہ اوہ معجزے کر کے بیماراں نُوں ٹھیک کر رہیا اے۔
3 ایس لئی یسوع اپنے شاگرداں نال اِک پہاڑ تے چلا گیا تے اوتھے بہہ گیا۔
4 اوہدوں یہودیاں دی فسح دی عید نیڑے سی۔
5 جدوں یسوع نے اپنیاں اَکھاں چُک کے ویکھیا کہ اِک وڈی بِھیڑ اوہدے وَل آ رہی اے تے اوہنے فِلپّس نُوں پچھیا: ”اَسی اینے سارے لوکاں لئی روٹی کتھوں خریداں گے؟“
6 یسوع نُوں پتہ سی کہ اوہ کیہہ کرن والا اے۔ پر فیر وی اوہنے فِلپّس نُوں پرکھن لئی ایہہ پچھیا سی۔
7 فِلپّس نے جواب دِتا: ”جے اَسی 200 دینار دِیاں روٹیاں وی خرید لئیے تے فیر وی سارے لوکاں چ پوریاں نئیں آنیاں۔“
8 یسوع دے اِک شاگرد اندریاس نے جیہڑا شمعون پطرس دا بھرا سی، اوہنوں کہیا:
9 ”ایتھے اِک مُنڈے کول جَو دِیاں پنج روٹیاں تے دو چھوٹیاں مچھیاں نیں۔ پر اوہناں نال اینے سارے لوکاں دا ٹیڈھ کیویں بھرے گا؟“
10 یسوع نے کہیا: ”لوکاں نُوں بٹھاؤ۔“ اوتھے بوہت ساری گھاہ سی ایس لئی لوک تھلے بہہ گئے۔ بِھیڑ وچ تقریباً 5000 مرد شامل سن۔
11 یسوع نے روٹیاں لے کے خدا دا شکر کیتا تے اوہناں نُوں اوتھے بیٹھے ہوئے لوکاں چ وَنڈ دِتا۔ ایسے طرحاں اوہنے مچھیاں وی وَنڈیاں تے لوکاں نے رَج کے کھادا۔
12 جدوں سارے لوک رَج گئے تے یسوع نے اپنے شاگرداں نُوں کہیا: ”سارے بچے ہوئے ٹکڑے جمع کر لوو تاکہ کجھ ضائع نہ ہووے۔“
13 ایس لئی اوہناں نے لوکاں دے کھان توں بعد جَو دِیاں پنج روٹیاں دے بچے ہوئے ٹکڑے جمع کیتے جنہاں نال 12 ٹوکرے بھر گئے۔
14 جدوں لوکاں نے یسوع د ا ایہہ معجزہ ویکھیا تے اوہ آپس چ کہن لگ پئے: ”ایہہ واقعی اوہی نبی اے جنہے دُنیا چ آنا سی۔“
15 یسوع جان گیا کہ لوک اوہنوں پھڑ کے زبردستی بادشاہ بنانا چاہندے نیں۔ ایس لئی اوہ کلّا فیر توں پہاڑ تے چلا گیا۔
16 جدوں شام ہوئی تے اوہدے شاگرد جھیل تے گئے
17 تے اِک کشتی وچ بہہ کے جھیل دے اوس پار کفرنحوم وَل نکل گئے۔ اوس ویلے تک نھیرا ہو گیا سی۔ پر یسوع حالے تک اوہناں کول نئیں آیا سی۔
18 نالے تیز نھیری دی وجہ توں جھیل دے وچ اُچیاں اُچیاں چھلاں اُٹھ رہیاں سن۔
19 جدوں شاگرد کشتی چ کوئی تِن چار میل* دُور چلے گئے تے اوہناں نے ویکھیا کہ یسوع پانی تے ٹُردا ہویا کشتی وَل آ رہیا اے۔ اوہ ایہہ ویکھ کے ڈر گئے۔
20 پر یسوع نے اوہناں نُوں کہیا: ”مَیں آں، ڈرو نہ۔“
21 فیر اوہناں نے یسوع نُوں کشتی چ بیٹھا لیا تے چھیتی ای اوہ اپنی منزل تے پونچ گئے۔
22 جیہڑے لوک جھیل دے ایس پار رہ گئے سن، اوہناں نے ا گلے دن ویکھیا کہ کنارے تے کوئی کشتی نئیں اے۔ اوہناں نُوں پتہ سی کہ کل شام تک اوتھے اِک چھوٹی کشتی ہے سی جدے چ بہہ کے شاگرد جھیل دے دُوجے پاسے گئے سن۔ پر یسوع اوہناں دے نال نئیں گیا سی۔
23 فیر شہر طبریاس توں لوک چھوٹیاں کشتیاں چ اوس جگہ دے کول آئے جِتھے مالک یسوع نے دُعا چ خدا دا شکر کر کے اوہناں نُوں روٹی کھان لئی دِتی سی۔
24 پر جدوں لوکاں نے ویکھیا کہ یسوع تے اوہدے شاگرد اوتھے نئیں نیں تے اوہ کشتیاں چ بہہ کے یسوع نُوں لبھن لئی کفرنحوم گئے۔
25 جدوں اوہناں نے جھیل پار کر کے یسوع نُوں اوتھے لبھ لیا تے اوہناں نے اوہنوں کہیا: ”اُستاد،* تُوں ایتھے کدوں آیا سیں؟“
26 یسوع نے اوہناں نُوں جواب دِتا: ”مَیں توانوں سچ کہنا واں، تُسی مینوں ایس لئی نئیں لبھ رہے کیونکہ تُسی میرے معجزے ویکھے سن سگوں ایس لئی لبھ رہے او کیونکہ مَیں توانوں رَج کے روٹی کھوائی سی۔
27 اوس کھانے لئی محنت نہ کرو جیہڑا خراب ہو جاندا اے سگوں اوس کھانے لئی محنت کرو جیہڑا کدی خراب نئیں ہوندا تے ہمیشاں دی زندگی دیندا اے۔ ایہہ کھانا انسان دا بیٹا* توانوں دَوے گا کیونکہ اوہدے اُتے باپ یعنی خدا نے اپنی منظوری دی مُہر لا دِتی اے۔“
28 اوہناں نے یسوع نُوں کہیا: ”اَسی کیہہ کریئے تاکہ سانوں خدا دی منظوری ملے؟“
29 یسوع نے اوہناں نُوں جواب دِتا: ”خدا دی منظوری پان لئی ایہہ ضروری اے کہ تُسی اوہدے تے ایمان ظاہر کرو جنہوں اوہنے گھلیا اے۔“
30 فیر لوکاں نے اوہنوں کہیا: ”تُوں کیہڑا معجزہ کریں گا جنہوں ویکھ کے اَسی تیرے اُتے ایمان لے آئیے؟ دَس توں کیہڑا کم کریں گا؟
31 ساڈے پیو دادیاں نے ویرانے چ من کھادا سی جیویں کہ لکھیا اے: ”اوہنے اوہناں نُوں اسمانوں روٹی دِتی۔““
32 یسوع نے اوہناں نُوں کہیا: ”مَیں توانوں سچ کہنا واں کہ موسیٰ نے توانوں اسمانوں روٹی نئیں دِتی سی سگوں میرا باپ توانوں اسمانوں اصلی روٹی دیندا اے۔
33 خدا وَلّوں مِلن والی روٹی اوہ بندہ اے جیہڑا اسمانوں آیا اے تے دُنیا نُوں زندگی دیندا اے۔“
34 ایہہ سُن کے لوکاں نے کہیا: ”مالک، سانوں ایہہ روٹی ہمیشاں دیندا رہویں۔“
35 یسوع نے کہیا: ”زندگی دی روٹی مَیں آں۔ جیہڑا میرے کول آندا اے، اوہنوں کدی وی بُھکھ نئیں لگے گی تے جیہڑا میرے تے ایمان ظاہر کردا اے، اوہنوں کدی وی پیاس نئیں لگے گی۔
36 پر مَیں توانوں پہلاں وی کہیا اے کہ تُسی مینوں ویکھ کے وی میرا یقین نئیں کردے۔
37 ہر اوہ بندہ جیہڑا میرا باپ مینوں دیندا اے، اوہ میرے کول آئے گا۔ تے جیہڑا میرے کول آندا اے، اوہنوں مَیں کدی وی اپنے توں دُور نئیں کراں گا
38 کیونکہ مَیں اسمانوں اپنی مرضی پوری کرن نئیں سگوں اوہدی مرضی پوری کرن آیا واں جنہے مینوں گھلیا اے۔
39 میرے گھلن والے دی مرضی ایہہ وے کہ جیہڑے لوک اوہنے مینوں دِتے نیں، اوہناں وچوں کوئی وی میرے کولوں گواچ نہ جائے سگوں مَیں آخری دن اوہناں نُوں زندہ کراں۔
40 میرے باپ دی مرضی ایہہ وے کہ جیہڑا وی پُتر نُوں جان دا اے تے اوہدے تے ایمان ظاہر کردا اے، اوہ ہمیشاں دی زندگی پائے تے مَیں اوہنوں آخری دن زندہ کراں گا۔“
41 فیر یہودی لوک یسوع بارے بُڑ بُڑ کرن لگ پئے کیونکہ اوہنے کہیا سی: ”اسمانوں آن والی روٹی مَیں آں۔“
42 تے اوہ آپس چ کہن لگ پئے: ”کیہہ ایہہ یوسف دا پُتر یسوع نئیں جدے ماںپیو نُوں اَسی جاننے آں؟ تے فیر ایہہ کیویں کہہ سکدا اے کہ ”مَیں اسمانوں آیا واں“؟“
43 یسوع نے اوہناں نُوں کہیا: ”آپس چ بُڑبُڑ کرنا بند کرو۔
44 کوئی وی انسان میرے کول نئیں آ سکدا جدوں تک باپ جنہے مینوں گھلیا اے، اوہنوں میرے کول نہ لیائے* تے مَیں اوہنوں آخری دن زندہ کراں گا۔
45 نبیاں دِیاں کتاباں چ لکھیا اے: ”اوہ سارے یہوواہ کولوں تلیم پان گے۔“ جنہے باپ دِیاں گلاں سُنیاں نیں تے اوہدے کولوں تلیم پائی اے، اوہ میرے کول آندا اے۔
46 کسے وی انسان نے باپ نُوں نئیں ویکھیا سوائے اوہدے جیہڑ ا اوہدے وَلّوں* آیا اے۔ اوہنے ای باپ نُوں ویکھیا اے۔
47 مَیں توانوں سچ کہنا واں کہ جیہڑا وی میرے تے یقین کرے گا، اوہ ہمیشاں دی زندگی پائے گا۔
48 زندگی دی روٹی مَیں آں۔
49 تواڈے پیو دادیاں نے ویرانے چ من کھادا پر فیر وی اوہ مر گئے۔
50 پر جیہڑا وی اسمانوں آن والی روٹی کھاندا اے، اوہ کدی نئیں مرے گا۔
51 زندگی دی روٹی جیہڑی اسمانوں آئی ا ے، اوہ مَیں آں۔ جیہڑا وی ایہہ روٹی کھائے گا، اوہ ہمیشاں زندہ رہوے گا۔ اصل چ ایہہ روٹی میرا جسم اے جیہڑا مَیں دُنیا دی خاطر قربان کراں گا تاکہ لوکاں نُوں زندگی ملے۔“
52 ایہہ سُن کے یہودی آپس چ ایہہ بحث کرن لگ پئے: ”ایہہ بندہ سانوں اپنا جسم کھان لئی کیویں دے سکدا اے؟“
53 یسوع نے اوہناں نُوں کہیا: ”مَیں توانوں سچ کہنا واں کہ جے تُسی انسان دے بیٹے دا گوشت نئیں کھاؤ گے تے اوہدا خون نئیں پِیو گے، توانوں زندگی نئیں ملے گی۔
54 جیہڑا بندہ میرا گوشت کھاندا اے تے میرا خون پیندا اے، اوہنوں ہمیشاں دی زندگی ملے گی تے مَیں اوہنوں آخری دن زندہ کراں گا
55 کیونکہ میرا گوشت تے خون کسے وی کھان پین والی چیز نالوں بوہتا اہم اے۔ *
56 جیہڑا بندہ میرا گوشت کھاندا اے تے میرا خون پیندا اے، اوہ میرے نال اِک مُٹھ رہندا اے تے مَیں اوہدے نال اِک مُٹھ رہنا واں۔
57 جیویں زندہ باپ نے مینوں گھلیا اے تے مَیں باپ دی وجہ توں زندہ واں، اوسے طرحاں میرا گوشت کھان والا بندہ میری وجہ توں زندہ رہوے گا۔
58 اسمانوں آئی روٹی ایہی اے۔ ایہہ اوس روٹی وانگوں نئیں جیہڑی تواڈے پیو دادیاں نے کھادی سی پر اوہ فیر وی مر گئے۔ جیہڑا ایہہ روٹی کھاندا اے، اوہ ہمیشاں زندہ رہوے گا۔“
59 اوہنے ایہہ گلاں اوس ویلے کہیاں جدوں اوہ کفرنحوم دی اِک عبادتگاہ چ تلیم دے رہیا سی۔
60 یسوع دِیاں گلاں سُن کے اوہدے بوہت سارے شاگرداں نے کہیا: ”ایہہ تے نِری بکواس اے۔ ایہنوں کون سُنے؟“
61 پر یسوع جان گیا کہ اوہدے شاگرد کیہہ بُڑبُڑ کر رہے نیں۔ ایس لئی اوہنے اوہناں نُوں کہیا: ”کیہہ میریاں ایہہ گلاں توانوں بُریاں لگیاں نیں؟
62 تے فیر اوس ویلے توانوں کیہو جیہا لگے گا جدوں تُسی انسان دے بیٹے* نُوں اوتھے جاندیاں ویکھو گے جتھوں اوہ آیا اے؟
63 اصل چ پاک روح ای زندگی دیندی اے، انسان اپنے آپ کجھ نئیں کر سکدا۔* مَیں جیہڑیاں گلاں کہیاں نیں، اوہ پاک روح توں نیں تے زندگی دیندیاں نیں۔
64 پر تواڈے وچوں کجھ میرا یقین نئیں کردے۔ “ اصل چ یسوع شروع توں ای جان دا سی کہ کیہڑے لوک اوہدا یقین نئیں کردے تے کون اوہنوں دھوکھے نال پھڑوائے گا۔
65 اوہنے اَگے اوہناں نُوں کہیا: ”ایسے لئی مَیں توانوں ایہہ گل کہی سی کہ ہر کوئی میرے کول نئیں آ سکدا سگوں اوہی آ سکدا اے جنہوں باپ منظوری دیندا اے۔“
66 ایس وجہ توں اوہدے بوہت سارے شاگرداں نے اوہدا ساتھ چھڈ دِتا تے فیر توں اپنے اوسے کم کار چ لگ گئے جیہڑا اوہ چھڈ کے آئے سن۔
67 ایس لئی یسوع نے 12 رسولاں نُوں پچھیا: ”کیہہ تُسی وی مینوں چھڈ کے جانا چاہندے او؟“
68 شمعون پطرس نے جواب دِتا: ”مالک، اَسی کِدے کول جائیے؟ ہمیشاں دی زندگی دِیاں گلاں تے تیرے کول نیں۔
69 اَسی ایمان لے آئے آں تے سانوں یقین اے کہ خدا دا پاک خادم تُوں ای ایں۔“
70 یسوع نے اوہناں نُوں کہیا: ”توانوں 12 نُوں تے مَیں آپ چُنیا سی۔ پر تواڈے وچوں اِک شیطان* ورگا اے۔“
71 اصل چ اوہ شمعون اِسکریوتی دے پُتر یہوداہ دی گل کر رہیا سی جنہے اوہنوں دھوکھے نال پھڑوانا سی بھانویں کہ اوہ 12 رسولاں وچوں اِک سی۔
فٹ نوٹ
^ تقریباً 5 یاں 6 کلومیٹر۔
^ یونانی چ: ”ربّی۔“
^ ”لفظاں دی وضاحت“ نُوں ویکھو۔
^ یونانی چ: ”میرے وَل نہ کِھچے۔“
^ یونانی چ: ”خدا وَلّوں آیا اے۔“
^ یونانی چ: ”کیونکہ میرا گوشت اصل کھانا اے تے میرا خون اصل پین والی چیز اے۔“
^ ”لفظاں دی وضاحت“ نُوں ویکھو۔
^ یونانی چ: ”جسم دا کوئی فائدہ نئیں۔“
^ یونانی چ: ”بدنام کرن والا اے۔“
