پطرس دا پہلا خط 1:1-25
1 مَیں پطرس، یسوع مسیح دا رسول آں تے ایہہ خط اوہناں چُنے ہوئے لوکاں نُوں لکھ رہیا واں جیہڑے پُنطُس، گلتیہ، کپدُکیہ، آسیہ تے بِتونیہ چ پردیسیاں وانگوں رہ رہے نیں۔
2 خدا باپ نے پہلاں توں ای طے کیتے ہوئے اپنے مقصد دے مطابق توانوں اپنی روح نال پاک کیتا تاکہ تُسی فرمانبردار بنو تے تواڈے اُتے یسوع مسیح دا خون چھڑکیا جائے۔
میری دُعا اے کہ خدا توانوں ہور زیادہ عظیم رحمت تے سلامتی بخشے۔
3 ساڈے مالک یسوع مسیح دے خدا تے باپ دی وڈیائی ہوئے جنہے ساڈے اُتے بڑا رحم کر کے سانوں نویں سِرے توں پیدا کیتا۔ اوہنے یسوع مسیح نُوں مُردیاں چوں زندہ کیتا جدی وجہ توں سانوں ایہہ پکی* امید ملی
4 کہ اَسی اوہ وراثت حاصل کریئے جیہڑی پاک اے تے جیہڑی کدی وی ختم تے خراب نئیں ہو سکدی۔ ایہہ وراثت تواڈے لئی اسمان تے سانبھ کے رکھی گئی اے۔
5 تواڈے ایمان دی وجہ توں خدا اپنی طاقت دے ذریعے تواڈی حفاظت کردا اے تاکہ توانوں اوہ نجات ملے جیہڑی آخری زمانے چ ظاہر ہوئے گی۔
6 ایسے وجہ توں تُسی بڑے خوش او بھانویں کہ تھوڑے چِر لئی توانوں طرحاں طرحاں دِیاں اَزمیشاں سہنیاں پے رہیاں نیں
7 تاکہ تواڈا ایمان پَرکھیا جائے تے ہور مضبوط ہو جائے۔ ایہو جہے ایمان دا مُل اوس سونے نالوں کِتے زیادہ ہوندا اے جنہوں اَگ چ تپا کے خالص تے بنایا جاندا اے، پر اوہ فیر وی تباہ ہو جاندا اے۔ ایہو جہے ایمان دی وجہ توں اوس ویلے تواڈی تعریف، وڈیائی تے عزت ہوئے گی جدوں یسوع مسیح ظاہر ہوئے گا۔
8 بھانویں کہ تُسی مسیح نُوں کدی نئیں ویکھیا، پر فیر وی تُسی اوہنوں پیار کردے او۔ تُسی حالے وی اوہنوں نئیں ویکھ سکدے، پر فیر وی اوہدے تے ایمان ظاہر کردے او تے اینے زیادہ خوش او کہ تُسی اپنی شاندار خوشی نُوں بیان نئیں کر سکدے
9 کیونکہ توانوں یقین اے کہ توانوں اپنے ایمان دا پھل یعنی نجات ملے گی۔
10 ایس نجات بارے نبیاں نے بڑے دھیان نال چھانبین کر کے پتہ کیتا تے تواڈے اُتے ہون والی عظیم رحمت بارے پیشینگوئی کیتی۔
11 اوہ ایہہ جانن دی کوشش چ لگے رہے کہ اوہ گلاں کدوں تے کیہڑے زمانے چ ہون گیاں جیہڑیاں پاک روح نے مسیح بارے ظاہر کیتیاں سن۔ پاک روح دے ذریعے پہلاں توں ای دَس دِتا گیا سی کہ مسیح نُوں کیہڑے دُکھ سہنے پین گے تے بعد چوں اوہنوں کیہڑی شان ملے گی۔
12 نبیاں اُتے ظاہر کیتا گیا سی کہ ایہہ گلاں اوہناں لئی نئیں سگوں تواڈے لئی نیں۔ ایس لئی اوہناں نے تواڈے خادماں دے طور تے ایہہ گلاں تواڈے تک پونچائیاں۔ ہُن ایہہ گلاں توانوں اوہناں لوکاں نے دَسیاں نیں جنہاں نے اسمانوں مِلن والی پاک روح دے ذریعے توانوں خوشخبری سُنائی۔ فرشتے وی ایہناں گلاں نُوں سمجھن چ بڑی دلچسپی رکھدے نیں۔
13 ایس لئی سخت محنت کرن لئی پوری طرحاں* تیار رہوو۔ اپنے ہوش قائم رکھو تے اوس عظیم رحمت اُتے پکی امید رکھو جیہڑی توانوں اوہدوں ملے گی جدوں یسوع مسیح ظاہر ہوئے گا۔
14 فرمانبردار بچیاں وانگوں اوہناں خواہشاں مطابق چلنا* چھڈ دَوو جیہڑیاں تُسی اوہدوں رکھدے سو جدوں تُسی خدا نُوں نئیں جان دے سو
15 سگوں اوس پاک خدا وانگوں بنو جنہے توانوں بلایا اے تے اپنے سارے چالچلن نُوں پاک رکھو
16 کیونکہ لکھیا اے: ”پاک ہووو کیونکہ مَیں پاک آں۔“
17 نالے باپ کسے دی طرفداری نئیں کردا سگوں ہر انسان دی عدالت اوہدے کماں مطابق کردا اے۔ جے تُسی اوہدے کولوں دُعا کردے او تے دُنیا چ پردیسیاں وانگوں رہندے ہوئیاں اپنے کماں توں ظاہر کرو کہ تُسی اوہدا خوف رکھدے او۔
18 تُسی جان دے او کہ توانوں اپنے پیو دادے دِیاں فضول رویتاں توں آزادی* سونے یاں چاندی دے ذریعے نئیں ملی جیہڑے خراب ہو جاندے نیں
19 سگوں تُسی اِک بےداغ تے بےعیب میمنے یعنی مسیح دے قیمتی خون دے ذریعے آزاد ہوئے او۔
20 ایہہ سچ اے کہ دُنیا دی نِیہہ رکھن توں پہلاں مسیح نُوں چُنیا گیا سی پر اوہنوں تواڈی خاطر ایس آخری زمانے چ ظاہر کیتا گیا۔
21 اوہدے ذریعے تُسی خدا تے ایمان رکھدے او جنہے اوہنوں مُردیاں چوں زندہ کیتا تے اوہنوں شان بخشی تاکہ تُسی خدا تے ایمان تے امید رکھ سکو۔
22 ہُن تُسی سچائی دے مطابق چل کے اپنے آپ نُوں پاک کر لیا اے جدی وجہ توں تُسی اِک دُوجے نال بھین بھراواں وانگوں سچا پیار کردے او۔ ایس لئی اِک دُوجے نُوں دل دِیاں گہرائیاں توں محبت کردے رہوو۔
23 توانوں زندہ تے ابدی خدا دے کلام دے ذریعے نویں سِرے توں پیدا کیتا گیا اے تے تواڈی ایہہ پیدائش خراب ہون والے بیہہ توں نئیں سگوں اوس بیہہ توں ہوئی اے جیہڑا کدی خراب نئیں ہوندا۔
24 جیویں کہ پاک کلام چ لکھیا اے: ”سارے انسان گھاہ ورگے نیں تے اوہناں دی شان پُھلاں ورگی اے۔ گھاہ سُک جاندی اے تے پُھل جھڑ جاندے نیں۔
25 پر یہوواہ دا کلام ہمیشاں قائم رہندا اے۔“ ایہہ ”کلام“ اوہ خوشخبری اے جیہڑی توانوں سُنائی گئی اے۔
فٹ نوٹ
^ یونانی چ: ”زندہ۔“
^ یونانی چ: ”اپنے ذہناں نُوں تیار رکھو۔“
^ یونانی چ: ”ڈھلنا۔“
^ یونانی چ: ”تواڈے لئی فدیہ دِتا گیا، توانوں چھڈایا گیا۔“
