یوحنا دا پہلا خط 2:1-29
2 میرے پیارے بچیو، مَیں توانوں ایہہ گلاں ایس لئی لکھ رہیا واں تاکہ تُسی گُناہ نہ کرو۔ پر جے کسے کولوں کوئی گُناہ ہو وی جائے تے باپ کول ساڈا اِک مددگار* اے یعنی یسوع مسیح جیہڑا نیک اے۔
2 اوہنے خدا نال ساڈی صلح کران لئی ساڈے گُناہواں دی خاطر اپنی قربانی دِتی۔* اوہدی قربانی صرف ساڈے گُناہواں لئی نئیں سگوں ساری دُنیا دے گُناہواں لئی وی اے۔
3 جے اَسی اوہدے حکماں تے عمل کردے رہواں گے تے ایہدے توں ظاہر ہوئے گا کہ اَسی اوہنوں جان گئے آں۔
4 جیہڑا انسان کہندا اے کہ ”مَیں اوہنوں جان گیا واں“ پر اوہ اوہدے حکماں تے عمل نئیں کردا تے اوہ جھوٹھا اے تے اوہدے وچ سچائی نئیں۔
5 پر جیہڑا انسان اوہدے کلام تے عمل کردا اے، اوہ خدا نُوں دلوں پیار کردا اے۔* ایہدے توں سانوں پتہ چلدا اے کہ اَسی اوہدے نال اِک مُٹھ آں۔
6 جیہڑا انسان کہندا اے کہ ” مَیں اوہدے نال اِک مُٹھ آں “ اوہدے لئی ضروری اے کہ اوہ یسوع وانگوں زندگی گزارے۔*
7 میرے پیاریو، مَیں اپنے خط چ توانوں کسے نویں حکم بارے نئیں سگوں اوس پرانے حکم بارے لکھ رہیا واں جیہڑا توانوں شروع توں ملیا ہویا اے۔ ایہہ پرانا حکم اوہی اے جیہڑا تُسی سُنیا سی۔
8 مَیں توانوں ایہی حکم نویں سِرے توں دے رہیا واں جدے تے یسوع وی چلدا سی تے تُسی وی چل رہے او کیونکہ نھیرا دُور ہو رہیا اے تے سچا چانن چمکن لگ پیا اے۔
9 جیہڑا انسان کہندا اے کہ ”اوہ چانن وچ اے“ پر اوہ اپنے بھرا توں نفرت کردا اے تے اوہ حالے وی نھیرے وچ اے۔
10 جیہڑا اپنے بھرا نال پیار کردا اے، اوہ چانن وچ رہندا اے تے اوہ کسے وی وجہ توں گمراہ نئیں ہوندا۔
11 پر جیہڑا اپنے بھرا توں نفرت کردا اے، اوہ نھیرے وچ اے تے نھیرے چ چلدا اے تے اوہنوں نئیں پتہ ہوندا کہ اوہ کتھے جا رہیا اے کیونکہ نھیرے دی وجہ توں اوہنوں کجھ نظر نئیں آندا۔
12 پیارے بچیو، مَیں توانوں ایس لئی لکھ رہیا واں کیونکہ یسوع دے ناں دی خاطر تواڈے گُناہ معاف کر دِتے گئے نیں۔
13 تُسی جیہڑے پیو او، مَیں توانوں ایس لئی لکھ رہیا واں کیونکہ تُسی اوہنوں* جان گئے او جیہڑا شروع توں اے۔ نوجوانو، مَیں توانوں ایس لئی لکھ رہیا واں کیونکہ تُسی شیطان تے فتح پا لئی اے۔ بچیو، مَیں توانوں ایس لئی لکھ رہیا واں کیونکہ تُسی اپنے اسمانی باپ نُوں جان گئے او۔
14 تُسی جیہڑے پیو او، مَیں توانوں ایس لئی لکھ رہیا واں کیونکہ تُسی اوہنوں* جان گئے او جیہڑا شروع توں اے۔ نوجوانو، مَیں توانوں ایس لئی لکھ رہیا واں کیونکہ تُسی طاقتور او تے خدا دا کلام تواڈے چ وَسدا اے تے تُسی شیطان تے فتح پا لئی اے۔
15 نہ دُنیا نال پیار کرو تے نہ ای دُنیا دِیاں چیزاں نال۔ جیہڑا دُنیا نال پیار کردا اے، اوہ باپ نال پیار نئیں کردا
16 کیونکہ جو کجھ دُنیا وچ اے یعنی جسم دی خواہش، اَکھاں دی خواہش تے دَھن دولت دا دِکھاوا،* اوہ باپ وَلّوں نئیں اے سگوں دُنیا وَلّوں اے۔
17 ایہدے علاوہ ایہہ دُنیا تے ایہدی ہر اوہ چیز ختم ہو جائے گی* جدی لوک خواہش کردے نیں۔ پر جیہڑا انسان خدا دی مرضی تے چلدا اے، اوہ ہمیشاں قائم رہوے گا۔
18 پیارے بچیو، ایہہ آخری ویلا اے تے تُسی سُنیا سی کہ مسیح دا مخالف آ رہیا اے سگوں مسیح دے بوہت سارے مخالف تے آ چُکے نیں جدے توں سانوں پتہ چلدا اے کہ ایہہ آخری ویلا اے۔
19 اوہ لوک سانوں چھڈ کے چلے گئے کیونکہ اوہ ساڈے ورگے نئیں سن۔ جے اوہ ساڈے ورگے ہوندے تے ساڈے نال رہندے۔ پر اوہناں دے جان توں ظاہر ہو گیا اے کہ سارے لوک ساڈے ورگے نئیں۔
20 توانوں مُقدس خدا نے مسح کیتا اے تے تواڈے کول سچائی دا علم اے۔
21 مَیں توانوں ایس لئی نئیں لکھ رہیا کہ توانوں سچائی دا پتہ نئیں سگوں ایس لئی لکھ رہیا واں کیونکہ توانوں سچائی دا پتہ اے تے سچائی چوں کسے طرحاں دا جھوٹھ نئیں نکلدا۔
22 جھوٹھا کون اے؟ کیہہ اوہ نئیں جیہڑا یسوع نُوں مسیح منن توں اِنکار کردا اے؟ ہاں، اوہی مسیح دا مخالف اے جیہڑا باپ تے بیٹے دا اِنکار کردا اے۔
23 جیہڑا بیٹے دا اِنکار کردا اے، اوہدا باپ نال وی کوئی رشتہ نئیں اے۔ پر جیہڑا بیٹے نُوں قبول کردا اے، اوہدا باپ نال وی رشتہ اے۔
24 پر ضروری اے کہ جو کجھ تُسی شروع توں سُنیا اے، اوہ تواڈے دل چ رہوے۔ جے اوہ سب کجھ تواڈے دل چ رہوے گا جو کجھ تُسی شروع توں سُنیا اے تے تُسی بیٹے نال وی اِک مُٹھ رہوو گے تے باپ نال وی۔
25 ایہدے علاوہ اوہنے آپ ساڈے نال ہمیشاں دی زندگی دا وعدہ کیتا اے۔
26 مَیں توانوں اوہناں لوکاں بارے ایہہ گلاں لکھ رہیا واں جیہڑے توانوں گمراہ کرن دی کوشش کر رہے نیں۔
27 پر توانوں خدا نے پاک روح نال مسح کیتا اے تے ایہہ پاک روح تواڈے اندر وَسدی اے۔ ایس لئی ضروری نئیں کہ کوئی توانوں تلیم دَوے سگوں خدا توانوں مسح کر کے سب کجھ سکھاندا اے تے پاک روح دا مسح سچا اے، جھوٹھا نئیں۔ جیویں پاک روح دے ذریعے توانوں سکھایا گیا اے، اوہدے نال اِک مُٹھ رہوو۔
28 ایس لئی پیارے بچیو، اوہدے نال اِک مُٹھ رہوو تاکہ جدوں اوہ ظاہر ہوئے تے اوہدی موجودگی دے دوران اَسی اوہدے سامنے بغیر جھجکے گل کر سکئے تے سانوں شرمندہ ہو کے اوہدے توں لُکنا نہ پووے۔
29 جے توانوں ایہہ پتہ اے کہ اوہ نیک اے تے فیر توانوں ایہہ وی پتہ اے کہ جیہڑا بندہ نیکی کردا اے، اوہ خدا توں پیدا ہویا اے۔
فٹ نوٹ
^ یاں، ”وکیل۔“
^ یاں، ”کفارے دی قربانی دِتی۔“
^ یونانی چ: ”اوہدے چ خدا دی محبت واقعی مکمل ہو گئی اے۔“
^ یونانی چ:” اونویں چلدا رہوے جیویں اوہ چلدا سی۔“
^ یعنی یسوع نُوں۔
^ یعنی یسوع نُوں۔
^ یاں، ”اپنیاں چیزاں بارے شیخی مارنا۔“
^ یونانی چ: ”ختم ہو رہی اے۔“
