یوحنا دا پہلا خط 3:1-24
3 غور کرو کہ باپ نے سانوں ایناں پیار کیتا اے کہ اوہنے سانوں اپنے بچے ہون دا مان بخشیا اے تے اَسی اوہدے بچے ہے وی آں۔ ایس لئی دُنیا سانوں نئیں جان دی کیونکہ اوہ اوہنوں وی نئیں جان دی۔
2 میرے پیاریو، ہُن اَسی خدا دے بچے آں۔ پر حالے ایہہ گل ظاہر نئیں ہوئی کہ اَسی مستقبل چ کیہو جہے ہونواں گے۔ پر سانوں ایہہ ضرور پتہ اے کہ جدوں خدا اپنے آپ نُوں ظاہر کرے گا تے اَسی اوہدے ورگے بن جانواں گے کیونکہ اَسی ویکھاں گے کہ اوہ سچمچ کیہو جیہا اے۔
3 تے جیہڑا انسان اوہدے تے امید رکھدا اے، اوہ اپنے آپ نُوں پاک کردا اے کیونکہ اوہ وی پاک اے۔
4 جیہڑا انسان گُناہ کردا رہندا اے، اوہ خدا دے قانون دے خلاف جاندا اے۔ گُناہ دا تے مطلب ای قانون دے خلاف جانا اے۔
5 توانوں ایہہ وی پتہ اے کہ یسوع ساڈے گُناہ مٹان لئی آیا سی تے اوہ آپ گُناہ توں پاک اے۔
6 جیہڑا اوہدے نال اِک مُٹھ رہندا اے، اوہ گُناہ کرن توں باز رہندا اے۔ پر جیہڑا گُناہ کردا رہندا اے، اوہ نہ تے اوہنوں جان دا اے تے نہ ای اوہدے تے ایمان* رکھدا اے۔
7 پیارے بچیو، تُسی کسے دِیاں گلاں چ آ کے گمراہ نہ ہونا۔ جیہڑا نیکی کردا رہندا اے، اوہ یسوع وانگوں نیک اے۔
8 جیہڑا گُناہ کردا رہندا اے، اوہ اِبلیس ورگی سوچ رکھدا اے کیونکہ اِبلیس شروع* توں ای گُناہ کردا آیا اے۔ خدا دا پُتر ایسے لئی ظاہر ہویا کہ اِبلیس دے کماں نُوں مٹائے۔
9 پر خدا دے بچے گُناہ نئیں کردے رہندے کیونکہ خدا دی پاک روح* اوہناں چ وَسدی اے۔ تے ایہہ ہو ای نئیں سکدا کہ اوہ گُناہ کردے رہن کیونکہ اوہ خدا دے بچے نیں۔
10 خدا دے بچیاں تے اِبلیس دے بچیاں چ فرق ایس گل توں ظاہر ہوندا اے: اوہ لوک خدا دے بچے نئیں جیہڑے نیکی نئیں کردے تے جیہڑے اپنے بھرا نال پیار نئیں کردے
11 کیونکہ تُسی شروع توں ایہہ پیغام سُنیا اے کہ سانوں اِک دُوجے نال پیار کرنا چاہی دا اے۔
12 سانوں قائن وانگوں نئیں بننا چاہی دا جیہڑا اِبلیس دی اولاد ثابت ہویا تے جنہے اپنے بھرا نُوں قتل کر دِتا۔ پر اوہنے اپنے بھرا نُوں قتل کیوں کیتا؟ کیونکہ اوہدے اپنے کم بھیڑے سن جد کہ اوہدے بھرا دے کم نیک سن۔
13 بھراوو، ایس گلوں حیران نہ ہووو کہ دُنیا تواڈے توں نفرت کردی اے۔
14 اَسی جاننے آں کہ اَسی مریاں ورگے ساں پر ہُن اَسی زندہ ہو گئے آں کیونکہ اَسی اپنے بھراواں نال پیار کرنے آں۔ جیہڑا بندہ پیار نئیں کردا، اوہ مریاں ورگا اے۔
15 جیہڑا بندہ اپنے بھرا نال نفرت کردا اے، اوہ قاتل اے تے تُسی جان دے او کہ کسے قاتل نُوں ہمیشاں دی زندگی نئیں ملے گی۔
16 اَسی جان گئے آں کہ پیار کیہہ ہوندا اے کیونکہ مسیح نے ساڈے لئی جان دے دِتی تے ہُن ساڈا وی فرض اے کہ اَسی اپنے بھراواں لئی جان دَئیے۔
17 پر جدے کول زندگی گزارن لئی بتھیرا کجھ اے تے اوہ اپنے بھرا دی ضرورت نُوں ویکھ کے وی اوہدے تے ترس نئیں کھاندا تے اوہ کیویں کہہ سکدا اے کہ اوہ خدا نال پیار کردا اے؟
18 پیارے بچیو، سانوں بس گلیباتی نئیں سگوں سچے دل نال کجھ کر کے اپنے پیار دا ثبوت دینا چاہی دا اے۔
19 اِنج سانوں پتہ لگے گا کہ اَسی سچائی وَل آں تے اَسی اپنے دل نُوں یقین دَواں واں گے کہ خدا سانوں پیار کردا اے۔
20 بھانویں کہ ساڈا دل سانوں قصوروار ٹھہرائے پر فیر وی اَسی یاد رکھاں گے کہ خدا ساڈے دل نالوں وڈا اے تے سب کجھ جان دا اے۔
21 میرے پیاریو، جے ساڈا دل سانوں قصوروار نئیں ٹھہراندا تے اَسی بغیر جھجکے خدا نال گل کر سکنے آں۔
22 تے اَسی اوہدے کولوں جو کجھ وی منگنے آں اوہ سانوں دیندا اے کیونکہ اَسی اوہدے حکماں تے عمل کر نے آں تے اوہی کم کرنے آں جیہڑے اوہدی نظر چ صحی نیں۔
23 بےشک اوہدا حکم ایہہ وے کہ اَسی اوہدے پُتر یسوع مسیح دے ناں تے ایمان لیائیے تے اوہدے حکم دے مطابق اِک دُوجے نال پیار کرئیے۔
24 ایہدے علاوہ جیہڑا انسان خدا دے حکماں تے عمل کردا اے، اوہ خدا نال اِک مُٹھ رہندا اے تے خدا اوہدے نال اِک مُٹھ رہندا اے۔ اوہنے سانوں جیہڑی پاک روح دِتی اے، اوہدے ذریعے سانوں پتہ چلدا اے کہ اوہ ساڈے نال اِک مُٹھ اے۔
فٹ نوٹ
^ یونانی چ: ”اوہنوں ویکھیا اے۔“
^ یاں، ”جدوں توں اِبلیس نے غلط راہ تے چلنا شروع کیتا۔“
^ یونانی چ: ”بیہہ“ یعنی ایہو جیہا بیہہ جیہڑا پھل پیدا کرے یاں جدے ذریعے نسل اَگے وَدھے۔
