چوکس رہوو!
سکول چ قتل—بائبل ایس دُکھ چ کیہہ تسلی دیندی اے؟
24 مئی، 2022 نُوں امریکہ دی ریاست ٹیکساس دے اِک چھوٹے جہے شہر چ اِک بڑا ای دردناک واقعہ پیش آیا۔ اخبار نیو یارک ٹائمز دے مطابق ”اِک بندے نے اِک پرائمری سکول چ فائرنگ کر کے 19 بچیاں تے دو ٹیچراں نُوں مار دِتا۔“
افسوس دی گل اے کہ ایہو جہے دردناک واقعے اَج کل بوہت زیادہ ہو رہے نیں۔ اِک اخبار دی رپورٹ دے مطابق امریکہ چ ”1970 توں لے کے ہُن تک سکول چ فائرنگ دے اینے واقعے نئیں ہوئے جِنّے 2021 چ ہوئے۔ ایس سال سکول چ فائرنگ دے 249 واقعے پیش آئے۔“
ایہہ ظلم کیوں ہو رہیا اے؟ اَسی تسلی تے حوصلہ کتھوں حاصل کر سکنے آں؟ کیہہ ایہہ ظلم کدی ختم ہوئے گا؟ آؤ ویکھئیے کہ بائبل ایہدے بارے کیہہ کہندی اے۔
دُنیا اینی ظالم کیوں ہوندی جا رہی اے؟
بائبل چ ساڈے زمانے نُوں اصل چ آخری زمانہ کہیا گیا اے۔ ایہدے چ دَسیا گیا اے کہ آخری زمانے چ لوک محبت توں خالی تے وحشی ہون گے یعنی اوہ ظالم تے دُوجیاں نُوں تکلیف پونچان والے ہون گے۔ نالے ایہو جہے لوک دن بدن وِگڑدے ای جان گے۔ (2-تیمُتھیُس 3:1-5، 13) ایہدے بارے ہور جان لئی ایہہ مضمون پڑھو: ”آخری زمانے یاں آخری وقت دی نشانی کیہہ اے؟“
بوہت سارے لوک سوچدے نیں کہ ”خدا سکول چ فائرنگ ورگے دردناک واقعے روک دا کیوں نئیں؟“ بائبل چوں ایس سوال دا جواب جانن لئی اُردو زبان چ ایہہ مضمون پڑھو: ”آخر کیوں؟—اچھے لوگوں پر مصیبتیں کیوں آتی ہیں؟“
اَسی تسلی تے حوصلہ کتھوں حاصل کر سکنے آں؟
جنیاں وی گلاں پہلاں لکھیاں گئیاں اوہ ساڈی ہدیت لئی لکھیاں گئیاں تاکہ اَسی پاک کلام چوں تسلی پا کے تے ثابتقدم رہ کے امید حاصل کرئیے۔—رومیوں 15:4۔
بائبل چ دِتے گئے اصولاں تے عمل کر کے تُسی ایس ظالم دُنیا چ تسلی تے سکون پا سکدے او۔ ایہدے بارے ہور جانن لئی اُردو زبان چ ایہہ جاگو! رسالہ پڑھو: ”کیا تشدد کبھی ختم ہوگا؟“
اپنے بچیاں نُوں سکھاؤ کہ جدوں اوہ کوئی دل نُوں ہلا دینے والی خبر سُن دے نیں یاں اوہناں دے سامنے کوئی خوفناک واقعہ ہوندا اے تے اوہ پریشان نہ ہون سگوں یہوواہ تے بھروسا رکھن تے اوہدے کولوں مدد منگن۔
کیہہ ظلم کدی ختم ہوئے گا؟
اوہ اوہناں نُوں ظلم تے ہر طرحاں دی زیادتی توں بچائے گا۔—زبور 72:14۔
اوہ اپنیاں تلواراں نُوں توڑ کے داتریاں تے اپنے بھالیاں نُوں کھیتی باڑی دے اوزار بنا دین گے۔ قوم قوم اُتے تلوار نہ چلائے گی تے فیر اوہ کدی جنگ کرنا نہ سکھن گے۔—میکاہ 4:3۔
خدا اوہ کرے گا جو انسان نئیں کر سکدے۔ اوہ اپنی بادشاہی دے ذریعے سارے ہتھیاراں تے ظلم نُوں ہمیشاں لئی ختم کر دَوے گا۔ ایہدے بارے ہور جانن لئی کہ خدا دی بادشاہی کیہہ کجھ کرے گی، اُردو زبان چ ایہہ مضمون پڑھو: ”خدا کی بادشاہت میں خوب امن رہے گا۔“
ایہہ وی ویکھو
اہم تلیم
خدا نے حالے تک دُکھ تکلیفاں نُوں ختم کیوں نئیں کیتا؟
خدا دے کلام چ ایس سوال دا تسلیبخش جواب دِتا گیا اے۔
بائبل دی تلیم
ایہہ کورس کر کے ویکھو۔
اِک ایہو جیہا دلچسپ بائبل کورس کرو جدے چ تُسی تے تواڈا اُستاد مِل کے گل بات کرو گے۔
