اہم سوال
جے اِک مسیحی حرامکاری دے علاوہ کسے ہور وجہ توں اپنی بیوی نُوں طلاق دیندا اے تے کسے ہور نال ویاہ کر لیندا اے تے کلیسیا نُوں اوہدی پرانی شادی تے اوہدی نوِیں شادی نُوں کیہو جیہا خیال کرنا چاہیدا اے؟
اِنج دی صورتحال چ کلیسیا دی نظر چ پرانی شادی ختم ہو جائے گی تے نوِیں شادی جائز ہوئے گی۔ ایہدی وجہ نُوں سمجھن لئی آؤ اوس گل تے غور کرئیے جیہڑی یسوع مسیح نے طلاق تے دُبارہ شادی کرن بارے کہی سی۔
متی 19:9 چ یسوع مسیح نے دَسیا کہ طلاق صرف اِکو ای وجہ نال ہو سکدی اے۔ اوہنے کہیا: ”جیہڑا بندہ حرامکاری دے علاوہ کسے ہور وجہ توں طلاق دیندا اے تے دُوجی عورت نال ویاہ کردا اے، اوہ زنا کردا اے۔“ یسوع مسیح دے ایس بیان توں دو گلاں دا پتہ چلدا اے: پہلی گل ایہہ اے کہ طلاق صرف حرامکاری دی وجہ توں ہو سکدی اے تے دُوجی گل ایہہ اے کہ جے اِک بندہ اپنی بیوی نُوں حرامکاری دے علاوہ کسے ہور وجہ توں طلاق دیندا اے تے دُوجی عورت نال ویاہ کردا اے تے اوہ زنا کردا اے۔ a
کیہہ یسوع دی گل دا ایہہ مطلب سی کہ جے شوہر حرامکاری کردا اے تے اپنی بیوی نُوں طلاق دیندا اے تے اوہ دُبارہ شادی کر سکدا اے؟ ضروری نئیں۔ جے شوہر حرامکاری کردا اے تے اوہدی بیوی فیصلہ کرے گی کہ اوہ اوہنوں معاف کرے گی یاں نئیں۔ جے اوہدی بیوی اوہنوں معاف نئیں کردی تے اوہدے توں طلاق لے لیندی اے تے طلاق دی کاروائی پوری ہون دے بعد اوہ دونویں دُوجی شادی کرن لئی آزاد نیں۔
ہو سکدا اے کہ جیس عورت دے شوہر نے اوہدے نال بےوفائی کیتی اے، شاید اوہ طلاق لینا نہ چاہوے تے ایہہ کہوے کہ اوہ اپنے شوہر نُوں معاف کرن لئی تیار اے۔ پر جے اوہدا شوہر نئیں چاہندا کہ اوہنوں معاف کیتا جائے تے اوہ اپنی بیوی نُوں طلاق دے دیندا اے تے فیر ایس صورت چ کیہہ ہوندا اے؟ بھانویں کہ بیوی اپنے شوہر نُوں معاف کرن لئی تیار سی تے اپنی شادی نُوں ختم نئیں کرنا چاہندی سی ایس لئی پاک کلام دے مطابق شوہر دُبارہ شادی نئیں کر سکدا۔ پر جے اوہ بائبل دے اصولاں دے خلاف جا کے کسے ہور نال شادی کر لیندا اے تے اوہ دُبارہ حرامکاری کردا اے۔ ایہو جہی صورتحال چ کلیسیا دے بزرگ دُبارہ توں عدالتی کمیٹی بناندے نیں تاکہ اوس بندے دے ایس گُناہ دے خلاف کاروائی کیتی جائے۔—1-کُرنتھیوں 5:1، 2؛ 6:9، 10۔
جدوں کوئی ایہو جیہا بندہ دُبارہ شادی کر لیندا اے جیہڑا بائبل دے مطابق دُبارہ شادی نئیں کر سکدا سی تے کلیسیا نُوں اوہدی پرانی شادی تے نوِیں شادی نُوں کیہو جیہا خیال کرنا چاہیدا اے؟ کیہہ بائبل دے مطابق اوہدی پہلی شادی حالے وی قائم اے؟ کیہہ اوہدی پہلی بیوی حالے وی اوہنوں معاف کرن یاں چھڈن دا فیصلہ کر سکدی اے؟ کیہہ اوہدی نوِیں شادی زنا کرن دے برابر اے؟
پہلاں اَسی ایہہ مننے ساں کہ جے اِک بندہ ناجائز وجہ توں اپنے جیون ساتھی نُوں طلاق دیندا اے تے کسے ہور نال شادی کردا اے تے اوہدی نوِیں شادی اوہدوں تک زناکاری دے برابر رہندی اے جدوں تک اوہدا پہلا جیون ساتھی زندہ اے، دُبارہ توں شادی نئیں کر لیندا یاں حرامکاری ورگا کوئی سنگین گُناہ نئیں کردا۔ جدوں یسوع نے طلاق تے دُوجی شادی کرن بارے گل کیتی تے اوہ اوس بندے بارے گل نئیں کر رہیا سی جدا جیون ساتھی اوہدے نال بےوفائی کردا اے۔ ایہدی بجائے اوہ اوس بندے بارے گل کر رہیا سی جیہڑا اپنی بیوی نُوں حرامکاری دے علاوہ کسے ہور وجہ توں طلاق دیندا اے تے دُوجی عورت نال ویاہ کردا اے تے اِنج زنا کردا اے۔ ایہو جہی صورت چ اوہدی پہلی شادی ختم ہو جاندی اے۔
جیہڑا بندہ حرامکاری دے علاوہ کسے ہور وجہ توں طلاق دیندا اے تے دُوجی عورت نال ویاہ کردا اے، اوہ زنا کردا اے۔—متی 19:9۔
جدوں اِک بندہ اپنی بیوی نُوں طلاق دیندا اے تے دُوجی شادی کر لیندا اے تے اوہدی پہلی بیوی کول اوہنوں معاف کرن یاں اوہنوں چھڈن دا حق نئیں رہندا۔ اوہدے تے ایہہ فیصلہ کرن دا بوجھ نئیں رہندا کہ اوہ اپنے پہلے شوہر نُوں معاف کر دَوے یاں چھڈ دَوے۔ ایہدے علاوہ بھانویں اوس بندے دی پہلی بیوی فوت ہو جائے، دُبارہ شادی کر لوَے یاں فیر حرامکاری کرے، ایہدا ایس گل تے کوئی اثر نئیں ہوئے گا کہ کلیسیا اوس بندے دی نوِیں شادی نُوں کیہو جیہا خیال کردی اے۔ b
اُتے جیہڑی مثال دِتی گئی اے، اوہدے چ شوہر نے حرامکاری کیتی جدی وجہ توں طلاق ہو گئی۔ جے شوہر نے حرامکاری نہ کیتی ہوندی پر اوہنے طلاق لے کے دُوجی شادی کر لئی ہوندی تے فیر کیہہ ہوندا؟ یاں فیر شوہر نے طلاق لین توں پہلاں حرامکاری نہ کیتی ہوندی سگوں طلاق لین دے بعد حرامکاری کیتی ہوندی تے دُوجی شادی کر لئی ہوندی بھانویں کہ اوہدی بیوی اوہنوں معاف کرن لئی تیار سی تے فیر کیہہ ہوندا؟ ایہناں ساریاں مثالاں چ طلاق تے دُبارہ شادی زناکاری دے برابر اے جدی وجہ توں پہلی شادی ختم ہو جاندی اے۔ نوِیں شادی قانون دے مطابق جائز اے۔ جیویں کہ 15 نومبر 1979 دے ”دی واچٹاور“ دے صفحہ نمبر 32 تے دَسیا گیا سی کہ ”ہُن کیونکہ اوہنے نوِیں شادی کر لئی اے تے اوہ ایہنوں ختم کر کے اپنی پہلی بیوی نال پہلاں وانگوں شادیشُدہ زندگی نئیں گزار سکدا ایس لئی طلاق، زناکاری تے دُوجی شادی دی وجہ توں اوہدی پہلی شادی ختم ہو گئی اے۔“
ایس نوِیں معلومات دا مطلب ایہہ نئیں کہ مسیحیاں دی نظر چ شادی دا بندھن پہلے جِنّاں پاک نئیں رہیا یاں زناکاری ایناں وڈا گُناہ نئیں اے۔ جے اِک شخص حرامکاری دے علاوہ کسے ہور وجہ توں اپنی بیوی نُوں طلاق دیندا اے تے دُوجی عورت نال شادی کردا اے تے بزرگ زناکاری دے خلاف کاروائی کرن لئی عدالتی کمیٹی بنان گے۔ (جے اوہ شخص وی یہوواہ دا گواہ اے جدے نال اوہنے شادی کیتی اے تے زناکاری دی وجہ توں اوہدے خلاف وی عدالتی کمیٹی بنائی جائے گی۔) نوِیں شادی زناکاری دے برابر تے نئیں ہوئے گی پر اوس شخص نُوں کئی سالاں تک یاں فیر اوس وقت تک کلیسیا چ کوئی ذمےداری نئیں مِل سکدی جدوں تک دُوجے اوہدے گُناہ بارے سوچ کے دُکھی ہونا گھٹ نئیں کر دیندے یاں فیر ایہہ سوچنا نئیں چھڈ دیندے کہ ایہہ شخص عزت دے لائق نئیں اے۔ ایہدے علاوہ بزرگ ایس گل تے وی دھیان دین گے کہ اوہدا پہلا جیون ساتھی جدے کولوں طلاق لین لئی اوہنے حرامکاری کیتی سی، کیہڑے حالاتاں چوں لنگھ رہیا اے۔ بزرگ ایہہ وی ویکھن گے کہ اوہدے بچیاں دی کیہہ صورتحال اے جنہاں نُوں شاید اوہنے چھڈ دِتا اے۔—ملاکی 2:14-16۔
جے اِک بندہ بائبل دے اصولاں دے خلاف جا کے اپنے جیون ساتھی نُوں طلاق دیندا اے تے کسے ہور نال شادی کر لیندا اے تے ایہدے بڑے بھیڑے نتیجے نکل دے نیں۔ ایس لئی یہوواہ وانگوں مسیحیاں نُوں وی شادی دے بندھن نُوں پاک خیال کرنا چاہیدا اے۔—واعظ 5:4، 5؛ عبرانیوں 13:4۔
a اسانی لئی اَسی ایس مضمون چ ایہہ فرض کیتا اے کہ شوہر نے حرامکاری کیتی اے تے اپنی بیوی نُوں دھوکھا دِتا اے۔ پر جیویں کہ مرقس 10:11، 12 چ یسوع مسیح نے صاف دَسیا، ایہہ اصول بندیاں تے عورتاں دونواں تے لاگو ہوندا اے۔
b پہلاں اَسی ایہہ مننے ساں کہ جدوں تک اوہ جیون ساتھی جدے نال بےوفائی ہوئی اے، فوت نئیں ہو جاندا، دُبارہ شادی نئیں کر لیندا یاں حرامکاری نئیں کردا اوہدوں تک بےوفائی کرن والے بندے دی دُوجی شادی زناکاری دے برابر رہندی اے۔ ایس مضمون چ دِتی گئی معلومات دے مطابق ہُن اَسی ایہہ نئیں من دے۔
