مطالعے دا مضمون نمبر 2
اپنی سوچ دا رُخ موڑ کے اپنے آپ نُوں پوری طرحاں بدل لوو
اپنی سوچ دا رُخ موڑ کے اپنے آپ نُوں پوری طرحاں بدل لوو تاکہ تُسی جان لوو کہ خدا نُوں کیہہ منظور اے تے اوہدی چنگی تے کامل مرضی کیہہ اے۔—رومیوں 12:2۔
گیت نمبر 34: وفا دی راہ تے چلو
مضمون تے اِک نظر a
1، 2. سانوں بپتسمہ لین دے بعد وی کیہہ کردے رہنا چاہی دا اے؟ وضاحت کرو۔
تُسی اپنے گھر نُوں کِنّی واری صاف کردے او؟ شاید تُسی جدوں ایتھے شفٹ ہوئے سو تے تُسی ایہنوں بڑی چنگی طرحاں صاف کیتا سی۔ پر جے تُسی ایہنوں صاف کرنا چھڈ دَوو گے تے فیر کیہہ ہوئے گا؟ اَسی جاننے آں کہ مٹی گھٹا تے گندگی چیزاں تے بوہت چھیتی جم جاندی اے۔ ایس لئی جے تُسی چاہندے او کہ تواڈا گھر چنگا لگے تے توانوں ایہنوں باقاعدگی نال صاف کرنا پووے گا۔
2 اپنی سوچ تے کماں نُوں صحی رکھن لئی وی سانوں کجھ اِنج ای کرنا پووے گا۔ ایہہ سچ اے کہ بپتسمہ لین توں پہلاں اَسی بوہت محنت کیتی سی کہ اَسی اپنی سوچ تے جسم نُوں ہر طرحاں دی ناپاکی توں پاک کریئے۔ (2-کُرنتھیوں 7:1) پر ہُن سانوں پولُس رسول دی ایس نصیحت تے عمل کرن دی لوڑ اے: اپنی سوچ نُوں نواں بناندے جاؤ۔ (اِفسیوں 4:23) سانوں اِنج مسلسل کرن دی ضرورت کیوں ہوندی اے؟ کیونکہ گھٹا مٹی جیویں چیزاں تے بڑی چھیتی جم جاندا اے،اونویں ای دُنیا دی سوچ وی بڑی چھیتی ساڈے تے اثر کر سکدی اے۔ ایہدے توں بچن تے یہوواہ دی نظر چ پاک رہن لئی ایہہ بوہت ضروری اے کہ اَسی اپنی سوچ، کماں تے خواہشاں دا جائزہ لیندے رہیے۔
اپنی سوچ دا رُخ موڑدے جاؤ
3. اپنی سوچ دا رُخ موڑن دا کیہہ مطلب اے؟ (رومیوں 12:2)
3 سانوں اپنی سوچ دا رُخ کیوں موڑنا چاہی دا اے یعنی سانوں اپنی سوچ کیوں بدلنی چاہی دی اے؟ (رومیوں 12:2 نُوں پڑھو۔) جیس یونانی لفظ دا ترجمہ ”اپنی سوچ دا رُخ موڑنا“ کیتا گیا اے، اوہدا ترجمہ ”اپنی سوچ نُوں نواں بنانا“ وی کیتا جا سکدا اے۔ ایس لئی اپنی سوچ دے رُخ نُوں موڑن لئی صرف چنگے کم کرنا ای کافی نئیں اے سگوں ایس گل تے وی دھیان دینا ضروری اے کہ اَسی اندروں کیہو جہے انسان آں۔ تے جے سانوں محسوس ہوندا اے کہ سانوں اپنے اندر بہتری لیان دی لوڑ اے تے سانوں ضرور اِنج کرنا چاہی دا اے تاکہ اَسی اُنج دے انسان بن جائیے جنج دے یہوواہ چاہندا اے۔ اِنج سانوں صرف اِک دو وار نئیں سگوں ہمیشاں کردے رہنا چاہی دا اے۔
اَسی تلیم تے نوکری بارے جیہڑے فیصلے کرنے آں، کیہہ اوہناں توں ایہہ ظاہر ہوندا اے کہ اَسی خدا دی بادشاہی نُوں پہلی تھاں دینے آں؟ (پیراگراف نمبر 4، 5 نُوں ویکھو۔) c
4. اَسی کیہہ کر سکنے آں تاکہ شیطان دی دُنیا ساڈی سوچ تے اثر نہ پا سکے؟
4 جدوں اَسی بےعیب ہو جاواں گے تے اَسی اپنے ہر کم توں یہوواہ نُوں خوش کر پانواں گے۔ پر جدوں تک اِنج نئیں ہوندا، سانوں یہوواہ نُوں خوش کرن لئی سخت محنت کرنی پووے گی۔ غور کرو کہ رومیوں 12:2 چ پولُس نے کہیا سی کہ سانوں اپنی سوچ دا رُخ موڑن دی ضرورت ایس لئی اے تاکہ اَسی جان سکئے کہ خدا دی مرضی کیہہ اے۔ سانوں ایس دُنیا دی سوچ نُوں اجازت نئیں دینی چاہی دی کہ ایہہ ساڈے منصوبیاں تے فیصلیاں تے اثر پائے۔ ایہدی بجائے سانوں کوئی منصوبہ بنان تے کوئی فیصلہ کرن توں پہلاں ایہہ ویکھنا چاہی دا اے کہ ایہدے بارے خدا دی مرضی کیہہ اے۔
5. اَسی ایس گل دا اندازہ کیویں لا سکنے آں کہ اَسی یہوواہ دے دن نُوں اپنے ذہن چ رکھیا ہویا اے یاں نئیں؟ (تصویر نُوں ویکھو۔)
5 اپنی سوچ دا رُخ موڑن بارے اِک مثال تے غور کرو۔ یہوواہ چاہندا اے کہ اَسی اوہدے دن نُوں اپنے ذہن چ رکھیے۔ (2-پطرس 3:12) اپنے آپ کولوں پچھو: ”کیہہ میری زندگی توں ایہہ ظاہر ہوندا اے کہ مینوں پتہ اے کہ ایہہ بُری دُنیا بوہت چھیتی ختم ہون والی اے؟ کیہہ تلیم تے نوکری دے حوالے نال میں جیہڑے فیصلے کرنا واں، اوہناں توں ایہہ ظاہر ہوندا اے کہ میری زندگی چ یہوواہ دی خدمت کرنا سب توں زیادہ ضروری اے؟ کیہہ میں ہر ویلے پیسہ کمان دے بارے سوچدا رہنا واں یاں کیہہ مینوں پکا بھروسا اے کہ یہوواہ میری تے میرے گھر والیاں دِیاں لوڑاں نُوں پورا کرے گا؟“ ذرا سوچو کہ یہوواہ ایہہ ویکھ کے کِنّاں خوش ہوندا ہوئے گا کہ اَسی اوہدی مرضی دے مطابق زندگی گزارن دی کوشش کر رہے آں۔—متی 6:25-27، 33؛ فِلپّیوں 4:12، 13۔
6. سانوں کیہہ کردے رہنا چاہی دا اے؟
6 سانوں باقاعدگی نال اپنی سوچ دا جائزہ لیندے رہنا چاہی دا اے۔ جے سانوں لگدا اے کہ سانوں کِتے بہتری لیان دی لوڑ اے تے سانوں اِنج ضرور کرنا چاہی دا اے۔ پولُس نے کُرنتھس چ رہن والے مسیحیاں نُوں کہیا سی: اپنا جائزہ لیندے رہوو کہ تُسی سِدھی راہ تے چل رہے او یاں نئیں؛ وار وار اپنے آپ نُوں پرکھو۔ (2-کُرنتھیوں 13:5) سِدھی راہ تے چلن دا مطلب صرف ایہہ نئیں اے کہ اَسی عبادتاں تے جائیے تے کدی کدار مُنادی کرئیے۔ سگوں ایہدے چ ساڈی سوچ،خواہشاں تے نیت وی شامل اے۔ ایس لئی اپنی سوچ دا رُخ موڑن لئی سانوں خدا دے کلام نُوں پڑھنا ہوئے گا،اوہدے وانگوں سوچنا پئے گا تے فیر اپنے اندر بہتری لیا کے اپنی زندگی نُوں یہوواہ دی مرضی دے مطابق ڈھالنا پووے گا۔—1-کُرنتھیوں 2:14-16۔
نوِیں شخصیت نُوں پا لوو
7. (الف) اِفسیوں 4:31، 32 دے مطابق سانوں ہور کیہہ کرنا چاہی دا اے؟ (ب) اِنج کرنا مشکل کیوں ہوسکدا اے؟
7 اِفسیوں 4:31، 32 نُوں پڑھو۔ اپنی سوچ نُوں بدلن دے نال نال سانوں نوِیں شخصیت نُوں وی پان دی ضرورت اے۔ (اِفسیوں 4:24) اِنج کرن لئی سانوں سخت محنت کرنی پووے گی۔ ایہدے چ ایہہ وی شامل اے کہ اَسی اپنے اندروں ہر طرحاں دا ویر، غصہ تے غضب کڈھ دَئیے۔ پر اِنج کرنا مشکل کیوں ہوسکدا اے؟ کیونکہ کجھ عادتاں اِک انسان دی شخصیت دا حصہ بن گئیاں ہوندیاں نیں۔ مثال لئی، بائبل چ دَسیا گیا اے کہ کجھ لوک فوراً غصے چ آ جاندے نیں تے گل گل تے بھڑک جاندے نیں۔ (امثال 29:22) جیہڑے لوکاں دِیاں بھیڑیاں عادتاں بڑیاں پکیاں ہو چُکیاں ہوندیاں نیں، اوہناں نُوں بپتسمہ لین دے بعد وی ایہناں عادتاں تے قابو پان لئی مسلسل کوشش کرنی پیندی اے۔ ایہہ گل اگلے پیراگراف چ دِتی گئی مثال توں پتہ چلدی اے۔
8، 9. بھرا سٹیون دی مثال توں کیویں پتہ چلدا اے کہ سانوں اپنی پرانی شخصیت نُوں لا کے سُٹن لئی مسلسل کوشش کرن دی لوڑ اے؟
8 بھرا سٹیون نُوں اپنے غصے نُوں قابو چ رکھنا مشکل لگدا سی۔ اوہنے کہیا: ”بپتسمہ لین دے بعد وی مینوں اپنے غصے نُوں قابو چ رکھن لئی سخت کوشش کرنی پئی۔ مثال لئی، اِک واری جدوں میں مُنادی کر رہیا ساں تے اِک بندے نے میری گڈی چوں ریڈیو چوری کر لیا۔ میں اوس چور دے پچھے بھجن لگ پیا۔ جدوں میں اوہدے کول پونچیا تے اوہ ریڈیو تھلے سٹ کے بھج گیا۔ فیر بعد چوں جدوں میں ایہہ واقعہ دُوجے بھین بھراواں نُوں سنایا تے اِک بزرگ نے میرے کولوں پچھیا: ”سٹیون، جے اوہ چور تیرے ہتھے چڑھ جاندا تے تُوں اوہدے نال کیہہ کردا؟“ ایس سوال نے مینوں سوچن تے مجبور کر دِتا تے مینوں ہلاشیری دِتی کہ میں اپنے اندروں غصے نُوں کڈھن لئی محنت کردا رہواں۔“ b
9 بھرا سٹیون دی مثال توں پتہ چلدا اے کہ بھانویں کہ سانوں لگدا اے کہ اَسی اپنی کسے بھیڑی عادت نُوں چھڈ دِتا اے، پر فیر وی اوہ اچانک ساڈے توں ظاہر ہو سکدی اے۔ جے تواڈے نال اِنج ہوندا اے تے ہمت نہ ہارو۔ ایہہ نہ سوچو کہ تُسی اِک چنگے مسیحی نئیں او۔ پولُس دے نال وی اِنج ای ہویا۔ اوہنے کہیا: میں چنگے کم تے کرنا چاہنا واں پر میرے اندر بُرائی دا رُجحان ہوندا اے۔ (رومیوں 7:21-23) عیبدار ہون دی وجہ توں سارے مسیحیاں چ ایہو جہیاں عادتاں ہوندیاں نیں جیہڑیاں نہ چاہندیاں ہوئیاں وی ظاہر ہو جاندیاں نیں، بالکل اُنج ای جیویں گھٹا مٹی وار وار ساڈے گھر آ جاندا اے۔ جیویں اپنے گھروں گھٹا مٹی تے گندگی نُوں صاف کرن لئی سانوں وار وار کم کرنا پیندا اے، اونویں ای اپنیاں بھیڑیاں عادتاں تے قابو پان لئی سانوں مسلسل محنت کرنی پووے گی۔ اَسی اِنج کیویں کر سکنے آں؟
10. اَسی اپنیاں بھیڑیاں عادتاں دا مقابلہ کیویں کر سکنے آں؟ (1-یوحنا 5:14، 15)
10 اپنی اوس عادت بارے یہوواہ کولوں دُعا کرو جنہوں چھڈنا توانوں مشکل لگ رہیا اے۔ ایس گل دا یقین رکھو کہ اوہ تواڈی دُعا ضرور سنے گا تے تواڈی مدد کرے گا۔ (1-یوحنا 5:14، 15 نُوں پڑھو۔) یہوواہ کوئی معجزہ کرکے تواڈی اوس عادت نُوں ختم تے نئیں کرے گا پر اوہ توانوں اوہدے تے قابو پان لئی طاقت ضرور دَوے گا۔ (1-پطرس 5:10) ایہدے علاوہ اپنیاں دُعاواں دے مطابق عمل وی کرو۔ ایہدا مطلب ایہہ وے کہ اوہ کم نہ کرو جدی وجہ توں تواڈی پرانی شخصیت واپس آ سکدی اے۔ مثال لئی، ایہو جہیاں فلماں تے ٹیوی پروگرام نہ ویکھو تے ایہو جہیاں کہانیاں نہ پڑھو جنہاں چ اوہناں کماں نُوں بڑا چنگا وکھایا جاندا اے جنہاں نُوں اَسی چھڈن دی کوشش کر رہے آں۔ ایہدے علاوہ غلط خواہشاں بارے سوچدے نہ رہوو۔—فِلپّیوں 4:8؛ کُلسّیوں 3:2۔
11. اَسی نوِیں شخصیت نُوں پان لئی کیہہ کر سکنے آں؟
11 پرانی شخصیت نُوں لان دے نال نال نوِیں شخصیت نُوں پانا وی ضروری اے۔ اَسی اِنج کیویں کر سکنے آں؟ جدوں توانوں یہوواہ دی کسے خوبی بارے پتہ چلدا اے تے تُسی سوچ سکدے او کہ میں ایہہ خوبی کیویں ظاہر کر سکنا واں؟ (اِفسیوں 5:1، 2) مثال لئی، جدوں تُسی بائبل چوں کوئی ایہو جیہا واقعہ پڑھدے او جدے چ توانوں یہوواہ دی معاف کرن دی خوبی نظر آندی اے تے اپنے آپ کولوں پچھو: ”کیہہ میں دُوجیاں نُوں معاف کرنا واں؟“ جدوں تُسی کوئی ایہو جیہا واقعہ پڑھدے او جدے توں پتہ چلدا اے کہ یہوواہ نُوں غریباں نال ہمدردی اے تے اپنے آپ کولوں پچھو: ”کیہہ میں وی اپنے ضرورتمند بھین بھراواں لئی فکر رکھنا واں تے اوہناں دی مدد کرنا واں؟“ نوِیں شخصیت نُوں پان نال اپنی سوچ دا رُخ موڑدے جاؤ۔ پر یاد رکھو کہ اِنج کرن چ وقت لگ سکدا اے۔
12. سٹیون نے ایہہ کیویں محسوس کیتا کہ بائبل چ کسے نُوں بدلن دی طاقت اے؟
12 سٹیون جدا پہلے وی ذکر ہویا اے، اوہ آہستہ آہستہ نوِیں شخصیت نُوں پان دے قابل ہویا۔ اوہ دَسدا اے:”بپتسمہ لین دے بعد وی مینوں کئی وار ایہو جہی صورتحال دا سامنا ہویا جدے چ میں آپے توں باہر ہو سکنا ساں۔ پر میں سکھ لیا اے کہ یاں تے میں اوہناں لوکاں توں دُور چلا جاواں جیہڑے مینوں غصہ دَوا رہے ہوندے نیں یاں فیر ٹھنڈے دماغ نال مسئلے نُوں حل کراں۔ میری بیوی تے ہور وی کئی لوکاں نے مینوں داد دِتی اے کہ میں اِنج دے معاملیاں نُوں بڑے چنگے طریقے نال حل کیتا اے۔ میں تے آپ ایس گل توں بڑا حیران ساں۔ میں آپ اپنے اندر ایہہ تبدیلیاں نئیں لیا سکیا سگوں میرا ایمان اے کہ خدا دے کلام نے ای مینوں بدلیا اے۔“
غلط خواہشاں دا مقابلہ کر دے رہوو
13. کیہڑی چیز ساڈی مدد کرے گی کہ اَسی اپنے اندر چنگے کم کرن دی خواہش پیدا کریئے؟ (گلتیوں 5:16)
13 گلتیوں 5:16 نُوں پڑھو۔ یہوواہ سانوں اپنی پاک روح دیندا اے تاکہ اَسی چنگے کم کرن دی کوشش چ کامیاب ہو سکیے۔ جدوں اَسی پاک کلام پڑھنے آں تے اَسی پاک روح نُوں اپنے اُتے اثر کرن دا موقع دے رہے ہنے آں۔ تے جدوں اَسی عبادتاں تے جانے آں تے اوہدوں وی سانوں پاک روح مِلدی اے۔ عبادتاں تے جان نال اَسی اپنے بھین بھراواں نال وقت گزار سکنے آں جیہڑے ساڈے وانگوں صحی کم کرن دی پوری کوشش کردے نیں۔ (عبرانیوں 10:24، 25؛ 13:7) ایہدے توں سانوں بڑا حوصلہ مِلدا اے تے جدوں اَسی اپنی کسے خامی تے قابو پان لئی یہوواہ کولوں دُعا کرنے آں تے اوہ سانوں اپنی پاک روح دیندا اے تاکہ اَسی اپنیاں غلط خواہشاں نال لڑدے رہیے۔ ایہہ سارے کم کرن دے بعد وی ہو سکدا اے کہ ساڈے اندروں غلط خواہشاں ختم نہ ہون۔ پر ساڈی ایہہ مدد ضرور ہوئے گی کہ اَسی ایہناں خواہشاں نُوں پورا کرن توں باز رہیے۔ گلتیوں 5:16 چ دَسیا گیا اے: جیہڑے لوک پاک روح دے مطابق چلدے نیں، اوہ جسم دِیاں خواہشاں نُوں بالکل پورا نئیں کرن گے۔
14. ایہہ کیوں ضروری اے کہ اَسی اپنے اندر چنگے کم کرن دی خواہش پیدا کردے رہیے؟
14 جدوں اَسی ایہو جہے کم شروع کر نے آں جنہاں دی وجہ توں اَسی یہوواہ دے نیڑے رہ سکنے آں تے سانوں ایہہ کم کرنے کدی وی نئیں چھڈنے چاہی دے تے اپنے اندر چنگے کم کرن دی خواہش پیدا کردے رہنا چاہی دا اے۔ اِنج کرنا کیوں ضروری اے؟ کیونکہ ساڈا اِک دُشمن ساڈے تے لگاتار حملے کردا رہندا اے تے ایہہ دُشمن بھیڑے کم کرن دی ازمیش اے۔ ہو سکدا اے کہ بپتسمہ لین دے بعد وی ساڈا دل کرے کہ اَسی ایہو جہے کم کریئے جیہڑے سانوں نئیں کرنے چاہی دے، جیویں کہ جُوا کھیڈنا، حد توں زیادہ شراب پینا یاں گندیاں فلماں تے تصویراں ویکھنا۔ (اِفسیوں 5:3، 4) اِک جوان بھرا نال بپتسمہ لین توں بعد اِنج ای ہویا۔ اوہنے کہیا: ”میرے لئی اپنی جیہڑی خواہش نال لڑنا سب توں مشکل سی، اوہ ایہہ سی کہ میں دُوجے مُنڈیاں لئی کشش محسوس کرنا ساں۔ مینوں لگدا سی کہ ہولی ہولی ایہہ خواہش میرے اندروں ختم ہو جائے گی۔ پر مینوں اَج وی ایہدے نال لڑنا پیندا اے۔“ جے تواڈے اندر کوئی غلط خواہش وار وار سر چُک دی اے تے کیہڑی چیز ایہدے نال لڑن چ تواڈی مدد کر سکدی اے؟
جے تُسی کسے غلط خواہش نال لڑ رہے او تے مایوس نہ ہووو کیونکہ دُوجے وی ایہناں نال لڑ چُکے نیں تے ایہناں تے قابو پان چ کامیاب ہوئے نیں۔ (پیراگراف نمبر 15، 16 نُوں ویکھو۔)
15. کیہہ دُوجیاں نوں وی اپنیاں غلط خواہشاں نال لڑنا پیندا اے؟ (تصویر نُوں ویکھو۔)
15 جدوں تُسی کسے ایہو جہی خواہش نال لڑ رہے ہوندے او جیہڑی وار وار تواڈے اندر سر چُک دی اے تے یاد رکھو کہ دُوجیاں نُوں وی ایہو جہیاں خواہشاں نال لڑنا پیندا اے۔ بائبل چ لکھیا اے: تُسی جیہڑیاں جیہڑیاں ازمیشاں دا سامنا کیتا اے، اوہ انوکھیاں نئیں سگوں دُوجیاں تے وی آندیاں نیں۔ (1-کُرنتھیوں 10:13) بائبل دے اِک ہور ترجمے چ ایہہ ایت ایس طرحاں لکھی اے: تواڈے اُتے ایہو جہی کوئی ازمیش نئیں آئی جیہڑی دُوجیاں اُتے نہ آئی ہووے۔ ایہہ گل پولُس رسول نے خدا دے الہام نال کُرنتھس دے مسیحی مرداں تے عورتاں نُوں لکھی سی۔ ایہناں چوں کجھ، مسیحی بنن توں پہلے حرامکار، ہمجنس پرست تے شرابی سن۔ (1-کُرنتھیوں 6:9-11) تواڈے خیال چ بپتسمہ لین توں بعد اوہناں دے دل چ کدی وی ایہہ خواہشاں نئیں آئیاں ہون گیاں؟ اِنج نئیں ہویا ہوئے گا۔ ایہہ سچ اے کہ اوہ مسح کیتے گئے مسیحی سن پر اوہ وی عیبدار سن۔ ایہدے چ کوئی شک نئیں کہ اوہناں نُوں کدی کدار اپنیاں غلط خواہشاں نال لڑنا پیندا ہوئے گا۔ ایہہ جان کے سانوں بڑی تسلی مِلدی اے۔ پر کیوں؟ کیونکہ ایہدے توں سانوں پتہ لگ جاندا اے کہ اَسی جیہڑی غلط خواہش دا سامنا کر رہے آں، اوہدا مقابلہ ہور لوک وی کر چُکے نیں۔ واقعی اَسی اپنا ایمان مضبوط رکھ سکنے آں تے یاد رکھ سکنے آں کہ پوری دُنیا چ ساڈے ہمایمان ایسے طرحاں دِیاں مصیبتاں دا سامنا کر رہے نیں۔—1-پطرس 5:9۔
16. سانوں کیہڑی چیز توں خبردار رہنا چاہی دا اے تے کیوں؟
16 سانوں ایس سوچ توں خبردار رہنا چاہی دا اے کہ ساڈی مشکل نُوں کوئی نئیں سمجھ سکدا۔ جے اَسی اِنج سوچاں گے تے سانوں اِنج لگنا شروع ہو جائے گا کہ اَسی اپنی غلط خواہشاں تے کدی قابو نئیں پا سکدے تے ساڈے اندر ایہناں نال لڑن دی طاقت نئیں اے۔ پر بائبل چ دَسیا گیا اے: خدا وعدے دا پکا اے تے اوہ توانوں کسے ایہو جہی ازمیش وچ نئیں پین دَوے گا جیہڑی تواڈی برداشت توں باہر ہووے سگوں اوہ ہر ازمیش دے نال کوئی نہ کوئی راہ وی کڈھے گا تاکہ تُسی ثابتقدم رہ سکو۔ (1-کُرنتھیوں 10:13) ایس لئی جے تواڈی کوئی غلط خواہش وار وار سر چُک دی اے تے تُسی یہوواہ دی مدد نال اوہدا مقابلہ کر سکدے او تے اوہدے وفادار رہ سکدے او۔
17. بھانویں کہ غلط خواہشاں نُوں اپنے دل چ آن توں روکنا ساڈے وس وچ نئیں اے پر کیہڑی چیز ساڈے وس وچ اے؟
17 ایہہ گل یاد رکھو کہ گُناہگار ہون دی وجہ توں شاید تُسی اپنے دل چ غلط خواہشاں نُوں آن توں نہ روک سکو۔ پر جدوں ایہہ خواہشاں تواڈے دل چ آندیاں نیں تے تُسی ایہناں توں اِنج بھج سکدے او جیویں یوسف فوطیفار دی بیوی توں بھجیا سی۔ (پیدایش 39:12) ایہہ ساڈے وس وچ اے کہ اَسی اپنی غلط خواہشاں نُوں پورا کراں گے یاں نئیں۔
ہمت نہ ہارو
18، 19. اپنی سوچ دا رُخ موڑدے ویلے اَسی اپنے آپ کولوں کیہڑے سوال پچھ سکنے آں؟
18 اپنی سوچ دا رُخ موڑن دا مطلب ایہہ وے کہ اَسی اپنی سوچ نُوں یہوواہ دی مرضی دے مطابق ڈھالن لئی مسلسل کوشش کریئے۔ اِنج کرن لئی سانوں باقاعدگی نال اپنا جائزہ لینا چاہی دا اے تے اپنے آپ کولوں ایہہ سوال پچھنے چاہی دے نیں: ”کیہہ میرے کماں توں نظر آندا اے کہ مینوں پتہ اے کہ میں آخری زمانے چ رہ رہیا واں؟ کیہہ میں نوِیں شخصیت نُوں پان دی کوشش کر رہیا واں؟ کیہہ میں یہوواہ دی پاک روح نُوں اپنی زندگی تے اثر کرن دے رہیا واں تاکہ میں جسم دِیاں خواہشاں نُوں پورا کرن توں بچ سکاں؟“
19 جدوں تُسی اپنا جائزہ لے رہے ہوندے او تے اپنے آپ کولوں حد توں زیادہ توقع نہ کرو۔ سگوں تُسی ہُن تک اپنے اندر جِنّی بہتری لیا چُکے او، اوہدے توں خوش ہووو۔ جے توانوں لگدا اے کہ حالے وی کِتے بہتری لیان دی ضرورت ہے وے تے بے حوصلہ نہ ہووو۔ ایہدی بجائے ایس نصیحت تے عمل کرو جیہڑی فِلپّیوں 3:16 چ لکھی اے: اَسی جِنّی وی ترقی کیتی اے، آؤ اَگے ودھدے رہیے۔ ایس گل دا یقین رکھو کہ تُسی اپنی سوچ دا رُخ موڑن لئی جیہڑیاں وی کوششاں کرو گے، اوہناں چ یہوواہ تواڈی مدد ضرور کرے گا۔
گیت نمبر 36: اپنے دل دی حفاظت کریئے
a پولُس رسول نے اپنے ہمایماناں نُوں کہیا سی کہ اوہ اپنی سوچ تے کماں تے دُنیا دا اثر نہ ہون دین۔ سانوں وی پولُس دی ایس نصیحت تے عمل کرنا چاہی دا اے۔ سانوں ایس گل دا خیال رکھنا چاہی دا اے کہ دُنیا دی سوچ ساڈی سوچ تے کماں تے اثر نہ کرے۔ پر جے سانوں لگدا اے کہ ساڈی سوچ تے ساڈے کم یہوواہ دی مرضی دے مطابق نئیں نیں تے سانوں فوراً اپنی سوچ نُوں ٹھیک کرنا چاہی دا اے۔ ایس مضمون چ اَسی ویکھاں گے کہ اَسی اِنج کیویں کر سکنے آں۔
b ویبسائٹ jw.org تے اُردو زبان چ مضمون ”میری زندگی بد سے بدتر ہوتی گئی“ نُوں ویکھو۔
c تصویر دی وضاحت : اِک نوجوان بھرا ایس گل تے سوچ وچار کر رہیا اے کہ کیہہ اوہ اعلیٰ تلیم حاصل کرے گا یاں کُل وقتی خدمت کرے گا۔
