بائبل توں پتہ چلدا اے کہ یہوواہ پہلے توں دَس سکدا اے کہ مستقبل چ کیہہ ہوئے گا۔ (‏یسعیاہ 45:‏21‏)‏ پر ایہدے چ ایس گل بارے پوری تفصیل نئیں دَسی گئی کہ اوہ کیویں تے کدوں اِنج کردا اے یاں فیر اوہ کیس حد تک مستقبل نُوں جاننا چاہندا اے۔ ایس لئی اَسی ایس معاملے بارے پورے یقین نال کجھ نئیں کہہ سکدے۔ پر آؤ ایس بارے کجھ گلاں تے غور کرئیے۔‏

یہوواہ سب کجھ جانن دی صلاحیت رکھدا اے پر کدی کدار اوہ اپنی ایس صلاحیت نُوں استمال نئیں کردا۔‏ یہوواہ لامحدود حکمت دا مالک اے۔ ایس لئی جے اوہ چاہوے تے اوہ مستقبل بارے پہلاں توں ای سب کجھ دَس سکدا اے۔ (‏رومیوں 11:‏33‏)‏ پر اوہ اپنی ذات اُتے پوری طرحاں قابو وی رکھ سکدا اے ایس لئی اوہ ویکھدا اے کہ اوہنوں کدوں مستقبل بارے جانن دی ضرورت اے تے کدوں نئیں۔—‏یسعیاہ 42:‏14 تے غور کرو۔‏

اوہ اپنی مرضی نُوں پورا کرن لئی حالات نُوں ڈھال سکدا اے۔‏ ایس گل دا یہوواہ دی ایس صلاحیت نال کیہہ تعلق اے کہ اوہ مستقبل بارے پہلاں توں دَس سکدا اے؟ یسعیاہ 46:‏10 چ لکھیا اے:‏ مَیں شروع توں ای انجام دی خبر دینا واں تے بوہت پہلاں ای اوہ گلاں دَسنا واں جیہڑیاں حالے تک نئیں ہوئیاں تے کہنا واں کہ میرے فیصلے قائم رہن گے تے مَیں اپنی مرضی ضرور پوری کراں گا۔‏

اِک گل جدی وجہ توں یہوواہ مستقبل بارے دَس سکدا اے، اوہ ایہہ وے کہ یہوواہ حالات نُوں اپنی مرضی دے مطابق ڈھالن دی طاقت رکھدا اے۔ کدی کدی اَسی فلم چھیتی چھیتی اَگے لنگھا کے ویکھ لینے آں کہ اوہدے آخر چ کیہہ ہویا اے۔ پر یہوواہ نُوں اِنج کرن دی لوڑ نئیں۔ اوہ آپ ایہہ فیصلہ کر سکدا اے کہ کیہڑا واقعہ کدوں ہوئے گا تے فیر وقت آن تے اوہ حالات نُوں ایہدے مطابق ڈھالدا اے۔—‏خروج 9:‏5، 6؛‏ متی 24:‏36؛‏ اعمال 17:‏31‏۔‏

ایسے لئی بائبل چ ”‏ٹھہرانا،“‏ ”‏ارادہ کرنا“‏ تے ”‏پورا کرنا“‏ ورگے لفظ استمال کیتے گئے نیں جنہاں توں پتہ چلدا اے کہ یہوواہ جو طے کر لیندا اے، اوہنوں مستقبل چ پورا وی کردا اے۔ (‏2-‏سلاطین 19:‏25؛‏ یسعیاہ 46:‏11‏)‏ جیہڑے عبرانی لفظ دا ترجمہ ”‏ٹھہرانا،“‏ ”‏ارادہ کرنا،“‏ یاں ”‏پورا کرنا“‏ وغیرہ کیتا گیا اے، اوہ اوس عبرانی لفظ توں نکلیا اے جدا مطلب اے، ”‏کمیار۔“‏ (‏یرمیاہ 18:‏4‏)‏ جیویں اِک کمیار عام جہی مٹی نال اِک سوہنا جیہا گلدان بنا دیندا اے اونویں ای یہوواہ اپنی مرضی پوری کرن لئی حالات نُوں ڈھال سکدا اے۔—‏اِفِسیوں 1:‏11۔‏

یہوواہ ایس گل دا لحاظ رکھدا اے کہ اوہنے سانوں اپنی مرضی نال فیصلے کرن دی آزادی دِتی اے۔‏ یہوواہ نے ہر بندے دی قسمت پہلے توں نئیں لکھی تے نہ ای اوہ نیک بندیاں کولوں ایہو جہے کم کراندا اے جنہاں دی وجہ توں اوہ مشکلاں چ پھس جاندے نیں۔ اوہ سارے انساناں نُوں اپنی مرضی نال زندگی گزارن دی اجازت دیندا اے۔ پر ایہدے نال نال اوہ اوہناں نُوں ایہہ وی سکھاندا اے کہ اوہ اپنی زندگی چنگی طرحاں کیویں گزار سکدے نیں۔‏

آؤ دو مثالاں تے غور کرئیے۔ پہلی مثال نینوہ دے لوکاں دی اے۔ یہوواہ نے کہیا سی کہ نینوہ دے لوکاں نُوں اوہناں دی بدکاری دی وجہ توں تباہ کر دِتا جائے گا۔ پر جدوں اوہناں نے توبہ کر لئی تے یہوواہ نینوہ دے لوکاں تے اوہ عذاب نازل کرن توں باز آیا جدے بارے اوہنے کہیا سی۔ (‏یُوناہ 3:‏1-‏10‏)‏ نینوہ دے لوکاں نے یہوواہ وَلّوں مِلن والے پیغام نُوں اپنی مرضی نال قبول کر کے توبہ کر لئی جدی وجہ توں یہوواہ نے وی اپنی سوچ بدل لئی تے اوہناں نُوں معاف کر دِتا۔‏

دُوجی مثال اِک پیشین‌گوئی دی اے جیہڑی اوس بادشاہ بارے کیتی گئی سی جدا ناں خورس ہوئے گا تے جیہڑا یہودیاں نُوں غلامی توں آزاد کرے گا تے یہوواہ دی ہیکل نُوں دُبارہ بنان دا حکم دَوے گا۔ (‏یسعیاہ 44:‏26–‏45:‏4‏)‏ بادشاہ خورس نے بالکل اُنج ای کیتا جیویں ایس پیشین‌گوئی چ دَسیا گیا سی۔ (‏عزرا 1:‏1-‏4‏)‏ پر خورس سچے خدا یہوواہ دی عبادت نئیں کردا سی۔ یہوواہ نے ایس پیشین‌گوئی نُوں پورا کرن لئی خورس نُوں استمال تے کیتا پر اوہدے کولوں اپنی مرضی نال عبادت کرن دی آزادی نئیں کھوئی۔—‏اَمثال 21:‏1‏۔‏

ایہہ بس کجھ گلاں نیں جنہاں دی بِنا تے اَسی اندازہ لا سکنے آں کہ یہوواہ مستقبل بارے دَسن دی اپنی صلاحیت نُوں کیویں استمال کردا اے۔ اصل چ کوئی وی انسان یہوواہ دِیاں راہواں نُوں پوری طرحاں نئیں سمجھ سکدا۔ (‏یسعیاہ 55:‏8، 9‏)‏ پر ہُن تک اَسی یہوواہ بارے جو کجھ وی سکھیا اے، اوہدے توں ایس گل تے ساڈا ایمان ضرور مضبوط ہوندا اے کہ یہوواہ جو وی کردا اے صحی کردا اے فیر بھانویں ایہہ مستقبل بارے دَسن دا معاملہ ای کیوں نہ ہووے۔‏