بھین ریٹا تے اوہدا شوہر رابرٹ a اِک ایہو جہے ملک چ رہندے نیں جتھے بوہت سارے لوک ملک فلپائن توں کم کرن لئی آندے نیں۔ کورونا دی وبا دے دوران بھین ریٹا نے نہ صرف اپنے ملک دے لوکاں نُوں سگوں دُوجے مُلکاں توں آئے لوکاں نُوں وی بائبل کورس کرایا۔ او ہ اِنج کیویں کر سکی؟‏

بھین ریٹا جیہڑے لوکاں نُوں بائبل کورس کرا رہی سی، اوہناں کولوں اوہ ایہہ سوال پچھدی سی:‏ ”‏کیہہ تواڈی نظر چ کوئی ایہو جیہا بندہ ہے وے جیہڑا بائبل کورس کرنا چاہندا اے؟“‏ جے اوہ کہندے کہ ہاں، ایہو جہے کجھ لوک ہے نیں تے بھین ریٹا اوہناں نُوں کہندی سی کہ ”‏کیہہ تُسی میری اوہناں نال گل کرا سکدے او؟“‏ ایہہ سادہ جیہا سوال پچھن نال اکثر بڑے چنگے نتیجے نکلدے نیں کیونکہ جیہڑے لوک خدا دے کلام دی دِلوں قدر کردے نیں، اوہ ایہدے چوں سکھیاں ہوئیاں گلاں اپنے دوستاں تے رشتے‌داراں نُوں وی دَسدے نیں۔ بھین ریٹا نے جدوں ایہہ سوال پچھیا تے ایہدا کیہہ نتیجہ نکلیا؟‏

بھین ریٹا کولوں بائبل کورس کرن والی اِک عورت جیزمین نے اوہدی چار ہور لوکاں نال گل کرائی جیہڑے بائبل کورس کرنا چاہندے سن۔ ایہناں وچوں اِک عورت دا ناں کرسٹین سی۔ اوہنوں بائبل کورس کرنا ایناں چنگا لگدا سی کہ اوہنے بھین ریٹا نُوں کہیا کہ اوہ اوہنوں ہفتے چ دو واری بائبل کورس کرائے۔ جدوں بھین ریٹا نے کرسٹین کولوں وی ایہہ سوال پچھیا کہ کیہہ اوہ ایہو جہے لوکاں نُوں جان دی اے جیہڑے بائبل کورس کرنا چاہندے نیں تے کرسٹین نے کہیا:‏ ”‏ہاں جی، مَیں تواڈی گل اپنیاں کجھ دوستاں نال کراواں گی۔“‏ صرف کجھ ہفتیاں چ ای کرسٹین نے بھین ریٹا دی گل اپنیاں چار دوستاں نال کرائی۔ بعد چوں کرسٹین نے بھین ریٹا نُوں اپنیاں کجھ ہور دوستاں بارے وی دَسیا تے اَگوں اوہناں نے وی بھین ریٹا دی کجھ ہور لوکاں نال گل کرائی۔‏

کرسٹین دے گھر والے فلپائن چ رہندے سن تے اوہ چاہندی سی کہ اوہ وی بائبل کورس کرن۔ ایس لئی اوہنے اپنی دھی اینڈریا نال ایس بارے گل کیتی۔ شروع شروع چ اینڈریا سوچدی سی کہ یہوواہ دے گواہواں دا مذہب بڑا عجیب اے، اوہ یسوع مسیح نُوں نئیں من دے تے صرف پرانے عہدنامے نُوں پڑھدے نیں۔ پر پہلی وار بائبل کورس کرن تے ای اوہدیاں ساریاں غلط‌فہمیاں دُور ہو گئیاں۔ ہر واری جدوں اوہ بائبل چوں کوئی نوِیں گل سکھدی سی تے اوہ کہندی سی:‏ ”‏جے بائبل چ ایہہ گل لکھی اے تے فیر ایہہ ضرور سچی اے۔“‏

کجھ عرصے بعد اینڈریا نے بھین ریٹا دی گل اپنیاں دو دوستاں تے اپنے نال کم کرن والی اِک کُڑی نال کرائی۔ اوہ تِنے وی بائبل کورس کرن لگ پئیاں۔ بھین ریٹا نُوں نئیں پتہ سی کہ جدوں اوہ اینڈریا نُوں بائبل کورس کرا رہی ہوندی سی تے اینڈریا دی پھپھو وی اوہدیاں گلاں سُن رہی ہوندی سی۔ اینڈریا دی پھپھو دا ناں اینجلا اے تے اوہ ویکھ نئیں سکدی۔ فیر اِک دن اینجلا نے اینڈریا نُوں کہیا کہ اوہ بھین ریٹا نُوں کہوے کہ اوہ اوہنوں وی بائبل کورس کرائے۔ جو کجھ اینجلا سکھ رہی سی، اوہ اوہنوں ایناں پسند آیا کہ کجھ مہینیاں دے اندر اندر ای اوہنے بائبل دِیاں کئی ایتاں زبانی یاد کر لئیاں۔ اوہ تے ہفتے چ چار واری بائبل کورس کرنا چاہندی سی۔ اینڈریا اوہدی مدد کردی سی کہ اوہ ویڈیو کال دے ذریعے عبادتاں چ شامل ہوئے تے اِنج اوہ باقاعدگی نال عبادتاں نُوں وی سُنن لگ پئی۔‏

 جدوں بھین ریٹا نُوں پتہ چلیا کہ اوہ جیس ویلے کرسٹین نُوں بائبل کورس کرا رہی ہوندی اے تے اوہدا شوہر جوشوعا وی اوہدے کول ای ہوندا اے تے اوہنے جوشوعا نُوں وی بائبل کورس کرن بارے پچھیا۔ جوشوعا نے کہیا:‏ ”‏مَیں صرف تواڈی گل بات سُناں گا پر میرے کولوں کوئی سوال نہ پچھنا۔ نئیں تے مَیں فوراً اُٹھ کے چلا جاواں گا۔“‏ پر حالے بائبل کورس کردے ہوئے پنج منٹ ای ہوئے سن کہ اوہنے اپنی بیوی کرسٹین نالوں وی بوہتے سوال پچھنے شروع کر دِتے۔ اوہ چاہندا سی کہ اوہ ایسے طرحاں بائبل بارے سکھدا رہوے۔‏

بھین ریٹا نے صرف اِک سادہ جیہا سوال پچھیا جدا نتیجہ ایہہ نکلیا کہ بوہت سارے لوک بائبل کورس کرن لگ پئے۔ اوہنے کجھ ہور بھین بھراواں نُوں وی کہیا کہ اوہ ایہناں وچوں کجھ لوکاں نُوں بائبل کورس کران۔ بھین ریٹا نے 28 لوکاں نُوں بائبل کورس کرانا شروع کیتا جیہڑے چار فرق مُلکاں توں سن۔‏

بھین ریٹا کولوں بائبل کورس کرن والی عورت جیزمین جدا سب توں پہلاں ذکر ہویا اے، اوہنے اپریل 2021 چ بپتسمہ لیا۔ کرسٹین نے مئی 2022 چ بپتسمہ لیا تے واپس فلپائن اپنے گھر والیاں کول چلی گئی۔ کرسٹین نے بھین ریٹا دی گل جیہڑے لوکاں نال کرائی سی، اوہناں وچوں دو عورتاں نے وی بپتسمہ لے لیا۔ کجھ مہینیاں بعد اینجلا نے وی بپتسمہ لے لیا تے ہُن اوہ پہل‌کار دے طور تے خدمت کر رہی اے۔ کرسٹین دا شوہر جوشوعا،اوہدی دھی اینڈریا تے کئی ہور لوک وی باقاعدگی نال بائبل کورس کر رہے نیں تے یہوواہ نال اپنی دوستی مضبوط کر رہے نیں۔‏

پہلی صدی چ بادشاہی دی خوش‌خبری بوہت تیزی نال پھیلی کیونکہ بوہت سارے لوکاں نے اپنے دوستاں تے رشتے‌داراں نُوں اوہ گلاں دَسیاں، جیہڑیاں اوہناں نے یسوع بارے سکھیاں سن۔ (‏یوحنا 1:‏41، 42؛‏ اعمال 10:‏24،‏ 27،‏ 48؛‏ 16:‏25-‏33‏)‏ تُسی وی بائبل کورس کرن والیاں تے بائبل چ دلچسپی رکھن والے لوکاں کولوں ایہہ سوال پچھ سکدے او:‏ ”‏کیہہ تواڈی نظر چ کوئی ایہو جیہا بندہ ہے وے جیہڑا بائبل کورس کرنا چاہندا اے؟“‏ ایہہ سادہ جیہا سوال پچھن نال بوہت سارے لوک بائبل کورس شروع کر سکدے نیں۔‏