اَج کل بوہت سارے لوکاں نُوں لگدا اے کہ دُوجیاں نُوں اوہناں نال زیادہ بہتر طریقے نال پیش آنا چاہی دا اے تے اوہناں نُوں زیادہ اہمیت دینی چاہی دی اے۔ پر ایہو جہے لوکاں نُوں جِنّی وی اہمیت دِتی جائے، اوہناں نُوں ایہہ گھٹ ای لگدی اے۔ جیہڑے لوک ایہو جہی سوچ رکھدے نیں، اوہ خودغرض تے ناشکرے ہوندے نیں۔ بائبل چ پہلاں توں ای دَسیا گیا سی کہ آخری زمانے چ ایہو جہے لوک ہون گے۔—‏2-‏تیمُتھیُس 3:‏2‏۔‏

ایہہ گل سچ اے کہ دُنیا چ شروع توں ای لوک خودغرض رہے نیں۔ مثال لئی، آدم تے حوا نے آپ ایہہ فیصلہ کیتا کہ اوہناں لئی کیہہ اچھا اے تے کیہہ بُرا۔ تے اَج اَسی سارے ایہدے نتیجے بھگت رہے آں۔ ایہدی اِک ہور مثال یہوداہ دا بادشاہ عُزیاہ اے جنہوں لگیا کہ بادشاہ ہون دی وجہ توں اوہنوں ایہہ حق مِل گیا اے کہ اوہ ہیکل چ جا کے بخور جلا سکے۔ پر اصل چ اوہدے کول ایہہ حق نئیں سی۔ (‏2-‏تواریخ 26:‏18، 19‏)‏ ایہدے علاوہ فریسیاں تے صدوقیاں نُوں ایس گل تے بڑا مان سی کہ اوہ ابراہام دی نسل چوں نیں۔ اوہناں نُوں لگدا سی کہ ایس وجہ توں خدا نُوں اوہناں تے خاص مہربانیاں کرنیاں چاہی دِیاں نیں۔—‏متی 3:‏9‏۔‏

اَج ساڈے آلے دوالے ایہو جہے بوہت سارے لوک نیں جیہڑے خودغرض تے مغرور نیں۔ ایہناں لوکاں دی سوچ دا اثر ساڈے تے وی ہو سکدا اے۔ (‏گلتیوں 5:‏26‏)‏ اوہناں وانگوں شاید اَسی وی ایہہ سوچن لگ پئیے کہ فلانے اعزاز نُوں حاصل کرنا ساڈا حق اے یاں سانوں زیادہ اہمیت دِتی جانی چاہی دی اے۔ اَسی ایہو جہی سوچ توں کیویں بچ سکنے آں؟ ایہدے لئی سانوں سب توں پہلاں ایس گل تے غور کرنا چاہی دا اے کہ ایس معاملے بارے یہوواہ دی کیہہ سوچ اے۔ بائبل دے دو اصول ایہہ جانن چ ساڈی مدد کرن گے۔ آؤ ایہناں اصولاں تے غور کرئیے۔‏

ایہہ فیصلہ یہوواہ کردا اے کہ کون کیس چیز دا حق‌دار اے۔‏ ذرا ایہدیاں کجھ مثالاں تے غور کرو۔‏

• یہوواہ چاہندا اے کہ خاندان چ شوہر نُوں عزت ملے تے بیوی نُوں محبت۔  ‏(‏اِفسیوں 5:‏33‏)‏ یہوواہ شادی‌شُدہ لوکاں کولوں ایہہ چاہندا اے کہ اوہ اپنے جیون ساتھی دے علاوہ کسے ہور غیر مرد یاں عورت نال محبت نہ کرن۔ (‏1-‏کُرنتھیوں 7:‏3‏)‏ ایہدے علاوہ ایہہ ماں پیو دا حق اے کہ اوہناں دے بچے اوہناں دی عزت کرن تے بچیاں دا ایہہ حق اے کہ اوہناں دے ماں پیو اوہناں نُوں پیار تے توجہ دین۔—‏2-‏کُرنتھیوں 12:‏14؛‏ اِفسیوں 6:‏2‏۔‏

• یہوواہ چاہندا اے کہ اَسی کلیسیا دے بزرگاں دی عزت کرئیے کیونکہ اوہ کلیسیا چ بڑی محنت نال کم کردے نیں۔ (‏1-‏تھسلُنیکیوں 5:‏12‏)‏ پر یہوواہ نے بزرگاں نُوں ایہہ حق نئیں دِتا کہ اوہ بھین بھراواں تے رُعب جمان۔—‏1-‏پطرس 5:‏2، 3‏۔‏

• حکومتاں نُوں خدا وَلّوں ایہہ اِختیار مِلیا اے کہ اوہ اپنی عوام کولوں ٹیکس لین تے خدا عوام کولوں ایہہ چاہندا اے کہ اوہ حکومتاں دے تابع‌دار رہن۔—‏رومیوں 13:‏1،‏ 6، 7‏۔‏

یہوواہ نے سانوں اوہ برکتاں دِتیاں نیں جنہاں دے اَسی لائق وی نئیں ساں۔‏ گُناہ‌گار ہون دی وجہ توں اَسی صرف موت دے لائق ساں۔ (‏رومیوں 6:‏23‏)‏ پر یہوواہ ساڈے نال اَٹل محبت کردا اے ایس لئی اوہنے سانوں بوہت ساریاں برکتاں دِتیاں نیں۔ (‏زبور 103:‏10، 11‏)‏ ایہہ ساریاں برکتاں سانوں ایس لئی نئیں مِلدیاں کیونکہ اَسی ایہناں دے حق‌دار آں سگوں ایہہ سانوں یہوواہ دی عظیم رحمت دی وجہ توں مِلدیاں نیں۔—‏رومیوں 12:‏6-‏8؛‏ اِفسیوں 2:‏8‏۔‏

دُنیا دی سوچ توں خبردار رہوو۔‏ ہو سکدا اے کہ سانوں پتہ وی نہ چلے تے ساڈے اندر ایہہ سوچ پیدا ہونی شروع ہو جائے کہ سانوں دُوجیاں نالوں بوہتے اعزاز تے بوہتی عزت ملنی چاہی دی اے۔ یسوع نے اِک مثال دے ذریعے دَسیا کہ ساڈے اندر ایہہ سوچ کِنّی اسانی نال پیدا ہو سکدی اے۔ اوہنے انگوراں دے باغ چ کم کرن والے مزدوراں دی مثال دِتی۔ اوہناں وچوں کجھ مزدوراں نے سارا دن سڑدی بلدی دُھپ چ محنت کیتی۔ پر کجھ نے صرف اِک گھنٹہ کم کیتا۔ پر اوہناں ساریاں نُوں اِک اِک دینار مِلیا۔ جیہڑے مزدوراں نے ساریاں توں پہلاں کم شروع کیتا سی، اوہناں نے سوچیا کہ اوہناں نُوں بوہتے پیسے مِلن گے۔ پر اوہناں نُوں وی اِک ای دینار مِلیا۔ ایس لئی اوہ بُڑبُڑ کرن لگ پئے۔ (‏متی 20:‏1-‏16‏)‏ ایس مثال توں یسوع نے اپنے پیروکاراں نُوں سکھایا کہ اوہناں نُوں اوہناں چیزاں تے مطمئن رہنا چاہی دا اے جیہڑیاں یہوواہ اوہناں نُوں خوشی نال دیندا اے۔‏

شکرگزار ہووو تے دُوجیاں کولوں حدوں ودھ توقع نہ کرو۔‏ (‏1-‏تھسلُنیکیوں 5:‏18‏)‏ پولُس رسول دی مثال تے عمل کرو۔ اوہنے کُرنتھس چ رہن والے بھین بھراواں کولوں ایہہ توقع نئیں کیتی کہ اوہ اوہدیاں ضرورتاں پوریاں کرن۔ جے پولُس چاہندا تے اِنج کر سکدا سی۔ (‏1-‏کُرنتھیوں 9:‏11-‏14‏)‏ سانوں دُوجیاں وَلّوں جیہڑی وی مدد مِلدی اے، سانوں اوہدے لئی شکرگزار ہونا چاہی  دا اے تے اوہناں کولوں ہور زیادہ چیزاں حاصل کرن دی توقع نئیں کرنی چاہی دی۔‏

خاکسار بنو۔‏ جیہڑا بندہ اپنے آپ نُوں زیادہ اہم سمجھدا اے؛ اوہ سوچدا اے کہ جِنّی عزت اوہنوں مِل رہی اے، اوہ اوس توں زیادہ دا حق‌دار اے۔ ایہو جہی سوچ زہر وانگوں اے تے ایس زہر دا علاج خاکساری اے۔‏

دانی‌ایل نبی نے خاکساری دی بڑی ودھیا مثال قائم کیتی۔ اوہ بنی‌اِسرائیل دے بڑے اہم قبیلے توں سی۔ اوہ بڑا خوب‌صورت، ذہین تے قابل سی۔ ایہناں گلاں دی وجہ توں اوہ سوچ سکدا سی کہ اوہنوں جیہڑی عزت مِلی اے، اوہ ایہدا حق‌دار اے۔ (‏دانی‌ایل 1:‏3، 4،‏ 19، 20‏)‏ پر دانی‌ایل نے اِنج نئیں سوچیا۔ اوہ خاکسار رہیا تے ایس خوبی دی وجہ توں یہوواہ اوہنوں بڑا پیار کردا سی۔—‏دانی‌ایل 2:‏30؛‏ 10:‏11، 12‏۔‏

ایہہ دُنیا خودغرض تے مغرور لوکاں نال بھری ہوئی اے۔ پر ساڈا ایہہ عزم اے کہ اَسی اپنے اندر اوہناں ورگی سوچ پیدا نئیں ہون دَواں گے۔ ایہدے علاوہ، اَسی یہوواہ دی ہر اوس برکت لئی شکرگزار ہوواں گے جیہڑی اوہ اپنی عظیم رحمت دی وجہ توں سانوں دیندا اے۔‏