مطالعے دا مضمون نمبر 36
یہوواہ دے بندے نیکی نال پیار کردے نیں
اوہ لوک خوش رہندے نیں جنہاں نُوں نیکی دی بُھکھ تے پیاس اے۔—متی 5:6۔
گیت نمبر 9: یہوواہ اے ساڈا بادشاہ
مضمون تے اِک نظر *
1. یوسف تے کیہڑی ازمیش آئی تے اوہنے کیہہ کیتا؟
یعقوب دے پُتر یوسف نُوں اِک کڑی ازمیش دا سامنا کرنا پیا۔ اوہدے مالک فوطیفار دی بیوی نے اوہنوں کہیا: میرے نال ہمبستر ہو۔ پر یوسف نے اوہدی گل منن توں اِنکار کر دِتا۔ اَج شاید کجھ لوک سوچن کہ اوس ویلے فوطیفار گھر نئیں سی تے یوسف اوہدی بیوی دی گل من سکدا سی کیونکہ یوسف اِک غلام سی۔ اپنی مالکن نُوں اِنکار کرن نال اوہدی زندگی مشکل چ پے سکدی سی۔ پر ایس سب دے باوجود یوسف اوہدی گل منن توں اِنکار کردا رہیا۔ اوہنے اِنج کیوں کیتا؟ یوسف نے کہیا: میں کیوں اینی وڈی بدی کراں تے خدا دا گُناہگار بناں؟—پیدایش 39:7-12۔
2. یوسف نُوں کیویں پتہ سی کہ حرامکاری کرن نال اِک بندہ خدا دا گُناہگار بن جاندا اے؟
2 یوسف کیویں جان دا سی کہ خدا دی نظر چ حرامکاری اِک بوہت وڈی بدی اے؟ موسیٰ دی شریعت چ خدا نے ایہہ صاف دَس دِتا سی کہ توں زِنا نہ کرِیں۔ یہوواہ نے ایہہ حکم یوسف دے زمانے توں تقریباً 200 سال بعد دِتا سی۔ (خروج 20:14) پر یوسف یہوواہ نُوں چنگی طرحاں جان دا سی۔ ایس لئی اوہنوں پتہ سی کہ یہوواہ حرامکاری نُوں کیہو جیہا خیال کردا اے۔ مثال لئی، یوسف یقیناً ایس گل توں واقف سی کہ جنسی تعلقات صرف اوس مرد تے عورت دے درمیان ہونے چاہی دے نیں جنہاں دی آپس چ شادی ہوئی اے۔ اوہنے ایہہ وی سُنیا ہوئے گا کہ یہوواہ نے کیویں دو وار اوہدی پڑدادی سارہ دی عزت بچائی۔ نالے اِضحاق دی بیوی رِبقہ دی عزت وی بچائی سی۔ (پیدایش 2:24؛ 12:14-20؛ 20:2-7؛ 26:6-11) ایہناں ساریاں گلاں تے سوچوچار کرن نال یوسف ایہہ سمجھ گیا کہ خدا دی نظر چ کیہہ صحی اے تے کیہہ غلط۔ یوسف اپنے خدا نال بوہت محبت کردا سی۔ ایس لئی اوہ نیکی دے معیاراں نال محبت کردا سی تے اوہنے پکا ارادہ کیتا ہویا سی کہ اوہ ایہناں معیاراں دے مطابق زندگی گزارے گا۔
3. ایس مضمون چ اَسی کیہڑیاں تِن گلاں تے غور کراں گے؟
3 کیہہ تُسی وی نیکی نال محبت کردے او؟ بےشک تُسی کردے او۔ پر اَسی سارے عیبدار آں تے جے اَسی محتاط نئیں رہواں گے تے نیکی دے حوالے نال ایس دُنیا دی سوچ دا بڑی اسانی نال ساڈے اُتے اثر پے سکدا اے۔ (یسعیاہ 5:20؛ رومیوں 12:2) ایس لئی آؤ ویکھئے کہ نیکی کیہہ اے تے ایہدے نال محبت کرن نال سانوں کیویں فائدہ ہو سکدا اے۔ ایہدے بعد اَسی تِن ایہو جہے طریقیاں تے غور کراں گے جنہاں تے عمل کرن نال اَسی اپنے دل چ نیکی لئی محبت ودھا سکاں گے۔
نیکی کیہہ اے؟
4. کیہڑیاں گلاں دا نیکی نال کوئی تعلق نئیں اے؟
4 یسوع مسیح دے زمانے چ مذہبی رہنما اپنے آپ نُوں بوہت نیک سمجھدے سن۔ پر یسوع مسیح نے ثابت کیتا کہ اوہ ایہناں رہنماواں دے سخت خلاف اے کیونکہ اوہناں نے نیکی دے بارے اپنے معیار قائم کیتے ہوئے سن۔ (واعظ 7:16؛ لُوقا 16:15) ساڈے زمانے چ وی کجھ لوک ایہو جہے نیں۔ اوہ سوچدے نیں کہ اوہ کجھ غلط نئیں کردے۔ پر اوہ دُوجیاں نُوں اپنے معیاراں مطابق پرکھدے نیں۔ اوہ مغرور ہوندے نیں تے اپنے آپ نُوں دُوجیاں توں بہتر سمجھدے نیں۔ پر خدا نُوں ایہہ گلاں پسند نئیں تے ایہناں دا نیکی نال دُور دُور تک کوئی تعلق نئیں اے۔
5. بائبل دے مطابق نیکی کیہہ اے؟ مثالاں دَوو۔
5 نیکی اِک بوہت ای ودھیا خوبی اے۔ نیکی دا مطلب اے کہ اَسی اوہ کم کرئیے جیہڑے یہوواہ دی نظر چ صحی نیں۔ جدوں بائبل چ لفظ نیکی استمال ہوندا اے تے ایہدا اشارہ ایس گل وَل ہوندا اے کہ اِک بندہ یہوواہ دے اصولاں مطابق زندگی گزارے کیونکہ یہوواہ دے اصول سب توں بہترین نیں۔ مثال لئی، یہوواہ نے حکم دِتا سی کہ اِک کاروبار کرن والا بندہ صحی وزن دے وَٹے استمال کرے۔ (اِستثنا 25:15) ایتھے جیس عبرانی لفظ دا ترجمہ صحی کیتا گیا اے، اوہدا ترجمہ نیک وی کیتا جا سکدا اے۔ ایس لئی جیہڑا بندہ یہوواہ دی نظر چ نیک بننا چاہندا اے، اوہنوں ہر کاروباری معاملے چ ایمانداری نال کم لینا چاہی دا اے۔ اِک نیک بندہ انصاف نُوں پسند کردا اے تے اوہنوں کسے دے نال ناانصافی ہوندیاں ویکھ کے بوہت بُرا لگدا اے۔ ایس لئی اِک نیک بندہ ہر معاملے چ یہوواہ نُوں خوش کرن لئی ایس گل دا خیال رکھدا اے کہ یہوواہ اوہدے فیصلیاں بارے کیہہ سوچدا اے۔—کُلسّیوں 1:10۔
6. اَسی صحی تے غلط بارے یہوواہ دے معیاراں تے بھروسا کیوں رکھ سکنے آں؟ (یسعیاہ 55:8، 9)
6 بائبل چ یہوواہ بارے دَسیا گیا اے کہ اوہ نیکی دا چشمہ اے۔ ایس لئی اوہدے بارے کہیا جا سکدا اے کہ اوہدے چ نیکی وَسدی اے۔ (یرمیاہ 50:7) یہوواہ نے ساریاں چیزاں نُوں بنایا اے۔ ایسے لئی اوہنوں حق اے کہ اوہ صحی تے غلط بارے معیار قائم کرے۔ کیونکہ اَسی گُناہگار آں تے عیبدار آں ایس لئی اکثر اَسی ایہہ نئیں سمجھ سکدے کہ یہوواہ نے کسے چیز نُوں صحی یاں غلط کیوں کہیا اے۔ (امثال 14:12؛ یسعیاہ 55:8، 9 نُوں پڑھو۔) کیونکہ یہوواہ نے سانوں اپنی صورت تے بنایا اے ایس لئی اَسی صحی تے غلط بارے یہوواہ دے معیاراں مطابق زندگی گزار سکنے آں۔ (پیدایش 1:27) تے سانوں اِنج کرنا چنگا وی لگدا اے۔ اَسی اپنے اسمانی باپ نُوں بوہت پیار کرنے آں۔ ایس لئی اَسی اوہدی مثال تے عمل کرن دی پوری کوشش کرنے آں۔—اِفسیوں 5:1۔
7. اَسی کیوں کہہ سکنے آں کہ کسے اِک معیار یاں اصول دے مطابق چلن نال فائدہ ہوندا اے؟ مثالاں دَوو۔
7 سانوں صحی تے غلط دے سلسلے چ یہوواہ دے معیاراں تے چلن نال فائدہ کیوں ہوندا اے؟ ایہنوں سمجھن لئی ذرا ایہناں دو مثالاں تے غور کرو۔ جے ہر بینک اپنے اپنے معیاراں دے مطابق پیسے دی قیمت طے کرے تے کیہہ ہوئے گا؟ ظاہری گل اے کہ کوئی وی کم صحی طریقے نال نئیں ہوئے گا۔ تے جے ہر ڈاکٹر تے نرس مریضاں دا علاج کرن بارے اپنے اپنے اصول بنا لین تے ایہدے توں کجھ مریضاں دی جان جا سکدی اے۔ ایہناں مثالاں توں پتہ چلدا اے کہ جدوں لوک کسے اِک معیار یاں اصول دے مطابق کم کردے نیں تے ایہدا بوہت فائدہ ہوندا اے۔ ایسے طرحاں صحی تے غلط بارے یہوواہ دے معیاراں تے چلن نال سانوں فائدہ ہوندا اے۔
8. جیہڑے لوک صحی کم کرنا چاہندے نیں، اوہناں نُوں کیہڑیاں برکتاں مِلن گیاں؟
8 جیہڑے لوک یہوواہ دے معیاراں مطابق زندگی گزارن دی کوشش کردے نیں، یہوواہ اوہناں نُوں بوہت برکتاں دیندا اے۔ اوہنے ایہہ وعدہ کیتا اے: صادق [یاں نیک] زمین دے وارث ہون گے تے ایہدے تے ہمیشاں ہسدے وَسدے رہن گے۔ (زبور 37:29) ذرا سوچو کہ جدوں سارے لوک یہوواہ دے اصولاں مطابق چلن گے تے ہر پاسے کِنّاں امن، سکون تے خوشحالی ہوئے گی! یہوواہ چاہندا اے کہ توانوں وی ایہو جہی زندگی ملے۔ تے ایہہ نیکی نال محبت کرن دی اِک ہور وجہ اے۔ اَسی نیکی لئی اپنے دل چ محبت کیویں ودھا سکنے آں؟ آؤ، ایہدے تِن طریقیاں تے غور کرئیے۔
اپنے دل چ یہوواہ دے اصولاں لئی محبت ودھاؤ
9. کیہڑی چیز نیکی نال محبت کرن چ ساڈی مدد کرے گی؟
9 پہلا طریقہ: یہوواہ نال محبت کرو جیہڑا صحی تے غلط دے معیار قائم کردا اے۔ جے اَسی نیکی نال محبت کرنا چاہنے آں تے سانوں اپنے دل چ یہوواہ لئی محبت ودھانی پئے گئی جیہڑا صحی تے غلط بارے معیار قائم کردا اے۔ اَسی یہوواہ نال جِنّی زیادہ محبت کراں گے اونی زیادہ ساڈے دل چ ایہہ خواہش ودھے گی کہ اَسی اوہدے اصولاں مطابق زندگی گزارئیے۔ ذرا سوچو کہ جے آدم تے حوا یہوواہ نال محبت کردے تے اوہ کدی وی اوہدا حکم نہ توڑدے۔—پیدایش 3:1-6، 16-19۔
10. ابراہام نے یہوواہ دی سوچ نُوں چنگی طرحاں سمجھن لئی کیہہ کیتا؟
10 اَسی کدی وی آدم تے حوا ورگی غلطی نئیں کرنا چاہندے تے ایس غلطی توں بچن لئی ضروری اے کہ اَسی یہوواہ دے بارے سکھدے رہیے، اوہدیاں خوبیاں دی قدر کردے رہیے تے اوہدی سوچ نُوں سمجھن دی کوشش کردے رہیے۔ اِنج کرن نال ساڈے دل چ یہوواہ لئی محبت ودھے گی۔ ذرا ابراہام بارے سوچو۔ اوہ یہوواہ نال بوہت پیار کردا سی۔ ایس وجہ توں اوہ اوس ویلے وی یہوواہ دے خلاف نئیں گیا جدوں اوہنوں اوہدے کجھ فیصلیاں نُوں سمجھنا مشکل لگ رہیا سی۔ ایہدی بجائے اوہنے یہوواہ نُوں ہور چنگی طرحاں جانن دی کوشش کیتی۔ مثال لئی، جدوں ابراہام نُوں پتہ چلیا کہ یہوواہ نے سدوم تے عمورہ نُوں تباہ کرن دا فیصلہ کیتا اے تے شروع چ اوہ ایہہ سوچ کے پریشان ہو گیا کہ پوری دُنیا دا انصاف کرن والا بھیڑے لوکاں دے نال نیک لوکاں نُوں وی مار دے گا۔ ابراہام جان دا سی کہ یہوواہ اِنج کر ای نئیں سکدا۔ ایسے لئی اوہنے بڑی خاکساری نال یہوواہ کولوں کجھ سوال پچھے۔ تے یہوواہ نے بڑے صبر نال اوہدے سوالاں دے جواب دِتے۔ ایہدے بعد ابراہام سمجھ گیا کہ یہوواہ ہر انسان دے دل نُوں پرکھدا اے تے اوہ کدی وی بھیڑے بندے نال نیک بندے نُوں سزا نئیں دیندا۔—پیدایش 18:20-32۔
11. ابراہام نے کیویں ثابت کیتا کہ اوہ یہوواہ نال محبت کردا اے تے اوہدے تے بھروسا کردا اے؟
11 یہوواہ تے ابراہام دے درمیان سدوم تے عمورہ بارے جیہڑی گل بات ہوئی، اوہدا ابراہام تے بوہت گُوڑھا اثر ہویا۔ بےشک ایہدے بعد ابراہام دے دل چ اپنے اسمانی باپ لئی محبت تے عزت پہلے توں وی زیادہ ودھ گئی ہوئے گی۔ پر کئی سالاں بعد یہوواہ اُتے ابراہام دے بھروسے دا بوہت کڑا اِمتحان ہویا۔ یہوواہ نے ابراہام نُوں کہیا کہ اوہ اپنے پیارے پُتر نُوں قربان کر دے۔کیونکہ ابراہام یہوواہ نُوں چنگی طرحاں جان گیا سی ایس لئی اوہنے ایس وار یہوواہ کولوں کوئی سوال نئیں پچھیا۔اوہ بس یہوواہ دے حکم تے عمل کرن لئی ٹُر پیا۔ ذرا سوچو کہ جدوں اوہ اِضحاق نُوں قربان کرن دی تیاریاں کر رہیا ہوئے گا تے اوہدے دل تے کیہہ بیت رہی ہوئے گی۔ اوس ویلے ابراہام نے اوہناں گلاں بارے سوچوچار کیتا ہوئے گا جیہڑیاں اوہ یہوواہ بارے جان گیا سی۔ ابراہام جان دا سی کہ یہوواہ کدی وی کوئی بھیڑا کم نئیں کر سکدا۔ پولُس رسول نے کہیا کہ ابراہام نے سوچیا کہ خدا اوہدے پُتر نُوں مُردیاں چوں زندہ کر سکدا اے۔ (عبرانیوں 11:17-19) اُنج وی یہوواہ نے وعدہ کیتا سی کہ اِضحاق توں اِک قوم پیدا ہوئے گی تے اوہدوں تک اِضحاق دی کوئی اولاد نئیں سی۔ ایس لئی ابراہام نُوں پورا بھروسا سی کہ اوہدا اسمانی باپ اوہی کرے گا جو صحی اے۔ ایسے گل تے ایمان رکھ کے اوہنے یہوواہ دا حکم منیا بھانویں کہ اوہدے لئی اِنج کرنا اسان نئیں سی۔—پیدایش 22:1-12۔
12. اَسی ابراہام دی مثال تے کیویں عمل کر سکنے آں؟ (زبور 73:28)
12 ابراہام وانگوں سانوں وی یہوواہ بارے سکھن دی لوڑ اے۔ اِنج کرن نال اَسی یہوواہ دے ہور نیڑے ہو جاواں گے تے اوہدے نال ہور زیادہ محبت کراں گے۔ (زبور 73:28 نُوں پڑھو۔) ایہدے علاوہ ساڈی سوچ یہوواہ دی سوچ دے مطابق ڈھل جائے گی۔ (عبرانیوں 5:14) تے فیر جدوں کوئی سانوں غلط کم کرن لئی آکھے گا تے اَسی فوراً اِنکار کر دَواں گے۔ سانوں ایہو جہے کم کرن دے خیال توں وی نفرت ہوئے گی جنہاں توں یہوواہ دا دل دُکھ سکدا اے تے اوہدے نال ساڈی دوستی ٹُٹ سکدی اے۔ پر اَسی ہور کیویں ظاہر کر سکنے آں کہ اَسی نیکی نال پیار کرنے آں؟
13. اَسی نیکی کرن دی پوری کوشش کیویں کر سکنے آں؟ (امثال 15:9)
13 دُوجا طریقہ:ہر روز نیکی لئی محبت پیدا کرن دی کوشش کرو۔ جیویں اپنے پٹھیاں نُوں مضبوط کرن لئی سانوں ہر دن ورزش کرن دی لوڑ ہوندی اے اونویں ای یہوواہ دے نیک معیاراں لئی اپنے دل چ محبت پیدا کرن لئی وی سانوں روز کوشش کرنی چاہی دی اے۔ یہوواہ کدی وی ساڈے کولوں کوئی ایہو جیہا کم کرن دی توقع نئیں کردا جیہڑا ساڈے وَس چ نہ ہووے۔ (زبور 103:14) اوہنے سانوں ایس گل دا یقین دَوایا اے کہ اوہ اوس بندے نال پیار کردا اے جیہڑا نیکی کرن دی پوری کوشش کردا اے۔ (امثال 15:9 نُوں پڑھو۔) جدوں اَسی یہوواہ دی خدمت لئی کوئی منصوبہ بنانے آں تے سانوں ایہنوں پورا کرن لئی کوشش کرنی پیندی اے۔ ایسے طرحاں نیکی دی راہ تے چلن لئی وی سانوں لگاتار کوشش کرنی پیندی اے۔ یہوواہ بڑے صبر نال ساڈی مدد کرے گا تاکہ اَسی وقت دے نال نال ایس بارے اپنے اندر بہتری لیائیے۔—زبور 84:5، 7۔
14. نیکی دا سینہ بند کیہہ اے تے سانوں ایہدی لوڑ کیوں اے؟
14 یہوواہ بڑے پیار نال سانوں یاد دَواندا اے کہ اوہدے نیک معیاراں تے چلنا ساڈے لئی بوجھ نئیں اے۔ (1-یوحنا 5:3) سگوں ایہہ ساڈی حفاظت لئی نیں تے ایس حفاظت دی سانوں ہر روز ضرورت پیندی اے۔ یاد کرو کہ پولُس نے اِک جنگی لباس دا ذکر کیتا سی جیہڑا خدا وَلّوں اے۔ (اِفسیوں 6:14-18) اوس لباس دا کیہڑا حصہ فوجی دے دل دی حفاظت کردا اے؟ ایہہ نیکی دا سینہ بند اے جیہڑا یہوواہ دے نیک معیاراں وَل اشارہ کردا اے۔ جیس طرحاں اِک سینہ بند فوجی دے دل دی حفاظت کردا اے اوسے طرحاں یہوواہ دے نیک معیار ساڈے دل دی حفاظت کر سکدے نیں۔ دل ایس گل وَل اشارہ کردا اے کہ اَسی اندروں کیہو جہے انسان آں۔ ایسے لئی ایہہ بوہت ضروری اے کہ اَسی نیکی دا سینہ بند پانا کدی نہ بُھلئیے۔—امثال 4:23۔
15. تُسی نیکی دا سینہ بند کیویں پا سکدے او؟
15 نیکی دے سینہ بند نُوں پان لئی ایہہ ضروری اے کہ اَسی ہر دن کوئی وی فیصلہ کرن توں پہلاں ایہہ سوچئے کہ ایہدے بارے یہوواہ دے معیار کیہہ نیں۔ مثال لئی، جدوں اَسی کسے موضوع تے گل کرن، کوئی گانا سنن، کوئی فلم ویکھن یاں کوئی کتاب پڑھن بارے سوچنے آں تے سانوں پہلے اپنے آپ کولوں ایہہ سوال پچھنے چاہی دے نیں: ”ایہدا میری سوچ تے کیہہ اثر پووے گا؟ کیہہ ایہہ چیز یہوواہ نُوں پسند اے؟یاں کیہہ ایہدے چ بدچلنی، تشدد، لالچ یاں خودغرضی ورگیاں چیزاں دی ہلاشیری مِل رہی اے جنہاں دا نیکی نال دُور دُور تک کوئی تعلق نئیں اے؟“ (فِلپّیوں 4:8) جے اَسی ایہو جہے کم کرن دا فیصلہ کراں گے جیہڑے یہوواہ نُوں پسند نیں تے فیر اَسی اوہدے نیک معیاراں نُوں اپنے دل دی حفاظت کرن دی اجازت دے رہے ہونواں گے۔
تواڈی نیکی سمندر دِیاں چھلاں وانگوں ہوئے گی۔ (پیراگراف 16، 17 نُوں ویکھو۔)
16، 17. یسعیاہ 48:18 چ سانوں ایس گل دا یقین کیویں دَوایا گیا اے کہ اَسی ہمیشاں تک یہوواہ دے معیاراں مطابق زندگی گزار سکنے آں؟
16 کیہہ تُسی کدی ایہہ سوچ کہ پریشان ہوئے او کہ پتہ نئیں تُسی ہمیشاں تک یہوواہ دے معیاراں تے چل سکو گے یاں نئیں؟ ذرا غور کرو کہ یہوواہ نے یسعیاہ 48:18چ اِک مثال دے ذریعے سانوں کیس گل دا یقین دَوایا اے۔ (ایس ایت نُوں پڑھو۔) اوہنے ساڈے نال وعدہ کیتا اے کہ ساڈی نیکی سمندر دِیاں چھلاں وانگوں ہوئے گی۔ فرض کرو کہ تُسی سمندر دے کنارے کھلوتے او تے ایہدیاں چھلاں نُوں کنارے تے آندیاں ویکھ رہے او۔ ایہنے پُرسکون ماحول چ کیہہ تُسی ایہہ سوچ کے پریشان ہووو گے کہ اِک دن ایہہ چھلاں کنارے تے آنا بند ہو جان گیاں؟ بالکل نئیں۔ تُسی جان دے او کہ ہزاراں سالاں توں ایہہ چھلاں کنارے تک آ رہیاں نیں تے ایہہ کدی وی آنا بند نئیں ہون گیاں۔
17 تواڈی نیکی وی سمندر دِیاں چھلاں وانگوں ہو سکدی اے۔ اوہ کیویں؟ جدوں توانوں کوئی فیصلہ کرنا پیندا اے تے سب توں پہلاں ایہہ سوچو کہ یہوواہ تواڈے کولوں کیہہ چاہندا اے۔ تے فیر فیصلہ کرو۔ تواڈا فیصلہ بھانویں جنہاں وی مشکل ہووے ایس گل دا یقین رکھو کہ تواڈا اسمانی باپ ہمیشاں تواڈے نال کھلوتا ہوئے گا تاکہ تُسی ہر روز اوہدے نیک معیاراں مطابق زندگی گزار سکو۔—یسعیاہ 40:29-31۔
18. سانوں دُوجیاں نُوں اپنے معیاراں مطابق کیوں نئیں پرکھنا چاہی دا؟
18 تیجا طریقہ: ایس گل دا فیصلہ یہوواہ تے چھڈ دَوو کہ دُوجے جو کجھ کر رہے نیں اوہ صحی اے یاں غلط۔جدوں اَسی یہوواہ دے نیک معیاراں تے عمل کرن دی کوشش کر رہے ہنے آں تے سانوں ایہہ نئیں سوچنا چاہی دا کہ اَسی دُوجیاں نالوں بہتر آں۔ سانوں دُوجیاں بارے ایہہ فیصلہ وی نئیں کرنا چاہی دا اے کہ اوہ یہوواہ دے اصولاں تے عمل کر رہے نیں یاں نئیں۔ سانوں ایہہ حق نئیں کہ اَسی دُوجیاں نُوں اپنے معیاراں مطابق پرکھئیے۔ سانوں یاد رکھنا چاہی دا اے کہ صرف یہوواہ نُوں پوری دُنیا دا انصاف کرن دا حق اے۔ (پیدایش 18:25) اوہنے ایہہ حق سانوں نئیں دِتا۔ یسوع مسیح نے ایہہ حکم دِتا سی کہ دُوجیاں چ نُقص کڈھنا چھڈ دَوو تاکہ تواڈے چوں وی نُقص نہ کڈھے جان۔—متی 7:1۔ *
19. یوسف نے کیویں ظاہر کیتا کہ اوہنوں یہوواہ دے انصاف تے بھروسا اے؟
19 ذرا اِک وار فیر خدا دے بندے یوسف دی مثال تے غور کرو۔ اوہنے اپنے معیاراں مطابق دُوجیاں بارے رائے قائم نئیں کیتی سی، ایتھوں تک کہ اوہناں لوکاں بارے وی نئیں جنہاں نے اوہدے نال بُرا سلوک کیتا سی۔ اوہدے اپنے بھراواں نے اوہدے تے ظلم کیتا،اوہنوں غلام دے طور تے ویچ دِتا تے اپنے پیو نُوں یقین دَوایا کہ یوسف مر گیا اے۔ کئی سال بعد یوسف اپنے گھر والیاں نُوں دُبارہ ملیا۔ اوس ویلے تک اوہ اِک بوہت طاقتور حکمران بن گیا سی۔ بھانویں کہ اوہدے بھرا اپنے کیتے تے دلوں شرمندہ سن پر فیر وی اوہناں نُوں ڈر سی کہ یوسف اوہناں کولوں بدلہ لوَے گا۔ پر یوسف نے اوہناں نُوں ایہہ کہہ کے تسلی دِتی: ڈرو نہ۔کیہہ میں خدا واں؟ (پیدایش 37:18-20، 27، 28، 31-35؛ 50:15-21) یوسف نے خاکساری نال منیا کہ صرف یہوواہ ای اوہدے بھراواں دی عدالت کرن دا حق رکھدا اے۔
20، 21. اَسی اپنیاں ای نظراں چ نیک بنن توں کیویں بچ سکنے آں؟
20 یوسف وانگوں اَسی وی ایہہ گل یہوواہ تے چھڈنے آں کہ اوہ دُوجیاں دا فیصلہ کرے۔ مثال لئی، اَسی ایہہ اندازہ نئیں لاندے کہ ساڈا فلانا بھین بھرا کیس نیت نال کم کر رہیا اے۔ اَسی دلاں نُوں پڑھ نئیں سکدے،صرف یہوواہ ہی نیتاں نُوں جان دا اے۔(امثال 16:2) اوہ ہر طرحاں دے لوکاں نال پیار کردا اے فیر بھانویں اوہناں دا تعلق کسے وی علاقے یاں ثقافت نال ہووے۔ یہوواہ نے سانوں کہیا اے کہ اَسی اپنے دلاں چ دُوجیاں لئی ہور تھاں بنائیے۔ (2-کُرنتھیوں 6:13) ایس لئی سانوں اپنے سارے بھین بھراواں نال پیار کرنا چاہی دا اے تے اوہناں بارے اپنے وَلّوں کوئی رائے قائم نئیں کرنی چاہی دی۔
21 اپنے دلاں چ زیادہ تھاں بنان دا مطلب ایہہ وی اے کہ اَسی اوہناں لوکاں بارے وی کوئی غلط رائے قائم نہ کرئیے جیہڑے کلیسیا دا حصہ نئیں۔ (1-تیمُتھیُس 2:3، 4) اَسی کدی وی اپنے رشتےداراں بارے ایہہ رائے قائم نئیں کراں گے کہ اوہ کدی یہوواہ دے گواہ نئیں بنن گے۔ اِنج کرن نال اَسی اپنی ای نظر چ نیک بن رہے ہونواں گے۔ یاد رکھو کہ یہوواہ حالے وی ساریاں لوکاں نُوں توبہ کرن دا موقع دے رہیا اے۔ (اعمال 17:30) ایہہ گل ہمیشاں یاد رکھو کہ یہوواہ اوہناں لوکاں نُوں نیک نئیں سمجھدا جیہڑے اپنے آپ نُوں دُوجیاں توں زیادہ نیک سمجھدے نیں۔
22. تُسی ایہہ عزم کیوں کیتا اے کہ تُسی نیکی نال محبت کرو گے؟
22 جدوں اَسی یہوواہ دے نیک معیاراں نال محبت کراں گے تے ایہدے توں نہ صرف سانوں خوشی ملے گی سگوں اَسی دُوجیاں لئی وی اِک چنگی مثال قائم کراں گے۔ ایس طرحاں اوہ ساڈے تے یہوواہ دے ہور نیڑے ہو جان گے۔ دُعا اے کہ اَسی نیکی لئی اپنی بُھکھ تے پیاس کدی مٹن نہ دَئیے۔ (متی 5:6) ایس گل دا یقین رکھو کہ جدوں تُسی نیکی کرن دی پوری کوشش کردے او تے یہوواہ ایہنوں ضرور ویکھدا اے تے اوہنوں بڑی خوشی ہوندی اے۔ ایہہ دُنیا بُرائی دے سمندر چ ڈُبدی جا رہی اے، پر ہمت نہ ہارو۔ ایس گل نُوں یاد رکھو کہ یہوواہ نیک لوکاں نال محبت رکھدا اے۔—زبور 146:8۔
گیت نمبر 140: ہمیشاں دی زندگی
^ ایس دُنیا چ نیک لوک بڑی مشکل نال مِلدے نیں۔ پر فیر وی لکھاں لوک ایہو جہے نیں جیہڑے نیکی دی راہ تے چلدے نیں۔ بےشک تُسی وی اوہناں وچوں اِک او۔ تُسی نیکی دی راہ تے ایس لئی چلدے او کیونکہ تُسی یہوواہ نال محبت کردے او جیہڑا نیکی نال پیار کردا اے۔ اَسی اپنے دل چ ایس ودھیا خوبی لئی محبت کیویں ودھا سکنے آں؟ ایس مضمون چ دَسیا جائے گا کہ نیکی کیہہ اے تے نیکی نال محبت کرن نال سانوں کیویں فائدہ ہو سکدا اے۔ اَسی کجھ ایہو جہے طریقیاں تے وی غور کراں گے جنہاں توں اَسی اپنے دل چ نیکی لئی محبت ودھا سکنے آں۔
^ جدوں اِک مسیحی کوئی وڈا گُناہ کردا اے تے کلیسیا دے بزرگاں نُوں ایہہ فیصلہ کرنا پیندا اے کہ اوہنے دلوں توبہ کیتی اے یاں نئیں۔ (1-کُرنتھیوں 5:11؛ 6:5؛ یعقوب 5:14، 15) پر بزرگ خاکساری نال ایس گل نُوں یاد رکھدے نیں کہ اوہ دلاں نُوں نئیں پڑھ سکدے تے فیصلہ کرن دی ذمےداری اوہناں نُوں یہوواہ وَلّوں ملی اے۔ (2-تواریخ 19:6 تے غور کرو۔) ایس لئی بزرگ یہوواہ دی مثال تے عمل کردے ہوئے رحم تے انصاف نال فیصلہ کردے نیں۔
