1.‏ سانوں زندگی کنہے دِتی اے؟‏

یہوواہ زندہ خدا اے۔‏ (‏یرمیاہ 10:‏10‏)‏ اوہ ساڈا خالق تے مالک اے۔‏ پاک کلام چ لکھیا اے کہ یہوواہ خدا نے ساریاں چیزاں بنائیاں نیں تے ساریاں چیزاں اوہدی مرضی نال وجود وچ آئیاں تے بنائیاں گئیاں نیں۔‏ (‏مکاشفہ 4:‏11‏)‏ ایس توں پتہ چلدا اے کہ اوہنے سانوں زندگی دِتی اے۔‏ واقعی زندگی خدا وَلّوں اِک نعمت اے۔‏‏—‏زبور 36:‏9 نُوں پڑھو۔‏

2.‏ سانوں خوشیاں بھری زندگی گزارن لئی کیہہ کرن دی لوڑ اے؟‏

² یہوواہ خدا سانوں ہر اوہ شے دیندا اے جیہڑ‌ی زندہ رہن لئی ضروری اے جیویں کہ پانی تے خوراک وغیرہ۔‏ (‏اعمال 17:‏28‏)‏ پر اوہ ایہہ وی چاہندا اے کہ اَسی زندگی چ خوشیاں حاصل کریئے۔‏ (‏اعمال 14:‏15-‏17‏)‏ ایس لئی خوشیاں بھری زندگی گزارن لئی ضروری اے کہ اَسی خدا دے حکماں تے چلیے—‏یسعیاہ 48:‏17،‏ 18‏۔‏

3.‏ جدوں قائن نے ہابل نُوں مار دِتا تے یہوواہ خدا نے کیہہ کیتا؟‏

³ خدا دی نظر چ سارے انساناں دی زندگی بوہت اہم اے۔‏ ایس گل نُوں سمجھن لئی بائبل چوں اِک واقعے تے غور کرو۔‏ اِک دن قائن نُوں اپنے چھوٹے بھرا ہابل تے بوہت غصہ آیا۔‏ خدا نے اوہنوں سمجھایا کہ اوہ اپنے غصے نُوں قابو چ رکھے۔‏ پر قائن نے خدا دی گل نہ منی تے اپنے بھرا نُوں مار دِتا۔‏ (‏پیدایش 4:‏3-‏8‏)‏ یہوواہ خدا نے قائن نُوں ایہدی سزا دِتی۔‏ (‏پیدایش 4:‏9-‏11‏)‏ ایس توں پتہ چلدا اے کہ غصہ تے نفرت بوہت خطرناک نیں۔‏ ایہناں دی وجہ توں کوئی وی انسان ظالم تے وحشی  بن سکدا اے تے ہمیشاں دی زندگی نئیں پا سکدا۔‏ ‏(‏1-‏یوحنا 3:‏15 نُوں پڑھو۔‏)‏ ایس لئی یہوواہ خدا نُوں خوش کرن لئی ضروری اے کہ اَسی سارے انساناں نُوں پیار کرنا سکھئیے۔‏—‏1-‏یوحنا 3:‏11،‏ 12‏۔‏

4.‏ ایس حکم توں کیہہ پتہ چلدا اے کہ تُوں خون نہ کرِیں؟‏

⁴ ایس واقعے توں کئی ہزار سال بعد یہوواہ خدا نے موسیٰ نبی نُوں دس حکم دِتے جنہاں وچوں اِک حکم ایہہ سی کہ تُوں خون نہ کرِیں۔‏ (‏اِستثنا 5:‏17‏)‏ خدا نے کہیا سی کہ جے کوئی بندہ کسے نُوں جان‌بجھ کے قتل کرے تے اوہنوں وی قتل کر دِتا جائے۔‏ ایس طرحاں خدا نے اِک وار فیر ظاہر کیتا کہ اوہدی نظر چ زندگی بوہت اہم اے۔‏

5.‏ یہوواہ خدا بچہ ضائع کراؤن بارے کیہہ سوچدا اے؟‏

⁵ اَج کل کجھ لوکاں دی نظر چ بچہ ضائع کراؤنا بڑی معمولی گل اے۔‏ پر یہوواہ خدا دی نظر چ تے اوس بچے دی زندگی وی بوہت قیمتی اے جیہڑ‌ا حالے پیدا وی نئیں ہویا۔‏ اوہنے بنی‌اِسرائیل نُوں حکم دِتا کہ جے کوئی بندہ ماں بنن والی کسے عورت نُوں ایہو جیہا نقصان پونچائے کہ اوہدا بچہ مر جائے تے اوس بندے نُوں قتل کر دِتا جائے۔‏ (‏خروج 21:‏22،‏ 23 نُوں فٹ‌نوٹ توں پڑھو؛‏ * زبور 127:‏3‏)‏ ایس توں پتہ چلدا اے کہ بچہ ضائع کراؤنا غلط اے۔‏—‏کتاب دے آخر چ نکتہ نمبر 28 نُوں ویکھو۔‏

6،‏ 7.‏ اَسی کیویں ظاہر کر سکنے آں کہ ساڈی نظر چ زندگی اہم اے؟‏

⁶ اَسی کیویں ظاہر کر سکنے آں کہ ساڈی نظر چ ساڈی اپنی تے دُوجیاں دی زندگی اہم اے؟‏ اَسی کوئی وی ایہو جیہا کم نئیں کراں گے جدی وجہ توں ساڈی یاں دُوجیاں دی زندگی نُوں کوئی خطرہ ہووے۔‏ ایس لئی اَسی ہر طرحاں دے نشے جیویں کہ سگریٹ،‏ شیشہ،‏ پان چھالیا تے گٹکے وغیرہ توں دُور  رہواں گے۔‏ ایہہ ساریاں شیواں سانوں ایناں نقصان پونچا سکدیاں نیں کہ ساڈی جان وی جا سکدی اے۔‏

⁷ ساڈی زندگی تے ساڈا جسم خدا وَلّوں اِک نعمت اے تے سانوں ایہناں نُوں اوہدی مرضی دے مطابق استمال کرنا چاہی دا اے۔‏ ایس لئی ایہہ بوہت ضروری اے کہ اَسی اپنے جسم دا خیال رکھئے۔‏ جے اَسی اِنج نئیں کراں گے تے اَسی خدا دی نظر چ ناپاک ہو جانواں گے۔‏ (‏رومیوں 6:‏19؛‏ 12:‏1؛‏ 2-‏کُرنتھیوں 7:‏1‏)‏ جے اَسی زندگی دی قدر نئیں کردے تے فیر خدا وی ساڈی عبادت نُوں قبول نئیں کردا۔‏ بھیڑیاں عادتاں نُوں چھڈنا مشکل ہو سکدا اے۔‏ پر جے اَسی زندگی نُوں قیمتی سمجھاں گے تے ایہناں عادتاں نُوں چھڈن دی پوری کوشش کراں گے تے یہوواہ خدا ساڈی مدد کرے گا۔‏

8.‏ اَسی اپنی یاں دُوجیاں دی زندگی نُوں خطرے چ پاؤن توں بچن لئی کیہہ کر سکنے آں؟‏

⁸ اَسی سکھ لیا اے کہ زندگی اِک نعمت اے۔‏ یہوواہ خدا امید کردا اے کہ اَسی کدی وی اپنی یاں دُوجیاں دی زندگی خطرے چ نئیں پانواں گے۔‏ ایسے لئی اَسی موٹر سائیکل یاں کار بڑے دھیان نال چلاؤنے آں۔‏ اَسی ایہو جہیاں کھیڈاں چ حصہ نئیں لیندے جنہاں چ جانی نقصان ہو سکدا اے۔‏ (‏زبور 11:‏5‏)‏ اَسی اپنے گھر دی مرمت دا وی خیال رکھنے آں تاکہ کسے نُوں کوئی نقصان نہ ہووے۔‏ خدا نے بنی‌اِسرائیل نُوں حکم دِتا سی کہ جدوں تُسی کوئی نواں گھر بناؤ تے اپنی چھت اُتے بنیرے ضرور بناؤنا تاکہ کوئی وی اوتھوں ڈِگ نہ پوے تے اوہدا خون تیرے گھر والیاں دے سر نہ لگے۔‏—‏اِستثنا 22:‏8‏۔‏

9.‏ سانوں جانوراں نال کیہو جیہا سلوک کرنا چاہی دا اے؟‏

⁹ یہوواہ خدا چاہندا اے کہ اَسی جانوراں دی زندگی نُوں وی اہم سمجھئے۔‏ پاک کلام دے مطابق اَسی جانوراں نُوں اوہدوں ای مار سکنے آں جدوں سانوں خوراک یاں لباس دی لوڑ ہووے یاں فیر سانوں اوہناں توں جان دا خطرہ ہووے۔‏ (‏پیدایش 3:‏21؛‏ 9:‏3؛‏ خروج 21:‏28‏)‏ پر سانوں جانوراں تے ظلم نئیں کرنا چاہی دا تے نہ ای شوقیہ طور تے اوہناں دا شکار کرنا چاہی دا اے۔‏—‏امثال 12:‏10‏۔‏

10.‏ سانوں کیویں پتہ اے کہ خون زندگی دی علامت اے؟‏

¹⁰ یہوواہ دی نظر چ خون پاک اے کیونکہ ایہہ زندگی دی علامت اے۔‏ جدوں قائن نے ہابل نُوں قتل کیتا تے خدا نے اوہنوں کہیا کہ تیرے بھرا دا خون زمین چوں مینوں پکار رہیا اے۔‏ (‏پیدایش 4:‏10‏)‏ ہابل دا خون اصل چ اوہناں دی زندگی دی علامت سی ایس لئی خدا نے قائن نُوں سزا دِتی۔‏ نوح دے طوفان توں بعد یہوواہ نے اِک وار فیر ظاہر کیتا کہ خون زندگی دی علامت اے۔‏ اوہنے نوح تے اوہناں دے خاندان نُوں جانوراں دا گوشت کھان دی اِجازت دِتی تے کہیا کہ تُسی ہر چلدا پھردا جان‌دار کھا سکدے او۔‏ سبزیاں وانگوں سارے جان‌دار وی مَیں توانوں دے دِتے نیں۔‏ پر اوہنے ایہہ حکم وی دِتا کہ تُسی گوشت دے نال خون نُوں جیہڑ‌ا اوہدی جان اے نہ کھانا۔‏—‏پیدایش 1:‏29؛‏ 9:‏3،‏ 4‏۔‏

11.‏ یہوواہ خدا نے بنی‌اِسرائیل نُوں خون دے بارے کیہڑا حکم دِتا؟‏

¹¹ نوح تے اوہناں دے خاندان نُوں خون کھان توں منع کرن دے تقریباً 800 سال بعد یہوواہ خدا نے بنی‌اِسرائیل نُوں ایہہ حکم دِتا کہ تواڈے وچوں یاں اوہناں پردیسیاں وچوں جیہڑ‌ے تواڈے درمیان رہندے نیں جیہڑ‌ا وی کوئی شکار کردے ہوئیاں ایہو جیہا جانور یاں پرندہ پھڑے جنہوں کھانا ٹھیک اے تے اوہ اوہدا خون کڈھ کے اوہنوں مٹی نال ڈھک دَوے۔‏ ایہدے بعد یہوواہ خدا نے کہیا کہ تُسی خون نہ کھانا۔‏ (‏احبار 17:‏13،‏ 14‏)‏ یہوواہ خدا ہُن وی ایہہ ای چاہندا سی کہ اوہدے بندے خون نُوں پاک سمجھن۔‏ اوہ گوشت تے کھا سکدے سن پر خون نئیں کھا سکدے سن۔‏ جدوں اوہ خوراک لئی کسے جانور دا شکار کردے تے اوہ اوہدا خون زمین تے روڑھ دیندے سن۔‏

12.‏ خون دے بارے سچے مسیحیاں دی سوچ کیہہ اے؟‏

¹² یسوع مسیح دی موت دے کجھ سال بعد رسول تے یروشلیم دی کلیسیا دے بزرگ ایس گل تے غور کرن لئی جمع ہوئے کہ موسیٰ دی شریعت چوں کیہڑے حصے مسیحیاں اُتے لاگو ہوندے نیں۔‏ (‏اعمال 15:‏28،‏ 29 نُوں پڑھو؛‏ 21:‏25)‏ یہوواہ خدا دی مدد نال اوہ ایہہ سمجھ گئے کہ اوہدی نظر چ  خون حالے وی پاک اے ایس لئی اوہناں نُوں وی ایہنوں پاک سمجھنا چاہی دا اے۔‏ مسیحی نہ تے خون کھا سکدے سن تے نہ ای پی سکدے سن۔‏ اوہ اوس جانور دا گوشت وی نئیں کھا سکدے سن جدا خون صحی طرحاں کڈھیا نہ گیا ہووے۔‏ جے اوہ ایس طرحاں دا گوشت کھاندے تے ایہہ حرام‌کاری تے بُت‌پرستی دے برابر ہوندا۔‏ اوس وقت توں ای سچے مسیحی نہ تے خون کھاندے نیں تے نہ ای ایہنوں پیندے نیں۔‏ یہوواہ خدا اَج وی ایہو ای چاہندا اے کہ اَسی خون نُوں پاک سمجھئے۔‏

13.‏ سچے مسیحیاں نُوں خون کیوں نئیں لواؤنا چاہی دا؟‏

¹³ کیہہ فیر مسیحیاں نُوں خون لواؤنا وی نئیں چاہی دا؟‏ جی بالکل۔‏ خدا نے سانوں خون کھان یاں پِین توں منع کیتا اے۔‏ جے اِک ڈاکٹر توانوں شراب پِین توں منع کرے تے کیہہ تُسی ڈرِپ دے ذریعے شراب لواؤ گے؟‏ بالکل نئیں۔‏ ایسے طرحاں خون نُوں کھان یاں پِین توں منع کرن چ ایہہ گل شامل اے کہ اَسی خون نہ لوائیے۔‏—‏کتاب دے آخر چ نکتہ نمبر 29 نُوں ویکھو۔‏

14،‏ 15.‏ زندگی دی قدر کرنا تے یہوواہ خدا دی فرمانبرداری کرنا ضروری کیوں اے؟‏

¹⁴ پر شاید ڈاکٹر کہن کہ جے تُسی خون نئیں لواؤ گے تے تُسی مر جاؤ گے۔‏ ایس صورت چ تُسی کیہہ کرو گے؟‏ توانوں آپ فیصلہ کرنا پوے گا کہ تُسی خون دے استمال بارے یہوواہ خدا دا حکم منو گے یاں نئیں۔‏ سچے مسیحی زندگی دی بڑی قدر کردے نیں کیونکہ ایہہ اِک نعمت اے۔‏ اوہ اپنی جان بچاؤن لئی ہر اوہ علاج کراؤندے نیں جدے چ خون استمال نئیں ہوندا۔‏ پر اوہ کسے وی حال چ خون نئیں لواؤندے۔‏

¹⁵ اَسی تندرست رہن دی پوری کوشش کرنے آں پر خون لین توں بالکل پرہیز کرنے آں کیونکہ زندگی خدا دی نظر چ قیمتی اے۔‏ اَسی سمجھنے آں کہ خدا دی نافرمانی کر کے اپنی جان بچاؤن نالوں اوہدی فرمانبرداری کرنا بوہتا ضروری اے۔‏ یسوع مسیح نے کہیا کہ جیہڑ‌ا اپنی جان بچاؤنا چاہندا اے اوہ ایہنوں گنوا دَوے گا پر جیہڑ‌ا میرے لئی اپنی جان گنواؤندا اے اوہ ایہنوں بچا لوے گا۔‏ (‏متی 16:‏25‏)‏ اَسی خدا نال پیار دی وجہ توں اوہدے حکم مننے آں۔‏ اوہ جان دا اے کہ ساڈے لئی کیہہ بہتر اے۔‏ ایس لئی اَسی وی زندگی نُوں اونا ای قیمتی تے پاک سمجھنے آں جِنّاں اوہ سمجھدا اے۔‏—‏عبرانیوں 11:‏6‏۔‏

16.‏ یہوواہ خدا دے وفادار بندے اوہدے حکماں تے کیوں چلدے نیں؟‏

 ¹⁶ یہوواہ خدا دے وفادار بندیاں دا پکا اِراداہ اے کہ اوہ خون بارے اوہدے حکم تے چلن گے۔‏ اوہ نہ تے خون کھاندے نیں،‏ نہ پیندے نیں تے نہ ای لواؤندے نیں۔‏ * پر اوہ اپنی جان بچاؤن لئی اوہ علاج ضرور کراؤندے نیں جدے چ خون استمال نئیں ہوندا۔‏ اوہ پکا یقین رکھدے نیں کہ زندگی تے خون دا خالق یہوواہ جان دا اے کہ اوہناں لئی کیہہ بہتر اے۔‏ کیہہ تُسی وی ایہہ یقین رکھدے او؟‏

17.‏ یہوواہ خدا نے بنی‌اِسرائیل نُوں کیہڑے مقصد لئی خون استمال کرن دی اِجازت دِتی سی؟‏

¹⁷ یہوواہ خدا نے بنی‌اِسرائیل نُوں کہیا سی کہ جسم دی جان خون چ اے تے مَیں ایہنوں مذبحے تے تواڈی جاناں دے کفارے [‏یعنی تواڈے گناہواں دی معافی]‏ لئی توانوں دِتا اے کہ ایہدے توں تواڈی جاناں دا کفارہ ہووے کیونکہ جان رکھن دی وجہ توں ای خون کفارہ دیندا اے۔‏ (‏احبار 17:‏11‏)‏ جدوں کسے اِسرائیلی کولوں کوئی گناہ ہو جاندا سی تے اوہ یہوواہ خدا کولوں معافی پاؤن لئی اِک جانور قربان کردا سی تے کاہن نُوں کہندا سی کہ اوہ اوس جانور دا کجھ خون ہیکل چ قربان‌گاہ تے ڈوہلے۔‏ یہوواہ خدا نے صرف ایسے مقصد لئی خون استمال کرن دی اِجازت دِتی سی۔‏

18.‏ یسوع مسیح دی قربانی دے وسیلے انساناں نُوں کیہہ حاصل کرن دا موقع مِل گیا اے؟‏

¹⁸ جدوں یسوع مسیح زمین تے آئے تے اوہناں نے ساڈے گناہواں دی معافی لئی اپنا خون بہا دِتا۔‏ ایہدے بعد جانور قربان کرن دی لوڑ نہ رہی۔‏ (‏متی 20:‏28؛‏ عبرانیوں 10:‏1‏)‏ یسوع مسیح دی زندگی اینی قیمتی سی کہ اوہناں دی قربانی دے وسیلے ہُن یہوواہ خدا سارے انساناں نُوں ہمیشاں دی زندگی حاصل کرن دا موقع دے سکدا سی۔‏—‏یوحنا 3:‏16؛‏ عبرانیوں 9:‏11،‏ 12؛‏ 1-‏پطرس 1:‏18،‏ 19‏۔‏

19.‏ اَسی کیہہ کر سکنے آں تاکہ اَسی انساناں دے خون توں بَری رہیے؟‏

 ¹⁹ اَسی یہوواہ خدا دے بوہت شکرگزار آں کہ اوہنے سانوں زندگی دِتی اے۔‏ ایس لئی اَسی دُوجیاں نُوں دَسنا چاہواں گے کہ اوہ یسوع مسیح اُتے ایمان لیا کے ہمیشاں دی زندگی پا سکدے نیں۔‏ اَسی انساناں نُوں پیار کرنے آں ایس لئی وی اَسی اوہناں نُوں دَساں گے کہ ہمیشاں دی زندگی پاؤن لئی کیہہ کجھ کرن دی لوڑ اے۔‏ (‏حِزقی‌ایل 3:‏17-‏21‏)‏ اِنج اَسی پولس رسول وانگوں کہہ سکاں گے کہ اَسی سارے انساناں دے خون توں بَری آں کیونکہ اَسی اوہناں نُوں خدا دی مرضی بارے دَسن توں شرمائے نئیں۔‏ (‏اعمال 20:‏26،‏ 27‏)‏ واقعی جدوں اَسی دُوجیاں نُوں یہوواہ بارے دَسنے آں تے ایہہ سکھاؤنے آں کہ اوہدی نظر چ زندگی کِنّی قیمتی اے تے اصل چ اَسی زندگی تے خون لئی دِلوں قدر وکھا رہے ہنے آں۔‏