2 Deselonika 3:1-18
3 Eri riat ko, kumwail pousehlahte kapakapkin kiht, pwe mahsen en Siohwa* en kin mwadang lohkseli oh linganla, nin duwen me kin wiawi rehmwail,
2 oh pwe sen pitsang aramas keper oh suwed kan, pwe kaidehn aramas koaros kin ahneki pwoson.
3 Ahpw Kauno me lelepek, oh e pahn ketin kakehlaka oh pereikumwailsang me suwedo.
4 Patehng met, nin duwen tohnpadahk en Kauno kei, se kin koapworopworkin kumwail me kumwail kin kapwaiada oh pil pahn pousehlahte kapwaiada at kaweid kan.
5 Kauno en ketin pousehlahte kaukaweid amwail mohngiong ni ahl me pwung, pwe kumwail en poakohng Koht oh dadaurete pwehki Krais.
6 Eri riat ko, ni mwaren atail Kaun Sises Krais, se kin kaweidkin kumwail, kumwail en kalekeikumwailsang riatail men me sohte kin weweid ni pwung oh sohte kin idawehn tiahk* me kumwail* alehsang reht.
7 Pwe pein kumwail eseier ia duwen amwail pahn alasang kiht, pwehki at wiewia kin konehng ni at kin mihmi rehmwail,
8 oh se sohte kin pekihda kanat mwenge. Ahpw, se kin doadoahk laud oh nannanti ni rahn oh nipwong pwe sen dehr kihong kumwail katoutou pweilaud ehu.
9 Kaidehn pwehki sohte at pwuhng, ahpw se men wia mehn kahlemeng ehu ong kumwail en alasang.
10 Ni mehlel, ni at kin mihmi rehmwail, se kin kehkehlingkihong kumwail met: “Ma emen sohte men doadoahk, a en dehr mwenge.”
11 Pwe se rong me ekei nanpwungamwail sohte kin weweid ni pwung, re sohte mwahn kin doadoahk, ahpw re kin kedirepwki mehkot me sohte arail ong.
12 Ong soangen aramas pwukat, se kehkehlingki oh kaweidki ni mwaren Kaun Sises Krais ren wia pein arail doadoahk oh kin kang mwenge me re pein koadoahkihada.
13 A kumwail, riat ko, kumwail dehr pwangahki wiewia mwahu.
14 Ahpw ma emen sohte kin peikiong dahme se koasoia nan kisinlikou kiset, kilelehdi aramas menet oh kumwail uhdihsang amwail werekiong, pwe en namenekla.
15 Oh kumwail dehr wiahkin ih imwintihti men, ahpw pousehlahte panawih ih nin duwen riatail men.
16 Eri Kaunen popohl en ketikihong kumwail popohl ahnsou koaros ni ahl koaros. Kauno en ketin ieiang kumwail koaros.
17 Eri, ngehi Pohl, ni pein mengin pehiet, I kadarewei ei rahnmwahu. Ih mwomwen ei kin nting nan kisinlikou koaros pwe kumwail en ese me ngehi me ntingihedi.
18 Kadek sapan en atail Kaun Sises Krais en kin ieiang kumwail koaros.
