2 Piter 1:1-21
1 Saimon Piter, sapwellimen Sises Krais ladu oh wahnpoaron, ong irail kan me ahnekier pwoson me uhdahn kesempwal duwehte aht* pwehki pwung en atail Koht oh Sises Krais, atail Sounkomour:
2 Kadek sapan oh popohl en lalaudla rehmwail sang ni loalokong pwung en Koht oh Sises, atail Kaun,
3 pwe roson en Koht kin kihong kitail* soahng koaros me kin sewese kitail en mour poadidiong Koht pwehki loalokong pwung en Meno me ketin malipehkin kitail sapwellime lingan oh kupwuramwahu.
4 Pwehki sapwellime lingan oh kupwuramwahu, e ketikihong kitail* inou kan me uhdahn kesempwal oh kaselel, pwe sang ni mepwukat kumwail en iang ale sapwellimen Koht lingan, ni amwail pitsang suwed en sampah me ineng suwed kin kahrehda.
5 Ong ni kahrepe wet, nantihong wia uwen amwail kak pwe kumwail en kapatahiong amwail pwoson kamwahu, oh ong amwail kamwahu loalokong,
6 ong amwail loalokong kaunda pein kumwail, ong amwail kaunda pein kumwail dadaur, ong amwail dadaur poadidiong Koht,
7 ong amwail poadidiong Koht limpoak en pirien, ong amwail limpoak en pirien limpoak ong koaros.
8 Pwe ma kumwail direkihla mepwukat, kumwail sohte pahn dangahngahla de sohte wah nin duwen loalokong pwung en atail Kaun Sises Krais.
9 Pwe ma emen sohte ahneki mepwukat, e maskun oh sohte kin men kilang maraino,* oh e pil manokelahr me e mwakelekelsangehr eh dihp en mehn mahs ako.
10 Eri riei ko, wia uwen amwail kak koaros pwe amwail malipilip oh pilipil en pweiong kumwail, pwe ma kumwail pahn kin wiewiahte mepwukat, kumwail sohte mwahn pahn lohdi.
11 Ni mehlel, iei ahl wet me kumwail pahn alehkihdi kapai laud en pedolong nan Wehi poatopoat en atail Kaun oh Sounkomour Sises Krais.
12 Iei kahrepen ei koasoanehdi en kin katamankin kumwail mepwukat ahnsou koaros, mehnda ma kumwail ese mepwukat oh poadidier teng nan padahk mehlel me kumwail sukuhlkier.
13 Ahpw I kin lemeleme me mehkot pwung ehu ei kin katamankin kumwail mepwukat erein ei kin mihmi nan impwalet,*
14 pwe I ese me I pahn kereniong kohkohsang impwal wet, duwen me atail Kaun Sises Krais pil ketin padahkihong ie ni sansal.
15 Ahnsou koaros I pahn wia uwen ei kak pwe mwurin ei pahn mweselda, kumwail en kak pein tamanda* mepwukat.
16 Soh, se sohte kin idawehn soai likamw me aramas wiahda ni at padahkihong kumwail duwen roson oh ketier en atail Kaun Sises Krais, ahpw se pein kilangki masat sapwellime lingan.
17 Pwe e ketin alehdi sang rehn Samatail Koht wahu oh lingan ni ahnsou me soangen mahsen pwukat* peidohng reh sang ni wasa lingalihngie, mahsanih: “Iet nei Pwutak kompoake, me pein ngehi kin kupwurperenki.”
18 Ei, se rong mahsen pwukat eh peipeidihdo sang nanleng nindoken at mihmi reh nin nahna sarawio.
19 Ihme kahrehda se uhdahn kamehlelehla me kokohp kan pahn pweida, oh e konehng kumwail en tetehk mwahu kokohp kan me duwehte lamp ehu me kin dakedaker wasa rotorot (wasa lao rahnpeseng oh usuhn rahn pwarada) me iei nan amwail mohngiong.
20 Pwe kumwail uhdahn ese met, me sohte kokohp ehu nan Nting Sarawio kin pwilsang ni madamadau en aramas.
21 Pwe saikinte pak ehu me aramas emen koasoiahda kokohp ehu sang ni pein nsene, ahpw sapwellimen Koht manaman* me kin kaweid aramas akan pwe ren koasoia mahsen en Koht.
Footnote kan
^ De “pwoson ehu me wia pwais kaselel duwehte aht.”
^ De “kihong kitail ni soh pweipwei.”
^ De “kihong kitail ni soh pweipwei.”
^ De kakete, “maskun, sohte kak kilang me doh.”
^ De “impwal,” me iei, paliwere me kisehn sampah.
^ De “koasoia.”
^ LK, “soangen ngihl ehu.”
^ LK, pneuʹma. Kilang KLL.
