Kalesia 4:1-31
4 Eri met I pahn nda me ni serien sohso men eh wiahte kisin seri, e sohte weksang ladu men, mendahki ih me kaunen mehkoaros,
2 ahpw e kin mi pahn sounkaweid kan oh sounapwalih kan lao lel rahno me eh pahpa koasoanediero.
3 Pil duwehte, ni atail wia seri kei, kitail kin liduwih madamadau oh wiewia en sampah wet.
4 Ahpw ni imwiseklahn ahnsou me koasoandiero eh leledo, Koht ketin poaronehdo sapwellime Ohl, me ipwidi sang lih emen, oh me mi pahn kosonned,
5 pwe en pwainla pweipwei en kasaledekihala irail kan me mi pahn kosonned, pwe Koht en ketin pwekada kitail nin duwen sapwellime seri kan.
6 Eri pwehki kumwail wia sapwellimen Koht seri kei, Koht ketin kadarodohng nan mohngiongitail sapwellime manaman* me sapwellime Ohlo alehdi oh manamano kin ngihl laudida nda: “Apa,* Samat!”
7 Eri ke solahr wia ladu men ahpw sapwellime seri. Oh ma kowe sapwellimen Koht seri, e pil pahn ketikihong uhk sohso ehu.
8 Ahpw ahnsou me kumwail sehse Koht, kumwail wialahr lidun irail kan me kaidehn uhdahn koht.
9 Ahpw met ni amwail esehlahr Koht, de ni Koht eh ketin mwahngihkumwaillahr, dahme kahrehda kumwail men pwuralahng madamadau oh tiahk mwahl en sampah oh men pwurehng wiahla arail lidu?
10 Kumwail uhdahn kin kesempwalki rahn akan, sounpwong kan, ahnsou kan* oh sounpar kan.
11 I perkinkumwaildahr, pwe mwein ei nantihong sewese kumwail sohte katepe.
12 Riei ko, I peki rehmwail, kumwail en duwehte ngehi, pwe I pil kin duwehte kumwail mahso. Kumwail sohte wiahiong ie mehkot sapwung.
13 Ahpw kumwail ese me pwehki ei soumwahu, I ahneki tepin ahnsou mwahu en kalohkihong kumwail rongamwahwo.
14 Oh mendahki ei soumwahu eh wia kahpwal ehu ong kumwail, kumwail sohte mwamwahlikin ie de kasautkin ie;* ahpw kumwail kasamwo ie duwehte sapwellimen Koht tohnleng men, de duwehte Krais Sises.
15 Eri, ia peren me kumwail ahnekio? Pwe I ese ni mehlel me, ma e kak wiawi, kumwail kapitasangehr pwoaren masamwail kan oh kihong ie.
16 Eri, ia duwe, I wialahr amwail imwintihti pwehki I koasoiaiong kumwail me mehlelo?
17 Irail kin ngoangkihla pwe kumwail en pwungkinirailla, ahpw kaidehn ong kahrepe mwahu ehu; re men kadohwankumwailweisang ie, pwe kumwail en uhdahn men idawehnirailla.
18 Ahpw ahnsou koaros e kin mwahu emen en kin ngoangki rapahkin kumwail ong kahrepe mwahu ehu, a kaidehnte ni ahnsou me I pahn mihmi rehmwail,
19 nei kisin seri ko, pwe I pwurehng weiweirek en neitik lao kumwail kasalehda sapwellimen Krais irair kan.
20 I men mihmi rehmwail ahnsou wet pwe I en wekidala ngileiet, pwe I sehsehla dahme I pahn wia pwehki kumwail.
21 Ndaiong ie mahs, kumwail me kin men mihmi pahn kosonned, Kumwail sohte kin rong Kosonnedo?
22 Karasepe, e ntingdier me Eipraam naineki pwutak riemen, emen sang rehn lih lidu men oh emen sang rehn lih saledek men;
23 ahpw pwutak me sang rehn lih liduwo ipwidi nin duwen aramas ar kin ipwidi, a pwutak teio me sang rehn lih saledeko ipwidi nin duwen inou ehu.
24 Mepwukat duwehte sipai en karasaras pwoat; pwe lih riemen pwukat kin wehwehki inou lap riau, ehu rehra wiawihda pohn Nahna Sainai; koaros me mi pahn inou lap wet lidu kei oh inou lap wet duwehte Akar.
25 Eri Akar kin wehwehki Sainai, nahna ehu me mi nan Arepia, oh e rasehng Serusalem rahnwet, pwe e wia lidu men iangahki nah seri kan.*
26 Ahpw Serusalem en powe me saledek, oh iei ih atail nohno.
27 Pwe e ntingdier: “Ke en pereperen, kowe lih depwen me sohte kin neitik; weriwerki omw peren, kowe lih me sohte kin medek en neitik; pwe nein lih me lekdeklahro seri kan me tohtohsang nein lih me mie eh pwoud.”
28 Eri riei ko, kumwail iei serien inowo duwehte Aisek.
29 Ahpw duwehte ni ahnsou me pwutak me ipwidi nin duwen aramas ar kin ipwidi eh kin tepida kaloke pwutak me ipwikihdi sapwellimen Koht manaman,* pil kin duwehte ahnsou wet.
30 Ahpw, dahme nting sarawio mahsanih? “Kausala lih liduwo oh nah pwutako, pwe nein lih liduwo pwutako sohte mwahn pahn iang nein lih saledeko pwutako wia serien sohso.”
31 Eri riei ko, kitail kaidehn serien lih liduwo, pwe serien lih saledeko.
Footnote kan
^ LK, pneuʹma. Kilang KLL.
^ Lepin Lokaiahn Ipru de Aramaik me wehwehki “Ipa!”
^ Me iei, ahnsou kan me kileldiong kasarawi.
^ De “kendipih ie.”
^ ‘Seri kan’ wasaht wehwehki tohn kahnimwo.
^ LK, pneuʹma. Kilang KLL.
