Wiewia 26:1-32
26 Akripa eri ndaiong Pohl: “Ke mweimweiongehr koasoia duwen pein kowe.” Pohl eri kapahla peh oh tepida koasoi pwe en doare pein ih.
2 “Maing Nanmwarki Akripa, I perenki ei mi mwohmwi rahnwet pwe I en kak koasoi pwe en doareiehsang soahng koaros me mehn Suhs akan kedipahkin ie,
3 ni mehlel pwehki komwi semen ni tiahk oh akupwung koaros nanpwungen mehn Suhs akan. Ihme kahrehda, I peki komwi en karonge ie ni kanengamah.
4 “Ni mehlel, mehn Suhs koaros me ese ie mahso kin wehwehki mwahu mwomwen ei mour sang ni ei pwulopwul kohda nanpwungen ei aramas akan* oh pil nan Serusalem,
5 me I kin idawehn pwihnen Parisi kan, me keieu limeidihd nan atail pelien lamalam; ma re mwahuki, irail kak kadehde met.
6 Ahpw met, I pakadeikadahr pwehki ei koapworopworki inou me Koht ketin wiahiongehr samatail mehn mahs ako;
7 iei inowohte me atail keinek 12 kin koapworopworki en kilang eh pweida ni arail kin ngoangki papah ih ni rahn oh nipwong. Duwen koapworopwor wet me mehn Suhs akan kin kedipahkin ie, maing Nanmwarki.
8 “Dahme kahrehda kumwail sohte kin kamehlele me Koht ketin kaiasada me melahr akan?
9 Ngehi emen me kin kamehlele mahso me I anahne wia soahng koaros pwe I en uhwong mwaren Sises mehn Nasaret.
10 Iei met me I wiadahr nan Serusalem, oh I salihedi tohnpadahk* tohto nan imweteng, pwe I aleier manaman sang rehn kaunen samworo kan; oh ni arail pahn kamakamala, I pil kin utung met.
11 Sang ni ei kin kalapw kaloke irail nan sinakoke koaros, I song en idingkihong irail en kahmahmkihla arail pwoson; oh pwehki ei kin inenen lingeringerkin irail, I pil kohla ni kahnimw teikan pwe I en kaloke irail.
12 “Ni ei kin wiewia met, I seiloaklahng Damaskus sang ni manaman oh kehkehlik sang rehn kaunen samworo kan,
13 eri pohn ahlo ni souwas maing Nanmwarki, I ahpw kilangada marain ehu me lingaling sang ketipin me dakodo sang nanleng me kapiliepene oh pil irail kan me iang ie seiseiloak.
14 Oh ni kiht koaros at pwupwudiong nanpwel, I ahpw rongada ngihl ehu me ndaiong ie ni lokaiahn Ipru: ‘Sohl, Sohl, dahme ke kalokalokehkin ie? Omw kin kikim tuhke kengo* kin kahrehiong uhk kahpwal.’
15 I ahpw patohwan: ‘Ihs komwi, maing Kaun?’ Kauno eri mahsanih: ‘Ngehi Sises me ke kin kalokaloke.
16 Pwourda oh kesihnenda. Iet kahrepen ei pwarohng uhk, pwe I en piluhkada nin duwen ladu men oh sounkadehde men ong soahng kan me ke kilangehr oh pil soahng kan me I pahn kasalehiong uhk me pid duwen ngehi.
17 Oh I pahn doareiukasang rehn mehn Suhs akan oh mehn liki kan me I pahn kadarowohng uhk rehrail
18 pwehn kapehdpeseng masarail kan, wekid irail sang nan rotorot ong nan marain oh sang ni manaman en Sehdan ong Koht, pwe irail en kak ale mahkpen diparail kan oh sohso ehu rehn irail me sarawihla kan sang ni arail pwoson ie.’
19 “Eri, maing Nanmwarki Akripa, I sohte sapeikiong kasansal sang nanlengo,
20 ahpw keieu ong irail me mi nan Damaskus, mwuri ong irail nan Serusalem, oh nan wehin Sudia pwon, oh pil mehn liki kan, I wahdo rohng me re anahne koluhla oh wekiong Koht sang ni arail pahn wia soahng kan me kasalehda koluhla.
21 Ihme kahrehda mehn Suhs ako kolkiniehdi nan tehnpas sarawio oh song en kemeiehla.
22 Ahpw pwehki I aleier sawas sang rehn Koht, I kin pousehlahte leledo rahnwet kadehdehiong me tikitik oh me lapalap akan, koasoiahte soahng kan me Soukohp ako oh pil Moses ntingihedi me pahn wiawi—
23 me Krais pahn lokolok oh nin duwen ih me tepin iasada sang rehn me melahr akan, e pahn lohkihong mehn Suhs akan oh mehn liki kan duwen marain.”
24 Eri ni Pohl eh koasoakoasoia mepwukat pwe en doare pein ih, Pestus ahpw werkihda ni ngihl laud: “Pohl, ke sahliella! Omw sukuhl laud kahrehiong omw sahliella!”
25 Ahpw Pohl nda: “I sohte sahliel maing Kepina Lapalap Pestus, ahpw I kin koasoia mahsen me mehlel oh pwung.
26 Ni mehlel, nanmwarkio me I koasoakoasoiong ni saledek wehwehki mwahu duwen mepwukat; I uhdahn kamehlele me e mwahngih mepwukat koaros, pwe mepwukat sohte wiawi ni rir.
27 Maing Nanmwarki Akripa, komw kamehlele Soukohp ako? I ese me komw kamehlele.”
28 Akripa ahpw ndaiong Pohl: “Nan erein ahnsoukiste, ke songosong en kahrehiong ie en wiahla Kristian men.”
29 Pohl ahpw nda: “I kapakap ong Koht me mehnda ma ahnsou mwotomwot de ahnsou reirei, kaidehn komwihte ahpw irail koaros me rong ie rahnwet pahn duweiehla, ahpw kaidehn ni selmete pwukat.”
30 Eri, nanmwarkio, kepinao, Pernis oh pil ohl akan me iang irail mwomwohd ahpw kesihnenda.
31 Ahpw ni arail mwesel, irail ahpw tepida ndapene nanpwungarail: “Ohl menet sohte wiahda mehkot me warohng en mehla de selidi.”
32 Akripa eri ndaiong Pestus: “Ohl menet kakete lapwada ma e sohte peki kopwung sapahl rehn Sihsar.”
