Ke wadekala mwahu Kahn Iroir pwukat? Kitail kilang ma kitail kak sapengala peidek kan me kileldi pah:

Mehn kadehde dahieu sang nan Paipel me kasalehda me Koht kin ketin poakeikitailla?

Ni ahnsou me mehn Israel en mahs ko wia lidu kei nan Isip, Koht ketin pohnese arail kahpwal kan oh ketin pehm arail lokolok. (Eks. 3:7; Ais. 63:9) Kitail wiawihda rasehng Koht, oh kitail kak kasalehda pepehm en poakehla meteikan. Koht kin ketin poakeikitailla pil ni ahnsou me kitail ele kin pehm me kitail sohte warohng sapwellime limpoak.​—wp18.3, pali 8-9.

Ia duwen sapwellimen Sises padahk kan ar sewese aramas akan en powehdi madamadau en lipilipilki aramas?

Mehn Suhs tohto ni mwehin Siseso kin ahneki madamadau en lipilipilki aramas. Krais ketin kasalehda anahnepen aktikitik oh ketin padahngki me e sapwung aramas en pohnmwahsohki arail keinek. E ketin kangoange sapwellime tohnpadahk kan en wiahki emenemen riarail.​—w18.06, pali 9-10.

Dahme kitail sukuhlkihsang Koht eh sohte ketin mweidohng Moses en pedolong nan Sapwen Inowo?

Moses ahneki nanpwungmwahu keren rehn Siohwa. (Deud. 34:10) Kerenlahng imwilahn sounpar 40 nan sapwtehno, aramas ako pwurehng kaulimki duwen eh sohte pihl. Koht ketin mahsanihong Moses en lokaiaiong paipo. Ahpw, Moses alehte wokih paipo. Ele Siohwa ketin engiengda pwehki Moses sohte idawehn Sapwellime kaweid kan, de Moses sohte kalinganahla Koht pwehki manamano. (Nemp. 20:6-12) Met anahne padahkihong kitail duwen kesempwalpen en peikiong Siohwa oh kalinganahla ih.​—w18.07, pali 13-14.

Ia duwen atail kak sapwungala ma kitail kin kadeik meteikan ni mas liki?

Mie soahng siluh me kak kamwakid madamadau en aramas duwen meteikan: aramaso kohsang ia de ih mehn ia, ia uwen mwohni me e naineki, oh e sounpar depe. E kesempwal kitail en song en kilangwohng meteikan ni ahlohte me Koht kin ketin kilangwohng irail, me iei, e sohte kin ketin lipilipilki aramas! (Wiewia 10:34, 35)​—w18.08, pali 8-12.

Ni ahl dah me Kristian mah kan kak sewese meteikan?

Kristian mah men me eh pwukoa wekila kin kesempwalte rehn Koht oh e kak wia soahng tohto pwehn sewese meteikan. E kak nantihong sewese en emen eh pwoud me sohte iang padahk mehlel, sewese emen me sohla kin kalohk oh iang mihting, wia onop en Paipel, oh kalaudehla eh doadoahk en kalohk.​—w18.09, pali 8-11.

Dahme mi nan nein Kristian kan Koakon en Kasukuhl?

Nan koakon en kasukuhlo, mie contact card oh doaropwehn luhk kan. Mie kisin doaropwe waluh me mwahu ong kalohk iangahki makasihn en Kahn Iroir oh Awake! (lokaiahn wai). Pil mie kisin pwuhk kei, pwuhken onop riau, oh kisin kasdo pahieu, iangahki Dahme Kahrehda Ken Onopki Paipel?​—w18.10, pali 16.

Ia duwen Kristian men eh kak “pwainda” padahk mehlel, nin duwen me Lepin Padahk 23:23 mahsanih?

Kitail sohte kin pwainkihda padahk mehlel mwohni. Ahpw, kitail kin anahne doadoahngkihla ahnsou oh nantihong laud pwe kitail en kak alehdi.​—w18.11, pali 4.

Dahme kitail kak sukuhlkihsang dahme Oseia wiahiong eh pwoudo, Komer?

Komer pwurupwurehng wia dipen kamwahl, ahpw Oseia mahkohng oh pwoudikihte ih. Ma Kristian men wia tiahk samin me pid wia nsenen pwopwoud, eh pwoudo me sohte sapwung kak mahkohng ih. Ma me sohte wiahda sapwungo pwurehng wia nsenen pwopwoud rehn eh pwoudo me wiahda sapwung, e solahr mie kahrepe pwung ehu sang nan Paipel pwe ira en mweipeseng.​—w18.12, pali 13.