1, 2. Dahme kahrehda Pohl ntinglahng Kristian kan nan Ipru?

 NAN pahr 61, mwomwohdiso kan nan Israel ahneki meleilei. Wahnpoaron Pohl mihmi nan imweteng en Rom, ahpw e koapworopworki me e pahn kereniong pedoi. Ienge Timoty me kin iang ih seiloak ahpwtehn pedoisang imweteng oh ira koaros kasikasik ira pahn mwemweitla rehn riara Kristian kan nan Sudia. (Ipru 13:23) Ahpw mwurin sounpar limaute, Kristian kan nan Sudia, ahpw mehlel irail kan me kousoan nan Serusalem anahne mwekid ni karuaru. Dahme kahrehda? Mwoweo, Sises ketin padahkihong sapwellime kan me ni ahnsowohte me re kilang sounpei kan kapilpene Serusalem, re anahne tang.​—Luk 21:20-24.

² E sounparehr 28 mwurin Sises ketin padahkihong sapwellime tohnpadahk ko duwen kehkehlik wet. Erein ahnsou ko, Kristian kan nan Israel kin kolokolte arail lelepek mendahki kalokolok oh kahpwal tohto. (Ipru 10:32-34) Ahpw Pohl men kaunopada irail ong dahme pahn wiawi mwuhr. Arail pwoson pahn kereniong lelohng ehu rehn kasongosong kan me keieu laud. (Mad. 24:20, 21;  Ipru 12:4) Re pahn anahne dadaurete oh ahneki pwoson me laudsang mahs pwe ren peikiong sapwellimen Sises mahsen en tangasang wasao pwe irail en kak pitla. (Wadek Ipru 10:36-39.) Eri Siohwa ketin kamwakid Pohl en ntinglahng Kristian pwukat. Kisinlikou wet, me met adaneki pwuhken Ipru, wiawihda pwehn kakehlairailda ong dahme pahn wiawi.

3. Dahme kahrehda kitail en men esehla pwuhken Ipru?

³ Nin duwen sapwellimen Koht aramas akan rahnwet, kitail en men esehla pwuhken Ipru. Dahme kahrehda? Pwehki kitail mi nan soangen irairohte me Kristian ko nan Sudia ahneki. Kitail mihmi nan “ahnsou apwal ekei” oh me tohto kin dadaurete ni lelepek pahn kahpwal de kalokolok laud kan. (2 Tim. 3:1, 12) Ahpw pali laud en kitail ahneki onepek mwahu oh sohte kin lelohng kalokolok. Eri, duwehte Kristian ko ni mwehin Pohl, kitail pil anahne mwasamwasahn. Dahme kahrehda? Ahnsou keren, atail pwoson pahn lelohng kasongosong me keieu laud!​—Wadek Luk 21:34-36.

4. Ia iren pahr en 2016, oh dahme kahrehda e konehng?

⁴ Dahme pahn sewese kitail pwehn kaunopadahng dahme pahn wiawi ahnsou kohkohdo? Nan pwuhken Ipru, Pohl kasalehda soahng tohto me pahn sewese kakehlaka atail pwoson. Ehu iren kataman me uhdahn kesempwal iei me dierek nan Ipru 13:1 (NW). E kin kangoange kitail: “Kumwail dadaurete amwail limpoakpene nin duwen pirien ehu.” Iretikitik wet iei me pilipilda pwehn wia iren pahr en 2016.

5. Dahkot limpoakpene nin duwen pirien ehu?

⁵ Dahkot limpoakpene nin duwen pirien ehu? Lepin lokaiahn Krihk me Pohl doadoahngki kin wehwehki “poakohng riomw.” Limpoakpene nin duwen pirien ehu iei limpoak laud me mi nanpwungen peneinei oh kompoakepah keren kan. (Sohn 11:36) Kitail sohte kin mwomwehdahte wia pirien ehu pwe kitail uhdahn pirien ehu. (Mad. 23:8) Pohl nda: “Kumwail en nsenohki emenemen ni amwail kin limpoakpene nin duwen pirien ehu. Kumwail en tiengla mwowe ni amwail kin wauneki emenemen.” (Rom 12:10, NW) Dahme e nda kin kasalehda uwen laud en atail poakohng riatail kan. Soangen limpoak wet, iangahki limpoak me poahsoankihda kaweid ong Kristian kan, kin sewese sapwellimen Koht aramas akan en kompoakepahnkihla emenemen oh pil miniminpene.

6. Ia duwen Kristian mehlel kan ar wehwehki wehwehn limpoakpene nin duwen pirien ehu?

⁶ Lepin lokaia pwukat “limpoakpene nin duwen pirien ehu” kin pwarada pali laud nan pwuhken Kristian kan. Ong mehn Suhs kan mahs, lepin lokaia wet “pirien” kin kalapw dokedoke emen kisehn peneinei oh ekei pak, e kin dokedoke emen likin peneinei. E sohte pahn kin pidada emen me kaidehn mehn Suhs. Ahpw nin duwen Kristian mehlel kan, “pirien” kin pidada Kristian mehlel koaros, sohte lipilipil mehnia sahpw me re kohsang ie. (Rom 10:12) Siohwa ketin padahkihongehr kitail en poakohng emenemen nin duwen pirien ehu. (1 Des. 4:9) Ahpw dahme kahrehda e kesempwal en dadaurete atail limpoakpene nin duwen pirien ehu?

7. (a) Ia kahrepe keieu kesempwal me kitail en limpoakpene nin duwen pirien ehu? (b) Menlau kihda pil ehu kahrepe kesempwal kitail en kakehlaka atail limpoakpene nanpwungatail.

⁷ Kahrepe keieu kesempwal kitail en limpoakpene nin duwen pirien ehu iei pwehki Siohwa ketin mahsanihong kitail en wia met. Kitail  sohte kak uhdahn poakohng Siohwa ma kitail sohte kin poakohng riatail kan. (1 Sohn 4:7, 20, 21) Pil ehu kahrepe iei kitail anahne emenemen, ahpw mehlel nan ahnsou apwal kan. Ni Pohl eh ntinglahng Kristian ko nan Ipru, e ese me ahnsou keren, ekei pahn anahne pwilikihdi arail kepwe kan oh kohkohsang imwarail ko. Sises ketin kawehwehda ia uwen apwal en ahnsowo. (Mark 13:14-18; Luk 21:21-23) Eri mwohn ahnsowo pahn leledo, Kristian ko pahn anahne kakehlaka arail limpoakpene nanpwungarail.​—Rom 12:9.

8. Dahme kitail anahne wia met mwohn kahn kamakam kowahlapo pahn tepida?

⁸ Kahn kamakam me keieu laud nan poadopoad en aramas pahn kereniong lel. (Mark 13:19; Kaud. 7:1-3) Kitail anahne peikiong kaweid wet: “Nei aramas akan, kumwail kohla pedolong nan pere kan mas loalen imwamwail kan, oh ritingedi wenihmw kan. Kumwail rukula mahs ahnsou kis lao ei engieng imwisekla.” (Ais. 26:20, NW) ‘Pere kan mas loale’ ele kin dokedoke atail mwomwohdiso. Ih wasao me kitail kin iang riatail Kristian kan kaudokiong Siohwa. Ahpw kitail anahne wia laudsang ihte kaukaule tuhpene. Pohl katamankihong Kristian en Ipru ko me re anahne kangoange emenemen en kasalehda limpoak oh wia kamwahu ong emenemen. (Ipru 10:24, 25) Kitail anahne kakehlaka atail limpoakpene nin duwen pirien ehu ahnsou wet pwehki e pahn sewese kitail en dadaurete pahn kahpwal koaros me kitail ele pahn lelohng ahnsou kohkohdo.

9. (a) Soangen ahnsou dah me kitail ahneki pwehn limpoakpene nin duwen pirien ehu rahnwet? (b) Menlau kihda karasaras kan duwen sapwellimen Siohwa aramas akan ar kin limpoakpene nin duwen pirien ehu.

⁹ Pil rahnwet, kitail ahneki ahnsou mwahu tohto en limpoakpene nin duwen pirien ehu mwohn kahn kamakam kowahlapo pahn tepida. Riatail Kristian tohto kin lelohng lokolok pwehki rerrer en sahpw, lapake, melimel, ilok laud, de pil soangen kahpwal teikan me duwehte mepwukat. Ekei riatail kin dadaur pahn kalokolok. (Mad. 24:6-9) Oh pwehki kitail mi nan sampah mwersuwed ehu, rahn koaros kin mie kahpwal en mwohni. (Kaud. 6:5, 6) Ahpw, uwen tohtohn kahpwal me riatail kan kin ahneki, ih uwen tohtohn ahnsou mwahu kitail en kasalehda uwen atail kin poakohng emenemen. Mendahki sampah wet sohte kin kasalehda limpoak, kitail anahne dadaurete atail limpoakpene nin duwen pirien ehu. (Mad. 24:12) ^[1]​—Menlau kilang ire kan mwuri.

10. Dahme kitail pahn koasoiapene ahnsou wet?

¹⁰ Ia duwen atail kak tehk mwahu me kitail kin dadaurete atail limpoakpene nin duwen pirien ehu mendahki kahpwal kan me kitail ahneki? Ia duwen atail kak kadehdehda me kitail ahneki soangen limpoak wet ong riatail kan? Mwurin wahnpoaron Pohl nda “kumwail dadaurete amwail limpoakpene nin duwen pirien ehu,” e ntingihedi ekei ahl me Kristian kan kak wia met. Kitail pahn koasoiapene ahnsou wet meh weneu.

11, 12. Ia wehwehn en kasalehda kadek? (Menlau kilang tepin kilel.)

¹¹ “Kumwail kin kataman epwelpen mehn keiru kan.” (Wadek Ipru 13:2.) Ia wehwehn “epwelpen mehn keiru kan”? Lepin lokaia pwukat me Pohl doadoahngki kin wehwehki “en kadek ong aramas me kitail sehse.” Ele lepin lokaia pwukat katamankihong kitail duwen Eipraam oh Lohd. Ohl riemen pwukat kasalehda kadek ong mehn keiru ko me ira sehse. Mwuhr, Eipraam oh Lohd esehda me mehn keiru ko uhdahn tohnleng kei. (Sen. 18:2-5; 19:1-3) Karasaras pwukat kangoange Kristian en Ipru ko ren limpoakpene nin duwen pirien ehu sang ni arail kin kadek ong meteikan.

 ¹² Ia duwen atail kak kasalehda kadek ong meteikan? Kitail kak lukehdo ni imwatail riatail Kristian kan ren iang kitail mwenge de pwehn kangoange emenemen. Mehnda ma kitail sohte nohn ese sounapwalih me kin seiloak oh eh pwoudo, kitail kak luke ira ni ahnsou me ira mwemweitdo nan atail mwomwohdiso. (3 Sohn 5-8) Kitail sohte anahne wiahda kamadipw ehu de doadoahngkihla mwohni laud. Atail mehn akadei iei en kangoange riatail kan a kaidehn pwe ren kapingahki kitail dahme kitail ahneki. Oh kitail en dehr luke irail kante me kak dupukohng kitail ni ahl tohrohr ehu dahme kitail wiahda. (Luk 10:42; 14:12-14) Dahme keieu kesempwal iei kitail en dehr nohn kedirepwla oh manokehla en kasalehda kadek ong meteikan!

13, 14. Ia duwen atail kak “tamanda me sensel kan”?

¹³ “Kumwail pil tamanda me sensel kan.” (Wadek Ipru 13:3.) Ni ahnsou me Pohl ntingihedi ire wet, e koasokoasoia rie Kristian ko me mi nan imweteng pwehki arail pwoson. (Pil. 1:12-14) Pohl kapingahki mwomwohdisou arail “pil iang ale lokolok en me selidi kan.” (Ipru 10:34) Ekei irail sewese Pohl erein sounpar pahieuo me e mi nan imweteng nan Rom, ahpw ekei irail kousoan wasa doh. Ia duwen arail kak sewese Pohl? Irail kak pousehlahte kapakapkin ih ni ngidingid.​—Ipru 13:18, 19.

¹⁴ Rahnpwukat, Sounkadehde tohto mi nan imweteng pwehki arail pwoson. Riatail Kristian kan me kousoan karanih wasa pwukat kak sewesekin irail dahme re anahne. Ahpw me tohto rehtail kousoan dohsang irail ko nan imweteng. Ia duwen atail kak sewese oh dehr manokehla irail? Limpoakpene nin duwen pirien ehu pahn kamwakid kitail en kapakapkin irail ni ngidingid. Karasepe, kitail kak kapakapki brother kan, sister kan oh pil seri kan me mi nan imweteng en Eritrea, iangahki riatail ko Paulos Eyassu, Isaac Mogos, oh Negede Teklemariam, me mihmihkiher nan imweteng erein sounpar 20.

15. Ia duwen atail kak kawauwih atail mouren pwopwoud?

¹⁵ “Kumwail koaros uhdahn pahn wauneki kasarawien kapwopwoud.” (Wadek Ipru 13:4.) Kitail pil kak limpoakpene nin duwen pirien ehu sang ni atail wiewia mwakelekel. (1 Tim. 5:1, 2) Karasepe, ma kitail pahn wiahiong riatail Kristian men tiahk samin me pid wia nsenen pwopwoud, kitail pahn kauwehla ih oh eh peneineio. Likilik me kitail ahneki nanpwungatail pahn ohla. (1 Des. 4:3-8) Pil medewehla ia pepehm en lih pwopwoud men ma e diarada me eh pwoudo kin kilikilang kilel de kasdo suwed kan. E pahn medewe me eh pwoudo poakohng ih oh wauneki ara koasoandi en pwopwoud?​—Mad. 5:28.

16. Ia duwen atail itarki dahme kitail ahneki eh sewese kitail en limpoakpene nin duwen pirien ehu?

¹⁶ Kumwail “nsenamwahukihte dahme kumwail ahneki.” (Wadek Ipru 13:5.) Atail likih Siohwa pahn sewese kitail en nsenamwahukihte de itarki dahme kitail ahneki. Ia duwen met eh sewese kitail en limpoakpene nin duwen pirien ehu? Ni atail kin itarki dahme kitail ahneki, kitail pahn taman me riatail Kristian kan kin kesempwalsang mwohni de kepwe kan. (1 Tim. 6:6-8) Kitail sohte pahn kaulimki riatail kan de irair en atail mour. Oh kitail sohte pahn peirinki meteikan de noahrok. Ahpw, ni atail itarki dahme kitail ahneki, kitail pahn kasalehda sapan.—1 Tim. 6:17-19.

17. Ia duwen atail ahneki “eimah” eh sewese kitail en limpoakpene nin duwen pirien ehu?

¹⁷ “Kitail eimah.” (Wadek Ipru 13:6.) Atail likih Siohwa pahn kihong kitail eimah pwehn dadaur pahn kahpwal laud kan. Soangen eimah wet kin sewese kitail en ahneki madamadau pwung. Oh ni atail kin ahneki soangen  madamadau wet, kitail kak limpoakpene nin duwen pirien ehu sang ni atail kangoange oh kansenamwahwih riatail Kristian kan. (1 Des. 5:14, 15) Pil erein kahn kamakam kowahlapo, kitail kak eimah oh ese me komourpatail kerendohr.​—Luk 21:25-28.

18. Ia duwen atail kak kakehlakahda atail limpoak ong elder kan nin duwen pirien ehu?

¹⁸ “Kumwail tamanda amwail sounpadahk en mahs ako.” (Wadek Ipru 13:7, 17.) Elder kan nan atail mwomwohdiso kin doadoahngki pein arail ahnsou pwehn doadoahk laud ong kitail. Ni atail medewehla duwen soahng koaros me re kin wia, atail poakohng oh kalahnganki irail kin lalaudla. Kitail sohte men irail en sohla ahneki peren de nsensuwedkihla mehkot me kitail wiahda. Ahpw, kitail kin men peikiong irail. Ni ahl wet kitail kin “waunekin irail oh pil poakohng irail ni mehlel, pwehki doadoahk me re kin wia.”​—1 Des. 5:13.

19, 20. Ia duwen atail kak kalaudehla atail dadaurete atail limpoakpene nin duwen pirien ehu?

¹⁹ Meteikan kin esehki sapwellimen Siohwa aramas akan arail kin limpoakpene nin duwen pirien ehu. Met pil kin wiawi ni mwehin Pohl. Ahpw Pohl kangoange rie Kristian ko ren kasalehda limpoak laudsang met. E nda: “Woneweite ni kalaudpen limpoak wet.” (1 Des. 4:9, 10) Eri e sansal me ahnsou koaros kin mie elen kamwahwihala atail wia met!

²⁰ Ni atail kilang iren pahr en sounpar wet nan atail Wasahn Kaudok, kitail en doudouloale peidek pwukat: I kak kalaudehla ei kadek ong meteikan? Ia duwen ei kak sewese riei Kristian kan nan imweteng? I kin kawauwih sapwellimen Koht koasoandi ong mouren pwopwoud? Dahme pahn sewese ie en uhdahn itarki dahme I ahneki? Ia duwen ei kak kalaudehla ei likih Siohwa? Ia duwen ei kak kalaudehla ei peikiong elder kan? Ma kitail kin nantihong kamwahwihala wasa weneu pwukat, iren pahr en sounpar wet sohte pahn wiahte sain ehu ni atail dihdo, ahpw e pahn katamankihong kitail en kapwaiada dahme Pohl ndao: “Kumwail dadaurete amwail limpoakpene nin duwen pirien ehu.”​—Ipru 13:1, NW.