1. Pwehki dihp, ia pepehm en sapwellimen Koht ladu lelepek tohto?

WAHNPOARON POHL ntingihedi: “Uhdahn aramas paisuwed men ngehi!” (Rom 7:24) Rahnwet, sapwellimen Koht ladu lelepek tohto kin nsensuwed oh mworusala duwehte Pohl. Dahme kahrehda? Pwehki mendahki kitail kin men kaperenda Siohwa, kitail koaros sohsohki dihp oh kitail sohte unsek. Eri kitail ele kin nsensuwedla ni atail kin kansensuwedihala ih. Ekei Kristian me wiahda dihp laud pil kin pehm me Siohwa uhdahn sohte kak ketin mahkohng irail.

2. (a) Ia duwen Melkahka 34:22 eh kasalehda me sapwellimen Koht ladu kan sohte anahne pehm me diparail kan poweiraildiher? (b) Dahme kitail pahn sukuhlki nan iren onop wet? (Menlau kilang kakon “ Iren Mehn Kasukuhl de Karasaras Ehu?”)

² Paipel kamehlelehiong kitail me ma kitail kin wiahki Siohwa atail wasahn ruk, kitail sohte anahne pehm me dipatail kan powekitaildiher. (Wadek Melkahka 34:22.) Ahpw ia wehwehn en wiahki Siohwa atail wasahn ruk? Dahme kitail anahne wia ma kitail men Siohwa en ketin kalahngan oh mahkohng kitail? Kitail kak diar pasapengpen peidek pwukat ni atail sukuhlki duwen koasoandi en kahnimw en rukula kan nan Israel mahso. Koasoandi wet mi pahn inou en Kosonnedo me imwisekla ni Pendekos en pahr 33. Ahpw Kosonned wet kohsang rehn  Siohwa. Eri, sang koasoandi en kahnimw en rukula kan, kitail sukuhlki ia duwen Siohwa eh kin ketin kilangwohng dihp, me dipada kan, oh irail kan me koluhla. Keieu, kitail pahn koasoiapene dahme kahrehda mie kahnimw en rukula kan nan Israel, oh ia duwen arail kin doadoahngki kahnimw pwukat.

3. Dahme mehn Israel kan kin wiahiong emen me kemehla aramas?

³ Siohwa kin uhdahn ketin nsenohki ni emen eh kamakamala. Ma mehn Israel men kemehla emen, “kisehn aramas mehlao me keieu keren ahneki pwukoahn kemehla aramas dipadao.” (Nemp. 35:19) Ni ahl wet, me dipkihda kamaramas pahn dupungkihong mour en aramas me e kemehlao pein eh mour. Ma e sohte mwadang kamakamala, Sapwen Inowo kakete saminla, de sohla sarawi. Siohwa ketin kehkehlingkihong irail en ‘dehr kasaminehla sahpw me irail koukousoan loale’ sang ni arail kin kemehla aramas.​—Nemp. 35:33, 34.

4. Dahme kin wiawi ni mehn Israel men eh depweila kemehla emen?

⁴ Ahpw dahme kin wiawi ni mehn Israel men eh depweila kemehla emen? Mehnda ma met depweila ieu, aramaso pwukoahkihte dipen kemehla aramas. (Sen. 9:5) Ahpw nan soangen irairo Siohwa ketin mahsanih me mahk kak kohwong soangen aramaso. Me depweila kemehla aramaso kak tangasang me pwukoahki ikih ih oh kohla ni ehu rehn kahnimw en rukula weneu ko. Ni ahnsou me e mweimweidahr en mi nan kahnimwo, e poadoandoarlahr. Ahpw e anahne mi nan kahnimwo lao samworo lapalap en ahnsowo mehla.​—Nemp. 35:15, 28.

5. Ia duwen koasoandi en kahnimw en rukula kan eh kak sewese kitail en wehwehkihla mwahu duwen Siohwa?

⁵ Siohwa me ketin wiahda koasoandi en kahnimw en rukula kan. E ketin kehkehlingkihong Sosua en padahkihong mehn Israel ko: “Kumwail pilada kahnimw kan wasahn rukula.” Pein Siohwa me ketin kasarawihla de katohrehla kahnimw pwukat. (Sos. 20:1, 2, 7, 8) Eri ia duwen koasoandi wet eh sewese kitail en wehwehkihla mwahu duwen sapwellimen Siohwa mahk kalahngan? Oh dahme met padahkihong kitail duwen atail kak wiahki Siohwa atail wasahn ruk rahnwet?

6, 7. (a) Kawehwehda pwukoahn kaun akan ni arail kopwung aramas me depweila kemehla emen. (Menlau kilang tepin kilel.) (b) Dahme kahrehda e wia elen loalokong ong me kemehla aramaso en koasoiong kaun akan?

⁶ Ma mehn Israel men depweila kemehla emen, e anahne tenge kahnimw en rukula oh “kawehwehiong kaun akan dahme pweidahro.” Kaun ako anahne kasamwo ih. (Sos. 20:4) Ahnsou ehu mwuhr, re pahn kapwurehla ih nan kahnimw me e kemehla aramaso pwe en ale kopwung rehn kaun akan wasao. (Wadek Nempe 35:24, 25.) Ma kaun ako pilada me kamakamalahn aramaso depweila ehu, irail pahn kapwurehla me kemehla aramaso nan kahnimw en rukulao.

⁷ Dahme kahrehda me kemehla aramaso anahne koasoiong kaun ako? Kaun ako anahne tehk mwahu me mwomwohdiso en Israel en mwakelekelte oh pil sewese ih en paiekihda sapwellimen Siohwa mahk kalahngan. Emen me samanih Paipel ntingihedi me ma aramaso sohte kohla rehn kaun ako, e kakete kamakamala. Oh e pahn pwukoahki pein eh kamakamala pwehki e sohte kapwaiada dahme Koht ketin kehkehlingki. Aramas men me depweila kemehla emen anahne peki oh ale sawas pwe en kak momourte. Ma e sohte kohla ni ehu kahnimw en rukula kan, kisehn me e kemehlao me keieu keren ahneki saledek en kemehla ih.

8, 9. Dahme kahrehda Kristian men me wiahda dihp laud ehu anahne koasoiong elder kan?

⁸ Rahnwet, Kristian men me wiahda dihp laud ehu anahne kohla rehn elder kan pwe ren kak sewese ih en pwurehng ahneki nanpwungmwahu  rehn Siohwa. Dahme kahrehda met uhdahn kesempwal? Keieu, pwehki Siohwa me ketin koasoanehdi elder kan en kopwung dihp laud kan. (Seims 5:14-16) Keriau, elder kan kin sewese irail kan me koluhla en pwurehng ahneki sapwellimen Koht kupwuramwahu oh en dehr pwurehng wia soangen dihpo. (Kal. 6:1; Ipru 12:11) Kesiluh, elder kan kin pilipilda oh pil kaiahnda pwe ren kin kansenamwahwih oh pil sewese me koluhla kan en saledeksang arail medek oh pepehm en dipada. Siohwa kin ketin kahdaneki elder pwukat “wasahn rukusang kisinieng oh melimel.” (Ais. 32:1, 2) Koasoandi wet iei ehu ahl me Koht kin ketin kasalehiong kitail mahk kalahngan.

⁹ Sapwellimen Koht ladu tohto kin pehm arail saledekla ni arail koasoiong elder kan oh ale sawas sang rehrail. Karasepe, emen brother me adaneki Daniel wiahda dihp laud ehu, ahpw erein sounpwong kei e sohte kohla rehn elder kan. E nda: “Mwurin ahnsou reirei, I kin medewe me solahr mehkot me elder kan kak wiahiong ie.” Ahpw e kin ahnsou koaros perki pwe emen de esehda duwen eh dihpo, oh e pehm me ehuehu pak me e pahn kapakap, e anahne tepikihda pekimahk ong Siohwa. Ehu rahn, e peki sawas sang rehn elder kan. Ni eh tamanda ahnsou ko, e nda: “Mehlel, I masak kohla rehrail. Ahpw mwurin ei tuhwong irail, e mwomwen me aramas emen pwekasang pohn pwopweie mehkot me uhdahn toutou.” Ahnsou wet, Daniel kakehr pwurehng kapakap ong Siohwa ni saledek. Met e ahneki nsenmwakelekel, oh me keren, e wiahla sounsawas men.

10. Pwe en ale mahk, dahme aramas me depweila kemehla emen anahne wia?

¹⁰ Pwehn ale mahk, e kesempwal ong aramas emen me depweila kemehla emen en tenge ehu kahnimw en rukula me keieu karanih ih. (Wadek Sosua 20:4.) Eh mour kin pidada eh kohla nan kahnimwo oh mihmi wasao lao samworo lapalapo mehla. Met wia tounmetei laud ehu ong ih. E anahne pwilikihdi eh doadoahk, imweo me kansenamwahu, oh saledek en seiloakseli. * (Nemp. 35:25) Ahpw met kesempwal. Ma e kohkohsang kahnimwo ahnsou sohte lipilipil, e pahn kasalehda  me e sohte nsenohki me e kemehla aramas emen, oh e pahn kahrehiong eh mour en mihla nan keper.

11. Ia duwen Kristian men me koluhla eh kasalehda me e uhdahn kalahnganki sapwellimen Koht mahk kalahngan?

¹¹ Rahnwet, emen me koluhkihla dipeo pil anahne wia soahng kei pwehn ale mahk sang rehn Koht. E anahne uhdihsang eh wiewiahn dihp. Met kin iangahki en soikala soahng koaros me kakete kahrehiong ih en wiahda dihp laud. Wahnpoaron Pohl kawehwehda dahme Kristian kan nan Korint me koluhla kin wia. E ntingihedi: “Kumwail kilang dahme Koht ketin wiadahr rehmwail sang ni nsensuwed wet: duwen eh kahredahr amwail pweriseklahr, amwail ngoangkilahr kadehde pein amwail pwung kan, uwen amwail suwedki me suwed, uwen amwail per, uwen amwail pepehm akan, uwen amwail poadidi, uwen ngoang en kaloke wiewia suwed kan!” (2 Kor. 7:10, 11) Eri ma kitail wia soahng koaros me kitail kak pwehn uhdihsang wiewia dihp, kitail pahn kasalehiong Siohwa me kitail uhdahn nsenohki atail irairo oh sohte kin medewe me sapwellime mahk kalahngan pahn mwadangete kohwong kitail.

12. Dahme Kristian men anahne uhdihsang wia pwe en alialehte sapwellimen Siohwa mahk kalahngan?

¹² Dahme Kristian men anahne uhdihsang wia pwe en alialehte sapwellimen Siohwa mahk kalahngan? E anahne mwadang uhdihsang wia pil soahng kan me e perenki wia ma soahng pwukat kak kahrehiong ih en wiahda dihp ehu. (Mad. 18:8, 9) Karasepe, ma kompoakepahmw kan kangoange iuk en wia soahng kan me kin kansensuwedihala Siohwa, ia duwe, ke pahn uhdihsang werekiong irail? Ma ke apwalki kaunda uwen laud en omw pahn nim sakau en wai, ke pahn soikala irair kan me kakete kasonge iuk en nim daulihala? Ma ke apwalki kaunda omw ineng en wia tiahk samin me pid wia nsenen pwopwoud, ke pahn soikala kilang kasdo kan, website kan, de wiewia kan me kak kahrehiong uhk en ahneki madamadau samin? Tamataman me omw wiahda tounmetei koaros pwehn peikiong sapwellimen Siohwa kosonned kan kin uhdahn kesempwal. Sohte pepehm ehu me suwed sang omw pahn kehn me Siohwa ketin likidmelieiukala. Oh sohte pepehm ehu me mwahusang omw pahn kehn sapwellimen Siohwa “limpoak poatopoat.”​—Ais. 54:7, 8.

13. Menlau kawehwehda dahme kahrehda aramas me tango kak pehm me e poadoandoarla, oh ahneki nsenamwahu nan kahnimw en rukulao.

¹³ Ni aramas me tango eh mihmihier nan kahnimw en rukulao, e solahr anahne perki mehkot. Siohwa ketin mahsanihki kahnimw pwukat: “Mehmen me pahn depweila oh kemehla emen aramas en kak kohla wasao pwehn rukusang aramas me men ikih.” (Sos. 20:2, 3) Siohwa sohte ketin kupwurki aramaso en pwurehng ale kadeikpen sapwung me e wiahdao. Pil ehu, me pwukoahki ikih sohte mweimweiong en pedolong nan kahnimwo pwe en kemehla aramaso. Ni aramas me tango eh mi nan kahnimwo, e kin ale mehn perepe sang rehn Siohwa. E sohte mi nan imweteng ehu. E kak doadoahk, sewese meteikan, oh papah Siohwa ni popohl. Ei, e kak ahneki mour nsenamwahu!

14. Dahme Kristian men me koluhla kak kamehlele?

¹⁴ Ekei sapwellimen Koht aramas akan me wiahda dihp laud kin ahnekihte pepehm en nsensuwedkihla dihp me re wiahdao pil mwurin arail koluhla. Ekei pil pehm me Siohwa sohte pahn uhdahn ketin meliehla dahme re wiahdao. Ma ke ahneki soangen pepehm wet, menlau kamehlele me ni Siohwa eh kin ketin mahkohng uhk, e kin ketin wia met ni unsek. Ke sohla anahne suwedkihte sapwung me ke wiahdao. Ih met me wiawihong Daniel me kitail koasoia mwoweo. Mwurin elder ko ar kapwungala ih oh sewese ih en pwurehng ahneki nsenmwakelekel, e uhdahn sohla pwunod. E nda: “I solahr toutouki dihp me I wiahdao. Ni dihpo eh sohralahr, e uhdahn sohralahr. Nin duwen me Siohwa ketin mahsanih, e kin ketikihsang oh ketin  kadohwaneweisang uhk omw mehn katoutou kan. Ke solahr pahn pwurehng kilang.” Mwurin aramas me tango eh mihier nan kahnimw en rukulao, e sohte anahne perki me aramas me pwukoahki ikih pahn kohla oh kemehla ih. Pil duwehte, mwurin Siohwa eh ketin mahkohngehr dipatailo, kitail sohla anahne perki me e pahn ketin kapwurehda oh kalokehkin kitail.​—Wadek Melkahka 103:8-12.

15, 16. Ia duwen omw likih sapwellimen Koht mahk kalahngan eh kin kehlailla ni omw ese me Sises ketin pwainlahr pweinen pweipwei sapahlo oh me e wia atail Samworo Lapalap?

¹⁵ Ni mehlel, kitail ahneki kahrepe ehu me pil laudsang ahn mehn Israel ko en likih sapwellimen Siohwa mahk kalahngan. Mwurin Pohl eh nda me e wia aramas “paisuwed” men pwehki e sohte kak peikiong Siohwa ni unsek, e nda: “Kalahngan ong Koht, . . . rehn atail Kaun Sises Krais!” (Rom 7:25) Ia wehwehn eh nda met? Mendahki Pohl kin pelipelian ineng sapwung kan oh dipadahr mahso, e kolulahr. Eri e likih me Siohwa ketin mahkohngehr ih pwehki meirong en pweinen pweipwei sapahl me Sises wiahdao. Pwehki Sises ketikihda pweinen pweipwei sapahlo, kitail kak ahneki nsenmwakelekel oh meleilei nan loalatail. (Ipru 9:13, 14) Nin duwen atail samworo lapalap, Sises “ketin kak met, oh ahnsou koaros, komourala irail kan me kin patohdo rehn Koht ni mware, pwehki eh ketin ieias kohkohlahte pwe en kin louloukin irail rehn Koht.” (Ipru 7:24, 25) Mahso, samworo lapalap kin sewese mehn Israel kan en kamehlele me Siohwa pahn ketin mahkohng diparail kan. Ni Sises eh ketin wia atail Samworo Lapalap, mie kahrepe laud me kitail en kamehlele me “iei wasao me kitail pahn ale kalahngan ie, mehn sewesei kitail ni ahnsoun atail anahn laud kan.”​—Ipru 4:15, 16.

¹⁶ Eri pwehn wiahki Siohwa atail wasahn ruk, kitail anahne pwoson sapwellimen Sises meirongo. Dehr medewe me pweinen pweipwei sapahlo kin kadoadoahk ongete aramas teikan. Ken pwoson me pein kowe kin paiekihda pweinen pweipwei sapahlo. (Kal. 2:20, 21) Ken pwoson me pwehki pweinen pweipwei sapahlo, Siohwa kin ketin mahkohng omw dihp kan. Ken pil pwoson me pweinen pweipwei sapahlo kin kihong uhk koapworopwor en mour kohkohlahte. Meirong en Sises iei sapwellimen Siohwa kisakis ong uhk!

17. Dahme kahrehda ke men wiahki Siohwa omw wasahn ruk?

¹⁷ Kahnimw en rukula kan kin sewese kitail en wehwehki sapwellimen Siohwa mahk kalahngan. Koasoandi wet sang rehn Koht kin padahkihong kitail me mour wia mehkot sarawi. E pil kasalehiong kitail ia duwen elder kan ar kak sewese kitail, ia wehwehn en uhdahn koluhla, oh dahme kahrehda kitail kak uhdahn likih sapwellimen Siohwa mahk. Ia duwe, ke kin wiahki Siohwa omw wasahn ruk? Sohte ehu wasahn ruk me mwahusang met! (Mel. 91:1, 2) Nan iren onop en mwuhr, kitail pahn kilang ia duwen kahnimw en rukula kan ar kak sewese kitail en alasang Siohwa, me ketin wia mehn kahlemeng me keieu mwahu duwen pwung pahrek oh mahk kalahngan.