OHL lemei kei uhwongada Stipen. Nin duwen Tohn Mwoalen Kopwung Lapalap nan Israel, sounkopwung 71 pwukat wia ohl me keieu ahneki manaman nan wehio. Samworo Lapalapo Kaiapas, me wia kaunen mwoalen kopwung wet sounpwong kei mwoweo ni ahnsou me Sises ketin kamakamala, me kihpene ohl pwukat. (Mad. 26:57, 59; Wiewia 6:8-12) Ni arail wahdo emenemen sounkadehde likamw kan, re tehkada mehkot me kapwuriamwei duwen Stipen​—“meseo likamwete mesen tohnleng men.”​—Wiewia 6:13-15.

Ia duwen Stipen eh kak kolokolete eh meleilei nan soangen irair kamasepwehko? Mwohn arail wurahdekihla ih mwohn Tohn Mwoalen Kopwung Lapalapo, Stipen kin ngoangki wia doadoahk en kalohk oh kin ale sawas laud sang sapwellimen Koht manaman. (Wiewia 6:3-7) Ni ahnsou me kopwungo wiawi, manamanohte kin sewesewese ih, nin duwen sounkansenamwahu oh sounkataman men. (Sohn 14:16, ntp.) Ni Stipen eh eimah uhki pein ih, nin duwen me kileldi nan Wiewia irelaud 7, sapwellimen Koht manaman sewese ih en tamanda ire 20 de tohtohsang nan Palien Paipel ni Lokaiahn Ipru. (Sohn 14:26) Ahpw ahn Stipen pwoson uhdahn kehlailla ni eh kilangada kaudiahl ehu duwen Sises eh patopato ni palimaun en Koht.​—Wiewia 7:54-56, 59, 60.

Ehu rahn kitail kakete lelohng kalokolok kan oh aramas kamasak kitail. (Sohn 15:20) Kitail kin mweidohng sapwellimen Siohwa manaman en doadoahk rehtail sang ni atail kin kaukaule wadek Mahsen en Koht oh pwerisek nan doadoahk en kalohk. Kitail pil pahn diarada kehl en pelianda uhwong kan oh ni ahnsowohte kolokol madamadau nsenamwahu.​—1 Pit. 4:12-14.