Rongamwahu en Luk koasoia me Sises ketin kihpeseng doaropwe limilim en Aiseia, wadek sang loale, oh pwurehng kapwurepene. Ni imwin rongamwahu en Sohn, Sohn pil koasoia duwen doaropwe limilim, e koasoia me e sohte kak kapatahiong nan nah doaropweo manaman koaros me Sises ketin wiahdahr.​—Luk 4:16-20; Sohn 20:30; 21:25.

Ia duwen doaropwe limilim kan ar wiawihda? E kohsang ni soahng kan me duwehte kilin mahn, kilin sihpw de kuht, de ahlek oh kapasepene pwehn wiahla tehn doaropwe me reirei ahtikitik me kak limilimpene. Met kak pidpene kisin lepin tuhke ehu oh nting kan mi mas loalen doaropwe limilimo. Pwuloi en nting kan kin kohdi ni mwotomwot en doaropweo ahpw irekla uwen tehlap en limilim en doaropweo. Ma doaropweo reirei, e kin mie tuhke riau ni imwin doaropweo, pwe sounwadawad kan en kak kol apali oh kihpeseng nting ko oh kol apali pwurehng limpene, lao re diar wasa me re raparapahki.

The Anchor Bible Dictionary koasoia: “Ehu kamwahupen pwuhk limilim iei e kak [kalapw reireiki piht 33 (10 m)] deukada pwuhk ehu pwon, ahpw ni ahnsou me e limilimpene e sohte nohn mosul. Karasepe, re kapatahda me mwein Rongamwahu en Luk anahne ehu limilim en doaropwe kan me pahn reireiki piht 31 (9.5 m). Ekei pak, koadoken oh ni keilen doaropwe ko kin lopla pwehn inen, kamedendelkihla ehu takai, oh kaduh nan ehu poh.

Sangete tepidahn koasoandi en samworo nan Israel, ohl emente me kin wia pwukoahn samworo lapalap, me idihda en wia pwukoa wet erein eh mour. (Nempe 35:25) Aaron me tepin ahneki soangen pwukoa wet. Kedekedeo, pwukoa wet uhd kin kohieng mesenih kan sang arail pahpa me wia pwukoa wet. (Eksodus 29:9) Ohl tohto sang nan kadaudok en Aaron me papah nin duwen samworo kei, ahpw me malaulaute me papah nin duwen samworo lapalap.

Ahnsou me mehn Israel kan mihla pahn wehin liki kan, kaunen liki pwukat me kaidehn mehn Israel kin ni nsenarail idihada oh kihsang samworo lapalap en mehn Suhs men. Ahpw, e mwomwen me kapw kan me kin pilipilda kin kalapw kohsang ni keinek en peneinei kan me pilipilda ong pwukoa wet, pali laud en ahnsou kin kohsang kadaudok en Aaron. Lepin lokaia “samworo lapalap akan” kin wehwehkiong irail me pahn tepin ale pwukoa kan en samworo. Samworo lapalap akan ele pahn kohsang kisehn peneinei en irail akan me wia kaunen pwihn en peneinei 24; towe lapalap akan en peneinei en samworo kan; oh samworo lapalap emen me aramas akan kihsang eh pwukoa, duwehte Anas.​—1 Kronikel 24:1-19; Madiu 2:4; Mark 8:31; Wiewia 4:6.