Ma ke mihmi nan kahpwal ehu, ke pahn kin uhdahn kasik me kompoakepahmw mwahu men pahn wia mehkot pwehn seweseiuk. Pwehki met, ekei kin nda me Koht kaidehn kompoakepah men pwehki re pehm me Koht sohte kin ketin wia mehkot pwehn sewese irail. Ahpw ni mehlel, Koht sohte ihte ketin wiadahr soahng tohto pwehn wia kamwahupatail ahpw e pil pahn ketin wia mehkot duwen kahpwal oh lokolok koaros me kin wiawihong kitail rahnpwukat. Dahme Koht pahn ketin wia?

Koht pahn ketin kauhdi soahng suwed koaros sang ni eh pahn ketin kasohrehla kahrepen soahng pwukat. Paipel kasalehda dahme kin kahrehda soahng pwukat ni eh mahsanih: “Sampah pwon mi pahn manaman en me suwedo.” (1 Sohn 5:19) “Me suwedo” iei ih me Sises ketin kahdaneki “kaunen sampah wet,” Sehdan me Tepil. (Sohn 12:31) Sehdan eh kin kamwakid aramas akan en sampah iei kahrepen irair suwed kan en sampah. Dahme Koht pahn ketin wia?

Kereniong Siohwa Koht pahn ketin doadoahngki sapwellime Ohlo, Sises Krais, pwehn “kasohrehla meno me kak kahrehda mehla, me iei Tepil.” (Ipru 2:14; 1 Sohn 3:8) Ni mehlel, Paipel kasalehda me pein Tepilo ese me “eh ahnsou mwotomwotalahr” mwohn eh pahn kasohrala. (Kaudiahl 12:12) Koht pahn pil ketin kasohrehla koaros me kin kahrehda soahng suwed kan.​—Melkahka 37:9; Lepin Padahk 2:22.

Mwurin Sounkapikpatailo pahn ketin kasohrehsang nin sampah me suwed koaros, e pahn ketin wia dahme anahn pwehn kapwaiada kupwureo sang nin tapio me pid aramas akan oh sampah. Dahme kitail kak kasikasik?

Popohl oh sohte perki mehkot kohkohlahte. “Me aktikitik kan pahn sapwenikihla sahpwo oh re pahn paiamwahu oh popohl.”​—Melkahka 37:11.

Mwenge tohto me mwahu. “Reken wahn pilawa en kin wiewiawihte nan wehiet; wahnsahpw en kin kipehdi dohl akan.”​—Melkahka 72:16.

Ihmw oh doadoahk kansenamwahu. “Aramas akan pahn kauwada imwarail kan oh kousoanla loale . . . Re pahn wiahda ar mwetuwel en wain oh pahn kin nsenamwahuki wahn wain kan . . .  Re pahn nsenamwahuki mehlel dipwisou kan me re koadoahkihada.”​—Aiseia 65:21, 22.

Ke men kilang soangen irair pwukat? Kereniong kitail pahn kilang soahng pwukat ar pahn wiawi rahn koaros.

Rahnpwukat, aramas koaros kin soumwahu oh mehla, ahpw e sohla pahn wiawi. Kereniong Koht pahn ketin doadoahngki kamwahupen sapwellimen Sises meirong en pweipwei sapahlo pwe “mehmen me kin kasalehda eh pwoson ih en dehr mwomwla ahpw en ahneki mour soutuk.” (Sohn 3:16) Ia pahn imwilahn met?

Soumwahu pahn kasohrala. “Sohte emen me kin kousoan nan sahpwo pahn kaulimkihla eh soumwahu, oh koaruhsie pahn ale lapwepen diparail kan koaros.”​—Aiseia 33:24.

Mehla solahr pahn wiahiong aramas akan. “KAUN-O, wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros.”​—Aiseia 25:8.

Aramas akan pahn mour kohkohlahte. “Sapwellimen Koht kisakis sapan, iei mour soutuk rehn Krais Sises atail Kaun.”​—Rom 6:23.

Irail me melahr akan pahn pwurehng mourda. “I koapworopworki Koht, duwen me pein ohl pwukat kin koapworopworki, me aramas koaros, me mwahu oh suwed, pahn iasada sang mehla.” (Wiewia 24:15) Irail pahn paiekihda sapwellimen Koht kisakis en pweinen pweipwei sapahlo.

 Ia duwen Koht eh pahn ketin kapwaiada mepwukat koaros?

Koht pahn ketin kapwaiada kupwureo ong aramas akan oh sampah sang ni eh ketin doadoahngki koperment en nanleng, me Krais Sises idihdidahr pwehn ketin wie kakaun. (Melkahka 110:1, 2) Iei ih koperment de wehi wet me Sises ketin padahkihong sapwellime tohnpadahk ko ren kapakapki ni mahsen pwukat: “Samat me ketiket nanleng, . . . Sapwellimomwi Wehi en ketido.”​—Madiu 6:9, 10.

Wehin Koht pahn kaunda sampah oh kasohrehla soahng suwed oh lokolok koaros. Wehi wet iei koperment keieu mwahu me aramas akan kak mi pah! Ihme kahrehda Sises ketin doadoahk laud pwehn kalohki “rongamwahu en Wehio” erein eh ketin kalokalohk pohn sampah oh e ketin padahkihong sapwellime tohnpadahk ko ren pil wia duwehte.​—Madiu 4:23; 24:14.

Pwehki eh ketin poakohng laud aramas akan me e ketin kapikada, Siohwa Koht ketin inoukihda me e pahn ketin wia soahng kaselel pwukat koaros ong irail. Met sou kahrehiong uhk ken men esehla ih oh karanihala? Ma ke pilada wia met, eri ia duwen omw pahn kak paiekihda? Oaralap en mwurin met pahn kawehwehda ia duwen.