Uwen laud en atail kin sukuhlki irair en aramas emen iei uwen laud en atail kin esehla ih, oh atail kin kompoakepahnkihla ih pil kak lalaudla. Duwehte, uwen laud en atail kin esehla sapwellimen Siohwa irair kan, ih uwen atail pahn esehla soangen Koht dahmen ih, oh atail kompoakepahnkihla ih kak lalaudla. Nanpwungen sapwellimen Koht irair kaselel kan koaros, meh pahieu me keieu kesempwal: sapwellime kehl, erpit, pwung pahrek, oh limpoak.

“Maing KAUN, Wasa Lapalahpie, komw me ketin wiahda sampah oh lahng sang ni sapwellimomwi roson oh manaman lapalap.”​—SEREMAIA 32:17.

Kitail kak kilang mehn kadehdepen kehl me Koht sapwellimanki nan kapikipik kan. Karasepe, ni omw kesikesihnen likin ihmw ni rahn kaselel ehu, dahme ke kin pehm pohn kilimwen? Karakar en ketipino. Ni mehlel, ke pepehm dahme kohsang kehl me Siohwa ketin doadoahngki pwehn kapikada soahng kan. Ia uwen kehl en ketipino? Nan werengen ketipino, uwen karakar mi mpen degree 27,000,000 Fahrenheit (15,000,000°C). Nan seken koaros, ketipino kin kihda kehl me pahrekiong pospeseng en uwen tohtohn nuclear pwom sapw kei.

Ahpw atail ketipin me tikitik kapahrekihong usu lik lik kei (trillions) me mi nanleng me aramas sohte kak wadekedi. Saintis kan kasawihada me ehu nanpwungen usu me keieu laud kan, me adaneki UY Scuti tehlapki mpen diameter 1,700 laudsang ketpino. UY Scuti uhdahn lapala, eri ma ke pahn kihdiong nan werengen wasa me ketipino kin mi ie, sampah pahn mi loale oh pil piripir en Jupiter pahn pil mi loalen UY Scuti. Mwein met kak sewese kitail en kak wehwehkihla laud dahme Seremaia koasoia me Siohwa Koht ketin kapikada  audepen lahng oh sampah sang ni sapwellime kehl lapalap.

Ia duwen atail kin paiekihda kehl me Koht sapwellimanki? Atail mour kin anahne sapwellimen Koht kepikipik kan, me duwehte ketipin oh soahng mwahu kan koaros nin sampah. Patehng met, Koht ketin doadoahngki sapwellime kehl pwehn wia kamwahu ong emenemen kitail. Ia duwen? Ni ahnsou me Sises ketiket nin sampah, Koht ketikihong ih manaman pwehn wiahda manaman kapwuriamwei kan. Kitail wadek: “Met me maskun kan kilangadahr wasa, me dangepel kan alialu mwahu, me tokutok kan mwakelekeldahr, me salengepon kan rongadahr wasa, me melahr akan mourdahr.” (Madiu 11:5) A ia duwen rahnwet? Paipel mahsanih: “E kin ketin kakehlahda me luwet oh me pwangadahr kan.” Oh e pil doula mahsanih: “Irail kan me kin koapworopworki KAUN-O, pahn onehda sapahl ar kehl.” (Aiseia 40:29, 31) Koht kak ketikihda “kehl me laudsang dahme aramas ahneki” pwehn sewese kitail en dadaurete pahn kahpwal akan nan atail mour. (2 Korint 4:7) Ke sou pwungki me kitail men ahneki nanpwungmwahu rehn Koht emen me uhdahn poakohng kitail kahrehda e ketin doadoahngki sapwellime kehl lapalap pwehn ketin sewese kitail nan atail kahpwal kan?

“Maing KAUN, ia uwen tohtohn wiepen nin limomwi kan! Ia uwen omwi kupwurokong ni omwi ketin wiairailda!”​—MELKAHKA 104:24.

Uwen laud en atail sukuhlki duwen soahng kan me Koht ketin wiahda, ih uwen laud en atail pahn pwuriamweikihla sapwellime erpit. Ni mehlel, ekei saintis kin sukuhlki sapwellimen Siohwa kepikipik kan oh alasang mwomwen kepikipik kan pwe ren kamwahwihala soahng kan me irail men pein wiahda. Eri re alasang mwomwen kepikipik pwukat pwe ren wiakihda mehn kateng pil lella sounpihr kan.

Karasaras me keieu kapwuriamwei en sapwellimen Koht erpit iei paliweren aramas. Nna song medewehla mwomwen seri men eh kin kekeirda nan kapehden nohno men. Met kin tepida sang ni dahme kohsang rehn ohlo eh pahn patehng kutohr en liho oh wiahla cell ehu. Cell wet kolokol koasoandi kan koaros me anahn pwehn wiahda serio. Mwuri e pahn nehnepeseng wiahda cell tohto me duwepenehte. E pahn lao lel ni ahnsou ieu me mwomwen cell ko pahn tepida wekila, wiawihda ni mwomwen soangsoangen mwomwen cell epwiki kei, me duwehte cell en nta, cell en nan sahl kan, oh cell en tih kan. Mwurinte, koasoandi en wiawiahdahn kepwehn nan paliwar pwarada oh tepida doadoahk. Nan erein sounpwong duwaute, tepin cello wialahr kisin paliwar ehu me wiawihkihda cell lik lik kei. Erpit me mi nan soangen koasoandi wet kin kahrehiong me tohto en pwungki sounnting en Paipelo me koasoia: “I kin patohwan kapingahkin komwi . . . wiepen nin limomwi kan me kapwuriamwei oh inenen mwahu mehlel.”​—Melkahka 139:14.

Ia duwen atail kin paiekihda sapwellimen Koht erpit? Sounkapikadao ketin mwahngih dahme kitail anahne pwe kitail en nsenamwahu. Pwehki eh ketin sapwellimanki kupwurokong oh wehwe laud, e kak ketikihong kitail kaweid erpit kan nan sapwellime Mahsen, Paipel. Karasepe, Paipel kangoangehkin kitail: “Kumwail pousehlahte . . . mahkpene douluhl.” (Kolose 3:13) Kaweid erpit ieu met? Ei. Toahkte kan diaradahr me en kin mahk kak kamwahwihala en emen meir oh katikala eh soumwahu en nta. E pil kakete katikala keperpen mwoarosala (depression) oh soumwahu teikan. Koht duwehte kompoakepah erpit oh nsenoh men me sohte mwahn kin ketin uhdihsang ketikihong kitail kaweid me kitail kin paiekihda. (2 Timoty 3:16, 17) Ke sou pahn men kompoakepahnki soangen kompoakepah menet?

“KAUN-O kin kupwurperenki dahme pwung.”​—MELKAHKA 37:28.

Koht kin ketin ahnsou koaros wia dahme pwung. Ni mehlel, “Koht Wasa Lapalahpie sohte kin ketin wia me suwed; e sohte kin ketin kupwur sapahrek ong emen.” (Sohp 34:12) Sapwellime kadeik kan me pwung, duwehte dahme sounmelkahkao koasoia ni eh patohwan me Siohwa “kin ketin kapwungkihla pwung mehlel aramas akan.” (Melkahka 67:4) Pwehki Siohwa kin ketin “kasawih nan mohngiong en aramas akan,” aramas sohte kak pitiheki arail tiahk en mwalaun kan, pwe e kin kak ketin mwahngih dahme mehlel oh kin ketin wia kadeik ni pwung ahnsou koaros. (1 Samuel 16:7) Patehng met, Koht kin ketin mwahngih wiewia sapahrek oh suwed koaros nan sampah, oh e ketin inoukihda me kereniong e pahn “ketin koahkoahsang aramas suwed kan nan sahpwo.”​—Lepin Padahk 2:22.

Ahpw, Koht kaidehn sounkopwung lemei men me kin ketin kupwurki ketikihong aramas akan kalokolok. E kin ketin kasalehda mahk kalahngan ni ahnsou me konehng. Paipel mahsanih: “KAUN-O me kalahngan oh limpoak,” pil ong aramas suwed kan ma re koluhla mehlel. Met sou pwung pahrek mehlel?​—Melkahka 103:8; 2 Piter 3:9.

Ia duwen atail paiekihda sapwellimen Koht pwung pahrek? Wahnpoaron Piter koasoia: “Koht sohte kin ketin lipilipilki aramas, ahpw nan wehi koaros, e kin ketin kupwurperenki aramas emen me kin lemmwiki ih oh wia dahme pwung.” (Wiewia 10:34, 35) Kitail kin paiekihda sapwellimen Koht pwung pahrek pwehki e sohte mwahn kin ketin lipilipilki aramas de ketin kupwurperenki ekei laudsang meteikan. E kak ketin kupwurkin kitail oh kitail kak wiahla sapwellime tohnkaudok kan sohte lipilipil mehnia keinek de wehi me kitail kohsang ie, de soangen sukuhl dah me kitail ale, de ma kitail lapalap de soh.

Pwehki Koht ketin kupwurki kitail en wehwehki oh paiekihda sapwellime pwung pahrek, e ketikihong kitail kadeikpen loalatail. Paipel kawehwehda me kadeikpen loalatail duwehte kosonned ehu ‘me ntingdier nan mohngiongitail,’ me kin “kadehdehda” ma atail wiewia kan kin pwung de sapwung. (Rom 2:15) Ia duwen atail  kin paiekihda? Ma e kaiahnda mwahu, kadeikpen loalatail kak kamwakid kitail en sohpeisang wiewia kan me keper oh sohte pahrek. Oh ma kitail wiahda sapwung, e kak kamwakid kitail en koluhla oh kapwungala atail wiewia kan. Ni mehlel, atail wehwehki sapwellimen Koht pwung pahrek kin sewese kitail oh kakerenihala kitail reh!

“Koht iei limpoak.”​—1 SOHN 4:8.

Koht kin ketin kasalehda kehl, erpit, oh pwung pahrek, ahpw Paipel sohte mahsanih me Koht iei kehl, erpit, de pwung pahrek. E mahsanih me Koht iei limpoak. Dahme kahrehda? Pwehki e pwung en nda me sapwellimen Koht kehl kak kahrehiong ih en wia mehkot oh sapwellime pwung pahrek oh erpit kin kaweid mwomwen eh ketin wia mehkot. Ahpw sapwellimen Siohwa limpoak kin kamwakid ih en wia mehkot. Limpoak kin kamwakid mehkoaros me e kin ketin wia.

Mehnda ma Siohwa sohte ketin anahne mehkot, sapwellime limpoak kamwakid ih en ketin kapikada tohnleng kan nanleng oh aramas akan sampah, me kak paiekihda sapwellime limpoak oh nsenoh. Ni soh roporop, e ketin kaunopada sampah pwehn wia wasahn kousoan mwahu ong sapwellime aramas akan. Oh e ketin pousehlahte kasalehda limpoak ong aramas koaros ni eh “kin ketin dakerki sapwellime ketipin pohn me suwed oh me mwahu kan oh kin ketin kamwerehdi keteu pohn me pwung oh pil me sapwung kan.”​—Madiu 5:45.

Patehng met, “Siohwa me diren limpoak oh kadek kalahngan.” (Seims 5:11) E ketin kasalehiong limpoak irail kan me kin ni mehlel wia kahk kan pwe ren esehla oh karanihala ih. Koht kin ketin tetehk emenemen irail. Ni mehlel, e “kin ketin nsenohkin kumwail.”​—1 Piter 5:7.

Ia duwen atail kin paiekihda sapwellimen Koht limpoak? Kitail kin perenki lingan en kihrlahn ketipin. Kitail uhdahn kin perenki rong ngilen kouruhr en kisin seri men. Kitail kin kesempwalki limpoak en kisehn atail peneinei keren men. Ele kitail kak wie momour mehnda ma mepwukat sohte mie, ahpw mepwukat kak kahrehiong atail mour en uhdahn nsenamwahu.

Kitail kin paiekihda pil ehu soangen kasalepen sapwellimen Koht limpoak: kapakap. Paipel kangoange kitail: “Kumwail dehr kin pwunodki mehkot, ahpw ni mehkoaros, kumwail en peki rehn Koht sawas ni kapakap oh kapakap ni ngidingid iangahki kalahngan.” Duwehte pahpa limpoak men, e ketin kupwurki kitail en sohpeilahng ih pwehn peki sawas ong atail pwunod kan. Eri, sang ni sapwellime limpoak me soh roporop, Siohwa ketin inoukihda me e pahn ketikihda ‘sapwellime popohl me inenen siksang madamadau en aramas koaros.’​—Pilipai 4:6, 7.

Ia duwe, atail koasoiapene ni mwotomwot sapwellimen Koht irair kan me duwehte kehl, erpit, pwung pahrek oh limpoak, seweseiuk ken wehwehkihla mwahu soangen Koht dahmen ih? Pwehn kalaudehla omw wehwehkihla mwahu duwen Koht, se lukeiuk ken sukuhlki dahme e ketin wiadahr oh dahme e pahn ketin wia ong kamwahupomw.