Me Mehlel Duwen Ahnsou Kohkohdo
Mie pak ke kin medewe dahme pahn wiawi ni ahnsou kohkohdo? Paipel kin kasalehda duwen soahng kesempwal kan me pahn kereniong wiawi oh pahn kamwakid aramas koaros nin sampah.
Sises ketin kawehwehda ia duwen atail pahn “ese me Wehin Koht kerendohr.” (Luk 21:31) E ketin kohpadahr me nanpwungen soahng koaros, pahn mie mahwen laud kan, rerrer en sapw laud kan, lehk lapalap, oh soumwahu lusulus—soahng kan me kitail kin kilang rahnpwukat.—Luk 21:10-17.
Paipel pil doula kasalehda me “ni imwin rahn akan” ong kaundahn aramas pahn sansaldahsang mwomwen mwekid en aramas de, mwekid suwed en aramas akan. Ke kak wadek duwen met nan 2 Timoty 3:1-5. Ni omw kin kilang soangen mwekid de wiewia pwukat, ele ke pahn pwungki me kokohp en Paipel wet pahrekiongete dahme kin wiawi ahnsou wet.
Ia wehwehn met? Ahnsowo kerendohr me Wehin Koht pahn ketin wiahda wekidekla laud kan me pahn uhdahn kamwahwihala mour nin sampah. (Luk 21:36) Nan Paipel, Koht ketin inoukihda soahng mwahu kan ong sampah oh ong aramas me kousoan loale. Iet ekei karasepe.
KAUN MWAHU
“E [Sises] ahpw ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih. Sapwellime manaman en kaunda wasa pahn poatopoat, oh sapwellime wehi sohte pahn imwisekla.”—DANIEL 7:14.
Ia wehwehn met: Ke kak nsenamwahuki mour pahn kaundahn koperment me keieu mwahu me Koht ketin koasoanedier rehn sapwellime Ohl nin duwen Nanmwarki.
ROSON MWAHU
“Sohte emen me kin kousoan nan sahpwo pahn kaulimkihla eh soumwahu.”—AISEIA 33:24.
Ia wehwehn met: Ke solahr pahn soumwahuda de mwoatorala; ke pahn mour oh sohte pahn mehla.
POPOHL UNSEK
“E kin ketin katokehdi mahwen wasa koaros nin sampah.”—MELKAHKA 46:9.
Ia wehwehn met: E solahr pahn mie mahwen oh lokolok koaros me mahwen kin kahrehda.
SAMPAH PAHN DIREKIHLA ARAMAS MWAHU KAN
“Aramas suwed kan pahn sohrala . . . a me aktikitik kan pahn sapwenikihla sahpwo [“sampah,” NW].”—MELKAHKA 37:10, 11.
Ia wehwehn met: Aramas suwed kan solahr pahn mie, ihte aramas akan me men peikiong Koht.
SAMPAH PWON PAHN WIAHLA PARADAIS EHU
“Aramas akan pahn kauwada imwarail kan oh kousoanla loale. Re pahn wiahda ar mwetuwel en wain oh pahn kin nsenamwahuki wahn wain kan.”—AISEIA 65:21, 22.
Ia wehwehn met: Sampah unsek pahn wiahla wasa kaselel ehu. Koht pahn ketin kapwaiada atail kapakapo me kupwure en pweida “nin sampah.”—Madiu 6:10.
