Koht ketikihong aramas akan kisakis tohrohr ehu​—iei koahiek en koasoakoasoiong ih oh kasalehiong ih atail pepehm kan ni kapakap. Soukohp Depit kapakapki: “Pwehki omwi kin ketin sapeng pekipek kan. Aramas koaros pahn pwarewei rehmwi.” (Melkahka 65:2) Ahpw ia duwen atail kak kapakap pwe Koht en kak ketin karonge oh kapaia kitail?

Pein omw kapakap akan kin mweidohng uhk ken kasalehiong omw apwal kan koaros​—pwehn kasalehiong ih pein omw pepehm kan. (Melkahka 62:8) Wasa Lapalahpie kin ketin kupwurki kapakap kan me kin sang nan mohngiong.

Mendahki Koht sapwellimaniki lengileng tohto, mware mehte ieu. “[Siohwa] iei mware.” (Eksodus 15:3) * Mwaro Siohwa pwarada pak 7,000 samwa nan Paipel. Soukohp tohto kin ni wahu doadoahngki mwaren Kohto ni arail kin kapakap ong ih. Eipram me edeo mwuhr wekiong Eipraam likweriong Koht: “Maing [Siohwa], Wasa Lapalap.” (Senesis 15:2) * Kitail pil anahne doadoahngki mwaren Koht, Siohwa, ni ahnsou me kitail kin kapakap.

Koht ketin mwahngih atail madamadau oh pepehm kan sohte lipilipil ni lokaia dah me kitail kin lokaiahki. Sapwellime Mahsen kamehlelehiong kitail: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”​—Wiewia 10:34, 35.

Ahpw pwehn ale kupwuramwahu en Koht, kitail anahne en kin wia laudsang en kin kapakapte. Nan oaralap kan en mwurin met, kitail pahn tehk dahme kitail anahne wia.