Ei nohno sounpar 17 ni ahnsou me I ipwidi nan pahr 1960. Mwohn ei ipwidi, ei pahpao kohkohlahsang kiht. Ngehi oh ei nohno kin koukousoan rehn ei pahpa oh nohno kahlap nan Burg, kisin kahnimw ehu nan German Democratic Republic, de Palimese en Germany. Me tohto wasao kin kamehlele me sohte mie Koht, oh ei peneinei pil kin iang ahneki soangen madamadau wet. Sohte katepeieng kiht Koht.

Ni ei kekeirda, I kin perenki iang ei pahpa kahlapo wiaseli soahng kan. E kin kahreie en iang ih wia doadoahk tohto, me duwehte e kin kadaur ie pohn tuhke kan pwehn lupukedi rahn tuhke kan. Ni ahnsou me I tikitik I kin perenki soangen doadoahk pwukat. Ei mour uhdahn mengei oh nsenamwahu.

Ehu rahno ni ahnsou me I sounpar isuh mie mehkot me inenen suwed wiawihong ie. I ahpwtehn tepida pwihn keriau. Ni ei alialu kohla ni imwato, I douda pohn densi pasara ieu. Ni ahnsou me I doudahla lel piht 25 (8 m), lioalo leliehte ngehi lipwongmasala. Ahnsou me I pirida ni imwen winio, I sohte kak kehn pehi kat. Pehi ko rongala, oh uwen suwed en ohlao kahrehda pehi ko anahne lopsang pwe ei nta ko en dehr paikingda. Ahpw, ni ei tikitik, I sohte uhdahn wehwehki ia uwen ei mour eh pahn wekila pwehki pehi ko eh sohla.

Mwurin ei mihmi nan imwen wini, I pwurala sukuhl. Seri kan kin kapailoke ie, siken ie, oh katehkin ie soahng kan pwehki ei sohte kak pere pein ngehi. I kin medekla pwehki arail lokaia kamedek kan oh re kin mwamwahlikin ie. Kedekedeo, I keseula Birkenwerder wasahn sukuhl en irail seri me ahneki kahpwal en paliwar kin kousoan ie. Pwehki wasahn sukuhlo dohsang imwato, ei nohnou oh ei pahpa kahlap oh nohno kahlap sohte kak mwemweitdo rehi. I kin kilang irailte ahnsou me sukuhl kin kommoal. I sohte tikida rehn ei nohno oh pahpa oh nohno kahlap erein sounpar eisek.

I sukuhlki en wia soahng tohto doadoahngki nehi kat. Ke kak medewehla mwomwen omw pahn doadoahngki sendin nehmw kan oh kol pwohk de supwuhn pwehn mwenge? Kedekedeo I koahiekla doadoahngki nehi kat ong soahng kan. I pil sukuhlki en doadoahngki nehi kat ong piroas oh kohmwihda pitenmoangei kan. Ei, nehi kat wiahla pehi.

 Ni ei kekeirda I kin perenki wadek soai kan me pid duwen sains. Ekei pak I kin medewehla en ahneki soangen peh kan me pahn wiawihda, me pahn kahrehiong ie en wia soahng tohto. Ni ei sounpar 14, I tepida simoak. E kin kahrehiong ie en pehm me I koahiek oh duwehte meteikan. E duwehte ei ndinda: ‘Ei, I pil kak wia soangen. Aramas laud kan me kin simoak, mehnda ma sohte de mie pehrail.’

I kin kedirepwki wia soahng kan oh I kin iang pwihn kan. I iangala pwihnen Free German Youth, ehu pwihn me koperment kin utung ong me pwulopwul kan, oh I wia neirail sekteri, pwukoa laud ehu rehn towe kan. I pil iang pwihnen koul ehu, pil iang pwihn me kin kohpene koasoia duwen lepin kahs lingan kan, oh iang pwihnen mwadong kan en irail kan me ahneki kahpwal en paliwar. Mwurin ei sukuhlki doadoahk ehu, I tepida doadoahkohng kompani ehu nan at wasa. Ni ei kekeirda, I kin kalapw doadoahngki pehi kan me wiawihda, pwehki I men kisehn paliwerei pwon en mie.

Ehu rahno ni ei awiawih train me I kin iang kohla doadoahko, ohl emen keido limwahi. E idek rehi ma I kak medewehla me Koht kak ketin kapwurehiong pehi kan. I uhdahn pwonopwonkihda met. Mehlel me I men en pwurehng mie pehi kan, ahpw ong ngehi met mwomwen mehkot me uhdahn sohte kak wiawi! Ngehi emen me sohte kin kamehlele Koht. Sang ahnsowo kohla, I kin song en soikala ohlo.

Ahnsou kis mwurin mwo, emen iengei tohndoadoahk lih lukei ie en mwemweitla rehn eh peneinei. Erein at niminim koahpi, eh pahpa nohno tepida koasoia duwen Koht, Siohwa Koht. Ehdin ei rong me mie mwaren Koht. (Melkahka 83:18) Ahpw, loalei I kin sapwungki oh nda: ‘Sohte kak en mie Koht, mendahki ia mware. I pahn kasalehda me aramas pwukat sapwung.’ I likih dahme I kamehlele, eri I pwungki sen koasoiapene Paipel. Ahpw, I pwuriamweikihla ei sohte kak kadehdehda me sohte Koht.

I ekisekis wekidala ei madamadau duwen ma mie Koht ni at kasawih kokohp kan en Paipel. Tohto kokohp kan pweidahier, mendahki ar ntingdi sounpar epwiki de kid kei mwohn ar pweida. Ehu ahnsowo, erein at koasoakoasoia duwen Paipel, se kapahrekihpene wiewiahn sampah ahnsou wet ong kokohp kan me dierek nan Madiu irelaud 24, Luk irelaud 21, oh 2 Timoty irelaud 3. Duwehte soahng kei ar patpene wiawi eh kin sewese toahkte men en diarada soangen soumwahu dah me aramas ahneki, patpenehn soahng kan me kileldi nan kokohp pwukat sewese ie en kilang me kitail mihmi ni ahnsou me Paipel kahdaneki “imwin rahn akan.” * I uhdahn pwuriamweikihla. Kokohp pwukat wie pweipweida mwohn mesei kat.

I kamehlele me dahme I sukusukuhlki iei me mehlel. I tepida kapakapohng Siohwa Koht oh sohla simoak, mendahki ei kin perenki simoak daulih sounpar eisek samwa. I pousehla onopki Paipel erein sounpar ehu. Nan April 27, 1986, I papidaisla ni rir nan wasahn duhdu ehu (bathtub), pwehki ahnsowo Sounkadehde kan keinapwidi nan Palimese en Germany.

Pwehki keinapwidio, se kin tuhpene ni pwihn tikitik kei nan ihmw kan oh ekeite riei Kristian kan me I ese. Ni soh kasikpe, koperment mweidohng ie en seiloakla Palikapi en Germany, wasa me Sounkadehde kan sohte keinapwidi. Ehdin nan ei mour, me I kak iang towehda kapokon ong koasoia Paipel oh kilang riei Kristian kid kei. Met wia mehkot tohrohr ehu ong ngehi.

Mwurin kasohrlahn Dihd en Berlin, Sounkadehdehn Siohwa kan sohla keinapwidi. Eri ahnsowo se kakehr kaudokiong Siohwa Koht ni saledek. I men kalaudehla ei kin iang doadoahk en kalohk. Ahpw, I masak tuhwong aramas me I sehse. I kin pehm me I sohte mwahu duwehte ekei aramas pwehki kahpwal en paliwar me I ahneki oh pwehki pali laud en ei tikida I kin mihmi nan wasahn apwalih aramas me ahneki kahpwal en paliwar. Ahpw nan 1992, I song wiahda awa 60 nan doadoahk en kalohk nan sounpwong ehu. I pweida oh uhdahn perenki. Eri I pilada en wia met sounpwong koaros oh pousehla wia met erein sounpar siluh.

I kin tamataman mahsen pwukat nan Paipel: “Ni emen eh kin luwetala, I pil kin luwetkihla.” (2 Korint 11:29) Mendahki ei kahpwal en paliwar, mie ei madamadau oh ngilei. Eri I kin song uwen ei kak en sewese meteikan. Pwehki sohte pehi kan, I kak uhdahn wehwehki irail kan me arail irair kin ireirailsang soahng kei. I ese ia pepehm en uhdahn men iang wia mehkot me ke sohte kak wia. I kin song en kangoange irail kan me ahneki soangen pepehm wet. Kihkihwei ong meteikan ni soangen ahl wet kin kahrehiong ie en nsenamwahu.

Ahpw ni mehlel, ekei pak I pil kin ekis mwoarosala. I uhdahn men wia aramas emen me ahneki kisehn paliwar pwon. I kak pein wia soangen doadoahk tohto, ahpw met kin anahne ahnsou laud, nanti laud, oh kehl laudsang dahme uhdahn kin anahn. Lepin kahs me I kin doadoahngki rahn koaros iei: “I kakohng mehkoaros sang ni manamano me e kin ketikihong ie.” (Pilipai 4:13, NW) Ehuehu rahn, Siohwa kin ketikihong ie kehl me I anahne pwe I en kak kapwaiada soahng kan me anahn. I sukuhlki me Siohwa sohte ketin uhdihsang sewese ie. Ihme kahrehda I sohte men uhdihsang papah ih.

Siohwa ketin kapaia ie oh ketikihong ie peneinei ieu, mehkot me I sohte ahneki erein ei tikida. Mie ei pwoud kaselel men, Elke, me kin limpoak oh kin wehwehkin ie. Patehng met, Sounkadehdehn Siohwa rar kei wiahla riei Kristian kei, peneinei ehu sampah pwon.

I pil kin nsenamwahukihla sapwellimen Koht inou en Paradais, me e pahn ketin “onehda sapahl mehkoaros” iangahki pehi kan. (Kaudiahl 21:5) I kalaudehla ei wehwehki inou wet ni ei kin medemedewe dahme Sises ketin wia ni ahnsou me e ketiket sampah. E kin ketin wiahkintehieu kamwahwihala pehn oh nehn aramas akan oh pil ketin kapwurehiong salengen ohl emen me lopsang. (Madiu 12:13; Luk 22:50, 51) Sapwellimen Siohwa inou kan oh manaman kan me Sises ketin wiahda kamehlelehiong ie me ni ahnsou keren kisehn paliwerei pwon pahn pwurehng miehla.

Ahpw, kapai me keieu laud iei en esehla duwen Siohwa Koht. E wiahla semei oh kompoakepahi, sounkansenamwahwihehla oh sounkakehlepei. I ahneki pepemohte me Nanmwarki Depit ahneki, me ntingihada: “KAUN-O kin ketin sinsile . . . E kin ketin sewese ie oh kaparanih ie.” (Melkahka 28:7) Padahk mehlel wet me I men kolokolete erein ei mour. I kin kolokol met mendahki sohte pehi kan.