“Ngehi eri kilangada mwoahl ehu nanleng, oh mehmen me ketiket powe. Silangi lingaling duwehte kisin takai kesempwal me adaneki sasper oh karnelian; oh ahia ehu me pohe duwehte pohn takai kesempwal me adaneki emerald kapilpene mwoahlo.”​—Kaudiahl 4:2, 3.

“Eri, mwohmw wet wie lingalingdo duwehte lingaling en prons nan werengen kisiniei. Marain lingaling ehu ahpw kapilpene wasa koaros. Marain lingan me rasehng lingan en ahia me kin pwarada nin depwek en keteu kan.”​—Esekiel 1:27, 28.

Kasansal pwukat, me kohwong wahnpoaron Sohn oh soukohp Esekiel, kasalehda soahng kaselel kan duwen Koht Wasa Lapalahpie, Siohwa, soahng kan me kitail kak medewehla me duwehte takai kaselel kan, ahia, oh mwoahl kaselel ehu. Mepwukat kin padahkihong kitail me ieias en Siohwa me uhdahn kaselel, kansenamwahu, oh kin ketin meleilei.

Mehn kasansal pwukat me kawehwehda duwen Koht kin pahrekiong mahsen kan me sounmelkahkao ntingihedi: “KAUN-O me lapalap oh konehng ale kaping lapalahpie; kitail uhdahn pahn lemwiki laudsang koht teikan koaros. Koht en wehi teikan koaros, iei irail me dikedik en eni, a KAUN-O, iei ih me ketin kapikada nanleng kan. Lingan oh roson kin kapilpene; manaman oh lingan kin kadirehla Tehnpese.”​—Melkahka 96:4-6.

Mendahki Siohwa me Keieu Lapalap, e ketin luke kitail en kapakapohng ih oh ketin kamehlelehiong kitail me e kin ketin karonge kitail. (Melkahka 65:2) Koht uhdahn ketin poakohng oh nsenohkin kitail, kahrehda wahnpoaron Sohn kak ntingihedi ni mehlel: “Koht iei limpoak.”​—1 Sohn 4:8.

“Stipen ahpw direkihla [“sapwellimen Koht manaman”, NW] oh saradahng nanleng oh udiahl sapwellimen Koht lingan oh pil Sises me ketiket ni palimaun en Koht. E ahpw nda, ‘Kumwail kilang! I kilangehr nanleng eh ritidahr oh pil Nein-Aramas eh ketiket ni palimaun en Koht!’”​—Wiewia 7:55, 56.

Mwohnte Stipen eh kilangada kasansal wet, kaunen pelien lamalam en mehn Suhs kan me Stipen wie koasoakoasoiong, me koasoanehdi Sises en kamakamala. Kasansal wet kasalehda me Sises ketin momour oh me e ketin iasada oh waunla. Me pid duwen  met, wahnpoaron Pohl ntingihedi: “[Siohwa] ketin kaiasada [Sises] sang rehn me melahr akan oh ketikihdiong ni palimauni nanleng. Krais ketin kakaun sang nanleng oh ketket pohnangin kaun akan oh me lapalap akan oh me manaman akan oh soumas en nanleng koaros; sapwellime lengileng laud sang lengileng koaros nin sampah wet oh pil nan mwehi me pahn kohdo.”—Episos 1:20, 21.

Patehngete kawehwehpen sapwellime dehu lapalap wet, Paipel kasalehda me duwehte Siohwa, Sises uhdahn kin ketin nsenohki aramas akan. Erein sapwellime doadoahk en kalohk nin sampah, Sises ketin kamwahwihala me soumwahu kan oh me luwet akan, oh ketin kaiasada me melahr kan. Sang ni eh ketin pwoula, e ketin kasalehda uwen laud en eh ketin poakohng Koht oh aramas akan. (Episos 2:4, 5) Sises kin ketiket ni palimaun en Koht oh ni ahnsou keren e pahn ketin doadoahngki sapwellime pwuhng en kaunda oh wahdo kapai laud ong sapwellime aramas peik kan wasa koaros.

“Eri, nindokon ei [soukohp Daniel] kilikilang mepwukat, mwoahl ekei wie koasoakoasoansoan. Oh Mehmeno [Siohwa] me ahneki mour poatopoat ket nan ehu mwoahl pwukat. . . . Kiden aramas me wie papah, oh aramas ngedehrie me aririh.”​—Daniel 7:9, 10.

Nan kasansal wet nanleng, Daniel sohte kilangadahte emen tohnleng ahpw meh kid kid kei. Ia uwen met eh wia kasansal kapwuriamwei ehu! Tohnleng kan ngehn lingan kei, oh irail erpit oh manaman. Mie ireirekidi en tohnleng kan, duwehte ekei kin wia serap oh ekei kerup. Paipel kin koasoia duwen tohnleng kan tohtohsang pak 250.

Tohnleng kan kaidehn aramas ekei me kin wie momour nin sampah mahso. Koht ketin kapikada tohnleng kan mwohn aramas ar miehla. Ni ahnsou me sampah kepikipikda, tohnleng kan pato limwahn Koht pwehn uhdiahl oh ngisingiski ar peren.​—Sohp 38:4-7.

Ehu ahl me tohnleng lelepek kan kin papah Koht iei ar kin iang pidada doadoahk me keieu kesempwal me kin wiewiawi nin sampah rahnwet, iei kalohki rongamwahu en Wehin Koht. (Madiu 24:14) Wahnpoaron Sohn kilangada kasansal ehu me kasalehda tohnleng pwukat ar kin iang pidada nan doadoahk wet ni eh ntingihedi: “I ahpw pil kilangada pil emen tohnleng me pipihr nan wehwe, me weuwa  rongamwahu poatopoat ehu me e pahn lohkihong tohn sampah kan, wehi koaros, kadaudok koaros, lokaia koaros, oh sahpw koaros.” (Kaudiahl 14:6) Mendahki tohnleng kan sohte kin koasoiong aramas akan rahnwet duwehte me re kin wia ekei pak mahso, irail kin sewese kahluwa irail kan me kin kalohki rohng mwahu ong aramas mohngiong mehlel kan.

“Mahwen ahpw tepida nanleng. Maikel [Sises Krais] oh ienge tohnleng kan mahweniong drakono, oh drakono oh ienge kan mahweniong Maikel oh ienge ko. Drakono eri lohdi; eri, sohla dehu ehu mweimweiong ih oh ienge ko nanleng. Drakon kalaimwuno eri pisikensang nanleng. Eri, iei ih serpent en mahso, me adaneki Tepil de Sehdan, me kin pitipitih sampah pwon, oh me pisikendiongehr sampah iangahki ienge tohnleng kan koaros.”​—Kaudiahl 12:7-9.

Mie ahnsou ehu me nanleng sohte meleilei. Ni tepin poadopoad en aramas, emen tohnleng ko ahnekihda ineng en men koaros en kaudokiong ih. Ih eri uhwongada Siohwa oh wiahla Sehdan me wehwehki “Sounpelian.” Mwuhr ekei tohnleng kan iangala uhwong wet oh wiahla ngehn suwed kan. Pwehki ar uhdahn suwed, irail uhwongada Siohwa oh kahrehiong pali laud en aramas akan en uhwongada sapwellimen Siohwa kaweid limpoak kan.

Sehdan oh nah ngehn suwed kan uhdahn suwed oh lemei. Irail wia imwintihti en aramas akan oh kin kahrehda lokolok tohto nin sampah. Karasepe, Sehdan kemehla nein ohl lelepek Sohp mahn akan oh ladu kan. Ih eri kemehla nein Sohp seri ehk koaros ni eh doadoahngki “melimel ehu” pwehn kauwehla ihmw me re mi loale. Mwurin mwo, Sehdan kihong Sohp “kens suwed ehu wasa koaros ni paliwere.”​—Sohp 1:7-19; 2:7.

Ahpw, ni ahnsou keren, Sehdan pahn sohrala. Pwehki eh pisikendihdo nin sampah, e ese me “eh ahnsou mwotomwotalahr.” (Kaudiahl 12:12) Sehdan uhdahn pahn sohrala, oh met uhdahn rohng mwahu ehu!

“Komw [Sises] ketin kasapahlkidohng aramas akan rehn Koht, sang kadaudok koaros, oh lokaia koaros, wehi koaros, oh sahpw koaros. Komw ketin wiahkiniraillahr wehin samworo ehu, pwe re en papah at Koht; oh re pahn kakaun nin sampah.”​—Kaudiahl 5:9, 10.

Duwehte Sises eh ketin iasada sang nin sampah ong mour en nanleng, meteikan pil pahn iang wia  met. Sises ketin mahsanihong sapwellime wahnpoaron lelepek ko: “I pahn kohla oh kaunopadahng kumwail deumwail. . . . I ahpw pahn pwurodo oh kahreikumwaildohng ie, pwe kumwail en mi wasa me I kin mi ie.”​—Sohn 14:2, 3.

Mie kahrepen arail pahn kohla nanleng. Re pahn iang Sises wiahda Wehin koperment ehu me pahn kaunda tohnsampah koaros oh wahdo kapai kan ong irail. Ih Wehi wet me Sises ketin padahkihong sapwellime tohnpadahk kan ren kapakapki: “Samat me ketiket nanleng: Mwaromwi en sarawihla rehn aramas koaros, mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”​—Madiu 6:9, 10.

“I [wahnpoaron Sohn] ahpw pil rongada ngihl laud ehu sang nan mwoahlo, me mahsanih, ‘Iet tehnpas en Koht rehn aramas akan! . . . E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.’”​—Kaudiahl 21:3, 4.

Kasansal en kokohp wet kin pid duwen ahnsou me Wehin Koht, me wiawihkihda Sises oh irail kan me iasada sang nin sampah, pahn kasohrala ahn Sehdan kaunda oh kaparadaisihala sampah. Soahng kan me kin kahrehda medek laud oh nsensuwed ong aramas akan pahn sohrala. Mehla solahr pahn pil wiawi.

Ahpw, dahme pahn wiawihong irail me lik kei me melahr oh sohte pahn iang iasada nanleng? Ni ahnsou kohkohdo, irail pahn pwurehng ale mour oh ahneki koapworopwor en mour kohkohlahte nan Paradais nin sampah.​—Luk 23:43.